१ पत्रुस 1:6 - जिरेल

⁶ ख्‍योकोन बात दोक ईन्‍देकी ख्‍योकोन आउदी गा खिन देता थुप्‍क्‍यो। ईन्‍दालाचेन थरिङोला ख्‍योकोनगी परी परीतेन्‍दे दुक्‍पा भोगे खिता फाप्‍क्‍यो। ईन्‍सीनोङ दोक्‍ते दुक्‍पा खालि टिक्‍पी दिनगी लाईदुकामा ओङच्‍येते ईन।

१ पत्रुस 1:6 Iomraidhean Croise

मत्ती 11:28

पीरताङ दुक्‍पेकी खित्‍सादु स्‍याप खाबाते मिवे, ख्‍योकोन ङा ओत्‍सादु स्‍योक। ङा ख्‍योकोनला ढुक्‍क खाला देत ज्‍युत्‍क्‍यो।

मत्ती 26:37

थोक खाला डोजीन थेकी पत्रुस थेमे जब्‍दी फुज्‍युङबा ङिबोलाचेन ङ्योम्‍बुराङ खेरसुङ। थे खोरोङला था चुक दुक्‍पा ओङगीते सिरच्‍ये पीरगी खित्‍सादु थेजीन थेते सेमोङ स्‍यिइन सिन्‍दा ओतान।

मत्ती 5:12

थेबेकी थोक खित्‍जीन ख्‍योकोन आउदी खाला गा खि। च्‍यिला सासीन स्‍वर्गने ख्‍योकोनगी छ्येज्‍यीक इनाम ङेत्‍क्‍यो। थाङबोबा परमेश्‍वर बात खित्‍कान्‍ते मिओनलाङ थे बेले मिओनगी खेदापानीराङ खाबा ओतान।

लूका 1:47

पापताङ दुक्‍पादुकी डेल्‍कान्‍ते थेराङ ईन्‍देकी ङाला आउदी गा लाङगीदुक।

लूका 10:20

ल्‍हन्‍डीकओनगी ख्‍योकोनगी कोताते ङेन्‍दा थोङजीन गा लासुङ मेन? गा खित्‍च्‍येते बातचेन दिराङ मेन। परमेश्‍वरगी तिरी थे खोरोङताङ देता ङेत्‍कान्‍ते मिओन नाङ स्‍वर्गने ख्‍योकोन मिनोङ टिबा ओत। गा खिता फाप्‍च्‍येते बातनी दिका ईन,” सिन सिदुक।

लूका 2:10

थेमे प्रभु परमेश्‍वर दूतकी थेबाला “ख्‍योकोन ज्‍यीबा माकेत। ङा दुरू ख्‍योकोनला आउदी गा लाङच्‍येते लोनज्‍यीक लाःपाला वाबाते ईन। ख्‍योकोन लाईदुकामा मेन, दि बात मि गाङे लाईदु गा लाङच्‍येते बात ईन।

यूहन्‍ना 16:22

ख्‍योकोनलाङ होदोकराङ ओङगो। चुक सासीन था ख्‍योकोनला आउदी पीर लाङगो। ईन्‍सीनोङ याङराङ ङा ख्‍योकोनला ठेता खिओ। थेमे थेजीन ख्‍योकोनला आउदी गा लाङगो। सुइँदेकी ख्‍योकोनला दोक खाला गा माकेत सासीनोङ ख्‍योकोन खाराक्‍पा देताराङ मुथुबो।

यूहन्‍ना 16:33

ङे खित्‍सादु ख्‍योकोन सेम ढुक्‍क खाला देता थुप्‍स्‍यीत सिनराङ ङे दि बाततेबा साबाते ईन। दि सा लुङबे मिओनगी ख्‍योकोनला तेरासम्‍म दुक्‍पा तेरग्‍यो। थोक ईन्‍सीनोङ ख्‍योकोन हरेस मासा। दि सा लुङबादु ओताते जे ईन्‍सीनोङ, जो ईन्‍सीनोङ गाङेला ङे ग्‍याल्‍गीन सिन्‍दा ओत,” सिन सिदुक।

शक्ति काम 14:22

थेपा ग्‍युरला डोजीन थेबेकी गोमा खोपरोङ गालाते होथे सार सारला ओताते येशू चेलाओनला “जस्‍तोराङ ओङसीनोङ प्रभु येशूला विश्‍वास खिन देता मातोङ। परमेश्‍वर राज्‍यने ड्वाप्‍ला ङुरूङगी दुरू याङ याङ दुक्‍पा ङेत्‍क्‍यो सिरच्‍येते बात टोक माज्‍येत,” सिन आँट तेरगीन गाल्‍सुङ।

