१ कोरिन्‍थी 4:5 - जिरेल

⁵ थोगी ङा ख्‍योकोनला च्‍यि सिते सासीन प्रभु येशू ग्‍युरगीन मावाथुप ख्‍योकोन सुङगीङ दि दोक्‍तेताङ थे थोक खित्‍कान्‍ते सिन ज्‍येनगी गल्‍ती मातेन। था वाला च्‍याला प्रभु येशूकी मिकी ज्‍येनगी छ्या मेस्‍येबा खाईन खाबाते काम ईन्‍स्‍यीत, खोपरोङ सेमलाकामा विचार खाबाते बात ईन्‍स्‍यीत, लेमु मेलेबा चुक ईन्‍दे सिन डेल्‍ग्‍यो। थेमे लेमु काम खित्‍कानलाचेन गाङेला परमेश्‍वरगी खुई आउदी लेमु खासुङ सिन सिओ।

१ कोरिन्‍थी 4:5 Iomraidhean Croise

मत्ती 10:26

थोक ईन्‍सीनोङ खेराङला मेलेबा खित्‍कान्‍तेबाताङ ज्‍यीबा माकेत। च्‍यिला सासीन ज्‍येनताङ छ्यागीन ईप्‍कीन खाबाते कामताङ बादोङ ङीमा लेनज्‍यीक गाङेकी छ्या स्‍येक्‍यो। थोकराङ खाला ब्‍वाकीन ज्‍याक्‍पाते बादोङ तिरी दाक छ्या स्‍येक्‍यो।

मत्ती 24:30

थेमे थे बेलाला नामने ताजीन परमेश्‍वर ओत्‍सादुई वाबाते मि ङा ओङा खाबाते थोङगो। थे छोमु ङा छ्येज्‍यीक शक्ति ङेत्‍ला मिगी ताराङ मुथुप्‍च्‍या नाम्‍दाककी झिलिमिली गाल्‍ला मुक्‍पे लाक्‍तु देत्‍ला स्‍वर्गनेकी देमा ओङा थोङला था सजाय ङेत्‍क्‍यो सिन ज्‍यीबेकी लुङबा लुङबे मि गाङेराङ झ्‍याउँ झ्‍याउँ ङुइओ।

मत्ती 24:46

तिरी मालिकते ग्‍युरला ओङजीन थेकी साबा साबा काम खिन देता ओत्‍सीन थेला लेमु ओङगो।

मत्ती 25:21

थोक सिरजीन मालिकतेकी थेला ‘खुई आउदी लेमु खाईन काम खादुक। खो मालिककी साबा च्‍योकराङ खित्‍कान्‍ते मि दुका। ङे खोल्‍ला चाँदी डबल थोस्‍यिककामा बिन्‍गीन ज्‍याक्‍सीनोङ खुई थे लेमु खाईन चले खाबेकी था ङा खोल्‍ला झन थे भन्‍दाङ काल्‍बेई पैसे जिम्‍मा तेरग्‍यो। था खो ङा च्‍योकराङ गा खिन ङात्ताङ ङ्योम्‍बुराङ देता ङेत्‍क्‍यो,’ सिन सादुक्‍लो।

मत्ती 25:23

मालिकतेकी थेलाङ ‘खुई आउदी लेमु खादुक। खो मालिककी साबा च्‍योकराङ खित्‍कान्‍ते मि दुका। ङे खोल्‍ला चाँदी डबल थोस्‍यिककामा बिन्‍गीन ज्‍याक्‍सीनोङ खुई थे थोक लेमु खाईन चले खाबेकी था ङा खोल्‍ला झन थे भन्‍दाङ काल्‍बेई पैसे जिम्‍मा तेरग्‍यो। था खोङ ङा च्‍योकराङ गा खिन ङात्ताङ ङ्योम्‍बुराङ देता ङेत्‍क्‍यो,’ सिन सादुक्‍लो।

लूका 6:37

थेमे ख्‍योकोनगी ज्‍येनला फलाना दोक्‍ते, थे थोक्‍ते सिन मासेर। थोक खासीन परमेश्‍वरगी ख्‍योकोन दोषी ईन सिन सिओ। थेमे ख्‍योकोनगी फलानेकी थोक खाबेकी थेकी सजाय ङेताराङ फाप्‍क्‍यो सिन मासेर। दोक खासीन परमेश्‍वरगीङ ख्‍योकोनला खेराङ कामगी सजाय तेरग्‍यो। बरू ख्‍योकोनला सुइँदेकी खइँदा मेलेबा खासीन थेबाला माफ बिन। दोक खासीन परमेश्‍वरगी ख्‍योकोन पापोङ माफ तेरग्‍यो।

