१ कोरिन्‍थी 14:3 - जिरेल

³ तर परमेश्‍वरगी सिर च्‍युताते बात खित्‍कान्‍तेकीचेन ज्‍येनतेबेकीङ खोच्‍येते बात खिओ। थेकी खाबाते बात थोला येशू ख्रीष्‍ट मिओनगी झन लेमु खाला येशूला विश्‍वास खिता थुप्‍क्‍यो, जस्‍तो ओङजीनोङ सेम सेता मेङच्‍याक्‍वा सिन छ्या स्‍येक्‍यो थेमे आँटोङ ङेत्‍क्‍यो।

१ कोरिन्‍थी 14:3 Iomraidhean Croise

लूका 3:18

होदोक्‍ते बात ज्‍येनोङ काल्‍बेई खिन यूहन्‍नेकी मिओनला परमेश्‍वर छ्य्‌वापा लै खि थेमे थेकी ख्‍योकोनला पापताङ दुक्‍पादुकी डेल्‍ग्‍यो सिन गा लाङच्‍येते बात लोप्‍कीन ओतान।

शक्ति काम 13:15

थेमे थेरू मिज्‍यीगी परमेश्‍वर नियमला टिबाते थेमे परमेश्‍वर बात खित्‍कान्‍तेबेकी टिबाते बात गाङेकी थोच्‍या खाईन पढे खासुङ। थे बाततेबा पढे खाईन सिन्‍नामेकी थे मिटिङ खित्‍च्‍येते खाम्‍बे छ्ये छ्ये मिकी आज्‍यो न्‍वावे, ख्‍योकोनला खइँदा लेमु बात सिरा सेम लाबा ओत्‍सीन थे बात दुरू जम्‍मा ओङाते मिओनला खि सिन मिज्‍यीकला पावलताङ बारनाबास देत्‍सादु ताङसुङ।

शक्ति काम 14:22

थेपा ग्‍युरला डोजीन थेबेकी गोमा खोपरोङ गालाते होथे सार सारला ओताते येशू चेलाओनला “जस्‍तोराङ ओङसीनोङ प्रभु येशूला विश्‍वास खिन देता मातोङ। परमेश्‍वर राज्‍यने ड्वाप्‍ला ङुरूङगी दुरू याङ याङ दुक्‍पा ङेत्‍क्‍यो सिरच्‍येते बात टोक माज्‍येत,” सिन आँट तेरगीन गाल्‍सुङ।

शक्ति काम 15:32

यहूदाताङ सिलासोङ ङिकाराङ परमेश्‍वर बात खित्‍कान्‍ते मि ओतान। थेबेकी थेरू आज्‍यो न्‍वाओनला चुक चुक खिता फाप्‍कीते सिन लाप्‍कीन बिन्‍गीन जस्‍तोराङ ओङसीनोङ प्रभु येशूला विश्‍वास खिन देता मातोङ सिन आँटोङ बिन्‍सुङ।

शक्ति काम 4:36

येशूला विश्‍वास खित्‍कान्‍तेबे नाङ यूसुफ सिराज्‍यीक मि ओतान। थेचेन साइप्रस लुङबादु केबाते लेवी थरगी मि ओतान। येशू ख्रीष्‍टकी खटे खाबाते मिओनगी थेला बारनाबास सिन मिन ज्‍याक्‍पा ओतान। बारनाबास साबाते मिओनला आँट तेरकान्‍ते साबाते ईन।

शक्ति काम 9:31

थे तिरी यहूदिया, गालील थेमे सामरिये अञ्‍चल नाङला ठाउँ ठाउँला जम्‍मा ओङकान्‍ते येशू ख्रीष्‍ट मि गाङेला लेमु ओङसुङ। था थेबाला सुङगीङ दुक्‍पा तेरगीन मेतान। प्रभु येशूला मन परे मिक्‍किच्‍येते छ्याःङ खिता मेङगो सिन ज्‍यीबा खिन थेबेकी झन झन लेमु खाईन थेला विश्‍वास खिताला स्‍यूसुङ। परमेश्‍वर आत्‍मेकी थेबाला आँट बिन्‍सुङ। दोक खाईन थेबा झन झन फेल्‍गीन ड्वाप्‍ला स्‍यूसुङ।

