१ पत्रुस 2:8 - जिरेल

⁸ परमेश्‍वर बातलाराङ “थे दोला मि काल्‍बेई नार्दोक देइओ। ठाःक छेतज्‍यीक ओताते थे दोला मि काल्‍बेई ठोके खाला रिल्‍ग्‍यो,” सिनोङ टिला दुक। परमेश्‍वर बातला नामज्‍योक मेसेत्‍कान्‍ते मिओनराङ थोक खाला रिल्‍ग्‍यो। थोक्‍ते मिओनला होदोक ओङ ज्‍युत्‍क्‍यो सिन परमेश्‍वरगी गोमाका साबा ओतान।

१ पत्रुस 2:8 Iomraidhean Croise

लूका 2:34

थेमे थेकी आबातेताङ आमातेलाङ आशी बिन्‍गीन च्‍याकीन थे फिजे आमा मरियमला “परमेश्‍वरगी खटे खाबाते दि फिजाला ङुरूङ इस्राएली नाङ कोईकी दिला परमेश्‍वरगी ताङाते ईनराङ मेन सिन विरोध खिओ। थोक खित्‍कान्‍तेबाला परमेश्‍वरगी सजाय तेरग्‍यो। कोईकीचेन दिला परमेश्‍वरगी ताङाते ईन सिन पत्ते खिओ। थोक खित्‍कानलाचेन परमेश्‍वरगी आशी बिन्‍ला लेमु खिओ।

रोमी 9:22

होथोकराङ खाला परमेश्‍वरलाङ थे खोरोङला जस्‍तो खिता सेम लाङगीदुक उस्‍तोराङ खित्‍च्‍येते अधिकार ओतेकी थेकी कोई कोई मिला स्‍येदाङगी चूर गाल्‍ला थे खोरोङगी तेरच्‍येते सजाय चुक मेलेबाज्‍यीक ओङगीते थेमे थे खोरोङताङ चुक छ्येज्‍यीक शक्ति ओते सिन तेन्‍गीन बिन्‍दा ओत। थेबा परमेश्‍वरगी स्‍येदाङगी चूर गाल्‍ला नरककुण्‍डमा लुबा फाप्‍च्‍येते मि ओता ईन्‍सीनोङ थे थेबाताङ होत्ता स्‍येदाङ मिक्‍किता खाईन काल्‍बासाक खपे खाईन देता ओतान।

१ कोरिन्‍थी 1:23

दोक ईन्‍सीनोङ ङ्योकोनचेन ख्रीष्‍ट मिओनला पापकी सजायदुकी डेलाला स्‍यिङगी थामला टाँए खाईन स्‍याप्‍ते ईन सिन मिओनला लोप्‍क्‍यो। दि बात लोप्‍जीन यहूदीओनचेन दिनी परमेश्‍वर विरोध खाबाते ईन सिन स्‍येदाङ खिदुक। थेमे ग्रीकओनचेन दि लेम्‍बे बात ईन सिन ङेनराङ मेङेन्‍दुक।

२ कोरिन्‍थी 2:16

ङ्योकोनगी लोप्‍कीन ओताते बात माङेन्‍ला नरककुण्‍डमा स्‍यूक्‍कान्‍ते मिओन लाईदु दि बात मि स्‍यिच्‍येते थुक च्‍योकराङ ईन सासीन दि बात ङेन्‍ला ख्रीष्‍टकी पापदुकी डेल्‍गीन ओताते मिओन लाईदुचेन नोमुङ मिसिन्‍च्‍येते जुनी ङेत्‍च्‍येते बात ईन। दाक्‍पोनगीराङ दोक छ्येते बातकी जिम्‍मा लाला काम खिता थुप्‍कान्‍ते मि सु ओतेरो?

