Jrm. 27:9 - Yus Papí: Shuarja̱i̱ Yus Yamaram Chicham Najanamu

⁹ Atumí etserniuri̱ṉkia, nekamniusha, mesekra nékausha, wakaní̱ untsuusha, uwishniusha chichartamainiak ‘Papirúnianmaya̱ úunt akupin umirkairap’ turamainia nuka átumka anturkashtiniaitrume.

Jrm. 27:9 Iomraidhean Croise

Jiin. 22:18

Nuwa̱ uwishin ainia nuka iwiaaku pujustin tsaṉkatnakchati.

Jiin. 7:11

Tura Parauṉka unuimiákuncha núnisaṉ uwishniuncha ikiankamiayi. Tura nisha ti neka ásar ni anaṉkartutairi̱ji̱a̱i̱ ímiatrusaṉ túruiniak

Neka. 19:27

Uchiru, jintinkratai̱ nekatai̱nmaya̱ akantámkimia nuka anturkaip.

Isa. 8:19

Tura atumín chichartamainiak “Jakaan chicháu áiniana nu tura nekamin ishishmasar chicháu áiniana nusha anintrústarum” turamainiakuisha chicharkuram “Aents ¿ni Yusri̱nkia anintrúschatniukait. Iwiaakna nu jakaan anintrústinkiait?” titiarum.

Jrm. 14:14

Nuyá̱ Uunt Yus chichartak “Yúsnan etserin ainia nu Winia náarun ántar pachisar waitruá etserainiawai. Kame Wikia niṉkia akupkacharuitjiai. Ímiaja̱i̱k wainkiamuncha waitruá etserainiawai tura ni enentái̱ji̱a̱i̱ṉ waitruá chichartamainiak ju̱ nuṉká ju̱ka mesetcha tsukasha atsuttawai turamainiawai. Túrasha nú Yusnan etserniuka mesetja̱i̱sha tsukaja̱i̱sha amuukartatui. Tura yana ujakármia nu aentsuk jákarmatai Jerusaréṉ jintianam ajapnawartatui. Túrawarmatai yáakesh nin iwiarsatniuka atsuttawai. Nuní̱ túrawaran ní yajauch túrutai̱ji̱a̱i̱ṉ akikiártatjai.

Jrm. 23:16

Ashí Akupin Uunt Yus jú̱nis tawai “Yúsnan etserin ainia nuna chichame̱ anturkairap. Warí átumka ‘ashí tí peṉkera nuna wainkiattajai’ tu enentáimpratarum tusar ántar ujatmainiawai. Kame ni enentáimsaṉ ímiaja̱i̱k wainkiamuncha ujatmainiawai túrasha nuka Uunt Yusa chichame̱nchuiti.

Jrm. 23:25

“Yúsnan etserin ainia nu Winia náarun ántar pachisar ¡Mesekamprajai, mesekamprajai! tusar wait chichaman etserainiana nunasha anturkaruitjiai.

Jrm. 23:32

Wats ju̱sha nekaata tawai Uunt Yus. Kame Yúsnan etserin mesekar wait ainia nuna etserainiak ni waitri̱ji̱a̱i̱ yuminchin chichasar Winia shuarun awajimtikiainia nuna yamaikia kajerkarjai. Warí Wikia akuptancha akupkacharuitjiai núnisaṉ warí péṉkernaksha jú̱ peprunka peṉké itiarchartatui” tawai Uunt Yus.

Jrm. 29:8

Israera Yusri̱ Ashí Akupin Uunt Yus chichaak jú̱nis tíniuiti. Atumí yusri̱niun etserin tura nekamin atumíin pujuiniana nu anaṉkramawairap. Tura mesekar mesekrampramuri̱sha peṉké anturkairap.

Tan. 4:7

Nuya̱ṉka uwishniusha, yaaja̱i̱ nekamniusha, nekamin Kartíu tura jaká untsuusha káunkarmai. Túramtai wi mesekrampramaj nuna ashí ujakármajai. Túramaitiat mesekran nekaacharmai.

Mks. 3:5

Nuya̱ṉka atumíin jean sumamtikiattajrume. Túrakun wawekratniunka núnisaṉ tsanirmancha tura anaṉkartuattsa Yussha irui nekas umiktatjai tiniu ainia nunasha núnisnak takarin áinian nuyá̱ waje̱ncha áitkiasnak mitiaikian waitkia ainia nunasha nu arantcha iraran yajauch awajin ainia nunasha Wíniaka ashamprutsuk nuna túrawaru ásarmatai Wisha nekasaiti tusan wárik makuraran ashí sumamtikiawartatjai” tawai Ashí Akupin Uunt Yus.

Tur. 8:11

Tura ti untsurí uwí wawekratmari̱ji̱a̱i̱ anaṉkarta asamtai nu aents umirkarmiayi.

Ipi. 5:6

Nu túramniaiti tusar ántar chichamja̱i̱ anaṉkramacharti. Warí, nuna túruiniakui Yusan umirainiachun Yus ti asutiáwartatui.

Muis. 18:14

Kame nu nuṉkanmaya̱ átum jí̱i̱rtatrumna nu shuarka uwishniuitjiai tura nekamniuitjiai tuinia nuna anturin áiniawai. Tuma asamtai atumí Uunt Yusri̱ nu yajauch túratniunka tsaṉkatramkacharuiti.

Apu. 18:23

Shiripkincha ekemákchartatui. Nuatma nampersha antunkashtatui. Nuikkia ni shuari̱ súrin arma nu ashí nuṉkanam naṉkamantu armai. Tura ashí nuṉkanmaya̱ aentsun waweatniua áintsaṉ niya núnis ajasarat tusa anaṉkawarmai. Túrasha núnisaṉ ti kakarmaitiat ju̱ mash túrunayi.

Apu. 21:8

Antsu sápijkia Yusan enentáimtichusha, yajauchin máatrasha, maṉkartincha, tsanirmatan pujurniusha, wawekratniusha, najankamu yusan tikishmátniusha tura ashí wáitrincha ji asupriji̱a̱i̱ keá antumiaṉnum apenáwartatui. Nuka jimiará jákatin tutainti” timiai.

Apu. 22:15

Tura antsu Yusan enentáimtachuka, wawekratniuka, tsanirmatan pujurainia nuka, maṉkartinkia, najankamu yusan tikishmátniuka tura ashí shuar wáitian wararainiak tuke túrin ainia nuka a̱a̱ matsatainiak peṉké waya̱chmin áiniawai.

Apu. 9:21

Núnisaṉ maṉkartuatniuncha, wawekratatniuncha, tsanirmatniuncha tura kasamkatniuncha iniaisacharmai.