Jrm. 2:8 - Yus Papí: Shuarja̱i̱ Yus Yamaram Chicham Najanamu

⁸ Yúsnan pujurniusha Uunt Yussha ¿tui̱ pujá? turutcharmai. Tura akupkámu umiktin chichaman nékainiasha nekaracharmai. Murikiu wáinin arma nusha Wíniaka nakitruiniak kajertukarmai. Núnisaṉ Yúsnan etserin arma nusha Paara náari̱ji̱a̱i̱ etserkarmai. Túmainiak antra nuna e̱a̱karmai.

Jrm. 2:8 Iomraidhean Croise

1 Akup. 18:22

Nuya̱ṉka Irías ataksha chichaak “Uunt Yúsnan etserniunka aya wiki juakjai antsu Páarnan etserin ainia nuka kuatrusiántu seṉkuintia áiniawai.

1 Akup. 18:29

Kame tutupin naṉkaamasmataisha wáurkamaikia nuna kakaram untsumainiak kí̱arai̱ árak áestutai̱ urancha aya úntsumtaik ejeniarmiayi. Túrasha ai̱kiartincha tura anturkartincha peṉké atsumiayi.

1 Akup. 18:40

Nuyá̱ Irías chicharainiak “Páarnan etserin ainia nu achirtarum chikichkisha pisarchati” tímiayi. Nuna takui̱ ashí achirármiayi. Tura Irías Kisun ashintsanmaani̱ yaruak kuntujnum tsupikiar máwarmiayi.

Isa. 28:7

Tura Yúsnan takarniusha núnisaṉ Yúsnan etserniusha ímiaja̱i̱k wainji tuinia nusha awartiun nampeku ásar ántar tuíniawai. Tura winiú nampekar nekasa nuna chichainiachu ásar ti awajir chichainiawai. Ántsaṉ mai̱ énentaim ajainiak péṉker sumamtikiainiatsui.

Isa. 29:10

Warí Uunt Yus atumí nekatairi̱n kanarua áitkiartamaitrume. Tura atumí Yúsnan etserniuri̱n ji̱ncha epetka nútikiaiti tura nekamin ainia nunasha nekamtai̱ri̱n emenkátkaiti.

Jrm. 10:21

Warí murikiu wainniusha netse ajasár Úunt Yusnasha e̱a̱kcharuiti. Túmainiak péṉker wáinkiacharma ásar murikrí̱sha ashí tsakiṉmakaruiti.

Jrm. 12:10

Murikiu wáinin untsurí uwa ajarnasha emesturkar Winia nuṉkarnasha amuuturarai. Winia tí shiirmachia nuka kampuntin atsá awajsamuiti.

Jrm. 16:19

Maa, winia kakarmar tura utúachmin asa itiurchat ákuisha winia ejamtair Uunt Yusru. Nuṉka náṉkatramunmaya̱ uunt nuṉka mátsatkamu ainia nusha Ámin káutramiartatui tura chichartamainiak “Ti nekas ii úuntri̱ṉkia yaintmakchamnia ántar wait áiniana nuna ikiurtámkiaruitji” turamartatui.

Jrm. 18:18

Takui̱ chichainiak “Káunkatarum Jirimías chícham najatawarmi. Warí, Yúsnan takarniunka chícham jintíamuka taáttsashtatui tura chicharkatniusha neka ainia nunasha taáttsachartatui. Ántsaṉ Yúsnan etserniuncha chíchamka taáttsachartatui. Pai yamaikia winitiárum jiakarmi túrar ni chichame̱ṉka peṉké anturkachartai” tiármiayi.

Jrm. 2:11

Warí uunt nuṉka mátsatka áiniana nu chikichkisha ni yusri̱ nekascha yus ainia nuna ¿yapaji̱áwaruk ainia? Túrasha Winia péprurka ni páantniuri̱nkia iniaisar antra nuna enentáimtuiniawai.

Jrm. 2:6

Núnisaṉ Ejiptunmaya̱ yarurmak atsamunam aya ju̱ju̱ptinniumaṉ kíritniunmaṉ wa̱a̱ írunmanum áentskesha nuiṉkia pujushtai̱niam tura wekachatai̱nmaani̱ juramkimiajnia nu Uunt Yussha ¿tui̱ pujá? turutchamkarum.

