Mik. 4:7 - Yus Papí: Shuarja̱i̱ Yus Yamaram Chicham Najanamu

⁷ Nuya̱ṉka shutuap juákarma núnaka tura yajá tsakiṉmakarmaj nunasha uunt pepru ti kakaram awajsartatjai” tawai Uunt Yus. Tura nu tsawantinkia Seun nainnium Uunt Yus yamaisha tura ukunmasha nin tuke akupkartatui.

Mik. 4:7 Iomraidhean Croise

YKan. 2:6

Warí Winia akantúrkamu naintrui̱ Seúnnum Winia akupniúrnaka Wiki anaikia apujsaitjiai títiatui.

Isa. 16:5

Kame akupkur pujutai̱ṉkia waitneṉkratamuja̱i̱ akupnáktin iwiarnarmatai nui̱ tímiatrus Niṉkia ekemsattui. Tura naka tímiatrus sumamtikiatniuka núnisaṉ péṉkerja̱i̱ yajauchin nekaatniun e̱a̱na nuyá̱ naka túrutai̱n wárik umiktinkia Tawit akuptainiam pujustatui.

Isa. 6:13

Núnisaṉ tias írutkamunmaya̱ chikichik juáktatna nusha amukma ártatui. Túrasha ensena numi ajakam aya ájiṉkiari̱ṉ juákiat jeana núnisaṉ nuna ajiṉkiári̱ya̱ peṉké tunaarincha jé̱e̱rtatui” turutmiayi.

Isa. 66:8

¿Yaki nu túman antukuit. Ya túrunancha wáinkiait. Chikichik tsawantini̱ṉ úunt matsatkamu ajasminkiait. Maa, ishichkisha árutsuk úunt matsatkamu najanarminkiait? Antsu Seunka ajapruku asa uchin takusarmai.

Isk. 43:7

Nisha chichartak “Aentsu uchiri̱yá, wi wajajna ju̱i̱ṉkia winia uunt pujutái̱ruiti. Tuma asamtai Israer shuar pujuinia nui̱ tarimian tuke pujustatjai. Nuya̱ṉka Israer shuarka ímia nisha tura ni akupniúri̱sha yamái túruinia núnisarka túrachartatui. Warí, ni najankamu yusri̱ ni akupniúri̱ji̱a̱i̱ métek jákarun untsurí naint ainia nui̱ enentáimtuiniak tsanirmatniua núniniawai.

Tan. 2:44

Tura nu úunt akupin pujuartatna nu tsawantin nayaimpinmaya̱ Yus chíkich akupeamu peṉké nupetkachminian apujsattawai. Antsu nuka ashí akupin ártatna núnaka tsai̱ tsai̱ awajsatniua núnis mash amú amus aya niṉki tuke akupin átatui.

Tan. 4:34

Tura tsawant naṉkaamarmatai wi Napukutunusúr nayaimpinmaani̱ nakaasan iimiai̱ ataksha aentsua núnis enentáimtikrurmai. Túrutamtai Ashí Naṉkamantu Yusan tuke pujú asamtai shiir awajeakun tura naṉkamantu enentáimtakun yumiṉsamjai. Warí, Ni akupeamuri̱sha peṉké amukashtiniaiti. Tura ukunam aents matsamiartatna nui̱sha tuke átiniaiti.

Tan. 7:14

Nuya̱ṉka akupkatin tura naṉkamantu ajastin núnisaṉ akupin átincha sunasmai. Tuma asamtai ashí aents tura mátsatkamu uunt nuṉka ainia nuya̱sha núnisaṉ chíkich chíkich chichamtin ainia nusha Nin shiir enentáimtuiniak umiriarmai. Warí, ni akupkatniuri̱ṉkia náṉkatkachu amuukashtin tura peṉké emesnarchatniuiti.

