Sak. 9:10 - Yus Papí: Shuarja̱i̱ Yus Yamaram Chicham Najanamu

¹⁰ Wikia Eprain nuṉkanmaya̱ mánitiai̱ kárun tura Jerusaréṉnumia̱ kawairi̱ncha emeskartatjai. Tura mesetnum mánitiai tíshimkiusha emesnak amukáttawai. Túramtai Niṉkia uunt nuṉka mátsatkamu ainia nuna aṉkant shiir matsamsatniun chichampruktatui. Tura nayantsar nayantsar nuyá̱ Yúpratis entsanmaya̱ naṉkama nuṉka náṉkata ímianai akupin átatui.

Sak. 9:10 Iomraidhean Croise

1 Akup. 4:21

Tura Saramúṉka Yúpratis entsanmaya̱ juarki̱ Jiristíu aentsu nuṉke̱n Ejiptuja̱i̱ nakarnáiya tímianai ashí úunt akupin pujuarmia nuna akupmiayi. Tura uunt akiktin kuítian ikiaatkar suármiayi. Kame Saramúṉ iwiaaku pujumia nui̱ṉkia tuke turu wéarmiayi.

YKan. 72:17

Etsa̱ ekemtiatna ju̱i̱ṉkia ni náari̱ṉkia tuke shiir awajsamu átatui. Ashí nuṉkanmaya̱sha niji̱a̱i̱ shiir awajnásartatui. Tura “ti shiir awajsámuitme” tiártatui.

YKan. 72:3

Yáiṉkratin asamtai náinniumia̱sha imiatkinchanum shiir pujustincha tura péṉker matsamsatniusha átatui.

YKan. 85:8

Jiuwá Yus títiatna nuna antuktatjai. Ni shuari̱ Yusan arantuk wekain ainia nuna Niṉkia waurka ajastinnium waketkiara̱i̱ṉ tusa aṉkant shiir matsamsatniun nekas susattajai tawai.

YKan. 89:26

Tura nisha chichartak ‘Ámeka winia aparuitme tura winia Yúsruitme. Winia ayamprutkam uwemtikriniaitme’ turuttiatui.

Isa. 11:10

Tuma asamtai nu tsawantiṉkia untsurí nuṉkanmaya̱ aents Isái shuari̱ya̱ átatna nuna e̱a̱kartatui. Nuka pepru ajapéri̱n tarach awajamua ánis Ni pujamuri̱ṉkia ti shiir páantin átatui.

Isa. 2:4

Tura ashí nuṉkanam Akupea asa ashí aentsun chicharkartatui. Tura aentska ni puya̱ri̱nkia nuṉka pukutai tura naṉkirí̱nkia trikiu tsupitiai̱ awajsártatui. Aentssha chíkich nuṉkanmaya̱ aentsja̱i̱ mesetan jurunáikchartatui. Nui̱ṉkia mániatin unuimiátratniusha peṉké atsuttawai.

Isa. 49:6

Nu Yus chichartak “Winia takartin ajasam Israer wea iniantkiaram tura Israer shuar iwiaaku juákaru ainia nu ataksha Yusai̱ni̱ awakearam irurartiniaitmena nuka aya ishichik takataiti. Antsu Wikia ashí nuṉkanmaya̱ aents tsáapninium wekasarat tusan akupkámajme. Túran ashí nuṉka náṉkata ímianai uwempratin chicham ejettame” turutmiai. Ruk. 2:32; Tur. 13:47

Use. 1:7

Antsu Jutanmaya̱ shuarnaka waitnentraran tíshimkiuja̱i̱nchu ántsaṉ puya̱ja̱i̱nchu tura kawaiji̱a̱i̱nchu nu arantcha mesetchaja̱i̱ antsu Ni Uunt Yusri̱ kakarmari̱ji̱a̱i̱ uwemtikrartatjai” tímiayi.

Use. 2:18

Tura nu tsawantinkia Israer shuaran waitnentraran ashí kampunniunmaya̱ yajasma ainia nuja̱i̱ tura yakiya̱ nanamtin ainia núja̱i̱sha nuyá̱ napiji̱a̱i̱sha nawamnairar pujusárat tusan chichaman najanattajai. Tura tíshimkiuncha puya̱ncha núnisaṉ mesetnasha atsutí tusan amuktatjai. Túran imiatkinchanum aṉkant apujsartatjai.

Use. 2:20

Kame nekas winia nua̱r ajasrum péṉker wáiniam Uunt Yus paant nekaattarme” tímiayi.

Mik. 4:8

Jerusaréṉká, ame Israera kumpintri̱yá tura Seuná ejamtai̱yá, yaunchua núnismek ashí naṉkamantu úunt akupin atak ajastatme.

Mik. 5:4

Uunt Yusa kakarmari̱ji̱a̱i̱ núnisaṉ Ni Yusri̱ Uunt Yusa naari̱ ti naṉkamantua nuja̱i̱ ni shuari̱ wainiainiam imiatkincha matsamsartatui. Warí Nisha nuṉka náṉkatrana ímianai naṉkamantu awajsamu átatui.

Mik. 5:9

Atumí nemasri̱ nupetkarum uwejém takuitiarum túrawakrumin atumín kajertamainia nuka amukma ártatui.

Aji. 2:22

Úunt akupin pujuinia nuna akupeamuri̱n pachimprukartatjai. Túran yajá nuṉkanmaya̱ akupeamu kakarmari̱ncha emestukartatjai. Nuyá̱ káruri̱ncha tura nui̱ eṉketáinia nunasha pachimprukartatjai. Núnisaṉ kawaisha tura eketainia nusha nuamtak naṉkiji̱a̱i̱ amunaikiartatui.

Tur. 10:36

Yuska shiir chichaman Israer shuarun akuptúkmiayi. Nui̱ chichaak ‘Shuar Jesukrístu náari̱n páchiakka Yusja̱i̱ nawamnaikiatin átiniaiti. Nú Jesukrístu ashí shuara Úuntri̱nti’ tímiayi Yus.

2 Kur. 5:18

Nunasha Yus túraiti. Iin nawampramkattsa Krístun akuptúrmakuitji. Tura nu etserkatniun iincha ataktamsaitji.

2 Kur. 5:20

Krístunu ataksamu asar Yuska atumín suir íirmarmena nu atsaṉkrarum aṉkant ajasat tusa Krístuja̱i̱ nawamnaikiatarum tusa ii wene̱ja̱i̱ atumín seatmarme. Tuma asakrin Kristu náari̱i̱n túratarum tájarme.

Apu. 11:15

Nuyá̱ suntar siatia nu, kachun umpuarmatai chícham kakaram chichainia nayaimpinmaya̱ antunkamai. Jú̱nis tiarmai “Yamaikia ii Uuntri̱ Yus tura ni Anaikiamu Kristu ashí shuaran akupin ajasárai. Nisha tuke amutsuk akupkartatui.”