यूहन्‍ना 21:22

थोक सिरजीन थेकी “थे था तिरी ङा ग्‍युरला ओङ ओङसाक सोन्‍लाराङ देत्‍स्‍यीत सिरच्‍येते ङे सेम ओत्‍सीनोङ दि बात खोल्‍ला च्‍यिला छ्या स्‍येबा फाप्‍सुङारो? खो ङात्ताङ ख्‍योम,” सिन सिदुक।

यूहन्‍ना 21:23

थोगी ज्‍येन चेलातेबेकीचेन था होथे चेला मिस्‍यिओ सिन बात खिताला स्‍यूसुङ। थे स्‍यिराङ मिस्‍यिओ सिनचेन येशूकी साबा मेतान। थेकी खालि “थे था तिरी ङा ग्‍युरला ओङ ओङसाक सोन्‍लाराङ देत्‍स्‍यीत सिरच्‍येते ङे सेम ओत्‍सीनोङ दि बात खोल्‍ला च्‍यिला छ्या स्‍येबा फाप्‍सुङा?” सिन साबा ओतान।

यूहन्‍ना 5:44

ख्‍योकोन ज्‍येनगी खेराङला लेमु मि ईन साकीन मान खासीन गा खिदुक। परमेश्‍वर खेराङताङ खुशी ओङला थेकी तेरच्‍येते मान ङेत्‍स्‍यीत सिरच्‍येतेनी ख्‍योकोन छ्याःङ विचारराङ मिक्‍किदुक। दोक ईन्‍देकी ख्‍योकोनगी ङाला परमेश्‍वरगी ताङाते ईन सिन चुक खाला विश्‍वास खिता थुप्‍कीतेरो?

रोमी 14:4

थोगी ज्‍येनला स्‍या सा मेङगो सिन सिरकान्‍ते खो सु ईन्‍देरो? ना खोका थे मालिक ईन्‍दे? प्रभु येशू ख्रीष्‍टराङ थेबे मालिक ईन्‍देकी थेकीकामा थेबेकी पाप खाबाते ईन्‍दाना मेन्‍दे सिन सिरा ङेत्‍क्‍यो। थेराङ थेबेकी स्‍या सोबाते मेलेबा मेन सिन सिरकान्‍ते ईन्‍देकी स्‍या सोला थेबाला पा फोकराङ मोफोगो।

रोमी 2:1

दि बात थोजीन छ्यि थेबा मेलेबा मि ईन सिरकान्‍तेबा ख्‍योकोन जोराङ ईन्‍सीनोङ ङेनी छ्याःङ मेलेबा खाबा मेत सिन सुङगीङ सिरा मेङेदो। थेबेकी मेलेबा काम खाबेकी सजाय ङेताराङ फाप्‍क्‍यो सिन साबेकी ख्‍योकोनोङ दोषी ईन। च्‍यि ख्‍योकोनोङ होथेबेकी खित्‍च्‍येते च्‍योक्‍ते कामराङ खित्‍कान मेनरो?

रोमी 2:16

ङे साबाते बातओन दोकराङ ईन सिन था तिरी न्‍याय खिते छोमु छ्या स्‍येक्‍यो। थे छोमु परमेश्‍वरगी मि गाङे सेमगी बात खाङ लेमु ईन्‍दे, खाङ मेलेबा ईन्‍दे सिन येशू ख्रीष्‍टला डेल च्‍युत्‍ला न्‍याय खित ज्‍युत्‍क्‍यो। था ङीमाई दोक ओङगो सिनचेन ङे लोप्‍कीन ओताते गा लाङच्‍येते बातला साबा ओत।

रोमी 2:29

परमेश्‍वरगी छाने खाबाते मि ओङालानी जीउला थे खतकी चिनु जोला मेन, दाक्‍पोन सेमका लेमु ओङा फाप्‍क्‍यो। परमेश्‍वर नियमला खतकी चिनु जो सिन टिबाते बात ङेन्‍ला मि सेम लेमु ओङच्‍येते मेन। परमेश्‍वर आत्‍मेकीकामा मि सेम लेमु जोइओ। होदोक्‍ते मिलाचेन ज्‍येनगी मान माक्‍यासीनोङ परमेश्‍वर थेबाताङ खुशी ओङला थेबाला मान तेरग्‍यो।