रोमी 12:12

थेमे परमेश्‍वरगी ख्‍योकोनगी आश खाईन देता च्‍योकराङ खित्‍च्‍येते ईन्‍देकी ख्‍योकोन गा खिन गुला देत। ज्‍येनगी दुक्‍पा तेरजीन थेमे आपत् विपत् आइ परे खित्‍जीन सेम मेसेता खाला देत। परमेश्‍वरताङ प्रार्थना खिन देता नोमुङ मातोङ।

रोमी 5:11

दोस्‍यिककामा मेन, ङुरूङ प्रभु येशूकी ङुरूङला परमेश्‍वरताङ डिक्‍पा खाईन बिन्‍दा ओतेकी परमेश्‍वर ङुरूङला चुक लेमु खित्‍कान्‍ते ईन्‍दे सिन था ङुरूङ गा खिन देता थुप्‍क्‍यो।

रोमी 5:2

थेकी खित्‍सादुराङ परमेश्‍वरगी थे खोरोङला विश्‍वास खित्‍कान ङुरूङला दया खाईन थे खोरोङताङ डिक च्‍युताते ईन। था थेकी ङुरूङला दया खिता नोमुङ मोतोङो। दोक ईन्‍देकी थाचेन परमेश्‍वरगी ङुरूङला मान बिन्‍ला थे खोरोङगी ज्‍वा चाला च्‍योकराङ लेमु जोइओ साबाते बात ङुरूङगी आश खाईन गुकीन देता च्‍योकराङ खिओ सिन गा खिन देता थुप्‍क्‍यो।

रोमी 9:2

दि बात च्‍यि ईन्‍दे सासीन ङेराङ जातकी आज्‍यो न्‍वाओन लाईदु पीर खिताई खिताई थानी ङेते सेमोङ छोकीन सिन्‍सुङ। ङा थेबे लाईदु आउदी खाला पीर खिनराङ देत्‍क्‍यो। थेबे साटोला थेबा च्‍योक खाईन ङा ङाराङ ख्रीष्‍टकी छ्य्‌वापेई ठाल्‍गीन देता थुप्‍सीन थेमे परमेश्‍वरगी थेबाला तेरच्‍येते सजाय ङाराङगी भोगे खिता फाप्‍सीन थोगोङ खित्‍च्‍या ओतान।

२ कोरिन्‍थी 4:17

थरिङोला टिक्‍पी दिन दोक्‍ते दुक्‍पा भोगे खिता फाप्‍सीनोङ दोक खाईन सिन्‍नामेईनी परमेश्‍वरगी ङेराङला सधैँभरि लाईदु मान बिन्‍ला थे खोरोङगी ज्‍वा चाला च्‍योकराङ लेमुका जोइओ। होथे बात सम्‍झे खित्‍जीन ङ्योकोनलानी थरिङोला टिक्‍पी दिन ङेराङगी भोगे खिन ओताते होदोक्‍ते पीरताङ दुक्‍पा छ्याःङ मेन सिराच्‍योक लाङगीदुक।

२ कोरिन्‍थी 6:10

दोक दोक ओङला पीरताङ तापकी नाङ देता फाप्‍सीनोङ ङ्योकोन सधैँ छ्याःङ पीर मेताते मि च्‍योक खाला गा खिन देत्‍क्‍यो। थेमे ङेराङ लाला साकान्‍ते च्‍योक्‍तेन्‍दे ओत्‍सीनोङ ङ्योकोनगी खाबाते कामगी खित्‍सादु मिओनगी परमेश्‍वरगी तेरच्‍येते जति गाङे ङेत्‍क्‍यो। लोक्‍ला ङ्योकोन ङेराङते सिराते छ्याःङ मेताते कङ्गाली च्‍योकराङ ईन्‍सीनोङ परमेश्‍वरगी खित्‍सादु ङेत्ताङ जेसुकै ओत।

गलाती 5:22

परमेश्‍वर आत्‍मेकी खित ज्‍युता चालाच्‍योक खित्‍कान्‍ते मिलाचेन थेकी फलफूल गोन ज्‍युताच्‍योक खाला लेमु कामताङ बात खित ज्‍युत्‍क्‍यो। थोगी थोक्‍ते मिकीचेन ज्‍येनला ङिङज्‍ये खिओ, थे गा खिन देत्‍क्‍यो थेमे सेमदु ढुक्‍क खाला देत्‍क्‍यो। थोक्‍ते मि होत्ताराङ स्‍येदाङ मिक्‍किओ, थेकी ज्‍येनला दया खिओ थेमे लेमु खिओ, थेकी खिओ साबा च्‍योकराङ खिओ,

