Sak. 14:4 - Yus Papí: Shuarja̱i̱ Yus Yamaram Chicham Najanamu

⁴ Nu tsawantinkia etsa̱ tatainmaani̱ Jerusaréṉnum íṉkiuasmak Uriwiu naintia nui̱ Uunt Yus tarimiattawai. Túramtai Uriwiu naintkia etsa̱ tatainmaani̱yá̱ juarki̱ etsa̱ akatainmaani̱ ímianai jímiapetek nakakáttawai. Túrunamtai naint nakakma arakaani̱sha muchitiakui tura chíkich nakakma nu nuṉkaani̱sha muchitiakui paka ti waṉkaram tépaku ajastatui.

Sak. 14:4 Iomraidhean Croise

2 Sam. 15:30

Túrasha Tawitkia Uriwiu náintian warukmiayi. Wákuk muuke̱nka nukuk náwek utki̱ wakamiayi. Núnisaṉ ashí aents niji̱a̱i̱ wéarmia nuka aṉkant aṉkant muuke̱n nukukár útkiar wákarmiayi.

Isk. 38:20

Nuyá̱ nayantsanam namak írunusha tura nayaimpinmaya̱ nanamtincha ántsaṉ kampunniunmaya̱ yajasmasha nuyá̱ nuṉká japinias wekain ainia nusha núnisaṉ ashí nuṉkanam aents matsatainia nusha Winia ashampruiniak kurainiak tákeer ajartatui. Naint ainia nusha metsaṉkrukartatui. Kaya sáisaintiak ainia nusha yumpuntrar kakerartatui tura kayá tánishsha ashí sanakiartatui.

Isk. 43:2

Tura Israer shuara Yusri̱ tsáapnintri̱ṉkia etsa̱ tatainmaya̱ winian wáinmiajai. Tura antursamsha entsa nujaṉkruk téter ajana tímiatrus ajamai tura nuṉkancha ni tsáapnintri̱ji̱a̱i̱ tsáapin awajmiai.

Awa. 3:6

Tura Ni wajasmataiṉkia nuṉkasha muchitiáiniawai núnisaṉ íimiakuiṉkia aentssha purushnintiá ajainiawai. Naintcha tuke irunniuitiat yumpunainiawai. Tura yáunchuya̱ naint tépeprak áiniana nusha Nin tikishmátainiawai. Warí Ni túrutairi̱ṉkia peṉké náṉkatkachuiti.

Sak. 14:10

Tura Kepa péprunmaya̱ juarki̱ Jerusaréṉ nuṉkaani̱ Rimiunka ímianai nuṉka pakamnattawai. Túrasha Jerusaréṉka yakí̱ ji̱i̱tkia juákmatai Piṉjiamín wáiti̱ya̱ nuyá̱ juarki̱ Emka wáitiya̱ ímianai núnisaṉ Tsukin wáiti̱ya̱ nuyá̱ Ananéran kumpintri̱ya̱ nui̱ juarki̱ tura úunt akupin uwa nekeṉkar yumiri̱ jutaiya ímianai nui̱ṉ matsamsarma átatui.

Sak. 14:7

Núnisaṉ kiritniuja̱i̱ tsáapnin yapajniáttawai. Túmak tsawái̱ tee ajakui káshikia tsáapnin átatui. Tura yáunchusha túrunachu nuyá̱ ukunmasha túrunashtatna nu tsawantnaka aya Yusak nékawai.

Sak. 14:8

Nu arantcha Jerusaréṉnumia̱ iwiaaku entsa jíintrartatui. Túruna ajapén chikichik kanaakmari̱ṉkia etsa̱ tatainmaani̱ nayantsanam ayaku átatui. Tura chíkich kanaakmari̱ṉ etsa̱ akatainmaani̱ nayantsanam akaikittiawai. Tura mái̱ entsaka esatái̱sha tura yumitincha ku̱yu̱chu ártatui.

Sak. 4:7

Maa timiá uunt naintiá ¿amesha yáitiam? Túrasha tímianu ámini̱ṉ Surupapír paka awajtámsattawai. Niṉkia amúamu kaya peṉkeri̱nia nu apujeak untsumuk “¡tí shiirmachichukait, tí shiirmachichukait!” ajattawai’” tímiayi.

Mar. 11:23

Iis, nekas tátsujrumek shuar ‘Yus nekas túratpiash’ tútsuk tura ‘wi tájana nuna Yus nekas túrattawai’ tu enentáimsar ju̱ náintian ‘jiinkí̱ nayantsanam iniaṉti’ tákuiṉkia páchitsuk iniaṉtatui.