Juaṉ 10:1 - Yus Papí: Shuarja̱i̱ Yus Yamaram Chicham Najanamu

¹ Jesus chichaak “Wi tájana nu ti nekasaiti. Shuar murikiun takakna nu ni murikrí̱n wenuimiunam kashi ikiuawai. Tura murik wenuimiunam pujuiniakui yajauch shuar murikiun kasamkatniun wakerakka wáitiniam waya̱chmin asa tanishnum waruk yajá waya̱wainti.

Juaṉ 10:1 Iomraidhean Croise

Jrm. 23:21

Túrasha wikia Yúsnan etserin ainia núnaka akupkacharuitjiai túramaitiat niṉki tsékeṉkiarmai. Wikia chichascharmajai túramaitiat niṉki etserkarmai.

Jrm. 23:32

Wats ju̱sha nekaata tawai Uunt Yus. Kame Yúsnan etserin mesekar wait ainia nuna etserainiak ni waitri̱ji̱a̱i̱ yuminchin chichasar Winia shuarun awajimtikiainia nuna yamaikia kajerkarjai. Warí Wikia akuptancha akupkacharuitjiai núnisaṉ warí péṉkernaksha jú̱ peprunka peṉké itiarchartatui” tawai Uunt Yus.

Juir 2:9

Tura péprunka weantúrar wenuknum wákaar tsékeṉkiar je̱a̱sha wákaar kasaja̱i̱ métek je̱á̱ áṉkamuri̱ni̱ waya̱wartatui.

Mat. 7:15

Aneartarum. Wáitruiniak ‘Wi Yúsnan étserjai’ tuinia nu írunui. Pátatek murikiua áinis yúpichuch áiniawai tura ni enentái̱n nekas úunt ya̱wa̱ áinis áiniawai. Pátatek shiir chichainiawai tura ni enentái̱n yajauch piákuiti.

Juaṉ 10:7

Nuyá̱ Jesus chichaak “Ti nekasan tájarme. Murik wainia nu wáitinkia Witjiai.

Juaṉ 3:3

Tutai Jesus chichaak “Tí nekas tájame. Atak yamaram akiiniachuka Yusa akupeamuri̱n pachinkiashtatui.”

Rum. 10:15

Tura akupkachmasha ¿itiurak Yus Chichaman ujakárat? Tura shuar Yus Chichaman etserkataj tusa wéana nuna Yus Papinium tawai “Shuar uwempratin chichame̱n etserki̱ wéana nu ti shíirchakait.” Isa. 52:7

Rum. 16:18

Nu shuar ii Uuntri̱ Jesukrístunun takainiatsui. Antsu ni wakeramun uminiawai. Tura ti shiir chichasar nékachun anaṉkenawai.

Tit. 1:11

Nisha kuítian achiktaj tusar wakeruiniak yajauch unuiniarchatniua nuna unuiniainiawai. Nuna túruiniak untsurí shuaran ni írutkamuri̱ji̱a̱i̱ yajauch enentáimtikiainiawai. Tuma asamtai ántar chichainiakui ni wene̱ epetkatniuiti.

Isr. 5:4

Shuar ni enentái̱ji̱a̱i̱ṉkia Yúsnan pujurniu uuntri̱ ajaschamniaiti. Antsu Yus nu shuaran anaikiatniuiti. Núnisaṉ Araunan anaikiamiayi.

1 Pit. 1:10

Yus aentsun waitnenta asa uwemtikrataj tusa tuke wakerimiayi. Núnaka Yúsnan etserin etseriarmiayi. Kristu Wakaní̱ ni enentái̱n pujuriarmia nu túruntsa̱i̱ṉ Kristu wáitsatniuri̱n jintíarmiayi. Tura ukunam ni ti shiir pujustintri̱ncha etseriarmiayi. Túrasha tú áishmaṉkait Kristu tutai tura urutíak túrunat tusar nu etserin émamkesar anintrúsarmiayi.

2 Pit. 2:1

Tura Israer shuarnum wait chichaman etserniusha páchitkia ármiayi. Atumíincha wait chichaman unuiniau páchitkia ártatui. Nisha awajimtikrampratniun wakeruiniak wáitian ti yajauchin ú̱kar unuiniarartatui. Tura “Uunt Jesus uwemtikrurmia nusha ántraiti” tiártatui. Nuna takui̱ ni amuukatniuri̱sha wárik jeartiatui.

2 Pit. 2:3

Kuítian ti wakeruinia ásar wait chichaman unuitiamprar akíam kuítriniawartatui. Tura nú shuar yaunchu Yus jákatniunam sumamtikiawarma ásar ni amuukatin tsawantri̱ jeatémayi.

1 Jṉ. 4:1

Aneamu yatsuru, untsurí shuar wáitruiniak “wi Yúsnan etserniuitjiai” tuíniawai. Tuma asamtai ashí shuar “wi Yusa Wakaní̱n takakun chichaajai” tuinia nu péṉker nekaptsuk enentáimtusairap. Antsu íisrum nekas Yusa Wakanímpiashit tura chíkich wakaniashit nu nekaatarum.