१ यूहन्‍ना 3:2 - जिरेल

² ङिङज्‍येते फिजावे, था ङुरूङ परमेश्‍वर फुज्‍युङ फुमु ओङगीन सिन्‍दा ओत। था तिरी ङुरूङ चुक ओङोङा सिरच्‍येते बात थोरूमसाक ङुरूङला छ्या मेत। दि बातज्‍यीकचेन ङुरूङला लेमु खाला छ्या ओत। च्‍यि सासीन येशू ख्रीष्‍ट ग्‍युरला ओङे छोमु ङुरूङोङ थे च्‍योकराङ ओङगो। च्‍यिला सासीन थे जस्‍तो दुक उस्‍तोराङ ङुरूङगी थेला थोङा ङेत्‍क्‍यो।

१ यूहन्‍ना 3:2 Iomraidhean Croise

मत्ती 5:8

सेमला पाप मेताते मिओन भाग्‍यमानी ईन। च्‍यिला सासीन थेबेकी परमेश्‍वरला थोङा ङेत्‍क्‍यो।

लूका 17:30

परमेश्‍वर ओत्‍सादुई वाबाते मि ङा देमा ग्‍युरला ओङे छोमुङ काल्‍बा च्‍योक मि नूहताङ लोतकी पालो मि च्‍योकराङ खिन देता ओङगो।

लूका 20:36

थेरू स्‍यिच्‍येते बादोङ छ्याःङ मेङगो। थेबा गाङे परमेश्‍वर दूत च्‍योकराङ ओङला देत्‍क्‍यो। परमेश्‍वरगी थेबाला स्‍यिसादुई सोम्‍बो लोक्‍च्‍येते ईन्‍देकी थेकी थेबाला थे खोरोङ फुज्‍युङ फुमु ईन सिन सिओ।

यूहन्‍ना 1:12

दोक ईन्‍सीनोङ थे वादुक सिन मान खिन थेला विश्‍वास खित्‍कान्‍ते मिओनलाचेन थेकी परमेश्‍वर फुज्‍युङ फुमु ओङच्‍येते अधिकार बिन्‍सुङ।

यूहन्‍ना 11:52

थेबे लाईदुकामा मेन, लुङबा लुङबाला देता ओताते परमेश्‍वर फुज्‍युङ फुमु गाङेला डिक्‍पा खाला सेमज्‍यीकराङ खाला देत ज्‍युताला थे थोक खाला स्‍यिइओ सिन कैयाफेकी थोक साबा ओतान।

यूहन्‍ना 17:24

आबा, खुई ङाला ङिङज्‍ये खित्‍च्‍येते ईन्‍देकी दि सा नाम ज्‍वा भन्‍दा गोमामेईराङ खुई ङाला छ्येज्‍यीक मान बिन्‍दा ओतान। था खुई ङे लाःक्‍तु जिम्‍मा बिन्‍दाते मि जतिङ ङा जहाँ देत्‍कीदुक, थेरूराङ देता ङेत्‍ला दिबाबरीकी ङा होथोक खाईन मान ङेत्‍कीन देताते थोङा ङेत्‍स्‍यीत सिरच्‍येते ङे सेम ओत।

रोमी 8:16

थेमे दाक्‍पोन परमेश्‍वर फुज्‍युङ फुमु ओङगीन सिन्‍दा ओत सिन ङुरूङला छ्या ओत। दि बात पक्‍काराङ ईन सिन ङुरूङला परमेश्‍वर आत्‍मेकीङ साबा ओत।

रोमी 8:18

था तिरी परमेश्‍वरगी ङुरूङला थोक खाला मान बिन्‍ला थे खोरोङगी ज्‍वा चाला च्‍योकराङ लेमु जोच्‍येते बात सम्‍झे खासीन थरिङोला ङुरूङगी भोगे खिता फाप्‍च्‍येते पीरताङ दुक्‍पाका च्‍यि ईन्‍देरो, ङालानी दिनी छ्याःङ मेन सिराच्‍योक लाङगीदुक।

रोमी 8:19

दोक खाला था ङीमाई परमेश्‍वरगी गाङेकी थोङच्‍या खाला थे खोरोङ फुज्‍युङ फुमुला थे खोरोङगी ज्‍वा चाला च्‍योकराङ लेमु जोच्‍येते दिन ओङगो। मि ईन्‍स्‍यीत, जीव जन्‍तु ईन्‍स्‍यीत परमेश्‍वरगी जोबातेबरी जेसुकै थे दिन नाम लेबोङा सिन गुकीनराङ देता ओत।

रोमी 8:29

च्‍यि सासीन थेकी थेबाला थे खोरोङ फुज्‍युङ च्‍योकराङ लेमु ज्‍वाप सिन गोमामेई छाने खाबा ओतान। थे खोरोङ फुज्‍युङचेन छ्येते फुज्‍युङ च्‍योकराङ ओङला थेते न्‍वातेबा काल्‍बेई ओङस्‍यीत सिन परमेश्‍वरगी होथेबाला थोक खाईन छाने खाबा ओतान।