Jrm. 4:22

Warí Wi shuarka Wíniaka nekarainiachu ásar enentáincha áiniawai. Uchi peṉké ántichua núnisar antutai̱ri̱sha atsuiniawai. Yajauch túratniunka tí nekainiayat péṉker túratniun peṉké nékainiatsui.

Jrm. 5:31

Tuma ásar Yúsnan etserin ainia nusha waitruá etserainiawai tura Yúsnan pujurin áiniana nusha ní enentái̱ji̱a̱i̱ṉᵏⁱ jú̱nisar túratai tuíniawai. Tura Wi shuarsha nuna wakeruiniawai. Túrasha ni amuukatniuri̱ jeamtaisha atumsha ¿warí itiurkatarmek?

Jrm. 7:8

Wats iiskua átumka waitiá chichame̱ yaintmakchamnia nu nekasa tímianu enentáimtarme.

Jrm. 9:14

Núnaka túrutsuk ni enentái̱ wakeruiniamun tura ni aparí̱ jintintiáwarma núnisaṉ túrawarmai Páaran enentáimtuiniak.

Isk. 34:2

“Aentsu uchiri̱yá, Israer shuar murikiun wáinin ainia nu chicharainiakum ‘Uunt Yus chichaak “Murikiu wáinin niiṉki wáinmamainiana nuka aneararti. Warí, murikiu wáinniuka murikiun wáinkiachartinkiait” túramprume’ tusam murikiu wáinin ujakárta” tawai.

Use. 4:6

Wi shuarka nekatai̱n nékachu ásar emesramuiti. Warí átumka nekatai̱ nakitramarme. Tuma asakrumin Yusna takarniuitrumna nuya̱ntka jí̱i̱ktiatjarme. Warí atumí Yusri̱ akupkámu chichamsha kajinmátki̱n asakrumin Wisha núnisnak atumí uchirí̱ncha kajinmátkiartatjai.

Awa. 2:18

Kame aents nakumak najankarua nusha ¿warinma péṉkerait? Tura jiru imintrar nakumkar najankamu ainia nusha ¿warinma péṉker ainia? Warí aya anaṉkartuatniunak jintiniawai núnisaṉ nakumak chichachun najankayatcha ¿urukamtai timiá péṉkersha enentáimta?

Mat. 16:26

Wats, shuar ashí jú̱ nuṉkanam írunna nuna sumakka tura nuja̱i̱ ni wakaní̱ émeseak ¿itiurak péṉker pujustiṉ? Shuara wakaní̱ emesramu ¿ashí jú̱ nuṉkanam írunna nuja̱i̱ iwiaramniakait?

Ruk. 11:52

Jintinniutiram aneartarum. Waiti asakatniua núnisrumek nekasa nu nekaatin epenearme. Atumkesha waya̱chiatrum waya̱taj tausha suritiarme” tímiayi.

Juaṉ 16:3

Nu shuar Winiasha tura winia Aparnasha nékachu ásar túrutmawartatui.

Juaṉ 8:55

Nusha táyatrum Nin nékatsrume. Wikia Nin nékajai. ‘Nin nékatsjai’ tákunka atumji̱a̱i̱ métek wáitrin aintjiai. Tura Nin neka asan Ni tana nuna tuke túriniaitjiai.

2 Kur. 4:2

U̱ka túratin ana nuyá̱ tura natsanmai̱ ana nuya̱sha kanakmiaji. Anaṉkatai tusar wekaatsji. Tura Yus Chichamja̱i̱ nakuratsji. Étserkur aya Yus Chicham tana núchik étserji. Ashí aents nuna antukar “nekas núiti Yus Chicham” tiarat tusar túraji. Wi tájana nuna Yus nékawai.

1 Sam. 12:21

Najankamu yus ainia nuní̱ kanakiirap. Warí yáimtancha yáimkiachmin tura uwemtikkiartutnasha uwemtikkiarturchamnia ásar peṉké ántar áiniawai.

1 Sam. 2:12

Irí uchirí̱ armia nuka Yúsnan pujurin áiniayataṉ Yusan enentáimtichu ármiayi. Núnisaṉ Uunt Yusa nekatairi̱ncha takakcha ármiayi. Yus áestuatniun tí peṉker armia nú namaṉken níniunak achia̱rmiayi. Arantichu ásar nú natsa yajauchiri̱nkia Uunt Yus íimmianum ti uunt armai.