रोमी 2:7

था तिरी परमेश्‍वरगी खोपरोङला थेकी ज्‍वा चाला च्‍योकराङ लेमु जोइओ थेमे मान बिन्‍ला नोमुङ मिस्‍यिच्‍येते जुनी तेरग्‍यो सिन थेकी साबाते ङेन्‍ला लेमु कामकामा खिन देत्‍कान्‍ते मिओनलाचेन थेकी नोमुङ मिसिन्‍च्‍येते जुनी तेरग्‍यो।

१ कोरिन्‍थी 1:7

थोक ईन्‍देकी था प्रभु येशू ख्रीष्‍ट नामराङ ग्‍युरला वाओङा सिन गुला देत्‍जीन ख्‍योकोनला गोच्‍येते परमेश्‍वर आत्‍मेकी तेरच्‍येते सीपताङ शक्ति ख्‍योकोनगी गाङे ङेता ओत।

१ कोरिन्‍थी 11:16

ङे साबाते दि बातला सुइँदा टेकाटेउरी खिता छोल्‍गीदुक सासीन खित्‍स्‍यीत। परमेश्‍वरगी सिर च्‍युताते बात सिरजीन थेमे प्रार्थना खित्‍जीन चुक खित्‍च्‍ये सिरच्‍येते बातला दि बाई ङ्योकोनगी सिरच्‍येते छ्याःङ बात मेत। थेमे ठाउँ ठाउँला जम्‍मा ओङकान्‍ते परमेश्‍वर मिओनतेङ ज्‍येन खुदुक चलन ओतराङ मेत।

१ कोरिन्‍थी 11:26

थोगी प्रभु येशू ग्‍युरला ओङ ओङसाक जहिले जहिले ख्‍योकोनगी प्रभु भोज स्‍योबेन सेइदुक थेमे अंगूर छ्याङ थुङगीदुक थोक खित्‍जीन खित्‍जीन प्रभु येशू ङुरूङ लाईदु स्‍या ओतान सिन गाङेकी छ्या स्‍येक्‍यो।

१ कोरिन्‍थी 15:23

थेकी दोक खित्‍च्‍येते पालो पालो खाला खिओ। च्‍यि सासीन गाङे भन्‍दा गोमा थेकी ख्रीष्‍टला सोम्‍बो लोक्‍सुङ। था दि तिरीचेन थेकी ख्रीष्‍टला विश्‍वास खित्‍कान्‍ते मिओनला सोम्‍बो लोइओ। थेबाला सोम्‍बो लोक्‍च्‍येते ख्रीष्‍ट दुरू ग्‍युरला ओङे छोमु ईन।

१ कोरिन्‍थी 3:13

थेमे खाम्‍बा जोकान्‍ते मिओनगी सु सुकी चुक खाईन जोबा ओता ईन्‍दाका सिन ङीमाई गाङे छ्या स्‍येक्‍यो। येशू ख्रीष्‍ट ग्‍युरला वाला मि गाङे न्‍याय खिते छोमु सु सुकी चुक खाबा ओता ईन्‍दाका सिन डेल्‍ग्‍यो। सु मि काम चुक दुका सिन थे छोमु मे नाङ लुक्‍ला तेइओ।

१ कोरिन्‍थी 3:14

थोक खाला मे नाङ लुजीनोङ सुइँदा मिकी थे जगी लाक जोबाते खाम्‍बा छिगीन थाला मागाल्‍सुङ सासीन थेलाचेन परमेश्‍वरगी इनाम तेरग्‍यो।

१ कोरिन्‍थी 3:8

बिरूवा जुकान्‍तेताङ छ्यु लुकान्‍ते ङिकाराङ थोजोराङ ईन। परमेश्‍वरगी था तिरी गाङेला दाक्‍पोन दाक्‍पोनगी खाबाते काम ताला इनाम तेरग्‍यो।

२ कोरिन्‍थी 10:18

बातचेन दिराङ ईन, मिकी ङा दोक्‍ते ईन, ङे दोक खाबाप थोक खाबाप साला छ्याःङ फाइदा मेत। प्रभु परमेश्‍वरगी दि मि लेमु मि ईन सिन सासीन थे बात खुदुकराङ ईन।