रोमी 12:8

ज्‍येनला सल्‍लाह बिन्‍ला आँट तेरा थुप्‍कान्‍ते मिकी ज्‍येनतेबे नाङ दोक खिता फाप्‍क्‍यो। थेमे दुक्‍पा ङेता ओताते मिओनताङ गोला साच्‍येते सीप बिन्‍दा ओताते मिकीङ कुच्‍यीरी मिक्‍किता खाला तेरा थुपासम्‍म तेरा फाप्‍क्‍यो। थोकराङ खाला सुइँदाला परमेश्‍वरगी थे खोरोङ सन्‍तानओनला ताकान्‍ते छ्येते मि जोला दुक सासीन थोक्‍ते मिकीङ अल्‍छी मिक्‍किता खाला लेमु खाला थे काम खिता फाप्‍क्‍यो। नाबाते थेमे सुङ मेताते गरीब दुःखीला ताच्‍येते सीप ङेता ओताते मिकीङ सुइँदे करला फाप्‍कीन खाबाच्‍योक मिक्‍किता खाला सोचित्तेकीराङ थे काम खिता फाप्‍क्‍यो।

रोमी 14:19

बात दोक ईन्‍देकी ङुरूङगी दाक्‍पोन नाङ मिडिक्‍च्‍येते होदोक्‍ते बात खिता ताङला डिक्‍ला थुन्‍ला देता फाप्‍क्‍यो। थेमे चुक खासीन दाक्‍पोन नाङ लेमु ओङगीका थोकराङ खित्‍च्‍ये छ्य्‌वापाकामा गाङेकी स्‍येत खिता फाप्‍क्‍यो।

रोमी 15:2

ङुरूङगी थेबाङ दाक्‍पोन च्‍योकराङ ईन सिन सम्‍झे खाला थेबाङ पाको डोरस्‍यीत सिन चुक खासीन थेबाला लेमु ओङगीका थोकराङ खिता फाप्‍क्‍यो।

१ कोरिन्‍थी 10:23

थेमे मिओनगी खोपरोङगी जे खासीनोङ ओङगो सिन खिदुक। ईन्‍दानी ईन, खिता ओङगो। थोक ईन्‍सीनोङ गाङे काम लेमुकामा मेन। जेङ खित्‍जीन ज्‍येनला मेलेबा ओङगो।

१ कोरिन्‍थी 14:12

ख्‍योकोन बादोङ होदोकराङ ईन। परमेश्‍वर आत्‍मेकी तेरच्‍येते सीपताङ शक्ति ङेत्‍स्‍यीत सिन ख्‍योकोन आउदी सेम खिदुक। खेराङला परमेश्‍वर आत्‍मेकी बिन्‍दाते सीपताङ शक्ति चुक खाईन चले खासीन येशू ख्रीष्‍ट मि गाङेला लेमु ओङगीका थे विचार खाला चले खि।

१ कोरिन्‍थी 14:17

खुई थोक खाईन परमेश्‍वरते जय जय खाबाते आउदी लेमु ईन्‍सीनोङ थे बात मोखोकान्‍ते मिओनला छ्याःङ फाइदा मेङगो।

