Ifiijan 2:3 - Di Jamiekan Nyuu Testiment

³ Matarafak, aal a wi yuus fi liv laka dat wan taim. Wi did a liv onggl fi wa wi badi waahn an fi di rang sitn dem wa wi main tel wi fi du. Wi did komiin jos laik evribadi els we fi get joj an ponish fi dem sin.

Ifiijan 2:3 Iomraidhean Croise

Maak 4:19

bot chuu dem a fret bout laif, chuu aal dem kyaahn tingk bout a ou fi mek moni an get rich, an chuu dem waahn muo an muo tingz, dem sitn de blak Gad wod, so it no du notn difrant iina dem laif.

Jan 1:13

Bot dem no baan iina Gad fambili laka ou naamal pikni baan wid mada an faada, ar kaaz sumadi did fiil fi av seks, ar kaaz wan ozban mek op im main se im waahn pikni. Nuo! A Gad imself mek dem baan.

Jan 8:44

Unu bilang tu unu faada, di devl, an unu waahn fi du di sitn dem we unu faada waahn unu fi du. Im did a mordara fram di staat, an na'av notn fi du wid di chuut, kaa im no se ar av notn fi du wid di chuut. Wen im tel lai, im jos a taak ou im tan, kaa im a laiyad an im a di faada fi aal lai.

Aks 14:16

Fos taim im yuus tu lef aal a di piipl iina di worl we a no Juu fi du we dem waahn fi du.

Ruoman 1:24

An kaaz piipl so fuul-fuul, Gad lef dem fi du wa dem waahn fi du. Im lef dem fi du aal a di naasinis we dem wel waahn fi du, an fi tek paat iina aal kain-a seks sin we jos a mash op dem badi an we jos a bring dong shiem pan dem wan aneda.

Ruoman 11:30

A siem so unu we a no Juu, unu neva yuus tu fala wa Gad se, bot Gad mek op im main fi gud an kain tu unu kaaz di Juu dem neva did a fala wa im se.

Ruoman 13:14

Insted-a aal a dat, unu fi mek Jiizas Krais ruul uova unu an tap tingk bout di wikid sitn dem we unu badi waahn fi du an ou unu kyan get dem sitn de.

Ruoman 2:14

Di piipl we a no Juu, dem neva get Gad Laa, so dem no nuo wa di Laa se. So wen dem du di sitn dem we di Laa se piipl fi du, dat shuo se dem nuo wa rait fram wa rang.

Ruoman 5:10

Wi a did Gad enimi, an iivn duo wi a did im enimi, Gad sen Jiizas fi ded fi wi sin dem an im mek tingz rait bitwiin wi an im. So nou dat tingz rait bitwiin wi an Gad, wi kyan nuo fi shuor se Jiizas wi siev wi wen Gad kom fi joj di worl. Wi nuo se im wi siev wi kaaz im kom bak alaiv.

Ruoman 5:9

Jiizas ded fi wi sin dem, an so Gad put tingz rait bitwiin wi an im. An sins wi nuo se Jiizas did du dat wi nuo tu se im wi siev wi wen Gad kom fi joj di worl.

Ruoman 6:12

So unu mosn mek sin ruul uova unu badi no muor. No mek it ruul uova unu, so dat unu wudn du di sitn dem wa unu badi waahn unu fi du.

Ruoman 7:18

Mi nuo se notn gud no de iina a mi, mi badi naa go mek mi du we rait. Kaaz mi waahn fi du we gud bot mi kyaahn du it.

Ruoman 9:22

Gad did waahn fi shuo piipl se im beks, im did waahn dem fi nuo umoch powa im av. Bot im tek taim wid dem an put op wid di siem piipl we did a beks im; di piipl we im did redi fi waip out.

1 Korintiyan 4:7

Kaaz a uu mek unu beta dan enibadi els? Wa unu av we a no get unu get it? An ef a get unu get it, mek unu a buos laik se a no get unu did get it?

