Ifiijan 6:17 - Di Jamiekan Nyuu Testiment

¹⁷ An mek di fak se unu nuo se Gad siev unu, protek unu siem laik ou suoja elmit protek dem ed fram dem enimi. An uol aan tait pan di suod we di Uoli Spirit gi unu, dat a Gad wod.

Ifiijan 6:17 Iomraidhean Croise

Matyu 4:4

Jiizas ansa bak, “It rait dong iina Gad wod se, ‘Man no liv pan bred wan. Bot wi niid evri wod we kom outa Gad mout fi riili liv.”

Matyu 4:7

Jiizas ansa im se, “Bot it rait dong tu, se ‘No tes di Laad we a yu Gad.’”

Ifiijan 5:26

Jiizas gi op im laif pan di kraas, so dat im kuda mek di choch kliin an set ar wan said fi Gad. A di Gud Nyuuz we powaful dat im tek wash ar an mek ar kliin.

1 Tesaluoniyan 5:8

Bot wi we bilang tu di die, wi fi tingk chriet an chos iina Gad an lov im. Da wie de wi a protek wiself jos laik di suoja dem wen dem wier di metal ves. An jos laik ou di suoja dem put aan di elmit fi protek dem ed, a siem so wi fi protek wiself an luk faawod fi Gad siev wi, an biliiv iina wi aat se im a-go du it.

Iibruu 4:12

Kaaz wen Gad taak, a laik se di sitn dem we im se alaiv, av powa an kyan du tingz! Gad wod kot beta dan eni wan a di tuu-saidid kotlis dem, an aal buor chuu an plit op suol fram spirit, an kot we wich paat di buon dem jain op fram di blod an sitn dem we de insaida di buon dem. It kyan joj we wi tingk iina wi aat an di sitn dem we wi waahn.

Iibruu 6:5

we did ties an nuo fi demself se Gad wod gud, an we fiil an nuo di powa we kom wen Gad staat ruul iina evri wie,

Revilieshan 1:16

Im did av sevn staar iina im rait an, an wan suod wid di tuu said dem wel shaap kom outa im mout. An im fies shain brait laik di son a migl die.

Revilieshan 12:11

Gad piipl biit di devl an no gi iin tu di sitn dem we im waahn dem fi du, kaaz dem neva tap biliiv iina Jiizas we did gi op im laif pan di kraas fi dem. An dem neva tap pred di Gud Nyuuz bout Jiizas. An dem neva lov dem laif so moch dat dem wuda fried fi ded.

Revilieshan 19:15

Wan shaap suod kom outa im mout we im a-go yuuz fi waar gens di piipl dem iina di worl an ponish dem. “Im a-go ruul dem wid wan aiyan paip.” An im a-go tep op, tep op pan dem an mash dem out laik wen piipl a mash out griep wid dem fut. Im a-go du dem da wie de fi mek dem si se Gad we av aal di powa, wel mad wid dem.

Revilieshan 2:16

Dem fi ton we fram dem sin, shuo se dem sari fi di rang we dem du an beg Gad paadn! Ef unu no du dat, mi a-go kom tu unu suun an waar gens dem wid di suod we kom outa mi mout.