Koloshan 2:4 - Di Jamiekan Nyuu Testiment

⁴ Mi tel unu dis so nobadi kyaahn kom fuul unu op tu ou dem taak, an mek unu go chrie. Wa dem se mait-a soun laik dem mek sens bot a pie lai.

Koloshan 2:4 Iomraidhean Croise

Matyu 24:24

Kaaz piipl a-go kom kom se dem a di wan we Gad sen fi siev piipl, wen notn no go so. An som faalz prafit a-go shuo op tu. Dem piipl de a-go wok aal kain-a mirikl an shuo aal kain-a sain fi chrik op piipl, dong tu aal di piipl dem we Gad pik, di faalz prafit dem wi chrik op tu ef dem get di chaans.

Matyu 24:4

So Jiizas se tu dem se, “Wach out, no mek nobadi fuul unu op.

Maak 13:22

Kaaz piipl a-go kom kom se dem a di wan we Gad sen fi siev piipl, wen notn no go so. An som faalz prafit a-go shuo op tu. Dem piipl de a-go wok aal kain-a mirikl an shuo aal kain-a sain fi chrik op piipl, dong tu aal di piipl dem we Gad pik dem wi chrik op ef dem get di chaans.

Aks 20:30

An di taim a-go kom wen iivn som a unu uona piipl a-go tiich som torbl sitn we go gens di chuut fi get som a unu fi fala dem.

1 Korintiyan 2:4

An wen mi did a tiich an a priich mi neva yuuz no fansi taak laik we di piipl dem we tingk dem waiz yuuz. Mi neva afi du dat fi mek unu biliiv kaaz Gad Spirit yuuz im powa fi shuo unu se aal a wa mi did a se a chuu sopm.

2 Korintiyan 11:3

Bot mi fried se, jos laik ou di siniek di chrik op Iiv, sumadi a-go chrik unu an kaaz unu fi ton we fram Krais Jiizas an tap fala im wid aal a unu aat.

Gyalieshan 2:4

Mi did taak tu di liida dem wan kaaz yu av som piipl we gwaan laik se dem a fala Gad an a siniik kom iin mongks Gad piipl, so dat dem kyan wach dem. Jiizas frii wi kaaz wi an im kluos. So dem a wach wi kaaz wi no afi fala di Juu dem Laa. Dem waahn wi fi fala da Laa de laik se wi a sliev.

Ifiijan 4:14

Wen da taim de kom, wi naa go komiin laik likl pikni we iizi fi get fuul op. Wi naa go komiin laik wan likl buot we di sii pich aal bout, ar we briiz bluo aal uova di plies. No laiyad, jinal tiicha kyaahn kom chrik wi ar fuul wi op.

Ifiijan 4:17

So, lisn nou! Mi a Gad sorvant so mi av di rait fi tel unu wa unu fi du. Unu no fi liv no muo laik di piipl dem we no nuo Gad. We dem piipl de main tel dem fi du no mek no sens.

Ifiijan 5:6

Unu no fi mek nobadi chrik unu wid wod we no mek no sens. Gad beks wid piipl we taak dem sitn de, an im gweehn ponish aal a uu chat fuulinish an no du we im se.

Koloshan 2:18

No fala nobadi we waahn mek unu fiil bad kaaz dem se unu no worship Gad ou unu fi worship im. Dem gwaan an gwaan bout ou unu fi ombl unuself, an bout ou unu fi worship ienjel. No lisn dem. Dem dis a chat a galang bout wa dem kliem se dem si iina vijan. Bot dem a buos an dem no av notn fi buos bout siek-a dem worliyan main.

Koloshan 2:8

Wach unuself! No mek nobadi chrap unu wid aagiment we onggl soun laik se dem mek sens, bot we no riili mek no sens at aal. Nuo! No mek dem tek unu ton no sliev. Dem aagiment de dis a taak bout ou piipl tingk bout sortn tingz, an bout wa faada tiich dem pikni, an we dem pikni de kom tiich fi dem pikni. Dem sitn de jos diil wid ou piipl luk pan di worl, an a jos taak bout powaful spirit we iina di worl. Dem no av notn fi du wid di chuu mesij bout Krais Jiizas.

2 Timoti 2:16

Stie faar fram aagiment we no rispek Gad. Kaaz di piipl dem we get iina dem kain-a aagiment de wi staat jraa we fram im.

2 Timoti 3:13

Bot di wikid piipl dem an di fraad dem a-go get fram bad tu wos. Dem a-go gwaan chrik piipl an lou demself fi get chrik tu.

1 Jan 2:18

Breda an sista di worl suun don. Unu did ier se di wan we go gens Krais Jiizas a-go kom. Wel nof piipl we go gens Krais Jiizas de ya aredi. A so wi nuo se di worl suun don.

1 Jan 2:26

Mi rait dem sitn ya fi waan unu bout di piipl dem we a chrai fi fuul unu op.

1 Jan 4:1

Mi fren, no biliiv iina evri spirit we se dem kom fram Gad. Wa yu fi du a tes di spirit dem fi si ef dem kom fram Gad fi chuu, kaaz a nof nof faalz prafit gaan out aal uova di worl.

2 Jan 1:7

Nof laiyad tiicha de iina di worl ya nou. Dem laiyad tiicha ya a taak buot se Jiizas Krais neva kom a ort wid wan badi laik wan man. Dem piipl de a laiyad. Dem a go gens Krais Jiizas.

Revilieshan 12:9

Di powaful jragan — di uol siniek we did de bout fram wie bak wen, we dem kaal di devl, ar sietan, we chrik di uol worl fi sin gens Gad, im an im ienjel dem get fling dong a ort.

Revilieshan 13:8

Evribadi we liv pan di ort a-go worship di wail animal. Di onggl piipl we naa go worship im a di wan dem we riili a liv. Fi dem niem rait dong bifuo di worl mek iina di buk we di Biebi Shiip av — di Biebi Shiip we did get kil.

Revilieshan 20:3

Im fling di jragan iina di pit we no av no batam, an lak it op tait tait so im kyaahn kom out. Im du dat so di jragan kyaahn chrik di piipl dem iina di worl no muo til di touzn ier dem don. Wen da touzn ier de don, di jragan a-go get frii fi a likl wail.

Revilieshan 20:8

an im a-go kom out an go fuul op di konchri dem aal uova di worl — dem kaal dem konchri ya Gag an Miegag. Im a go fi gyada dem op fi waar. Di wie dem so nof, dem komiin laik san a sii-said.