१ कोरिन्‍थी 14:26

आज्‍यो न्‍वावे, ख्‍योकोन गाङेराङ जम्‍मा ओङजीन ख्‍योकोन कोई परमेश्‍वरला छ्ये जोच्‍येते लु लिन्‍कान्‍ते, कोई सु सुकी चुक चुक खिता फाप्‍कीते सिन लोप्‍कान्‍ते थेमे कोईचेन परमेश्‍वरगी खोपरोङला तेन्‍गीन बिन्‍दाते तिरी ओङच्‍येते बात खित्‍कान्‍ते मि ओङगो। थोकराङ खाला कोई खोपरोङगी छ्या मास्‍येबाते खुदुक खुदुकते भाषाला बात खित्‍कान्‍ते मि ओङगो सासीन कोईचेन थे भाषाला खाबाते बातकी अर्थ खोले खित्‍कान ओङगो। ख्‍योकोनगी जे खासीनोङ येशू ख्रीष्‍ट मि गाङेला लेमु ओङे लाईदु खि।

१ कोरिन्‍थी 14:31

परमेश्‍वरगी सिर च्‍युताते बात ख्‍योकोनगी पालो पालो खाईन खासीन ख्‍योकोनगी च्‍यि सिका सिन ज्‍येनतेबेकी लेमु खाला खोबा थुप्‍क्‍यो। थेमे ख्‍योकोन बात थोनामेई ज्‍येनतेबेकी आँट ङेत्‍क्‍यो।

१ कोरिन्‍थी 8:1

थेमे ल्‍हाला पूजा खाबाते सा ओङगीताना मेङते सिन ख्‍योकोनगी ङाला ठिबा ओताक्‍वा। ईन्‍दाका च्‍यि खिता ओङगीते, चुक खिता मेङते सिन ङुरूङ गाङेला छ्याराङ ओत। जे बादोङ छ्या स्‍येकान्‍ते मि छ्येकामा खिओ। ज्‍येनला ङिङज्‍ये खित्‍कान्‍ते मिकीकामा लेमु काम खिओ।

२ कोरिन्‍थी 1:4

ङेराङला दुक्‍पा ओङजीन थेमे ज्‍येनगी दुक्‍पा तेरजीन जहिलेङ थेकी ङ्योकोनला आँट तेरगीदुक। थेकी दोक खाबेकी ज्‍येनला जस्‍तो दुक्‍पा ओङा ओत्‍सीनोङ परमेश्‍वरगी ङेराङला खाबाच्‍योक खाला पीर माकेत, सेम मासेत सिन ङ्योकोनगी थेबाला आँट तेरा थुप्‍कीदुक।

२ कोरिन्‍थी 2:7

बरू थाचेन ख्‍योकोनगी थेला माफ बिन्‍ला लेमु खि। थोक खानामेई दिबेकी ङाला थोरूमोङ ङिङज्‍ये खित्‍च्‍याक्‍वा सिन थेकी आँट ङेत्‍क्‍यो। ख्‍योकोनगी थोक माक्‍यासीन था ङाला लेमु खित्‍कान्‍ते सुङ मेताक्‍वा सिन पीर खाला थेकी झन सेम सेत्‍क्‍यो।

एफिसी 4:29

थोकराङ खाला ख्‍योकोनगी दोक्‍पोईकी ज्‍येनज्‍यीक सेमला फोक्‍च्‍येते बात नोमुङ माकेत। बरू सु मिला च्‍यि बेलाला चुक सिरा लेमु ओङच्‍या दुका थे विचार खाला बात खि।

एफिसी 6:22

ङ्योकोनला देपा चुक दुका सिन ख्‍योकोनगी लेमु खाला छ्या स्‍येला पीर मिक्‍किस्‍यीत थेमे दिकी खुलाबाते लोन थोला ख्‍योकोनगी आँट ङेत्‍स्‍यीत सिनराङ ङा दिला ख्‍योकोन ओत्‍सापा तोङगीन ओत।

कलस्‍सी 4:8

ङ्योकोनला देपा चुक दुका सिन ख्‍योकोनगी लेमु खाला छ्या स्‍येला पीर मिक्‍किस्‍यीत थेमे दिकी खुलाबाते लोन थोला ख्‍योकोनगी आँट ङेत्‍स्‍यीत सिनराङ ङे दिला ख्‍योकोन ओत्‍सापा ताङाते ईन।

