Ifiijan 4:25 - Di Jamiekan Nyuu Testiment

²⁵ So den, unu fi tap tel lai. Mek aal a wi taak di chuut tu wi wan aneda, kaaz di choch komiin laik wan badi, an aal a wi a paat a it.

Ifiijan 4:25 Iomraidhean Croise

Jan 8:44

Unu bilang tu unu faada, di devl, an unu waahn fi du di sitn dem we unu faada waahn unu fi du. Im did a mordara fram di staat, an na'av notn fi du wid di chuut, kaa im no se ar av notn fi du wid di chuut. Wen im tel lai, im jos a taak ou im tan, kaa im a laiyad an im a di faada fi aal lai.

Ruoman 12:5

a siem so, a nof a wi, bot di uol a wi mek op wan badi kaaz wi an Krais Jiizas a wan. Di uol a wi difrant bot wi jain op tugeda an wi bilang tu wi wan aneda.

1 Korintiyan 10:17

So a onggl wan bred de bout an aal a wi ton wan badi wen di uol a wi iit da bred de.

2 Korintiyan 7:14

Mi buos bout unu tu im an unu neva kaaz mi fi shiem. Kaaz jos laik ou evriting wi tiich unu a chuu, a siem so im kom fi si se evriting we mi did se bout unu a chuu tu.

Ifiijan 4:15

Insted-a gwaan laik se wi a pikni, mek wi taak bout di chuu mesij bout Jiizas an mek wi liv laik ou di mesij se wi fi liv. An mek wi du it wid lov iina wi aat. Da wie de, wi wi gruo op chrang iina aal saat a wie an get fi komiin laik Krais Jiizas, di wan we a di ed fi di choch.

Ifiijan 4:22

Unu lorn se unu fi don we wid di uol laif we unu yuus tu liv an aal a di woklis sitn dem unu yuus tu du, wen unu neva did a fala Jiizas. Dem taim de, unu did lov di wikid sitn dem we onggl did a mash op unu laif.

Ifiijan 4:31

Tap kyari beli fi unu wan aneda, an beks op beks op an a get mad wid unu wan aneda — tap it. Tap kos out an tier dong unu wan aneda an unu no fi wikid tu unu wan aneda niida.

Ifiijan 5:30

Im du it, kaaz wi a paat a fi im badi.

Koloshan 3:8

Bot nou, unu fi get rid a aal a dem sitn ya: no get beks an get so mad dat unu kyaahn iivn kanchuol unuself. No kip malis niida, an no chat bad bout piipl an tier dem dong. An no mek no doti wod kom outa unu mout niida.

Koloshan 3:9

No lai tu unu wan aneda, kaaz unu don wid di uol taim laif nou, an so unu naa du di sitn dem we unu yuus tu du agen.

1 Timoti 1:10

It mek fi di man dem we av seks wid ada man, ar uman we av seks wid ada uman, an fi piipl we tek paat iina aal kain-a seks sin. Di Laa a fi di wan dem we kech an sel piipl fi ton sliev, an fi piipl we a laiyad an piipl we go a kuot go tel lai pan ada piipl. Matarafak it a fi enibadi we go gens di chuu mesij we wi tiich,

1 Timoti 4:2

Dem tiicha ya a ipokrit, dem no nuo rait fram rang kaaz dem naa no kanchens.

Taitos 1:12

Iivn wan a dem uona prafit dem taak bad bout dem. Im se, “Di Kriitan dem eva a tel lai. Dem liezi an krabit laik. Dem gwaan laik se dem a som wikid wail animal.”

Taitos 1:2

An wen dem andastan Gad wod it wi gi dem sopm fi luk faawod tu. Dem wi luk fi si an nuo fi shuor se Gad wi mek dem liv fi eva. Kaaz lang bifuo di worl did mek Gad pramis fi mek wi liv fi eva, an Gad no lai.

Iibruu 12:1

So laik ou wan kroud a piipl de aal bout roun wi, an dem shuo wi aredi ou fi chos iina Gad, wi afi dash aaf evriting we a sluo wi dong iina da ries ya. Di sin we tai op wi fut iizi iizi, wi afi dash dem aaf man, an ron di ries we de infronta wi an no wier out pan di wie.

Jiemz 1:21

So unu fi get rid a aal a di naasi an torbl sitn dem we so nof bout di plies. Ombl unuself an tek iin di mesij we Gad put iina unu aat we kyan siev unu laif.

1 Piita 2:1

So tap dabl iina aal kain-a sin an wikidnis. No beks wid piipl an no chat tu dem, no bada tel no lai an no bi no ipokrit niida. Unu no fi bad main piipl fi we dem av. An mek shuor se unu no tek unu mout an tier dong nobadi.

Revilieshan 21:8

Bot di wan dem we a kowad, we no biliiv iina Gad, we mek demself doti wid aal a di naasi sitn we dem du, we kil piipl, we tek paat iina aal kain-a seks sin, we wok uobiya, we worship faalz gad an we tel lai — dem a-go get fling dong iina di liek a faiya we a bon wid solfa. A dis a di sekan det.”

Revilieshan 22:15

Bot di piipl dem we mek demself doti wid aal kain-a naasinis kyaahn go iina di siti: piipl we wok uobiya, du aal kain-a seks sin, kil piipl, worship faalz gad, an piipl we lov fi tel lai, non a dem kyaahn go iina di siti.