1 Jan 3:3 - Di Jamiekan Nyuu Testiment

³ Evribadi we biliiv se Jiizas a-go mek dem jos laik imself, kip we fram sin, jos laik ou Jiizas kip we fram sin.

1 Jan 3:3 Iomraidhean Croise

Matyu 5:48

So ier mi nou, unu no fi gud onggl somtaim an onggl tu som piipl; nobadi no fi av notn bad fi se bout unu, tan jos laik unu faada we iina evn — im gud aal di wail, tu evribadi, an nobadi kyaahn se notn bad bout im an a taak chuut.”

Luuk 6:36

Unu fi gud tu piipl aal ef dem no dizorv it, jos laik ou yu faada gud tu piipl.

Jan 17:19

A siek-a dem mek mi gi op miself fi sorv yu. Mi dwi'it so dem mait-a riili riili gi op demself fi sorv yu tu.

Aks 15:9

Gad shuo se wi no difrant fram dem. Im paadn dem fi dem sin kaaz dem biliiv iina im.

Ruoman 15:12

An iina wan neda paat a Gad wod, Aizaiya se: “Sumadi fram Jesi fambili a-go kom, an im a-go ruul uova di piipl we a no Juu, an dem a-go luk fi im gi dem aal we im pramis fi gi dem.”

2 Korintiyan 7:1

Mi gud gud fren, sins Gad mek dem pramis ya tu wi, mek wi stie faar fram sin an kip wi badi an wi spirit kliin. Mek wi rispek Gad an gi im evri paat a wi. Mek wi chrai fi bi muor laik im.

Koloshan 1:5

Unu du dem sitn de kaaz unu a luk fi get wa Gad put op iina evn fi wi, an unu nuo fi shuor se unu a-go get dem. Wa Gad put op a di sed sitn dem we unu did ier bout wen unu did ier di Gud Nyuuz, an da mesij de chuu.

2 Tesaluoniyan 2:16

Nou, wi prie tu wi Laad Jiizas Krais imself an wi Faada Gad — Gad lov wi an no tap gi wi gud wod fi mek wi aat chrang, an im mek wi kyan luk faawod tu som gud sitn tu we im pramis fi gi wi, duo wi no dizorv dem at aal at aal.

Taitos 3:7

Gad gi wi im Spirit, so nou dat tingz aarait wid wi an im, siek-a ou im lov wi iivn duo wi no dizorv it, wi kyan get wa wi Faada Gad pramis wi; kaaz wi nuo fi shuor se im a-go mek wi liv fi eva.

Iibruu 12:14

Chrai aad fi liv iina piis wid evribadi, an chrai fi no dabl-dabl iina sin bot tan gud an kliin kaaz nobadi naa get fi si Gad ef dem no gud an kliin.

Iibruu 6:18

Gad du tuu sitn we kyaahn chienj, kaaz wi nuo se Gad kyaahn lai. Im du dem tuu sitn de, so wi we ron tu im fi kip sief, wi wi fiil laik wi kyan uol aan chrang kaaz wi nuo fi shuor se wi a-go get di sitn dem we im pramis fi gi wi.

Iibruu 7:26

Liida fi priis we komiin laik Jiizas, a riili di kain-a liida fi priis we wi niid. Im mek Gad api iina evri kain-a wie. Im no du notn rang; im neva sin. Nobadi kyaahn bliem im fi notn. Gad mek im difrant, im no komiin laka sina piipl. An Gad riez im op ai ai, aiya dan aal evn.

Jiemz 4:8

Jraa nier Gad, an Gad wi jraa nier unu. Sina kliin op unu laif. An unu we kyaahn mek op unu main, kliin op fi unu aat tu.

1 Piita 1:15

Bot wa unu fi du a liv kliin an no dabl-dabl iina sin. Du wa rait iina evriting we unu du, jos laik ou Gad, di wan we kaal unu fi kom ton fi im pikni dem, onggl du di sitn dem we rait an gud an kliin.

1 Piita 1:3

Tangks an priez tu di Gad an Faada a wi Laad Jiizas Krais. Im so gud an kain tu wi, im gi wi nyuu laif wen im mek Jiizas Krais ded an kom bak alaiv. Da wie de, wi nuo fi shuor se wi kyan get wa im pramis wi.

2 Piita 1:4

Siek-a dem sitn ya im gi wi di big an preshos preshos gif we im did pramis wi. So, wi kyan komiin muo an muo laik Gad, an aal shier iina uu im bi. An da wie de wi kyan ron we fram di wikidnis we iina da worl ya, we set fi kil aaf piipl. Di wikidnis we kom bout siek-a ou dem wel waahn fi sin.

2 Piita 3:14

So fren, wail unu a wiet pan dis, unu fi mek shuor se unu liv rait, an no mek Gad fain no faalt wid unu.

1 Jan 2:6

Ef sumadi se Gad liv iina dem, dem fi liv di wie Krais Jiizas liv.

1 Jan 4:17

Wen jojment die kom wi wi kyan tan op infronta Gad an no fried, kaaz im lov iina wi aat, an wi a liv iina di worl jos laik ou Jiizas did liv.