१ पत्रुस 3:18 - जिरेल

¹⁸ मिओनला पापदुकी डेलाला ख्रीष्‍ट पापकी सजाय भोगे खाईन थे खोरोङ ज्‍यान बिन्‍गीन स्‍या ओतान। दोक खाईन छ्याःङ गल्‍ती मेताते ख्रीष्‍ट परमेश्‍वरगी माकेत साबा साबा खित्‍कान्‍ते मिओन लाईदु स्‍या ओतान। थे थोक खाईन बाजिई मि गाङे लाईदु स्‍यिइन सिन्‍दा ओतेकी था लोक्‍ला नोमुङ दोक खिता माफाबो। थे थोक खाईन स्‍याप्‍की खित्‍सादु ख्‍योकोन परमेश्‍वर दोन्‍दु ड्वा थुपा ओत। मिओनगी थेला सेता ओतान। ईन्‍सीनोङ परमेश्‍वरगी थेला थे खोरोङ आत्‍मे छ्य्‌वापेकी सोम्‍बो लोक्‍पा ओत।

१ पत्रुस 3:18 Iomraidhean Croise

मत्ती 27:19

थेमे पिलातस अड्डादुराङ देता ओते बेलाला फेम्‍मेतेकी थेला “थे छ्याःङ गल्‍ती मेताते मिला छ्याःङ मेलेबा माकेत। च्‍यिला सासीन थे मिला सजाय बिन्‍सीन आउदी मेलेबा ओङगो सिन ङे दाङ ग्‍वाका मेलेबाज्‍यीक मिलाम थोङसुङ,” सिन लोन ताङसुङ।

मत्ती 27:24

थेकी जे खित्‍जीनोङ छ्याःङ सीप लै माक्‍यासुङ। बरू थेरू मिओनगी हूलदङ्गाका मच्‍चे खाओङ सिराच्‍योक गालेकी थेकी गाङे दोन्‍दु लाक्‍पा ठुत्‍कीन “लो ख्‍योकोन दि बात छ्या स्‍येबा खि, दि गल्‍तीराङ मेताते मिला सेताते ङेते छ्याःङ दोष मेत। दिला सेत च्‍युताते ख्‍योकोनगीराङ ईन,” सिन सासुङ।

यूहन्‍ना 16:10

थेकी थेबाला परमेश्‍वरगी चुक्‍ते मिला दोषी मेन सिते सिनोङ छ्या स्‍ये ज्‍युत्‍क्‍यो। च्‍यिला सासीन था ङा दुरूकी आबा ओत्‍साने डुइओ। थेमे ख्‍योकोनगी ङाला मोथोङो।

शक्ति काम 22:14

थेमे थेकी ङाला ‘ङुरूङ ज्‍युज्‍यु पुर्खेकी माने खाबाते परमेश्‍वरगी थे खोरोङगी च्‍यि च्‍यि खिन ओते सिन खुई छ्या स्‍येस्‍यीत थेमे थे खोरोङगी खि साबा साबा च्‍योककामा खित्‍कान्‍तेला ठेत्‍स्‍यीत थेमे खुई थेकी खोत्ताङ बात खाबाते थोबा ङेत्‍स्‍यीत सिन खोल्‍ला छाने खाबा ओत।

शक्ति काम 3:14

थे साटोला ज्‍यानमाराज्‍यीकलाका थोङ सिन साबा ओतान। थोक खाईन ख्‍योकोनगीनी सेमला पाप सिराते छ्याःङ मेताते खालि परमेश्‍वरगी खि साबा साबा च्‍योककामा खित्‍कान्‍ते येशूला दिङ सु ईन्‍देरो सिराच्‍योकका खासुङ।

रोमी 1:4

थेमे स्‍यिसादुकी सोम्‍बो लोक्‍पा ओतेकी थे पक्‍काराङ परमेश्‍वर फुज्‍युङ ईन, थेत्ताङ छ्येज्‍यीक शक्ति ओत सिन परमेश्‍वर आत्‍मेकी गाङेला छ्या स्‍ये च्‍युता ओत। ङुरूङगी प्रभु सिरच्‍येते येशू ख्रीष्‍ट होथेराङ ईन।