१ थिस्‍सलोनिकी 2:11

आबातेकी फिजाओन बानी मेङ्येस्‍यीत सिन लाःपा कोता च्‍योकराङ ङ्योकोनगीङ ख्‍योकोन गाङेला लेमु ओङस्‍यीत सिन दोक दोक खाबाप। चुक सासीन दुक्‍पा ओङसीनोङ सेम मेसेता खाला प्रभु येशूला विश्‍वास खिन देता मातोङ साकीन आँट बिन्‍दाप।

१ थिस्‍सलोनिकी 2:3

जसकी जेराङ सासीनोङ ङ्योकोननी मिओनला गा लाङच्‍येते बात ङेन सिन लोप्‍जीन नोमुङ मेन्‍दे बात मोलोबो, चुक खासीन ङेराङला फाइदा ओङगीका थे तालाङ मोलोबो थेमे मि मिकला छारो देक्‍पाङ मोछोलो।

१ थिस्‍सलोनिकी 3:2

ङुरूङ न्‍वा तिमोथीला ख्‍योकोन ओत्‍सापा ताङा ओतान। तिमोथीङ ङ्योकोनताङराङ परमेश्‍वर काम खिन मिओनला ख्रीष्‍टते गा लाङच्‍येते बात लोप्‍कान्‍ते मिराङ ईन सिन ख्‍योकोनला सिरा माफाप्‍तासीन। ज्‍येनगी दुक्‍पा तेरजीन ख्‍योकोन सुङगीङ प्रभु येशूला विश्‍वास खिता तोङा मेङगो, बरू जति दुक्‍पा ओङसीनोङ सेम मेसेता खाला थेला विश्‍वास खिनराङ देता फाप्‍क्‍यो सिन आँट तेराला ङ्योकोनगी तिमोथीला थेपा ताङा ओतान। प्रभु येशूला विश्‍वास खाबेकी खित्‍सादु ङुरूङगी दुक्‍पा भोगे खिता फाप्‍क्‍यो सिन ख्‍योकोनला लेमु खाला छ्याराङ ओत।

१ थिस्‍सलोनिकी 4:1

आज्‍यो न्‍वावे, था ज्‍येन बात च्‍यि सासीन परमेश्‍वरला चुक्‍ते काम मन परे खिते, ख्‍योकोनगी चुक खाला देता फाप्‍कीते सिन ङ्योकोनगी ख्‍योकोनला लाप्‍कीन बिन्‍दा ओत। ङ्योकोनगी लापाच्‍योक खाला ख्‍योकोन कामोङ खिनराङ दुक। प्रभु येशूताङ जीउज्‍यीकराङ ओङाते मि ईन्‍देकी ङ्योकोन ख्‍योकोनला थोरूमसाक खिन ओताच्‍योक खिन देता मातोङ, झन लेमु खाला दोक खिनराङ देत सिन सिओ।

१ थिस्‍सलोनिकी 4:18

होदि बाततेबा सम्‍झे खाला ख्‍योकोनगी दोक्‍पोईकी ज्‍येनज्‍यीकला छ्याःङ पीर खिता माफाबो सिन सि।

२ थिस्‍सलोनिकी 3:12

प्रभु येशू ख्रीष्‍टकीराङ ङ्योकोनला दोक खित्‍च्‍येते अधिकार बिन्‍दा ओतेकी अल्‍छी खित्‍कान्‍तेबा ख्‍योकोन जोराङ ईन्‍सीनोङ ङ्योकोन च्‍यि सिते सासीन ओर्च्‍ये ख्‍योकोनगी अल्‍छी खिता ताङला खुरू खुरू दाक्‍पोन पाखुरा चले खाला सो।