२ कोरिन्‍थी 10:9

थेमे ङे चिट्ठीला टिबाते बाततेबा ख्‍योकोनला ज्‍यीबा लोङाप सिन टिबाते दुका सिराच्‍योक मालाङस्‍यीत।

२ कोरिन्‍थी 4:2

ङ्योकोन ईप्‍ला छ्याक्‍ला ज्‍येनला ठगे खित्‍च्‍येते च्‍योक्‍ते ङोचा लाङच्‍येते काम मिक्‍किओ, मिला छक्‍के खिताला ईनराङ मेन्‍दे बात मोलोबो, ङ्योकोननी परमेश्‍वर बात खुदुक जोला लोप्‍च्‍येतेङ मिक्‍किओ। परमेश्‍वर दोन्‍दुराङ काम खाबाच्‍योक खाला ङ्योकोननी सत्‍यते बातला जे साला दुक थेकामा लोप्‍क्‍यो। थोक ईन्‍देकी ङ्योकोनगी सत्‍यते बातकामा लापा ओत सिन मि गाङेकी सिरा थुप्‍क्‍यो।

२ कोरिन्‍थी 5:10

च्‍यिला सासीन ख्रीष्‍टकी न्‍याय खिते छोमु छ्ये टेक्‍टे जोराङ ईन्‍सीनोङ ङुरूङ गाङेराङ थे दोन्‍दु ड्वा फाप्‍क्‍यो। थेमे थे छोमु थेकी ङुरूङगी दि जुनीला लेमु मेलेबा चुक खाला दुका थे ताला सु सुला च्‍यि खिता फाप्‍च्‍या दुका थोकराङ खिओ।

१ थिस्‍सलोनिकी 5:2

चोर दि छोमुराङ ओङगो सिरा माथुपा च्‍योकराङ प्रभु येशू ग्‍युरला ओङच्‍येते दिनोङ दिराङ ईन सिन सुङगीङ सिरा मुथुबो सिन ख्‍योकोनला लेमु खाला छ्याराङ ओत।

हिब्रू 4:13

परमेश्‍वरताङ छ्याक्‍ला ईप्‍ला सुङगीङ छ्याःङ खिता मुथुबो। सा नाम खाङ नाम खापा च्‍यि ओङगीन दुका, सुई च्‍यि खिका सिन थेकी गाङे थोङला छ्या स्‍येक्‍यो। थेमे ङीमा लेनज्‍यीक मि गाङेकी दाक्‍पोनगी खाबाते लेमु मेलेबा गाङे कामताङ बातकी हर हिसाब थेला तेरा फाप्‍क्‍यो।

याकूब 4:11

आज्‍यो न्‍वावे, ख्‍योकोनगी फलाना दोक्‍तेताङ थोक्‍ते सिन दोक्‍पोईकी ज्‍येनज्‍यीक बात माकेत। दाक्‍पोन आज्‍यो न्‍वाकी बात खिन ख्‍याम्‍कान्‍ते कि खो दोषी ईन सिन सिरकान्‍ते मिकीचेन परमेश्‍वर नियमला साबाते दि दि बात लेमु मेन सिन थे नियमराङ ठीक मेन साबाते ईन। थोक खित्‍कान्‍ते मिकीनी थे नियम ङेन्‍दा साटोला थे लेमु मेन सिनका साबाते ईन।

याकूब 5:7

थेमे आज्‍यो न्‍वावे, प्रभु येशू ग्‍युरला ओङ ओङसाक ख्‍योकोन सेम मेसेता खाला गुलाराङ देत। खेती खित्‍कान्‍ते मिङनी बाली लेस्‍यीत सिन समय समयला देक्‍च्‍येते छ्यार्बा देक देकसाक गुलाराङ देत्‍क्‍यो।

याकूब 5:9

थेमे आज्‍यो न्‍वावे, परमेश्‍वरगी खेराङला दोषी ईन सिन मिसिरस्‍यीत सिन खुई दि लेमु माक्‍यासुङ, थे लेमु माक्‍यासुङ सिन दोक्‍पोईकी ज्‍येनज्‍यीक बात माकेत। मि गाङे न्‍याय खित्‍कान्‍ते परमेश्‍वर खेराङ दोन्‍दुराङ ओत सिरच्‍येते बात टोक माज्‍येत।

