१ कोरिन्‍थी 2:7 - जिरेल

⁷ ङ्योकोन ख्‍योकोनला थेकी गोमा सुङलाङ छ्या स्‍ये च्‍युता मेताते परमेश्‍वर बुद्धि बातज्‍यीक सिरामीन। दि बात गोमा परमेश्‍वरगी मिओनताङ ब्‍वाकीन ज्‍याक्‍पा ओतान। च्‍यि सासीन दि साताङ नाम ज्‍वा भन्‍दा गोमामेकीराङ थेकी ङुरूङला मान बिन्‍ला थे खोरोङगी ज्‍वा चाला च्‍योकराङ लेमु जोइओ सिन साबा ओतान।

१ कोरिन्‍थी 2:7 Iomraidhean Croise

मत्ती 11:25

थेमे थे बेलालाराङ गाङेकी थोच्‍या खाईन येशूकी “आबा, खो दि स्‍वर्गताङ पृथ्‍वीते मालिक ईन। ङा खुईते जय जय खिओ। च्‍यिला सासीन स्‍वर्गे राज्‍य बात खुई पढे माक्‍याबाते थेमे काल्‍बा बात छ्या मेस्‍येकान्‍ते मिओनला लेमु खाईन खो च्‍युत्‍सुङ। दि बातनी खुई आउदी बुद्धि ओतातेताङ काल्‍बेई पढे खाबाते छ्ये छ्ये मिलाङ खो च्‍युता मेतान।

मत्ती 13:35

थोक खाईन थाङबोका परमेश्‍वरगी थे खोरोङ बात खित्‍कान्‍ते छ्य्‌वापेकी साबाते दि बात साबा च्‍योकराङ ओङसुङ। थेकी “ङा मिओनला कथा लाःप्‍लाकामा ङाराङ बात लोप्‍क्‍यो। थोक खाला ङा थेबाला दि साताङ नाम जोजीनमेकी थातासाक छ्या स्‍ये च्‍युता मेताते बातओन लाप्‍ला तेरग्‍यो,” सिन साबा ओतान।

रोमी 11:25

थेमे याङराङ आज्‍यो न्‍वावे, परमेश्‍वरगी इस्राएलीओनला चुक चुक खिते सिरच्‍येते बात ख्‍योकोनगी छ्या स्‍येस्‍यीत सिन ङा दि बातज्‍यीक सिरामीन। दि बात ख्‍योकोनगी खेराङ बुद्धि खिये खाला छ्या स्‍येबा मुथुबो। थेकी गोमा सुङलाङ छ्या स्‍ये च्‍युता मेताते बात च्‍यि ईन्‍दे सासीन काल्‍बा च्‍योक इस्राएलीकी परमेश्‍वरगी साबाते पटक्‍क ङेन्‍च्‍ये सेम माक्‍यासीनोङ थेबा तिरीसाक दोकराङ खिन मेदेदो। परमेश्‍वरगी ज्‍येन ज्‍येन जातकी मि नाङदुकी थे खोरोङला विश्‍वास खिओ साबाते मि जति थे खोरोङ छ्य्‌वापा लै खाईन मासिनथुपकामा थेबा दोक खिन देत्‍क्‍यो।

रोमी 8:29

च्‍यि सासीन थेकी थेबाला थे खोरोङ फुज्‍युङ च्‍योकराङ लेमु ज्‍वाप सिन गोमामेई छाने खाबा ओतान। थे खोरोङ फुज्‍युङचेन छ्येते फुज्‍युङ च्‍योकराङ ओङला थेते न्‍वातेबा काल्‍बेई ओङस्‍यीत सिन परमेश्‍वरगी होथेबाला थोक खाईन छाने खाबा ओतान।

रोमी 8:30

थेमे परमेश्‍वरगी गोमामेई थे खोरोङ फुज्‍युङ च्‍योकराङ ज्‍वा चालाते मिओनला थे खोरोङ दोन्‍दु स्‍योक सिन काताङगीन च्‍याकीन दोषी मेन सासुङ। थोक खानामेई थेकी थेबाला मान बिन्‍गीन थे खोरोङगी ज्‍वा चाला च्‍योकराङ लेमु जोसुङ।