१ तिमोथी 1:4

थेमे थेबाला छ्याःङ काम लै मिक्‍किच्‍येते कथा थेमे थाङबो थाङबोमे वंशावली बात खाला दिन तोङच्‍येते माकेत सि। थोक्‍ते बात खित्‍जीन खालि टेकाटेउरीकामा स्‍योरग्‍यो, नोमुङ डिक्‍च्‍येते बात मेङगो। थोक्‍ते बात खित्‍कान्‍ते मिओनगीचेन परमेश्‍वरगी मिओन नाङ खिता चालाते काम मिक्‍किओ। येशू ख्रीष्‍टला लेमु खाला विश्‍वास खालाकामा परमेश्‍वरगी खिता चालाते काम खिता थुप्‍क्‍यो।

१ तिमोथी 4:13

ङा थेपा ओङ ओङसाक थेरू गाङेला परमेश्‍वर बात थोच्‍या खाला पढे खाला बिन थेमे थे बातला च्‍यि साबाते ईन्‍दे सिन लाप्‍ला बिन।

१ तिमोथी 6:2

थेबे मालिकतेबाङ येशू ख्रीष्‍टला विश्‍वास खित्‍कान्‍ते ईन्‍सीन थानी आज्‍यो न्‍वाराङ ईन सिराच्‍योक खाला मालिकतेबाला मान खिता तोङा मेङगो। बरू मालिकओनलाङ परमेश्‍वरगी ङिङज्‍ये खिओ, थेबाङ येशू ख्रीष्‍टला विश्‍वास खित्‍कान ईन साला थेबाला लेमु ओङस्‍यीत सिन झन लेमु खाला काम खिता फाप्‍क्‍यो। ङे साबाते दि बाततेबा गाङे चुक खिता फाप्‍कीते सिन खुई गाङेला लाप्‍ला कोत्‍ला बिन।

२ तिमोथी 4:2

खुई चुक खिता फाप्‍कीते सासीन मिओनला परमेश्‍वर बात लोप्‍कीनराङ देत, मिओनगी ङेन्‍सीनोङ माङेन्‍सीनोङ जुन बेलालाङ थे बात लोपा मातोङ थेमे गल्‍ती खित्‍कानला थोक खाबाते लेमु मेन साला थोक खिता थोङ सिन सि। चुक खिता लेमु ईन्‍दे सिन गाङेला लाप्‍ला बिन। थानी दिबाला थोई लोप्‍च्‍ये सिराच्‍योक माकेत, सुङताङ स्‍येदाङ मिक्‍किता खाला खा छ्येत लेमु खिन दोक खाला लोप्‍कीनराङ देत।

तीतस 1:9

दोस्‍यिककामा मेन, थोक्‍ते मिचेन सत्‍यते बात दाक्‍पोनला जस्‍तो खाईन लाप्‍कीन बिन्‍ला दुक थोकराङ खाला ङेन्‍गीन देत्‍कानज्‍यीक ओङा फाप्‍क्‍यो। थोक खानामेकी थेकी ज्‍येनतेबेकी खाङ बात ङेन्‍दा फाप्‍च्‍येते ईन्‍दे साला लाप्‍ला बिन्‍ला थेबाला थोकराङ खि सिन लोपा थुप्‍क्‍यो। थेमे थे बातताङ डिकराङ मिडिक्‍च्‍येते बात खित्‍कान्‍ते मिओनला ख्‍योकोनगी मेन्‍दे बात लोप्‍कीन दुक साला हगे हगे ज्‍य्‌वाबा थुप्‍क्‍यो।

तीतस 2:15

दि बाततेबा खुई थेरू गाङेला लोप। थेबाला दि बातओन लेमु खाला ङेन सि। सुइँदेकी दि बातला नामज्‍योक मेसेत्‍तुक सासीन थेबाला थोप। छ्याःङ ज्‍यीबा मिक्‍किता खाला खुई दि कामओन खि। दोक खित्‍जीन खोरोङला खुईते दोक खित्‍च्‍येते च्‍यि अधिकार ओते सिराच्‍योक खित्‍च्‍येते लाम सुङलाङ मातेर।