2 Korintiyan 7:1

Mi gud gud fren, sins Gad mek dem pramis ya tu wi, mek wi stie faar fram sin an kip wi badi an wi spirit kliin. Mek wi rispek Gad an gi im evri paat a wi. Mek wi chrai fi bi muor laik im.

Gyalieshan 3:22

Bot a no so it go. Iina Gad wod it rait dong se, sin av powa uova evribadi iina di worl, it komiin laik se wi iina prizn. An so Gad pramis fi siev wi an mek wi liv fi eva ef wi biliiv iina Jiizas Krais.

Ifiijan 2:2

Dem taim de unu yuus tu du di wikid sitn dem we di worliyan dem du. Unu yuus tu fala di wan we ruul an av powa iina di skai, di spirit we a wok iina di piipl dem we ton we fram wa Gad waahn dem fi du.

Ifiijan 4:22

Unu lorn se unu fi don we wid di uol laif we unu yuus tu liv an aal a di woklis sitn dem unu yuus tu du, wen unu neva did a fala Jiizas. Dem taim de, unu did lov di wikid sitn dem we onggl did a mash op unu laif.

Koloshan 1:21

Wan taim unu did faar fram Gad. A bier wikidnis unu yuus tu tingk bout an du, an dat did mek unu an Gad ton enimi.

1 Tesaluoniyan 4:13

Breda an sista, wi waahn unu fi nuo bout wa riili apm tu aal a dem we jrap asliip. Da wie ya unu wi no baal an muon laik di piipl dem we no nuo Gad an no ekspek notn gud fi apm afta sumadi ded.

1 Tesaluoniyan 5:6

So mek wi no sliip laik dem we a liv iina di daak. Bot mek wi kip wi yai waid uopm an wi ed skruu aan gud.

1 Timoti 6:9

Bot di piipl dem we waahn fi rich, di devl chrik dem an mek dem du aal kain-a wikid sitn. Im kech dem wid di fuul-fuul sitn dem we dem waahn an we no gud fi dem. Dem kyaahn si se di sitn dem we dem waahn a-go mash dem op an singk dem.

Taitos 3:3

Kaaz wan taim wi yuus tu fuul-fuul tu, wi neva waahn fala notn we nobadi se an wi a did sliev tu aal a di wikid sitn dem we wi waahn. Evridie wi beks wid wi wan aneda an wi eva waahn wa sumadi els av. Aal wi du a iet: wi iet evribadi an evribadi iet wi.

1 Piita 1:14

Laik som nais likl pikni we a fala Gad, no bada gi iin tu di bad sitn dem we unu yuus fi lang fa wen unu neehn nuo no beta, an go bak go du dem.

2 Piita 2:14

Evritaim dem luk pan wan man, ar dem luk pan wan uman aal dem kyan tingk bout a fi go bed wid im ar fi go bed wid ar. Dem eva a luk fi di chaans fi sliip wid sumadi. Dem eva a sin a galang so, laik se dem kyaahn satisfai. An dem pul iin di wiik wan dem iina dem chrap. Dem set iina dem aat fi bi griidi. Bot fi aal a dem sitn ya we dem du — Gad gweehn ponish dem!

2 Piita 2:18

Dem mek big chat we no wot notn an chrai fi jraa we di piipl dem we jos bieli ton we fram di piipl dem we naa liv rait. Kaaz dem piipl ya bieli muuv we fram dem sitn de, an wi stil wel waahn av seks iivn duo dem no marid an dabl-dabl iina aal kain-a sin, di faalz tiicha dem yuuz dis an jraa dem we.

1 Jan 2:16

Aal a di sitn dem iina di worl: di wie unu waahn fi du aal kain-a rang sitn, di sitn dem we unu red yai fa, an ou unu lov fi buos bout wa unu av — dem no kom fram di faada, dem sitn de kom fram di worl.

1 Jan 2:8

Bot wen unu tingk bout it, iina wan wie, a riili wan nyuu laa mi a rait gi unu. It nyuu siek-a wa Jiizas did du an kaaz unu a liv unu laif fi fala im. Rait ya nou di daaknis a go we, an di riil lait staat shain aredi.