१ कोरिन्‍थी 13:12

परमेश्‍वर दोकस्‍यिकराङ दुक सिन थरिङोलाचेन ङुरूङगी टिक्‍पी टिक्‍पीकामा थोङच्‍येते ऐनाला थोङाच्‍योक खाला थोङगो। था तिरीचेन थे दोकस्‍यिक ओताक्‍वा सिन थेला ठामासोमुला मिगी दोन्‍दुराङ थोङगो। परमेश्‍वर सु ईन्‍दे, थेकी चुक खाला काम खिते सिरच्‍येते बात थरिङोला ङे टिक्‍पी टिक्‍पीकामा छ्या स्‍येबा ओत। थेकी ङाला दि मि दोक्‍ते ईन सिन छ्या स्‍येबाच्‍योक खाला था तिरीचेन परमेश्‍वर दोक्‍ते दुका, थेकी दोकराङ खाला काम खित्‍च्‍याक्‍वा सिन ङे गाङे लेमु खाला छ्या स्‍येक्‍यो।

१ कोरिन्‍थी 15:49

थोक ईन्‍देकी ङुरूङ गाङेते थरिङोले जीउचेन आदम जीउ च्‍योक्‍तेराङ ईन। थरिङोले जीउ ओता च्‍योकराङ था तिरीचेन ङुरूङगी ख्रीष्‍टते च्‍योक्‍ते जीउ ङेत्‍क्‍यो।

१ कोरिन्‍थी 2:9

दि बात थेबा सुङगीङ छ्या मास्‍येसीनोङ परमेश्‍वर बातला चुक सिन टिला दुका सासीन “सुङगीङ माथोङाते, माथोबाते थेमे मिकी दोक ओङगीता सिन नोमुङ विचारराङ माक्‍याबाते कामतेबा परमेश्‍वरगी थे खोरोङला ङिङज्‍ये खित्‍कान्‍ते मिओनला खाला तेरग्‍यो सिन ठीक खाबा ओत,” सिन साला दुक।

२ कोरिन्‍थी 3:18

प्रभु ख्रीष्‍टकी ङुरूङ सेम खुदुक जोकीन बिन्‍नामेकी ङुरूङगी सुङताङ छ्याःङ बात बोङा माफाबो। ङुरूङला ताला मिओनगी ख्रीष्‍टताङ चुक छ्येज्‍यीक शक्ति ओता ईन्‍दाका सिन छ्या स्‍येक्‍यो। थेकी ङुरूङला थे खोरोङ च्‍योकराङ लेमु जोइन गाल्‍नामेई ङुरूङ झन झन प्रभु ख्रीष्‍ट च्‍योकराङ लेमु डुइन डुइओ। ङुरूङला दोक खित्‍कान्‍ते प्रभु ख्रीष्‍ट ईन। थेत्ताङ परमेश्‍वर आत्‍मा दोक्‍पोईराङ ईन।

२ कोरिन्‍थी 4:17

थरिङोला टिक्‍पी दिन दोक्‍ते दुक्‍पा भोगे खिता फाप्‍सीनोङ दोक खाईन सिन्‍नामेईनी परमेश्‍वरगी ङेराङला सधैँभरि लाईदु मान बिन्‍ला थे खोरोङगी ज्‍वा चाला च्‍योकराङ लेमुका जोइओ। होथे बात सम्‍झे खित्‍जीन ङ्योकोनलानी थरिङोला टिक्‍पी दिन ङेराङगी भोगे खिन ओताते होदोक्‍ते पीरताङ दुक्‍पा छ्याःङ मेन सिराच्‍योक लाङगीदुक।

गलाती 3:26

येशू ख्रीष्‍टला विश्‍वास खाबेकी खित्‍सादु था ख्‍योकोन गाङेराङ परमेश्‍वर फुज्‍युङ फुमु ओङाते ईन।

गलाती 4:6

दोक खाईन ख्‍योकोन थे खोरोङ फुज्‍युङ फुमुराङ ओङा ओतेकी परमेश्‍वरगी ख्‍योकोनला थे खोरोङ फुज्‍युङ आत्‍मा बिन्‍सुङ। ङुरूङ सेमगी नाङ ओताते थे आत्‍मे छ्य्‌वापेकीराङ परमेश्‍वरला ङुरूङ दाक आबा सिन सिओ।

फिलिप्‍पी 3:21

ङुरूङ जीउ प्रभु येशू ख्रीष्‍टकीते सोम्‍बो लोक्‍जीन ओताते जीउ च्‍योक मेत। थोगी ङुरूङ नेइओ, दुक्‍पा ओङगो थेमे ङुरूङ स्‍यिनामेई रूल्‍ला डुइओ। ईन्‍सीनोङ था प्रभु येशू ख्रीष्‍ट ग्‍युरगीन वानामेई थेकी ङुरूङ जीउ थे खोरोङते च्‍योकराङ लेमु जोइओ। जेसुकैला थे खोरोङ अधीनला ज्‍य्‌वाच्‍येते शक्तिकी थेकी दोक खिओ।

