Juaṉ 8:34 - Yus Papí: Shuarja̱i̱ Yus Yamaram Chicham Najanamu

³⁴ Jesus chichaak “Timiá nekasaiti, ashí shuar tunaan túruinia nuka nu tunaaja̱i̱ emetamuiti. Tuma asa takarniua núnisaṉ ajasuíti.

Juaṉ 8:34 Iomraidhean Croise

1 Akup. 21:25

Tura Akaapka ni nuwe̱ Jisawír yajauch túratin útsuamu asa Uunt Yus iismasha ti yajauchin túrimiayi. Tuma asa chíkich aents Akaapja̱i̱ métek yajauch túratniun surumatkaka peṉké atsumiayi.

Neka. 5:22

Antsu Yusan enentáimtichuka ni yajauch túrutairi̱n emetamu áiniawai kame ni tunaari̱n chapikji̱a̱i̱ jiṉkiatniua nútikiamu pujuiniawai.

Mat. 5:18

Nekasan tájarme. Ashí túrunatniua nu amúatsa̱i̱ṉ nu akupkámu ishichkisha yapajniáshtatui. Nayaimpisha tura nuṉkasha tuke amúatsa̱i̱ṉ nu akupkámusha amuukashtatui.

Juaṉ 3:3

Tutai Jesus chichaak “Tí nekas tájame. Atak yamaram akiiniachuka Yusa akupeamuri̱n pachinkiashtatui.”

Tur. 8:23

Nékajme, tsaaṉkea áintsaṉ yapá enentáimin pimiutramkaiti. Tura tunaarumiin jiṉkiamua núniniaitme” tímiayi.

Rum. 6:12

Nu asamtai tunaaka aya̱shmíin akuptámkashtiniaitrume. Aya̱shí̱ wakeramuri̱ umirkashtiniaitrume. Aṉkantaitrume.

Rum. 6:16

Tuke umireajnia nuna takarniúri̱ntji. Nuka nékatsrumek. Tura ni takarin ajasam umirkatniuitme. Tuma asamtai tunáa umirkurkia ni takarniúri̱ntji tura umirkar jakattaji. Tura Yus umirkurkia péṉker wekasattaji.

Rum. 6:6

Yaunchu enentáimtai̱ṉkia Krístuja̱i̱ métek jaka asamtai ii yajauch wakerutain emeṉkátrutmakuitji. Tuma asamtai yamaikia peṉké umirkashtiniaitji.

Rum. 7:14

Akupkámuka Yúsnaiti. Nu paant nékaji. Antsu wikia aya̱shnia nuna súmameakun tunaan umireajai.

Rum. 7:25

Yuska ii Uuntri̱ Jesukrístuja̱i̱ túrutmamniaitji. Tuma asamtai Yusan tí yumiṉkiajai. Ayu. Winia enentái̱rja̱i̱ Yus akupkámun umirniuitjiai. Antsu winia aya̱shruja̱i̱ tunaan umireajai.

Rum. 8:21

Nu tsawantai̱ ashí Yus najanamu emesnartinniumia̱ uwemprartatui. Tura ashí Yus najanamuka shuar Yusa uchirí̱ ajasárua nuja̱i̱ métek shiir awajnásar aṉkant ajasártatui.

Ipi. 2:2

Nu tunaanum jú̱ nuṉkanam pujuinia nuja̱i̱ métek tuke wekainiuyarme. Túrarum iwianchi akupniuri̱ wakeramuri̱ umirniuyarme. Iwianchi uuntri̱ Yusan umirainiatsna nuna ashí akaténawai. Kame ju̱ nuṉkanam yajauch wakan ni akupeamuri̱ji̱a̱i̱ wekainia nuja̱i̱ métek atumsha wekainiuyarme.

Tit. 3:3

Warí, Yuska umirtsuk iisha núnisrik Yus shuar ajatsuk náṉkamsar wekaimji. Tura íwianch emetamu pempée wekaimji. Tura ii aya̱shi̱ wakeramu tuke túriniuyaji. Tunaasha túriniuyaji. Chíkich atankittsar wakeriniuyaji. Chíkich shuar kajerkar tura nuamtaksha kajernainiuyaji.

2 Pit. 2:19

“Iiya núnis túrakrumka aṉkant átatrume” tu wénawai. Túrasha imia niṉki ni tunaarí̱i̱n emetamu áiniawai. Páantchakait. Shuar warí tunaaja̱i̱n nupetnaka, nuna emetamuri̱nti.