१ पत्रुस 1:8 - जिरेल

⁸ ईन्‍दानी ख्‍योकोनगी येशू ख्रीष्‍टला थोङा मेत। ईन्‍सीनोङ ख्‍योकोन थेला ङिङज्‍ये खिदुक। ख्‍योकोनगी थेला थरिङोला थोङा मेत्‍सीनोङ थेला विश्‍वास खिदुक। थेमे मिकी साला सिरा मुथुप्‍च्‍या आउदी खाला गा खिदुक।

१ पत्रुस 1:8 Iomraidhean Croise

मत्ती 10:37

थेमे ङाला भन्‍दाङ काल्‍बा आबा आमाला ङिङज्‍ये खित्‍कान्‍ते मिचेन ङे चेला ओङा मुथुबो। थोकराङ खाला दाक्‍पोन फुज्‍युङ फुमुलाका काल्‍बा ङिङज्‍ये खित्‍कान्‍ते मिलाङ ङे चेला ईन सिरा सोई मिक्‍किओ।

यूहन्‍ना 14:15

ख्‍योकोनगी ङाला ङिङज्‍ये खासीन ङे खि सिन कोतातेङ खिओ।

यूहन्‍ना 14:21

जसकी ङे खि सिन कोताते ङेन्‍ला खि साबाच्‍योक खिदुक, ङाला ङिङज्‍ये खित्‍कान्‍ते मि थेराङ ईन। ङाला ङिङज्‍ये खित्‍कान्‍ते मिलाचेन आबेकीङ ङिङज्‍ये खिओ। थोकराङ खाला ङाङ थेला ङिङज्‍ये खिओ थेमे ङा चुक छ्ये ईन्‍दे सिन थेला झन लेमु खाला छ्या स्‍ये ज्‍युत्‍क्‍यो,” सिन बात खासुङ।

यूहन्‍ना 14:24

ङाला ङिङज्‍ये मिक्‍किकान्‍ते मिकीचेन ङे लापाते बात मेङेनो। ङे ख्‍योकोनला लापाते बाततेबा ङाराङगी जोकीन लापाते मेन। दि बातओननी ङाला दुरू तोङकान्‍ते आबेकी सिर च्‍युतातेका ईन।

यूहन्‍ना 16:22

ख्‍योकोनलाङ होदोकराङ ओङगो। चुक सासीन था ख्‍योकोनला आउदी पीर लाङगो। ईन्‍सीनोङ याङराङ ङा ख्‍योकोनला ठेता खिओ। थेमे थेजीन ख्‍योकोनला आउदी गा लाङगो। सुइँदेकी ख्‍योकोनला दोक खाला गा माकेत सासीनोङ ख्‍योकोन खाराक्‍पा देताराङ मुथुबो।

यूहन्‍ना 20:29

थेमे येशूकी “खुईनी ङाला थोङेकी खित्‍सादु ङा सोम्‍बो लोक्‍पाते दुका सिन पत्ते खासुङ। ङाला माथोङालाङ ङा सोम्‍बो लोक्‍पाते ईन सिन पत्ते खाला ङाला विश्‍वास खित्‍कान्‍ते मिओन भाग्‍यमानी ईन,” सिन सिदुक।

यूहन्‍ना 8:42

याङराङ येशूकी थेबाला “ख्‍योकोन आबा परमेश्‍वर ईन्‍दा ईन्‍सीन ख्‍योकोनगी ङाला ङिङज्‍ये खित्‍च्‍या ओतान। च्‍यिला सासीन थे ओत्‍सादुकीराङ ङा दुरू वाबाते ईन। ङा दुरू ङाराङ खुशीकी वाबाते मेन, ङालाचेन थेकीराङ ताङाते ईन।

शक्ति काम 16:34

थोक थोक खानामेई थेकी थेबा ङिबोला खाम्‍बाने खेरगीन साप थुङाङ बिन्‍सुङ। परमेश्‍वरला विश्‍वास खिताला स्‍यूबेकी थेत्ताङ थे खाम्‍बे मि गाङेराङ आउदी गा खासुङ।

रोमी 14:17

दि बातओन ङे च्‍यिला खाबाते ईन्‍दे सासीन परमेश्‍वर राज्‍यदु स्‍यूबाते मिओन नाङ दि सा थुङा ओङगो, थे सा थुङा मेङगो सिरच्‍येते बात छ्याःङ छ्येते बात मेन। छ्येते बातचेन परमेश्‍वर आत्‍मे छ्य्‌वापेई परमेश्‍वरगी खि साबा साबाच्‍योक खित्‍च्‍येते, दाक्‍पोन नाङ डिक्‍ला थुन्‍ला देत्‍च्‍येते थेमे गा खिन देत्‍च्‍येतेराङ ईन।