तीतस 2:6

थोकराङ खाला स्‍यारातेबालाङ दाक्‍पोन सेम काबूला ज्‍य्‌वाबा फाप्‍क्‍यो सिन सि।

तीतस 2:9

थेमे योक्‍पो योङमुलाचेन दोक खि सिन सि। मालिकतेबेकी खोपरोङ लेमु खाला काम खित्‍कान्‍ते ईन सिन छ्या स्‍येस्‍यीत सिन जहिलेङ थेबेकी मालिकतेबेकी साबाते लेमु खाला ङेन्‍दा फाप्‍क्‍यो, थेबाला खा खिता मेङगो,

हिब्रू 10:25

थेमे कोई कोईकी गाङेराङ जम्‍मा ओङसाला ड्वा ताङला दुक। दोक खिता मेङगो। प्रभु येशू ग्‍युरला ओङच्‍येते दिन था काल्‍बेई बाँकी मेत सिन ङुरूङला छ्या ओतेकी बरू ङुरूङगी गाङेराङ जम्‍मा ओङला परमेश्‍वरला विश्‍वास खिनराङ देताला दोक्‍पोईकी ज्‍येनज्‍यीकला आँट तेरा फाप्‍क्‍यो।

हिब्रू 13:22

थेमे आज्‍यो न्‍वावे, दि चिट्ठीला ङे काल्‍बा बात टिबा मेत। ईन्‍सीनोङ खेराङगी चुक खिता फाप्‍कीते, च्‍यि खिता फाप्‍कीते सिन दुरू टिबाते बातबरी ख्‍योकोनगी स्‍येदाङ मिक्‍किता खाला लेमु खाला ङेन सिन ङा बिन्‍ती खिओ।

हिब्रू 3:13

थोगी परमेश्‍वर बात ङेन्‍दा ताङला पाप खाला परमेश्‍वर छ्य्‌वापेई ठाला माफाप्‍स्‍यीत सिन परमेश्‍वर बात ङेन्‍दा फाप्‍क्‍यो सिन ख्‍योकोनगी दोक्‍पोईकी ज्‍येनज्‍यीकला ङीमे ठाङमा सिन देत। खेराङगी “थरिङ दिन” सिरा ङेत ङेतसाकराङ ख्‍योकोनगी दोक खिनराङ देत।

१ पत्रुस 5:12

दि चिट्ठी ङे सिल्‍वानसला टिक च्‍युताते ईन। सिल्‍वानसचेन खिओ साबा च्‍योकराङ खित्‍कान्‍ते मि ईन। दि ङेते ङाराङ न्‍वा च्‍योकराङ ईन। जति दुक्‍पा ओङजीनोङ ख्‍योकोन सेम मेसेता खाला देत्‍स्‍यीत सिन आँट तेराला थेमे परमेश्‍वरगी पक्‍काराङ दया खिओ सिन ख्‍योकोनगी लेमु खाला छ्या स्‍येस्‍यीत सिन ङे थुम्‍मी खाईन दि चिट्ठी टिबाते ईन। परमेश्‍वरगी खेराङला दया खिनराङ देत्‍स्‍यीत सिन थेला माने खिन देता मातोङ।

यहूदा 1:20

ङिङज्‍येते आज्‍यो न्‍वावे, ख्‍योकोनगीचेन येशू ख्रीष्‍टला विश्‍वास खाईन खेराङगी ङेन्‍दाते बातला खि साबा च्‍योकराङ खिन झन झन लेमु खाला थे बात ङेन। थेमे परमेश्‍वर आत्‍मे शक्ति छ्य्‌वापेई प्रार्थना खिनराङ देत।