कलस्‍सी 3:4

ङुरूङला साम्‍बाते जुनी तेरकान्‍ते ख्रीष्‍ट था तिरी गाङेकी थोङच्‍या खाला देमा ग्‍युरला ओङगो। थेजीनराङ ख्‍योकोन परमेश्‍वरगी ज्‍वा चालाच्‍योक लेमु गाल्‍गीन मान ङेत्‍कीन थेत्ताङ ङ्योम्‍बु ओताते गाङेकी थोङगो।

हिब्रू 9:28

थोक ईन्‍देकी मि काल्‍बेईला थेबेकी खाबाते गाङे पापदुकी डेलाला ख्रीष्‍टोङ बाजिईकामा थे खोरोङ ज्‍यान बिन्‍गीन स्‍याप्‍ते ईन। था थे लोक्‍ला देमा ग्‍युरला ओङगो। थोक खाला ओङच्‍येते लोक्‍ला गोमा च्‍योकराङ मि पापकी सजाय भोगे खाला स्‍याप्‍ला मेन। थानी ङीमाई थे ग्‍युरला ओङगो सिन गुकीन देताते मिओनला पूरो खाला पापदुकी टाल्‍ला स्‍वर्गने देत खेराला लिन्‍दालाका ओङच्‍येते ईन।

२ पत्रुस 1:4

थेकी जमान खाईन तेरग्‍यो साबाते आशी ङेत्‍नामेई ङुरूङगी खोपरोङ सेम मेलेबा ओतेकी दि सा लुङबे मिओनगी च्‍योक दाक्‍पोन सेमला लाबा लाबा मिक्‍किता खाला थेकी खिता च्‍योकराङ लेमु खिता थुप्‍क्‍यो।

१ यूहन्‍ना 2:28

थेमे था फिजावे, ख्‍योकोन येशू ख्रीष्‍टताङ डिक्‍लाराङ देत। थोक खाईन देत्‍सीन थे ग्‍युरला ओङे छोमु सजाय ङेत्‍कीता सिन छ्याःङ ज्‍यीबा थेमे ङोचा मिक्‍किता खाला ङुरूङ थे दोन्‍दु ड्वा थुप्‍क्‍यो।

१ यूहन्‍ना 2:7

ङिङज्‍येते फिजावे, प्रभु येशूकी खि सिन कोताते ङे टिगीन ओताते दि बात ख्‍योकोनगी गोमा माथोबाते बातनी मेन। दि बात ख्‍योकोनगी थेला विश्‍वास खिता छोमुमेईराङ थोबाते बात ईन। दि बातचेन ख्‍योकोनगी थोबा ओताते गा लाङच्‍येते बातराङ ईन।

१ यूहन्‍ना 3:1

लो विचार खिते, आबा परमेश्‍वरगी ङुरूङला चुक आउदी ङिङज्‍ये खासुङा। थेकी थोक आउदी ङिङज्‍ये खाईन ङुरूङला थे खोरोङ फुज्‍युङ फुमु ईन सिओ। ईन्‍दाबोङ ङुरूङ थे फुज्‍युङ फुमुराङ ईन। दि सा लुङबे मिओनगी ङुरूङ चुक्‍ते मि ईन्‍दे सिन छ्याःङ छ्या मेस्‍येओ। च्‍यिला सासीन थेबेकी परमेश्‍वर सु ईन्‍दे सिन छ्या मास्‍येसुङ।

१ यूहन्‍ना 3:10

सु सु परमेश्‍वर फुज्‍युङ फुमु ईन्‍दाका सु सु शैतान सन्‍तान ईन्‍दाका सिन ङुरूङगी लेमु खाला डेला थुप्‍क्‍यो। चुक खाला सासीन लेमु काम मिक्‍किकान्‍ते मिङ दाक्‍पोन आज्‍यो न्‍वाला ङिङज्‍ये मिक्‍किकान्‍ते मिङ परमेश्‍वर फुज्‍युङ फुमु ईनराङ मेन।

१ यूहन्‍ना 3:21

ङिङज्‍येते फिजावे, दाक्‍पोनते ङे च्‍यिला थोक खाताका सिन मेलेबा लाङच्‍येते छ्याःङ मेत्‍सीन ङुरूङला परमेश्‍वर दोन्‍दु छ्याःङ ज्‍यीबा मालाङो।

१ यूहन्‍ना 5:1

येशू परमेश्‍वरगी तोङगो साबाते ख्रीष्‍ट ईन सिन पत्ते खित्‍कान्‍ते मि गाङे परमेश्‍वर फुज्‍युङ फुमु ओङाते मि ईन। आबा परमेश्‍वरला ङिङज्‍ये खित्‍कान्‍ते मिकी थे फुज्‍युङ फुमुलाङ ङिङज्‍ये खिओ।

छ्या स्‍ये च्‍युताते बात 2:28

थेमे थेला ङा ङोमु पाखाला स्‍यारच्‍येते कार्मा तेरग्‍यो।

छ्या स्‍ये च्‍युताते बात 22:4

थेबा गाङेकी परमेश्‍वर छ्येत थोङगो। थेमे थेबा गाङे टालाला परमेश्‍वर मिन टिबा ओङगो।