Sup. 2:9 - Yus Papí: Shuarja̱i̱ Yus Yamaram Chicham Najanamu

⁹ Kame Jiuwá Nayaimpinmaya̱ Suntara Uuntri̱, Israera Yusri̱ tawai “Wi iwiaakjai tuma asamtai Muapka Sutuma urukamia núniktatui núnisaraṉ Amun aentska Kumura urukamia núnis túrunawartatui. Ni nuṉke̱nka aya nárak wáinkiartatui tura wee jutai̱ ajasártatui tura emeskamu tuke juáktatui. Tura winia shuarui̱ya̱ juákarua nu utuawar kasarartatui tura nuṉke̱ncha akintrurar nui̱ matsamsartatui.”

Sup. 2:9 Iomraidhean Croise

Isa. 11:14

Nuyá̱ Israer shuarka etsa̱ akatainmaani̱ Jiristíu aents matsatainia nuna pinchu kuntinnian wainiak inianteana nútikias iniantrartatui. Nuyá̱ mash irunturar Etumnasha tura Muápnasha ni warirí̱n atantrar yarurkartatui. Kame Muapka tura Etumsha nupetkamu ártatui. Antsu Amuna uchirí̱ṉkia Israer shuaran umirin ártatui.

Isa. 49:18

Paṉkaim wajasam ashí íimsata. Ashí iruntrar niṉkia aminí̱ṉ waketainiawai. Wi ti nekas iwiaaku asamtai amesha núnismek ashí nu aents iwiarmamtaiya̱ nútikiam ti shiir iwiarmamprattame. Tura núja̱i̱ṉ nuwa̱ nuatnaiyak iwiarmamna tímiatrusam iwiarmamprattame” tawai Uunt Yus.

Jrm. 48:1

Israera Yusri̱ Ashí Akupin Uunt Yus Muápnaka jú̱nis tíniuiti “Ame takatrum tura ame kuítrum enentáimtusu asam amesha núnismek jatekma átatme. Péprunmaṉka aṉkant aṉkant emesmau winiartatui tura pakasha tura paka téparu ainia nusha Uunt Yus timia núnisaṉ emeskamu ártatui. Péṉker wáinmamtsuk Uunt Yusa takatrí̱n takakmana nuka yajauchiniam yumiṉkramu atí” Uunt Yus tíniuiti.

Jrm. 49:1

Uunt Yus Amuna uchirí̱n jú̱nis tawai “Nekaata, ámin téntatmak pujurtamainia nuna ámin ashampramkarat tusan itiartiatjame. Aṉkant aṉkant ámin shitiatma útsutmakartatui tura nuiṉkia wekarama nuna achirtámkatniuka atsuttawai. Nuya̱ṉka Amuna uchirí̱ achira yaruakma ainia nuna ataksha awakeartatjai” tawai Uunt Yus.

Jrm. 50:40

Kame Yus Sutuman tura Kumuran núnisaṉ chíkich pepru nui̱ ayaam pujuiniancha amukmia nútikiattawai. Tura nui̱ṉkia chikichík áentskesha pujuschamu átatui. Jú̱naka Wi Uunt Yus asan jú̱nisan tajai” tímiayi.

Ams. 1:13

Amuna shuari̱ncha yajauch tí túrukmanum peṉké tsaṉkurachartatjai. Warí nuṉke̱n iwiaṉkartai tusar Karaatnumia̱ nuwa̱ ajaprukaru áinianka ajapeyarmiayi. Núnisnak Rapá wenuke̱ncha jinia ikiapátran akupniu je̱e̱nkia mesetja̱i̱ kakaram untsummaja̱i̱ amutkartatjai tura yumitinkia nasé naseja̱i̱ ti kakaram yútak amukártatui. Tura akupniúsha péṉkeri̱ ainia nuja̱i̱ achirar yajá yaruakma ártatui” tíniuiti Uunt Yus.

Ams. 2:1

Tura Jiuwá chichaak “Muapa tunaari̱nkia menaintiuiti tura ju̱ kuátruja̱i̱ṉkia asuttsukka peṉké iniaisashtatjai. Etumnumia̱ úunt akupniu ukunchí̱ncha aestuk aya ju̱yu̱ awajtúsuiti.

Sup. 2:14

Ti untsurí waaka tura kampunniunmaya̱ ashí yajasma matsamtai̱ ajastatui. Túmakui̱ waiti wiyaṉke̱nka ampush tura kuru kániartatui tura je̱á̱ áṉkamu íimtai̱ya̱ nui̱ chichartatui. Antsu wáitinmaṉka warinkish atsá ajastatui. Warí, initiaani̱ṉkia sétruja̱i̱ iwiarkamusha a̱a̱ya̱ tanish emestukam numiri̱ paant ajasártatui.

Sup. 2:7

Kame Jutanmaya̱ iwiaaku juákaru nu nuṉkanmaṉka murikri̱n wainiartatui tura kí̱akuinkia Askarún shuar matsamin armia nu je̱a̱nam kániartatui. Warí, achira yaruakma matsatainia nuya̱ṉka Jiuwá ni Yusri̱ ata̱i̱niartatui.

Sup. 3:13

Israernumia̱ juákarua nuka yajauchin túrichartatui tura wáitniasha chichaschartatui tura ni wene̱nia̱sha anaṉkartuatniuka atsuttui. Warí, péṉker wainkiamu ártatui. Tura yáakesh sapijmiamtikiachma péṉker kanarartatui.”

Sak. 2:13

Kame Uunt Yus íimmianumka ashí aents takamátsarti. Warí tí shiir akantúkma pujutái̱ri̱ya̱ nui̱ Niṉkia wajakniuiti” tímiayi.

Wek. 14:21

“Tuma ai̱ṉsha Wikia iwiaakjai tura Winia kakarmarsha ashí nuṉkanam piákuiti.

Rum. 14:11

Nu asamtai Yus Papinium tawai “Wi nekas iwiaaku pujá asan ashí Winí̱ tikishmátrurartatui. Tura ashí ‘Yus asa tuke péṉker túriniaiti’ turutiartatui” tawai.Isa. 45:23; Jir. 2:10-11

Muis. 29:22

Tura ukunam atumí uchirí̱ pampaṉkartatna nusha nuyá̱ chíkich nuṉkanmaya̱ írar káunkartatna nusha Uunt Yus asutkian nuyá̱ náṉkamas suṉkurnasha nu nuṉkanam akupeamun wáinkiar chichainiak

Muis. 29:23

‘Yaunchu Sutuma, Kumura, Atma, tura Sepuim péprun Uunt Yus ti kajerak suira kaje̱ntuk asupriji̱a̱i̱ tura weeja̱i̱ nuyá̱ jiji̱a̱i̱ amukmiayi. Tuma asa nu nuṉkanmaṉka nupa̱sha tsapaichmin araksha arakmachmin ajasuíti. Kame nuja̱i̱ métek atumí nuṉke̱sha ajasuíti’ tiártatui.