Tan. 7:27

Nuya̱ṉka tunaarincha ainia nuna Ashí Tujintkiachu Yusa akupeamuri̱ aents ásarmatai ashí ju̱ nuṉkanam akupeamu ainia nuna peṉkeri̱n tura kakarmari̱ncha nuyá̱ páantniuri̱ncha nu akupeamun súsartatui. Warí, nu akupeamuri̱ṉkia peṉké naṉkankashtin asamtai ashí nuṉka akupeamunam ainia nusha Yusan shiir awajainiak umirkartatui.’

Use. 1:10

Túrasha ukunmaṉka Israer shuarka entsá naikim írunna imianú untsurí nekapmarchamnia ajasártatui. Tura átumka ‘Wí shuarchaitrume’ tunamármena núnaka iniaisar antsu ‘tuke iwiaaku Yusa uchirí̱ntrume’ tunattarme.

Juir 2:32

Kame Uunt Yus timia tímiatrusaṉ Jerusaréṉnum Seun nainniumka uwempratin átatui. Tuma asamtai yaaksha Uunt Yusa naari̱ pachis enentáimtuinia nuka uwemprartatui. Nuyá̱ Uunt Yus untsukma ainia nuka tuke iwiaaku juákaru ainia nuja̱i̱ pujusártatui. Tur. 2:17-21

Juir 3:17

Winia akantúkma náintiur Seunka nui̱ṉkia atumí Yusri̱ Wi Uunt Yusan pujamu nekarattarme. Nui̱ṉkia Jerusaréṉka ti shiir akantúkma pepru átatui. Túrunamtaiṉkia atakka wáinchatai aentska nuní̱ wayá̱ yajauch awajtámas naṉkaamakchartatui.

Apt. 1:21

Nuyá̱ uwemtikkiartin Seun naintnium wákartatui túrawar naintiar naintra Esaú nuṉkanka nékaskea nuja̱i̱ métek sumamtikiattawai. Nuya̱ṉka Jiuwá akupin ajastatui.

Mik. 2:12

Ti nekas Israer shuar juákaru ainia núnaka juukartatjai túran murik wénuimiunam matsatna nútikian matsastatjai. Túram untsurí aents matsamás tétete ajá matsamártatui. Ni akupniúri̱nkia Uunt Yus eem wétatui” tíniuiti Uunt Yus.

Mik. 5:3

Túrasha nuwa̱ takustinia nu tsawantri̱ jeamam núnisaṉ chíkich nuṉkanam Israer shuar matsatainia ní shuarja̱i̱ iruntratai tusar waketkiar kaunmam Uunt Yuska ní shuarnaka ajapa iniaisartatui.

Mik. 7:18

¿Ámiji̱a̱i̱ métek chíkich Yussha áwak? Kame yajauch túrutai̱sha tura Yusa aentsri̱ Nin enentáimtin juákaru ainia nuna tunaarí̱sha tsaṉkuram kajinmátniuitme. Warí Ni waitnenkartutariji̱a̱i̱ péṉker asa tuke kajekka pujuchuiti.

Sup. 3:13

Israernumia̱ juákarua nuka yajauchin túrichartatui tura wáitniasha chichaschartatui tura ni wene̱nia̱sha anaṉkartuatniuka atsuttui. Warí, péṉker wainkiamu ártatui. Tura yáakesh sapijmiamtikiachma péṉker kanarartatui.”

Sup. 3:20

Átum achirar yaruakma matsatrumin aṉkant awajsattajrumna nuka atumí jí̱ji̱a̱i̱ṉ wainkiattarme. Túrunawakrumni̱ṉkia nu tsawantinkia Wiki ikiankattajrume túran Wiki irurtatjarme nu tsawantinkia. Túran ashí nu nuṉkanam aents matsatainia nu shiir awajtai̱ tura nekaamu árat tusan apujsattajrume” tawai Jiuwá.

Apu. 11:15

Nuyá̱ suntar siatia nu, kachun umpuarmatai chícham kakaram chichainia nayaimpinmaya̱ antunkamai. Jú̱nis tiarmai “Yamaikia ii Uuntri̱ Yus tura ni Anaikiamu Kristu ashí shuaran akupin ajasárai. Nisha tuke amutsuk akupkartatui.”