Failiiman 1:6 - Di Jamiekan Nyuu Testiment

⁶ Az yu andastan aal a di gud sitn dem we Gad gi wi kaaz wi an Krais Jiizas a wan, mi prie se di fiet we yu shier wid wi an aal a Gad piipl wi gruo.

Failiiman 1:6 Iomraidhean Croise

Matyu 25:16

Di wan we get di faiv bag a guol, im lef go we sed taim an yuuz da faiv bag de mek wan neks faiv bag a guol.

Matyu 5:16

A siem so unu fi shain unu lait mek evribadi si, da wie de dem kyan si di gud sitn we unu du an big op unu Faada we de a evn.

1 Korintiyan 14:25

Gad mesij a-go kaaz aal a di sitn dem we dem did aid op iina dem aat fi kom out iina di uopm, an dem a-go go dong pan dem nii, put dem fies a grong an staat worship Gad. Dem a-go se, “Gad riili de mongks unu.”

1 Korintiyan 16:9

kaaz mi av a gud chaans fi du som wok dong de we wi elp fi siev piipl, iivn duo nof piipl we fait gens mi dong de.

Filipiyan 4:8

Mi breda an sista, wan muor ting mi waahn se tu unu. Unu si eniting we chuu, eniting we unu kyan rispek, eniting we rait, eniting we gud an kliin, eniting we piipl kyan luk pan an fiil gud bout, eniting we piipl kyan taak gud bout, eniting we fit fi get big op — a dem sitn de unu fi set unu aat an main pan aal di taim.

Koloshan 1:9

Siek-a dis, fram di die wi ier dat, wi no tap prie fi unu an a aks Gad fi mek unu nuo fi shuor wa im waahn unu fi du. Wi prie se im Spirit wi mek unu waiz an kyan andastan. Da wie de unu wi riili nuo wa im waahn.

Koloshan 3:10

Unu a nyuu sumadi nou. An Gad a mek unu komiin muo an muo laik im. Da wie de unu kyan riili get fi nuo im — di wan we mek unu, an we mek evriting els.

Taitos 3:14

Di piipl we biliiv iina Jiizas an we iina Kriit mos lorn fi wok aad an du gud sitn, so dat dem wi aalwiez av inof, so dem kyan gi piipl we niid it.

Iibruu 6:10

Gad fier yu nuo. Im naa go figet wa unu du. Im naa figet ou unu shuo umoch unu lov im wen unu elp di breda an sista dem we biliiv iina Gad, an ou unu stil a elp dem.

Jiemz 2:14

Mi breda an sista, wa sens unu tingk it mek ef sumadi se dem biliiv sopm, bot no du di sitn dem we wi shuo se dem riili biliiv? Unu tingk dem kyan get siev da wie de?

Jiemz 2:17

A siem so ef unu se unu biliiv sopm an no av no akshan fi bak it op, wa unu se unu biliiv no wot notn — it no mek no sens.

1 Piita 2:12

Unu mos liv gud an liv rait mongks di piipl dem we no biliiv iina Jiizas, so iivn duo rait ya nou dem a se aal kain-a bad sitn bout unu, an a se a bier wikidnis unu du, dem wi si se a gud sitn unu a du an priez Gad wen im kom baka ort kom big op uu fi get big op an ponish uu fi get ponish.

1 Piita 3:1

A siem so aal a unu waif mos lisn unu ozban an du wa dem se unu fi du. Da wie de ef dem no biliiv iina Gad wod dem wi staat biliiv jos siek-a ou unu a gwaan. Unu wudn iivn afi se a ting tu dem.

1 Piita 3:16

An wen unu a ansa dem no bada disrispek dem ar fuos dem fi biliiv wa unu a se. An unu fi diil wid dem gud tu, so unu no en op fiil gilti. Da wie de, aal a uu se aal kain-a rang sitn bout unu gud bievya kaaz unu a Krais Jiizas falara, dem wi en op fiil shiem bout wa dem did se.

2 Piita 1:8

Ef unu av dem kain-a wiez ya, an unu riili nuo di Laad Jiizas Krais, dem sitn ya wi gruo muo an muo iina unu aat. An gud sitn wi apm iina unu laif.