गलाती 5:11

थेमे आज्‍यो न्‍वावे, गा लाङच्‍येते बात लोप्‍जीन ङेङ यहूदीओनगी जीउला ज्‍वा फाप्‍च्‍येते खतकी चिनु ज्‍वापराङ फाप्‍क्‍यो सिन थोरूमसाक लोप्‍कीन ओता ईन्‍सीन थरिङसाकराङ यहूदीओनगी च्‍यिला ङाला खेदा खाला खाला दुक्‍पा तेरगीका ओना? ङेङ थेबेकी साबा च्‍योकराङ खित्‍च्‍येते ईन्‍दा ईन्‍सीन येशू ख्रीष्‍ट स्‍यिङगी थामला टाँए खाईन स्‍याप्‍की खित्‍सादुकामा परमेश्‍वरगी मिला दोषी मेन सिओ सिन ङे लोप्‍कीन ओताते बातकीते थेबा सुङगीङ दोक खाला विरोध खित्‍च्‍याराङ मेतान।

१ थिस्‍सलोनिकी 5:9

परमेश्‍वरगी ङुरूङला छाने खाबाते स्‍येदाङगी चूर गाल्‍ला सजाय तेराला मेन, ङुरूङ प्रभु येशू ख्रीष्‍टकी खाबाते कामगी खित्‍सादु पूरो खाला पापदुकी टाल्‍ला स्‍वर्गने देत ज्‍युताप सिन ईन।

१ पत्रुस 2:6

परमेश्‍वर बातला परमेश्‍वरगी “लो दि बात लेमु खाला ङेन। ङा सियोन सारदु ङाराङगी छाने खाबाते दोज्‍यीक ज्‍य्‌वाक्‍यो। थे मेताला छ्याःङ खिता मुथुप्‍च्‍या थे दो आउदी काम लै खित्‍च्‍येते ईन। परमेश्‍वरगी सियोन सारदु ज्‍याक्‍पाते दो साबाते मिकीकामा ङुरूङला लेमु खिता थुप्‍क्‍यो सिन थेला विश्‍वास खित्‍कान्‍ते मिओनला थेकी नोमुङ ङोचा मोलोङो,” सिन साबा ओत।

१ पत्रुस 2:7

थोगी थे दो साबाते येशू ख्रीष्‍टला विश्‍वास खित्‍कान्‍तेबा ख्‍योकोन लाईदु थे आउदी काम लै खित्‍च्‍येते दो ईन। ईन्‍सीनोङ थेला विश्‍वास मिक्‍किकान्‍तेबे लाईदु थे चुक्‍ते ईन्‍दे सिन परमेश्‍वर बातला “जुन दोला कर्मीओनगी कामराङ लै मिक्‍किओ सिन क्‍युरा ओतान, थे दोराङ आउदी काम लै खित्‍च्‍या थे मेताला छ्याःङ खिता मुथुप्‍च्‍या ओङसुङ,” सिन टिला दुक।

२ पत्रुस 2:3

पैसे लोभकी खित्‍सादु थेबेकी ख्‍योकोनला मेन्‍दा मेन्‍दे बात जोला लाप्‍ला ठगे खिओ। दोक खित्‍कान्‍तेबाला परमेश्‍वरगी सजाय बिन्‍ला नरककुण्‍डमा लुक्‍यो सिन गोमाका साबा ओत। थेकी दि बात टोक ज्‍येता मेत। था थेकी होत्ताराङ थेबाला सजाय तेरग्‍यो।

यहूदा 1:4

ङे च्‍यिला थे बात ङेन्‍दा तोङा मेङगो साबाते ईन्‍दे सासीन कोई कोई मि खाराक्‍पा ख्‍योकोन नाङ स्‍यूकीन सिन्‍दा ओत। थेबाचेन परमेश्‍वरगी माकेत साबा साबाते काम खित्‍कान्‍ते मि ईन। थेबेकी ङुरूङ परमेश्‍वरगी मिला दया खाला पापदुकी डेल्‍च्‍येते बातला चुक खिका सासीन परमेश्‍वरगी दाक्‍पोनला दया खाईन पापदुकी टाला ओतेकी था ङुरूङगी जे खासीनोङ ओङगो सिन रन्‍डीबाजी थेमे होदि च्‍योक्‍ते खिता मेङच्‍येते काम खिदुक। थेमे ङुरूङ मालिक येशू ख्रीष्‍टलाङ माने मिक्‍किदुक। गाङेपा गाङेला राज्‍य खित्‍कान्‍ते थेकामा ईन। होथोक्‍ते मिओनगी चुकस्‍यिक सजाय ङेत्‍कीते सिन परमेश्‍वर बातला गोमाका टिबा ओत।