Juaṉ 9:39 - Yus Papí: Shuarja̱i̱ Yus Yamaram Chicham Najanamu

³⁹ Nuyá̱ Jesus chichaak “Shuara enentái̱n nekaan akantratajtsan táwitjiai. Ni enentái̱n kusuru ai̱ṉ íimtiktinian tura anaṉmamuk ‘Yúsnan nekaan paant iimjiai’ tana nuna ukusturtinian táwitjiai” tímiayi.

Juaṉ 9:39 Iomraidhean Croise

Isa. 29:10

Warí Uunt Yus atumí nekatairi̱n kanarua áitkiartamaitrume. Tura atumí Yúsnan etserniuri̱n ji̱ncha epetka nútikiaiti tura nekamin ainia nunasha nekamtai̱ri̱n emenkátkaiti.

Isa. 44:18

Ju̱ aentska ji̱ epetkamu asar wáinmainiatsui tura enentáimias nekaawai tusar enentái̱ akirtuamu áiniawai.

Isa. 6:9

Tutai Ni chichartak “Ayu, wetá tura ju̱ aents chicharainiakum jú̱nisam tiartá ‘Péṉker ántayatrumek antukchattarme tura péṉker wáiniatrumek nekaashtatrume’ tiartá.

Isk. 12:2

“Aentsu uchiri̱yá ámeka umichu ainia nu matsatmanum pujame. Nuka iimiainiaksha wáinmainiatsui tura kuíshtin áiniayataṉ ántuiniatsui. Warí tuke umichu áiniawai.

Mat. 11:5

Kusurúsha wáinmainiawai.YKan. 146:8; Isa. 29:18 Shutuapsha wekainiawai. Tunamárusha péṉker ajainiawai. Empekárusha ántuiniawai. Jákarusha nantainiawai. Tura kuítrinchanmasha uwempratin chicham ujakmaiti.YKan. 68:10 Nu ujaktarum.

Mat. 6:23

Antsu ame ji̱mi yajauchitkiuiṉkia tsáapin amiin waya̱chmin asamtai tuke kiritin átatui. Núnisaṉ yajauchia nu wakerakmeka péṉkera nu ame enentáimiin waya̱chmin asamtai tuke kirit ajastatui. Nu kiritcha imiá yajauchiti.

Ruk. 13:30

Nui̱sha yamái ukunmaani̱ ainia nusha emka ártatui tura yamái emka ainia nusha nui̱sha ukunmaani̱ ártatui” tímiayi.

Ruk. 2:34

Semiuncha chichaak “Yus shiir enentáimturmasarti” ti Marin chicharuk “Nekaata. Ju̱ Uchin Israer shuartisha untsurí nakitrar iniarartatji. Tura chíkich Israer shuartikia ju̱ Uchin shiir enentáimtusar ti wararsartatji. Tura Uchiram Yusa kakarmari̱n ti paant iniakmastatui. Tuma ai̱ṉ untsurí Aun yajauch chichariartatui.

Ruk. 4:18

Yusa Wakaní̱ winí̱ pujurtawai. Shuar warainiachun shiir chichaman ujaktinian anaitiukuiti. Kúntuts enentáimiar wake mesek pujuinian tsuártinian akuptúkuiti. Achira yaruakma ainia nusha aṉkant awajsaruiti tura ji̱ kusurúncha íimtiktinian tura yajauch awajsamu ainia nuna péṉker awajsatniuncha

Ruk. 7:21

Wats, ni jeawarmia nui̱ Jesus untsurí jaan tsuártasa pujurmiayi. Iwianchrukuncha iwianchri̱n ji̱i̱rki̱ akuptúktaj tusa pujurmiayi. Tura kusurúncha íimtikmiayi.

Juaṉ 12:31

Yamaikia nuṉkanam makumatin jeayi. Tura iwianchi uuntri̱ ju̱ nuṉkanam akupniua nu nupetnak ajapnattawai.

Juaṉ 12:46

Wikia tsáapnin asan Winia enentáimturainia nuka kiritniunam wekasa̱i̱ṉ tusan ju̱ nuṉkanam táwitjiai.

Juaṉ 3:17

Yus aentsun kajerak jinium surukat tusa ni Uchirí̱n akupkachmiayi. Antsu uwemtikrarat tusa akupkámiayi.

Juaṉ 3:19

Yusa Uchirí̱ tsáapninia áintsaṉ ii yajauch túramuri̱n paant awajtúrmaji. Nu tsáapnisha ju̱ nuṉkanam táraiti. Shuar tunáa ti tura ásar tsáapninian nakitrar kiritniun wakeriarmai. Nuna tura ásar jinium surunkaruiti.

Juaṉ 8:12

Ataksha Jesus Yusa Uunt Je̱e̱n iruntrarun chicharainiak “Ju̱ nuṉkanam Wi tsáapninia áintsan shuara enentái̱n paant awajtajai. Ashí Wiji̱a̱i̱ tsaniṉ wekaana nú shuar kiritniunam wekasashtatui antsu shuar iwiaaku pujuwa nu tsáapninium wekasattawai” tímiayi.

Juaṉ 8:15

Ju̱ nuṉkanmaya̱ aents enentáimmiaja̱i̱ enentáimtakrum tí sumamtikrume. Tura Wikia chikichkinkesha súmamtiktsujai.

Juaṉ 9:25

Tutai “Kame tunaarinchashit. Nékatsjai antsu ju̱nak nékajai. Yaunchu kusurúitiatan yamaikia iimjiai.”

Tur. 26:18

Péṉker jintintiata tusan akupeajme. Kame aentssha kiritniumia̱ jíinkiar tsáapninium wekasarat tusan tura iwianchi kakarmari̱ya̱ aṉkant awajsar Yusan umirkarat tusan akupeajme. Tura Winia enentáimtursarmatai Wisha ni yajauchiri̱n tsaṉkurattajai. Nuna túran Yusna ajasáru áiniana nuja̱i̱ apujsattajai.’ Nuna Jesus turutmiai.

2 Kur. 2:16

Meṉkakatniunam weena nuka ii kuṉkúajnia nuna jakamnia mejea nekapramji. Tura iwiaaku átinnium weena nuka iwiaaku átin kuṉkúa nekapramji. Maa, nu túratniuncha ¿yaki jeá?

Ipi. 5:14

Nu asamtai Yus Papinium tawai “Kanaruitme nu shintiarta. Jakamunmaya̱ nantaktia. Tura Kristu tsáapin awajtúrmastatui.” Isa. 60:1

2 Tis. 2:10

Jinium wémin ainia nú shuaran ashí tunáa ana nuja̱i̱ anaṉkawartatui. Nu shuar Yus Chichaman nekas ana núnaka nakitraru ásar uwemprachmin áiniawai.

1 Pit. 2:9

Tura átumka Yus achikmaitrume. Tura wínian pujurtursarat tusa yajauchinmaya̱ Uunt Yus akantámkaitrume. Yusna asarum péṉker enentáimin ajasurme. Tura sumakma asarum Yúsnaitrume. Nisha winia péṉkerun etserturkarat tusa túraiti. Kame kiritniunmaya̱ jiinkirum ni tsáapnintri̱n wekasatniun achirmákurme.Jiin. 19:5-6; Muis. 10:15; Isa. 61:6

1 Jṉ. 2:11

Tura shuar chíkich Yus shuaran nakitiakka kiritniunam tuke wekaawai. Tura kiritniunam iimiu asa itiuraani̱ wea nuna nékatsui.