१ पत्रुस 1:7

मेला लुगीन ताकीन सक्‍कली दुका सिन छ्या स्‍येबाते सेरोङ ङीमाई छ्याःङ काम लै मिक्‍किच्‍या डुइओ। सेर आउदी दामी चीज ईन्‍सीनोङ दि भन्‍दाङ ख्‍योकोनगी येशू ख्रीष्‍टला खिन ओताते विश्‍वास झन आउदी छ्ये ईन। दोक्‍ते परी परीतेन्‍दे दुक्‍पा ओङजीनराङ ख्‍योकोनगी थेला पक्‍काराङ खाईन विश्‍वास खाबाते ईन्‍दाकाना मेन्‍दाका सिन छ्या स्‍येक्‍यो। जति दुक्‍पा ओङजीनोङ सेम मेसेता खाईन थेला विश्‍वास खिनराङ देत्‍सीन था थे ग्‍युरला ओङे छोमु परमेश्‍वरगी ख्‍योकोनला आउदी लेमु खासुङ सिन साला थे खोरोङगी ज्‍वा चाला च्‍योकराङ लेमु जोला मान तेरग्‍यो।

१ पत्रुस 5:4

दोक खासीन था येशू ख्रीष्‍ट ग्‍युरला ओङजीन थेकी ख्‍योकोनला इनाम सिन छ्येज्‍यीक मान तेरग्‍यो। थेकी थोक खानामेई ख्‍योकोन सधैँ मान ङेत्‍ला देता ङेत्‍क्‍यो। येशू ख्रीष्‍टचेन ज्‍येन गोठाला गाङेला कोत्‍कान्‍ते छ्येते गोठाला च्‍योक्‍ते ईन।

२ पत्रुस 3:12

परमेश्‍वरगी मि गाङे न्‍याय खित्‍च्‍येते थे दिन होत्ता ओङस्‍यीत सिन ख्‍योकोन होदोक खाला लेमु कामताङ बात खिन देत। थे छोमु नामचेन मेकी छिक्‍ला सोला डुइओ। थेमे दागार, ङीमाताङ कार्मातेबाङ मे रापकी खित्‍सादु बिले खाला खतम डुइओ।

२ पत्रुस 3:4

“थे याङराङ दुरू ग्‍युरला ओङगो साबाते बात खै खापा तोरसुङा? ज्‍युज्‍यु पुर्खा गाङे स्‍यिइन गाल्‍सुङ। ईन्‍सीनोङ दि सा लुङबा जोजीनमेई ओता च्‍योकराङ जेसुकै थोककी थोकराङ दुक,” सिन सिओ।

यहूदा 1:14

होथोक्‍ते मिओनला चुक ओङगीते सिन आदम पुस्‍ता दुईन तिरी मि हनोककी परमेश्‍वरगी सिर च्‍युताते बात खिन “दि बात ङेन। च्‍यि सासीन था प्रभु परमेश्‍वर ङोला ङ्वा मुथुप्‍च्‍या थे खोरोङ दूततेबा ङ्योम्‍बु टीला

छ्या स्‍ये च्‍युताते बात 1:7

लो दि बात टोक माज्‍येत। च्‍यि सासीन येशू ख्रीष्‍ट था मुक्‍पे नाङ खाला देमा ओङगीन ओत। थे दोक खाला ओङगीन ओताते सा लुङबे मि गाङेकी थोङगो। थेला बार्सा रोपे खित्‍कान्‍ते मिओन समेतकीङ खोपरोङ मिगीराङ थोङगो। थे थोक खाला दुरू ओङजीन सजाय ङेत्‍क्‍यो सिन ज्‍यीबेकी खित्‍सादु दि सा लुङबे मि गाङेराङ झ्‍याउँ झ्‍याउँ ङुइओ। दोकराङ ओङस्‍यीत। आमेन।

छ्या स्‍ये च्‍युताते बात 20:12

थेमे ङे छ्ये टेक्‍टे स्‍याप्‍ते मिबरी गाङेला थे सिंहासन दोन्‍दु लाकीन देता ओताते थोङसुङ। थेरू किताबओन खोले खासुङ। थे तिरी ज्‍येनज्‍यीक किताब खोले खासुङ। दि तिरी किताबचेन नोमुङ मिसिन्‍च्‍येते जुनी ङेत्‍कान्‍ते मिओन मिन टिबाते किताब ओतान। मिओनगी खोपरोङ जुनी खाङ खाबाते लेमु मेलेबा गाङे काम थे किताबओनला टिबा ओतान। थेबेकी खाबाते काम ताकीनराङ थेबा गाङेते न्‍याय खासुङ।