फिलिप्‍पी 2:26

दि ख्‍योकोनबरीला आउदी खाला सम्‍झे खिन था ख्‍योकोनला याङराङ नामराङ ठेदोङा सिराच्‍योक खाईन देता ओतान। थे लाक्‍तुङ ख्‍योकोनगी दि खोरोङ नाबाते बात थोदुक्‍लो सिन छ्या स्‍येनामेई था ख्‍योकोन आउदी खाला पीर खिता च्‍यिन्‍दा सिन दि आउदी खाईन सुर्ता खाबा ओतान।

फिलिप्‍पी 3:3

ङुरूङका परमेश्‍वरगी छाने खाबाते जीउला खतकी चिनु जोबा ओताते मि च्‍योक्‍ते ईन। च्‍यिला सासीन परमेश्‍वरला चुक खाला माने खिता फाप्‍च्‍येते ईन्‍दे परमेश्‍वर आत्‍मे छ्य्‌वापेकी ङुरूङ थेला थोकराङ खाला माने खिओ। परमेश्‍वरला माने खिताला ङुरूङचेन दाक्‍पोन जीउला खतकी चिनु जोबा ओत थेमे ज्‍येन ज्‍येनोङ धर्म कर्म खाबा ओत सिन छ्ये मिक्‍किओ। बरू येशू ख्रीष्‍टताङ जीउज्‍यीकराङ ओङा ओतेकी गा खिओ।

फिलिप्‍पी 4:4

थेमे प्रभु येशूताङ जीउज्‍यीकराङ ओङाते मि ईन्‍देकी दुक्‍पा किम्‍मु जस्‍तो ओङजीनोङ ख्‍योकोन जहिलेङ गा खि। ख्‍योकोन गा खि सिन ङा याङराङ सिओ।

१ थिस्‍सलोनिकी 1:6

थेजीन ङ्योकोनला ताकीन ख्‍योकोनगीङ ङ्योकोनगी खाबा खाबा च्‍योकराङ खाबा ओतान। ङ्योकोनगी खाबा च्‍योककामा मेन्‍देकी ख्‍योकोनगी प्रभु येशू ख्रीष्‍टकी च्‍योगोङ खाबा ओतान। चुक खाईन सासीन ज्‍येनगी आउदी खाला दुक्‍पा तेरजीनोङ परमेश्‍वर आत्‍मेकी खित्‍सादु गा खिन ख्‍योकोनगी गा लाङच्‍येते बात ङेन्‍दा ओतान।

याकूब 1:2

आज्‍यो न्‍वावे, ख्‍योकोनला थरी थरी दुक्‍पा ओङजीन थोकनी लेमु ओङालाका ओङाते ईन सिन गा खि।

याकूब 1:9

थेमे छ्याःङ मेताते आज्‍यो न्‍वाबा ख्‍योकोनगी परमेश्‍वरगी खेराङला मान बिन्‍गीन चुक छ्ये जोसुङा सिन गा खि।

याकूब 4:9

खेराङगी गोमाबा खाबाते काम मेलेबा दुका सिन आउदी खाला पीर खिन ङु। गोता साटोला था ङु। गा खिता साटोला सुर्ता खिन देत।

१ पत्रुस 3:17

ख्‍योकोनगी लेमु काम खाईन दुक्‍पा भोगे खाबातेराङ परमेश्‍वरला लेमु लाङगीदुक सासीन बरू मेलेबा काम खाला दुक्‍पा भोगे खिता भन्‍दा लेमु काम खाला दुक्‍पा भोगे खिताराङ लेमु ईन।

१ पत्रुस 4:7

थेमे था दि जुग सिन्‍च्‍ये बेला लेपा खाबा ओत। दाक्‍पोन सेम काबूला ज्‍याक्‍ला ख्‍योकोन च्‍याङबो खाला देत। दोक खासीन ख्‍योकोन परमेश्‍वरताङ प्रार्थना खिन देता थुप्‍क्‍यो।

१ पत्रुस 5:10

टिक्‍पी दिन ख्‍योकोनगी दोक्‍ते दुक्‍पा खपे खिता फाप्‍सीनोङ ख्रीष्‍टकी खाबाते कामगी खित्‍सादु खितासम्‍म दया खित्‍कान्‍ते परमेश्‍वरगी ख्‍योकोनला सधैँभरि लाईदु मान तेराला थे खोरोङ दोन्‍दु स्‍योक सिन काताङा ओत। थेकीराङ ख्‍योकोनला सेम सेता ओत्‍सादुई लोक्‍ला आँट तेरग्‍यो, जस्‍तो ओङजीनोङ मेलेबा खित्‍सादुई जोए खाला ज्‍य्‌वाक्‍यो थेमे ख्रीष्‍टला विश्‍वास खिन देताला शक्ति तेरग्‍यो।