१ कोरिन्‍थी 2:1

आज्‍यो न्‍वावे, ङा गोमा ख्‍योकोन ओत्‍सापा परमेश्‍वरगी येशू ख्रीष्‍टकी खित्‍सादु मिओन लाईदु च्‍यि खासुङा सिरच्‍येते बात लोप ओङजीन ङे आउदी पढे खाबाते मिकी च्‍योक खाईन बात माक्‍या। जे बादोङ छ्या स्‍येकान्‍ते मिकी च्‍योक खाईनोङ मालाप।

एफिसी 1:4

च्‍यि सासीन थे खोरोङ दोन्‍दु सेम खुदुक गालाते थेमे छ्याःङ गल्‍ती मेताते मि ओङस्‍यीत सिन ख्रीष्‍टकी खित्‍सादु थेकी ङुरूङला दि सा नाम ज्‍वा भन्‍दा गोमाराङ छाने खाबा ओतान। ङुरूङला ङिङज्‍ये खाईन

एफिसी 3:10

थाचेन गाङेपा जम्‍मा ओङकान्‍ते येशू ख्रीष्‍ट मिओनला ताला थे खोरोङगी थेबे लाईदु खाबाते कामतेबा चुक आउदी बुद्धि पुरे खाईन खाबाते ईन्‍दे सिन परमेश्‍वरगी स्‍वर्गने ओताते छ्ये टेक्‍टे थे खोरोङ दूत गाङेला छ्या स्‍ये च्‍युत्‍कीन बिन्‍सुङ।

२ तिमोथी 1:9

थेकीराङ ङुरूङला पापकी सजायदुकी टाल्‍गीन बिन्‍दा ओत। थेमे ङुरूङ सेम खुदुक गाल्‍ला मेलेबाते कामताङ बात सिराते छ्याःङ मिक्‍किस्‍यीत सिन थे खोरोङ दोन्‍दु स्‍योक सिन काताङा ओत। थेकी थोक खाबाते ङुरूङगी थेकी खि साबा साबाच्‍योक खाईन लेमु काम खाबेकी खित्‍सादु मेन, बरू थे खोरोङ दयेकी ङुरूङला थोक खिता चालेकी खित्‍सादुकामा ईन। येशू ख्रीष्‍ट छ्य्‌वापेकी ङुरूङ लाईदु दोक खिओ सिन थेकी दि सा नाम ज्‍वा भन्‍दा गोमाकाराङ टुङ्गो खाबा ओतान।

हिब्रू 1:2

थरिङोला दि जुग सिन्‍दे खालाचेन थेकी थे खोरोङ फुज्‍युङ छ्य्‌वापेई ङुरूङताङ बात खाबा ओत। दि सा नाम थेमे सा नाम खाङ ओताते जति गाङे परमेश्‍वरगी थे खोरोङ फुज्‍युङ छ्य्‌वापेईराङ जोबा ओतान। दोक खाईन जोबाते गाङे ङेत्‍कान्‍ते थेराङ ईन सिन परमेश्‍वरगी साबा ओत।

हिब्रू 11:3

परमेश्‍वरला विश्‍वास खितेकी खित्‍सादु थेकी दुरू दोक ओङस्‍यीत, थेरू थोक ओङस्‍यीत सिन सानामेई साबा च्‍योकराङ खाईन दि सा नाम थेमे सा नाम खाङ ओताते जति गाङे उत्‍पन्‍न ओङा ओतान सिन ङुरूङ पत्ते खिओ। दोक खाईन जोबाते थरिङोला मि मिगी थोङच्‍येते जति गोमा ओतराङ मेत्‍सीनोङ परमेश्‍वरगी दुरू दोक ओङस्‍यीत, थेरू थोक ओङस्‍यीत साकीन जोबा ओतान।