रोमी 15:13

थे खोरोङगी साबाच्‍योक खिओ सिन आश खाला देत ज्‍युत्‍कान्‍ते परमेश्‍वरराङ ईन। थेला विश्‍वास खित्‍कान ईन्‍देकी थेकी ख्‍योकोन गाङेला आउदी खाला गा खिन थेमे डिक्‍ला थुन्‍ला देत ज्‍युत्‍स्‍यीत सिन ङा प्रार्थना खिओ। थेकी थोक खानामेईचेन परमेश्‍वर आत्‍मे शक्ति छ्य्‌वापेकी ख्‍योकोन था परमेश्‍वरगी ङुरूङला खिओ साबाच्‍योक खिओतराङ सिन छ्याःङ शंका मिक्‍किता खाला झन आश खाला गुला देता थुप्‍क्‍यो।

१ कोरिन्‍थी 16:22

सुइँदेकी प्रभु येशूला ङिङज्‍ये मिक्‍किदुक सासीन थोक्‍ते मिला परमेश्‍वरगी सराप तेरस्‍यीत। स्‍योक स्‍योक प्रभु येशू, खो होत्ता स्‍योक।

२ कोरिन्‍थी 1:22

ङुरूङ थोक्‍ते मि ईन सिन थेकी ङुरूङला थे खोरोङ छाप ग्‍यापा ओत थेमे थे खोरोङगी तेरग्‍यो साबाते गाङे तेरग्‍यो सिन पक्‍का खिताला थेकी ङुरूङला परमेश्‍वर आत्‍मा बिन्‍दा ओत।

२ कोरिन्‍थी 12:4

थेने खेरनामेई थेकी मिकी साला सिराराङ मुथुप्‍च्‍या आउदी अचम्‍बतेन्‍दे बात थोसुङ। थोक्‍ते बात मिओनगी खिताराङ मेङेदो।

२ कोरिन्‍थी 4:18

थोगी ङ्योकोनचेन थरिङोला ओङगीन ओताते होदोक्‍ते बातला मेन, था तिरी ओङच्‍येते होथोक्‍ते लेमुते बातकी विचारकामा खाला देत्‍क्‍यो। च्‍यिला सासीन थरिङोला ओङगीन ओताते मिकी थोङा थुप्‍च्‍येते होदोक्‍ते पीरताङ दुक्‍पा ङीमाई गाङे सिन्‍ला तोरला डुइओ। तर थोरूमसाक सुङगीङ थोङा मेताते तिरी परमेश्‍वरगी तेरच्‍येतेचेन नोमुङ सिन्‍ला तोरला मोन्‍डोओ।

२ कोरिन्‍थी 5:7

प्रभु येशूला ङुरूङगी थरिङोला मिगी थोङा मेत्‍सीनोङ था तिरी सधैँभरि थेत्ताङ देता ङेत्‍क्‍यो सिन ङुरूङ थेला विश्‍वास खिओ।

२ कोरिन्‍थी 9:15

सुङगीङ खिता मुथुप्‍च्‍येते काम खाईन ङुरूङला लेमु खाबे लाईदु परमेश्‍वरला ङुरूङ धन्‍यवाद सिइ।

गलाती 5:22

परमेश्‍वर आत्‍मेकी खित ज्‍युता चालाच्‍योक खित्‍कान्‍ते मिलाचेन थेकी फलफूल गोन ज्‍युताच्‍योक खाला लेमु कामताङ बात खित ज्‍युत्‍क्‍यो। थोगी थोक्‍ते मिकीचेन ज्‍येनला ङिङज्‍ये खिओ, थे गा खिन देत्‍क्‍यो थेमे सेमदु ढुक्‍क खाला देत्‍क्‍यो। थोक्‍ते मि होत्ताराङ स्‍येदाङ मिक्‍किओ, थेकी ज्‍येनला दया खिओ थेमे लेमु खिओ, थेकी खिओ साबा च्‍योकराङ खिओ,

गलाती 5:6

च्‍यिला सासीन येशू ख्रीष्‍टताङ जीउज्‍यीकराङ ओङाते मिओनगी खतकी चिनु जोसीनोङ माजोसीनोङ छ्याःङ फरक परे मिक्‍किओ। छ्येते बातचेन थेबेकी येशू ख्रीष्‍टला विश्‍वास खाला ज्‍येनतेबालाङ ङिङज्‍ये खिकाना मिक्‍किका सिरच्‍येतेकामा ईन।

एफिसी 3:19

थेमे मिकी जति बुद्धि खिये खासीनोङ खोबा मुथुप्‍च्‍या खाला ख्रीष्‍टकी ङुरूङला चुक ङिङज्‍ये खिते सिन ख्‍योकोनगी खोबा थुप्‍स्‍यीत सिनोङ ङा प्रार्थना खिओ। परमेश्‍वरगी ख्‍योकोनला थे खोरोङ बुद्धि थेमे शक्ति बिन्‍ला थे खोरोङ च्‍योकराङ लेमु ओङाला गोच्‍येते जति तेरस्‍यीत सिनराङ ङा ख्‍योकोन लाईदु दोक दोक खाला प्रार्थना खिओ।