रोमी 4:25

ङुरूङगी पाप खाबेकी खित्‍सादु ङुरूङला पापदुकी डेलाला परमेश्‍वरगी थेला ङुरूङ लाईदु स्‍याप्‍ला ताङसुङ। थेमे ङुरूङला दोषी मेन सिराला थेकी थेला स्‍यिसादुकी सोम्‍बो लोक्‍सुङ।

रोमी 5:2

थेकी खित्‍सादुराङ परमेश्‍वरगी थे खोरोङला विश्‍वास खित्‍कान ङुरूङला दया खाईन थे खोरोङताङ डिक च्‍युताते ईन। था थेकी ङुरूङला दया खिता नोमुङ मोतोङो। दोक ईन्‍देकी थाचेन परमेश्‍वरगी ङुरूङला मान बिन्‍ला थे खोरोङगी ज्‍वा चाला च्‍योकराङ लेमु जोइओ साबाते बात ङुरूङगी आश खाईन गुकीन देता च्‍योकराङ खिओ सिन गा खिन देता थुप्‍क्‍यो।

रोमी 8:11

परमेश्‍वर थे खोरोङ आत्‍मा ख्‍योकोन सेमदु ओतेकी येशू ख्रीष्‍टला स्‍यिसादुकी सोम्‍बो लोक्‍कान्‍ते परमेश्‍वरगीराङ था स्‍यिनामेई रूल्‍ला डोच्‍येते ख्‍योकोन जीउ खुदुक जोला सोम्‍बो लोइओ। दोकचेन थेकी ख्‍योकोन सेमदु ओताते थे खोरोङ आत्‍मे छ्य्‌वापेई खिओ।

रोमी 8:3

ङुरूङ परमेश्‍वरगी खि साबाच्‍योक खिता मुथुप्‍कान्‍ते मि ईन्‍देकी ङुरूङला पापदुकी डेल्‍च्‍येते थेमे स्‍यिसादुकी जोए खित्‍च्‍येते काम परमेश्‍वर नियम छ्य्‌वापेकी ओङा थुपा मेतान। थोगी दि काम खिताला मि जुनीराङ लाला केला च्‍याला स्‍याप्‍ला परमेश्‍वरगी थे खोरोङ फुज्‍युङराङ देमा ताङसुङ। मि जुनी लासीनोङ थेकी नोमुङ छ्याङ पाप खाबा मेतान। थेमे पापकी सजाय जति परमेश्‍वरगी थेलाराङ भोगे खित च्‍युत्‍सुङ। थे थोक खाईन स्‍याप्‍की खित्‍सादु परमेश्‍वरगी मिओनला पाप खित्‍च्‍येते बानीदुकी टाल्‍गीन बिन्‍सुङ।

२ कोरिन्‍थी 1:24

ङा ख्‍योकोनला ङे साबा च्‍योकराङ खाला येशूला विश्‍वास खिता फाप्‍क्‍यो सिन कर लै मिक्‍किओ। ख्‍योकोनगी थेला खित्‍च्‍येते विश्‍वासका ठीकराङ दुक। ङानी खालि ख्‍योकोनला लेमु ओङला ख्‍योकोनगी गा खिन देता ङेत्‍स्‍यीत सिरच्‍येते कामताङ बातकामा खिओ।

२ कोरिन्‍थी 13:4

ईन्‍दानी मिओनगी स्‍यिङगी थामला टाँए खाला सेत्‍जीन थे छ्याःङ खिता मुथुप्‍कान्‍ते च्‍योकराङ थोङा ओतान। थोक ईन्‍सीनोङ परमेश्‍वरगी थे खोरोङ शक्तिकी थेला सोम्‍बो लोक्‍पेकी थे सोम्‍बोराङ ओत। ख्रीष्‍टताङ जीउज्‍यीकराङ ओङाते मि ङ्योकोनलाङ मिओनगी छ्याःङ खिता मुथुप्‍कान्‍ते च्‍योकराङ थोङगो। ईन्‍सीनोङ ङ्योकोनगी ख्‍योकोन नाङ खित्‍च्‍येते गाङे काम ख्रीष्‍टताङ जीउज्‍यीकराङ ओङगीन परमेश्‍वर शक्ति छ्य्‌वापेकी खित्‍च्‍येते ईन।