१ पत्रुस 1:11

थेबे सेमगी नाङ ओताते ख्रीष्‍टकी आत्‍मेकी ख्रीष्‍टकी देमा वाला दुक्‍पा भोगे खाला स्‍या फाप्‍च्‍येते थेमे थे दुक्‍पा भोगे खाईन सिन्‍नामेई परमेश्‍वरगी थेला छ्येज्‍यीक मान तेरच्‍येते बात थेबाला छ्या स्‍ये च्‍युत्‍नामेई था च्‍यि बेलाला चुक चुक ओङजीन परमेश्‍वरगी थोक खिताका सिन थेबेकी छ्या स्‍येबा चाला ओतान।

१ पत्रुस 5:1

थाचेन ङा ख्‍योकोन नाङ येशू ख्रीष्‍ट मिओनला ताकान्‍ते मिओनला बातज्‍यीक बात ङि सिरामीन। ङा ङाराङोङ ख्‍योकोन च्‍योकराङ येशू ख्रीष्‍ट मिओनला ताकान्‍ते मिज्‍यीक ईन। ख्रीष्‍टकी भोगे खाबाते दुक्‍पातेबा ङे गाङे ङाराङ मिगीराङ थोङाते ईन। था थे छ्येज्‍यीक शक्ति ङेत्‍ला ग्‍युरला ओङजीन ङाङ मान ङेत्‍ला थेत्ताङ देता ङेत्‍क्‍यो सिनोङ ङाला छ्या ओत। येशू ख्रीष्‍ट मिओनला ताकान्‍ते मिओन ख्‍योकोनगी ओर्च्‍ये दोक खि।

१ पत्रुस 5:10

टिक्‍पी दिन ख्‍योकोनगी दोक्‍ते दुक्‍पा खपे खिता फाप्‍सीनोङ ख्रीष्‍टकी खाबाते कामगी खित्‍सादु खितासम्‍म दया खित्‍कान्‍ते परमेश्‍वरगी ख्‍योकोनला सधैँभरि लाईदु मान तेराला थे खोरोङ दोन्‍दु स्‍योक सिन काताङा ओत। थेकीराङ ख्‍योकोनला सेम सेता ओत्‍सादुई लोक्‍ला आँट तेरग्‍यो, जस्‍तो ओङजीनोङ मेलेबा खित्‍सादुई जोए खाला ज्‍य्‌वाक्‍यो थेमे ख्रीष्‍टला विश्‍वास खिन देताला शक्ति तेरग्‍यो।

२ पत्रुस 1:3

दाक्‍पोनगी ङेताते साम्‍बाते जुनीला खिता फापाच्‍योक खिताला थेमे थेला माने खिताला खिता फाप्‍च्‍येते कामताङ बात खिताला गोच्‍येते जति गाङे परमेश्‍वरगी थे खोरोङताङ ओताते छ्येज्‍यीक शक्ति छ्य्‌वापेकी ङुरूङला बिन्‍दा ओत। थे सु ईन्‍दे, चुक्‍ते ईन्‍दे सिन थेला छ्या स्‍येबेकी खित्‍सादु थेकी ङुरूङला दोक खाईन गोच्‍येते जति बिन्‍दाते ईन। थे खोरोङताङ छ्येज्‍यीक शक्ति ओतेकी थेमे जे खित्‍जीनोङ लेमु खित्‍कान्‍ते ईन्‍देकी थेकी ङुरूङला थे खोरोङ दोन्‍दु स्‍योक सिन काताङा ओत।

छ्या स्‍ये च्‍युताते बात 13:8

थेमे दि सा लुङबे मि गाङेकी थे जन्‍तुला मान खाला छ्ये जोइओ। खालि दि सा नाम ज्‍वा भन्‍दा गोमाराङ नोमुङ मिसिन्‍च्‍येते जुनी ङेत्‍कान्‍ते मिओन मिन टिबाते किताब नाङ खोपरोङ मिन ओताते मिओनगीकामा थे जन्‍तुला मान खाला छ्ये मोजोओ। थे मिन टिबाते किताबचेन लुई रीउते ईन।