Jir. 4:5 - Yus Papí: Shuarja̱i̱ Yus Yamaram Chicham Najanamu5 Uunt Jesus tátin ishichik ajasái. Tuma asamtai tsaṉka enentái takakrum nu paant nekanati. Faic an caibideil |
Nu tsawant aya aneachma jeattawai. Ashí aents ju̱ nuṉkanam pujuinia nu, nuna enentáimtsuk pujuiniai̱ jeattawai. Tuma asamtai atumsha anearum wekasatarum. Yajauchiniam emetnarum, aya yurumátniuk, aya umartiniak enentáimtusrum ju̱ nuṉkanam ana nu ti wakerakrumni̱ṉkia péṉker enentáimsatin tujintkiattarme. Nu atsutí tusarum tura nu tsawant aya áwaktamka̱i̱j tusarum péṉker wekasatarum.
Shuar nakurak nekapnaisatin ainia nuka nupetmaktaj tákuṉka ashí itit awajea nuna ikiuiniawai. Iisha núnisrik nu enentáiji̱a̱i̱ Yusna nu takastiniaitji. Nakuruinia nu shuar awakmakun tawasap súsatniua nuna achikiársha nú tawaspan wárik kajinmátkimniaiti. Antsu Yus iin amastatjinia nú tawaspaka peṉké amuukashtatui.
Chíkich shuar anaṉkramawar “Uunt Jesukrístu tsawantri̱ jeayi” tu ujatmáktaj tusar wakeruiniawai. “Íimiarmaj nuja̱i̱ nékajai” turamainiakuisha “Chícham étserman antukmaj nuja̱i̱ nékajai” turamainiakuisha tura “Papru papí áarmari̱ nuna takui̱ nékajai” turamainiakuisha páchim enentáimprairap. Tura sapijmiakairap tusan seajrume.