२ कोरिन्‍थी 5:21

ख्रीष्‍टकी खाबाते कामगी खित्‍सादु ङुरूङला दोषी मेन सिन सिरा थुप्‍स्‍यीत सिन ङुरूङ पापकी सजाय जति परमेश्‍वरगी गाङे पाप सिराते नोमुङ छ्याःङ खाबा मेताते ख्रीष्‍टला भोगे खित च्‍युत्‍सुङ।

गलाती 1:4

दि कलि जुग मिओनगी च्‍योक मेलेबा कामताङ बात खित्‍च्‍ये छ्य्‌वापेई ङुरूङ ठाल्‍स्‍यीत सिन प्रभु येशू ख्रीष्‍टचेन ङुरूङला पापदुकी डेलाला थे खोरोङ ज्‍यान बिन्‍गीन स्‍या ओतान। दि गाङे बात ङुरूङ आबा परमेश्‍वरगी खिता चाला च्‍योकराङ खाईन ओङा ओतान।

गलाती 3:13

तर ख्रीष्‍टकीचेन परमेश्‍वर नियमला तोके खाबाते परमेश्‍वरगी ङुरूङला सराप बिन्‍ला तेरच्‍येते सजाय थे खोरोङगीराङ भोगे खाईन स्‍यिइन ङुरूङला थे सजायदुकी टाल्‍सुङ। दोक खाईन ङुरूङ साटोला परमेश्‍वरगी थेला सराप बिन्‍गीन सजाय बिन्‍दाते ईन सिन परमेश्‍वर बातला “स्‍यिङगी थामला टाँए खाबाते मिचेन परमेश्‍वर सराप लै खाईन सजाय ङेत्‍कीन स्‍याप्‍ते ईन,” सिन टिबा ओत।

एफिसी 3:12

ङुरूङ प्रभु येशू ख्रीष्‍टकी खाबाते कामगी खित्‍सादु थेमे थेला विश्‍वास खाबेकी खित्‍सादु था ङुरूङ छ्याःङ ज्‍यीबा मिक्‍किता खाला ढुक्‍क ओङला परमेश्‍वर दोन्‍दु ड्वा थुप्‍क्‍यो।

तीतस 2:14

ङुरूङ पापकी सजाय थे खोरोङगीराङ भोगे खाईन थे ङुरूङ लाईदु ज्‍यान बिन्‍गीन स्‍यिसुङ। ङुरूङला पाप खित्‍च्‍येते बानीदुकी पूरो खाला टाल्‍ला सेम लेमु जोला काम बात लेमुकामा खिता छोल्‍कान्‍ते थे खोरोङ मि सिरा थुप्‍स्‍यीत सिन थे थोक खाईन स्‍या ओतान।

हिब्रू 10:10

दोक खाईन स्‍यिइन येशू ख्रीष्‍टकी परमेश्‍वरगी खिता चालाच्‍योक खाबा ओत। था लोक्‍ला नोमुङ दोक खिता माफाप्‍च्‍या खाईन थेकी थे खोरोङ ज्‍यानराङ बिन्‍गीन स्‍यिइन ङुरूङ सेम खुदुक जोबा ओत।

हिब्रू 9:14

थोक खानामेईनी बिटुले खाबाते मि चोके खिओ सासीन ख्रीष्‍ट स्‍यिजीन थे जीउदुकी थेन्‍दाते ठागी खित्‍सादु था ईन्‍सीन मेलेबाते कामगी सजाय ङेत्‍ला ङा नरककुण्‍डमा स्‍यूक्‍पा माफाबो सिन ख्‍योकोन ढुक्‍क खाला देता थुप्‍क्‍यो। दोक ओङला ख्‍योकोनगी सोम्‍बोते परमेश्‍वरगी खि साबा साबाते खिन थेला माने खिता थुप्‍क्‍यो। च्‍यिला सासीन छ्याःङ गल्‍ती खाबा मेताते ख्रीष्‍ट परमेश्‍वर आत्‍मे शक्ति ङेत्‍कीन परमेश्‍वरला थे खोरोङ ज्‍यानराङ बिन्‍गीन स्‍या ओत।

