Jrm. 4:4 - Yus Papí: Shuarja̱i̱ Yus Yamaram Chicham Najanamu

⁴ Uunt Yusai̱ tsupirnaktarum. Aentsu aya̱shi̱ tsupirnaktinia ántsarum Jutanmaya̱ shuartirmesha tura Jerusaréṉnum matsatutirmesha atumí enentái̱n tsupirnaktarum. Túrachkurmiṉkia átum yajauch túramunam Winia kajetair jiya núnin jiinkí̱ atumín ekemátmakairum. Túrunamtaikia yaaksha nuna ikiajniáktinkia atsuinti” tíniuiti. Rum. 2:28-29

Jrm. 4:4 Iomraidhean Croise

Jrm. 15:14

Túran yajá ámeka nékashtai̱ nuṉkanam ame nemasrumi iniatairi̱ awajsattajme. Warí, winia suíruka jiya núnis keekái tura atumíin kéektatui.

Jrm. 21:12

Tawit shuartirmesha Uunt Yus ju̱na tiniua nu antuktarum. ‘Nékaskea nuja̱i̱ métek péṉker súmamtikiuram achikiar jukimiu wáitkiasma nusha wárik aṉkant awajsatarum. Nuíchuka atumí yajauchiri̱n Winia kajetair ji keek aesa mash awajniua núnis kéekmataisha yaki ikiajnátramkatarum.’

Jrm. 21:5

Atumji̱a̱i̱ kakaram kunturja̱i̱ tura uwejrun iwiaintiukan tura suira kaje̱ntkan ti kajekan mánaiktatjai.

Jrm. 23:19

Uunt Yusa kajetáiri̱ naseya núnis ti kakaram winittiawai. Auka nu nase péper péper ajakí̱ ti kakaram ajas Yusan umircha ainia nuna muuke̱n iniantrartatui.

Jrm. 36:7

Uunt Yus íimmianum aentsu seamuri̱ jeawainti tura aṉkant aṉkant ni yajauchiri̱ya̱ ataksha waketkiarainti. Warí Uunt Yusa kajetáiri̱ṉkia núnisaṉ Ni suíri̱ṉkia úuntaiti tusa jú̱ aentsun ujakáruiti” tímiayi.

Jrm. 44:22

Warí, yajauch tura mui̱jmiai̱ áiniana nu átum túramarmena nuna nú arant katsunkí̱ wétinian Uunt Yuska peṉké tujintkiamai. Tuma asa atumí nuṉke̱ṉka aya jú̱nik juak ashammai ajas tura yajauch yumiṉkramu asa yamái urukuit núnis áentsri̱ncha ajasuíti.

Jrm. 9:25

Wats antuktarum Uunt Yus chichaak “Iisiana tsawant jeatta nuiṉkia ashí tsupirnakaruncha tura tsupirnakcharuncha Ejiptunmaya̱n, Jutanmaya̱n tura Etumnumia̱ncha Amun aentsnasha nuyá̱ Muápnumia̱n núnisaṉ kampuntin atsunumaṉ matsatainia nunasha asuttiáwartatjai. Warí ju̱ nuṉkanam matsatainia ju̱ke ashí tsupirnakcha tura ashí Israernumia̱ ainia nusha Winia enentáimtursacharu ásar aya̱shnium tsupirnakcha ánis enentáiniam tsupirnakcharu áiniawai” tawai.

Isk. 18:31

Tura átum tunáa túraitrumna nuya̱ṉka kanakrum ashí iniaisatarum. Túrunarum yamaram enentai tura yamaram enentáimtairam achiktarum. Warí ¿urukamtaik Israer shuartirmesha jakatarum?

Riw. 26:28

nui̱ṉkia Wisha suíran ka̱e̱ kaje̱ntkan nú arant awajsattajrume. Túran átum yajauch túramunam nuna naṉkaamas siati awaiṉkin ataksha siati asutiáttajrume.

Riw. 26:41

Wisha núnisnak nin nakitiáiniakun kajerkaran ni nemasri̱ nuṉke̱n akupraru asan ni tsupirkachma núnisar Yusan enentáimtachunak enentáin yapaji̱áwar ni tunaarí̱n nekaamawarmataiṉkia

Ams. 5:6

¡Jiuwá e̱a̱ktarum túrakrum iwiaaku atarum! Túrachkurmeka Jusé shuari̱nkia kajerak jiya núnis jiinkí̱ Pitiran aeseakui ¿yaki ikiajniákat?

Sup. 2:2

Akupkámu uminkiatniua nu tsawant jeatsa̱i̱ṉ tura saepa núnisaṉ tsawantcha naṉkaamatsa̱i̱ṉ nuyá̱ Jiuwá suira ka̱e̱ kaje̱nkamuri̱ atumíin jeartamtsurmini̱ṉ núnisan Jiuwá kajetáiri̱ tsawant atumíin jeachmanumaṉ enentáimpratarum.

Rum. 2:25

Muisais akupkámia nu ashí umireakmeka ni timia núnismek tsupirnaktin péṉkeraiti. Tura takamtsuk umireachkumka tsupirnakcha núnisketme.

Muis. 10:16

Tuma asamtai yamaikia kátsuram enentáikia iniaisarum nekas enentáiji̱a̱i̱ umirkuram Úunt Yusnaitrumna nu paant iniakmamsatarum.

Muis. 30:6

Tura atumí nekas enentái̱ji̱a̱i̱ tura takamtsuk wakaní̱ji̱a̱i̱ Winia anentakrum iwiaaku pujusmíntrum tusa aya̱shnium tsupirnaktinia núnis Uunt Yus atumín tura atumí uchirí̱ enentái̱ncha yapajtiúrmattarme.

Muis. 32:22

Warí Winia kajetáirui̱ya̱ jiya núnis keekái. Túmak initcha Seura tímianaisha jeattawai. Tura nuṉkancha nuyá̱ nui̱ yuraṉ írununcha mash amuktatui. Núnisaṉ naintia táritramuri̱sha keekartatui.

Kurs. 2:11

Nu arant átum aya̱shnium tsupirnatskesha Kristu shuari̱ ajasákrumin ashí aya̱sh wakeramun tsupirkatniua áintsaṉ, Kristu ajapaiti.