एफिसी 6:24

ङुरूङ प्रभु येशू ख्रीष्‍टला ङिङज्‍ये खिन देत्‍कान गाङेला परमेश्‍वरगी दया खिनराङ देत्‍स्‍यीत।

फिलिप्‍पी 1:25

थोगी ङेते स्‍यिच्‍येते समय थोरूमोङ लेपा मेत सिन ङे छ्या स्‍येबा ओत। येशू ख्रीष्‍टला विश्‍वास खिन ख्‍योकोन चुक खाला पाको डुइन ड्वा थुप्‍कीते थेमे झन गा खिन देता थुप्‍कीते सिन ङे ख्‍योकोनला थोरूमोङ लोपा ङेत्‍क्‍यो।

फिलिप्‍पी 3:3

ङुरूङका परमेश्‍वरगी छाने खाबाते जीउला खतकी चिनु जोबा ओताते मि च्‍योक्‍ते ईन। च्‍यिला सासीन परमेश्‍वरला चुक खाला माने खिता फाप्‍च्‍येते ईन्‍दे परमेश्‍वर आत्‍मे छ्य्‌वापेकी ङुरूङ थेला थोकराङ खाला माने खिओ। परमेश्‍वरला माने खिताला ङुरूङचेन दाक्‍पोन जीउला खतकी चिनु जोबा ओत थेमे ज्‍येन ज्‍येनोङ धर्म कर्म खाबा ओत सिन छ्ये मिक्‍किओ। बरू येशू ख्रीष्‍टताङ जीउज्‍यीकराङ ओङा ओतेकी गा खिओ।

फिलिप्‍पी 4:4

थेमे प्रभु येशूताङ जीउज्‍यीकराङ ओङाते मि ईन्‍देकी दुक्‍पा किम्‍मु जस्‍तो ओङजीनोङ ख्‍योकोन जहिलेङ गा खि। ख्‍योकोन गा खि सिन ङा याङराङ सिओ।

हिब्रू 11:1

परमेश्‍वरला विश्‍वास खित्‍च्‍या सिरातेचेन थेकी तेरग्‍यो साबाते जति गाङे ङेत्‍क्‍यो सिन आश खाईन गुकीन देताते पक्‍काराङ ङेत्‍क्‍यो थेमे खइँदा दोकस्‍यिकराङ ओताक्‍वा सिन दाक्‍पोनगी नोमुङ थोङा मेत्‍सीनोङ परमेश्‍वरगी साबा ओता च्‍योकराङ ओत सिन पत्ते खित्‍च्‍येते ईन।

हिब्रू 11:27

थे खोरोङला मिश्रे गेल्‍बो लाःक्‍तुकी जोए खिओ सिन परमेश्‍वरला विश्‍वास खाईन थे मिश्रे गेल्‍बोताङ छ्याःङ ज्‍यीबा मिक्‍किता खाईन मिश्रे लुङबादुई थेन्‍गीन ख्‍याम्‍सुङ। मि मिगी थोङा मुथुप्‍च्‍येते परमेश्‍वरला थेकी थे खोरोङ मिगी दोन्‍दुराङ थोङाच्‍योक खाईन थे लुङबादुई थेन्‍गीन ख्‍याम्‍सुङ।

१ पत्रुस 1:6

ख्‍योकोन बात दोक ईन्‍देकी ख्‍योकोन आउदी गा खिन देता थुप्‍क्‍यो। ईन्‍दालाचेन थरिङोला ख्‍योकोनगी परी परीतेन्‍दे दुक्‍पा भोगे खिता फाप्‍क्‍यो। ईन्‍सीनोङ दोक्‍ते दुक्‍पा खालि टिक्‍पी दिनगी लाईदुकामा ओङच्‍येते ईन।

१ पत्रुस 2:7

थोगी थे दो साबाते येशू ख्रीष्‍टला विश्‍वास खित्‍कान्‍तेबा ख्‍योकोन लाईदु थे आउदी काम लै खित्‍च्‍येते दो ईन। ईन्‍सीनोङ थेला विश्‍वास मिक्‍किकान्‍तेबे लाईदु थे चुक्‍ते ईन्‍दे सिन परमेश्‍वर बातला “जुन दोला कर्मीओनगी कामराङ लै मिक्‍किओ सिन क्‍युरा ओतान, थे दोराङ आउदी काम लै खित्‍च्‍या थे मेताला छ्याःङ खिता मुथुप्‍च्‍या ओङसुङ,” सिन टिला दुक।

१ पत्रुस 5:4

दोक खासीन था येशू ख्रीष्‍ट ग्‍युरला ओङजीन थेकी ख्‍योकोनला इनाम सिन छ्येज्‍यीक मान तेरग्‍यो। थेकी थोक खानामेई ख्‍योकोन सधैँ मान ङेत्‍ला देता ङेत्‍क्‍यो। येशू ख्रीष्‍टचेन ज्‍येन गोठाला गाङेला कोत्‍कान्‍ते छ्येते गोठाला च्‍योक्‍ते ईन।