हिब्रू 9:26

दुरू पूजारीकी खिता च्‍योकराङ खिता फाप्‍च्‍या ईन्‍दा ईन्‍सीन दि सा नाम जोबा छुरला बाजि थोई थोई ख्रीष्‍टकी थे खोरोङ ज्‍यान तेरा फाप्‍च्‍या ओतान। तर मिकी खाबाते गाङे पापदुकी थेबाला डेलाला थे दि जुग सिन्‍दे खाला दुरू वाकीन बाजिईकामा थे खोरोङ ज्‍यान बिन्‍गीन स्‍याप्‍ते ईन।

हिब्रू 9:28

थोक ईन्‍देकी मि काल्‍बेईला थेबेकी खाबाते गाङे पापदुकी डेलाला ख्रीष्‍टोङ बाजिईकामा थे खोरोङ ज्‍यान बिन्‍गीन स्‍याप्‍ते ईन। था थे लोक्‍ला देमा ग्‍युरला ओङगो। थोक खाला ओङच्‍येते लोक्‍ला गोमा च्‍योकराङ मि पापकी सजाय भोगे खाला स्‍याप्‍ला मेन। थानी ङीमाई थे ग्‍युरला ओङगो सिन गुकीन देताते मिओनला पूरो खाला पापदुकी टाल्‍ला स्‍वर्गने देत खेराला लिन्‍दालाका ओङच्‍येते ईन।

याकूब 5:6

ख्‍योकोनगी छ्याःङ खिता मुथुप्‍कान्‍ते सुधोते मिओनला थाराङ दोष लै खाईन सेत्‍सुङ। थेबेकी ख्‍योकोनला छ्याःङ मेलेबा खाबा मेतान।

१ पत्रुस 3:19

परमेश्‍वर आत्‍मे छ्य्‌वापेईराङ थेकी स्‍यिइन सिन्‍दाते मिओन देता फाप्‍च्‍येते ठाउँदुङ गाल्‍गीन गोमाका स्‍याप्‍ते मिओनलाङ गा लाङच्‍येते बात लापा ओतान।

१ पत्रुस 4:1

थेमे ख्रीष्‍टकी मि जुनी लाकीन थोई दुक्‍पा भोगे खाबा ओताने सिन टोक मेज्‍येता खाला ख्‍योकोनगीङ थेकी च्‍योकराङ खाला दुक्‍पा भोगे खिओ सिन आँटे खाला देत। च्‍यिला सासीन दुक्‍पा भोगे खित्‍कान्‍ते मिकी पाप खिन मेदेदो।

१ पत्रुस 4:6

ङीमाई परमेश्‍वरगी दोक खाला न्‍याय खित्‍च्‍येते ईन्‍देकीराङ स्‍यिइन सिन्‍दाते मिओनलाङ गा लाङच्‍येते बात लापाते ईन। थोक खाबातेचेन थेबेकी सोन सोनसाक चुक खाला दुका थे ताला थेबे न्‍याय खिता थुप्‍स्‍यीत थेमे परमेश्‍वरगी तेरा चालाते नोमुङ मिसिन्‍च्‍येते जुनी ङेत्‍स्‍यीत सिन ईन।

१ यूहन्‍ना 1:9

बरू ङुरूङगी ए परमेश्‍वर, ङ्योकोनगी दोक दोक पाप खाबाप, थोक खाबाते लेमु मेन्‍दाक्‍वा सिन सासीन थेकी ङुरूङ पाप माफ तेरग्‍यो, ङुरूङगी खाबाते गाङे मेलेबा काम माफ खिओ। च्‍यिला सासीन परमेश्‍वर थे खोरोङगी खिओ साबाच्‍योक खित्‍कान्‍ते थेमे लेमु काम खित्‍कान्‍ते ईन।