Jir. 3:10 - Yus Papí: Shuarja̱i̱ Yus Yamaram Chicham Najanamu

¹⁰ Tuma asamtai ashí naṉkaamas wakeraj nu ju̱i̱ti, Krístun péṉker nekaan nekas enentáimtustinniasha tura ni iniantkímiu kakarman takustinniasha wakerajai. Tura Niji̱a̱i̱ métek ajastinian wakerakun ni waitkiamunam tsaniṉtinniasha tura Ni jakamia núnisan jákatniuncha wakerajai.

Jir. 3:10 Iomraidhean Croise

Jrm. 9:23

Uunt Yus chichaak “Ti neka nusha ní nekatairi̱ji̱a̱i̱ṉ niṉki naṉkamaku enentáimtumaschati. Núnisaṉ kakarma nusha ní kakarmari̱ji̱a̱i̱ṉ kakarmaitjiai tu enentáimtumaschati. Tura kuítrinniusha kuítri̱ji̱a̱i̱ niṉki shiir awajmámsashti.

Mat. 20:23

Tuíniakui Jesus chichainiak “Ayu. Winia piniṉkruí̱ya̱ umartatrume. Wi imiantiatjana nuja̱i̱ imiantiatrume. Antsu Wiji̱a̱i̱ tsaniṉkia pujustinniaka Wikia íischatniuitjiai antsu winia Apar iwiarturu ainia nuna nui̱ apujsattawai” tímiayi.

Juaṉ 10:18

Wi wakerakun jakattajai. Wi wakerachkuiṉkia chíkichkia mantuachminiaiti. Jákatniuncha tura nantaktinniasha winia Apar surusuiti” tímiayi Jesus.

Juaṉ 17:3

Kame ju̱i̱ti tuke amukashtin iwiaakma. Amek nekas Yúsaitmena nuna tura Jesukrístu Ame akupkámuiti nú nekaatniua nuiti.

Rum. 8:17

Tura ni uchirí̱ ajasu asakrin Yus timia núnisaṉ ashí Níniun suramsattaji. Krístun ashí susattana núnisaṉ iincha suramsattaji. Yamái Krístunu takaakur wáitiakrikia ukunam Krístuja̱i̱ métek ti shiir awajnástatji.

Rum. 8:29

Yámankamtaikniumia̱ iin nekarmak ni Uchirí̱ Jesukrístuja̱i̱ métek ajasat tusa achirmákmiaji. Nuja̱i̱ Yusa uchirí̱ untsurí ajasji. Tura Kristu ii iwia̱i̱ri̱nti.

Rum. 8:36

Yus Papiniumsha jú̱nis áarmaiti “Amé shuar asar tuke mantamnatin pujaji. Murik matniua áintsaṉ enentáimturmaji.” YKan. 44:22

2 Kur. 1:10

Jakamnia itiurchatnumia̱ Yuska uwemtikrampramji. Tura yamaisha uwemtikrampratajtsa pujurtamji. Tura atumsha iin Yus áujkartakrumni̱ṉkia “Yuska tuke uwemtikramprattaji” taji. Tura untsurí shuar Yus aujsa asakrumin ii uwempra asakrin untsurí shuar Yusan yumiṉsartatui.

2 Kur. 1:5

Warí, Kristu wáitsamuri̱ núkap pachinkiaitjinia núnisrik ni atsaṉkramuri̱n núkap pachinkiaitji.

2 Kur. 13:4

Kristu nekas kakarmachua nútiksaṉ krúsnum máamuitiat Yusa kakarmari̱ji̱a̱i̱ iwiaakuiti. Aya̱shnium Kristu kakarmachu nekapmia núnisrik iikia kakarmachuitji. Túrasha Yusa kakarmari̱ji̱a̱i̱ Ni takatri̱ takaaji. Nuja̱i̱ atumíin iniakmastatji.

Kar. 2:20

Wisha Krístuja̱i̱ krúsnum jákaitjiai. Tuma asamtai yamaikia wikia iwiaaktsujai wi wakeraj nuna túratniun antsu Kristu winí̱ iwiaakui ni wakera nuna túratniun. Tura ju̱ aya̱shnium pujayatan aya Kristu enentáimtakun iwiaakjai. Krístusha Yusa Uchirí̱ntiat winia ti anentuk jarutkamiayi.

Kar. 6:17

Yamaikia itiurchat najatawara̱i̱ṉ. Jesusa takatri̱ takaakui asutiuáwarma paant aya̱shrui̱ chimikma írunui.

Ipi. 4:13

Nuja̱i̱ Yus nekas enentáimtamunam Yusa Uchirí̱ ashí métekrak péṉker nekaattaji. Nu túrakur katsukir Krístuja̱i̱ métek péṉker ajastatji.

Jir. 3:8

Ashí enentáimpramnia ákuisha winia úuntur Jesukrístu shiir enentáimtustin nekas péṉkeraiti. Nu asamtai Krístunu ajakun wi takusmaj nu mui̱jmiai̱ ajasmatai núnaka iniaisámjai.

Kurs. 1:24

Atumín wáitiaknasha ti shiir waraajai. Kristu ni shuari̱n nekas péṉker awajsat tusa wáitiana nui̱ pachinkia asan waraajai. Ashí Yus shuar Kristu aya̱shí̱ áintsaṉ áiniakui Yus shuaran yáiṉtajtsan aya̱shruja̱i̱ wáitiakun shiir enentáimjiai.

Kurs. 2:13

Nuikkia átumsha tsupirnatsuk atumí tunaarí̱ tuke akui atumí wakaní̱i̱n jákauyarme. Tura yamaikia Jesukrístuja̱i̱ tsaniṉkiu asakrumin Yuska atumí tunaarí̱ tsaṉkur yamaram iwiaakman suramsaitrume.

Kurs. 3:1

Nuikia Krístuja̱i̱ nantakin asarum nayaimpinmaya̱ írunna nu wakeruktarum. Nui̱ Kristu pujawai Yusa untsuurí̱ni̱.

1 Pit. 1:3

Wats, Yus ii Uuntri̱ Jesukrístu Aparí̱ ana nuna naari̱ shiir awajsatai. Yussha ti waitnentrama asa atak akiiniatniun suramsaitji. Jesukrístu jakamunmaya̱ nantakin asamtai iikia atak akiiniar tuke iwiaaku pujustiniaitiajnia nu arutramji.

2 Pit. 1:13

Nekaatarum. Wi ju̱ aya̱shin ikiuktinian jeatéma nuna ii Uuntri̱ Jesukrístu ujatkayi. Tuma asamtai ju̱ aya̱shnium pujái̱ atumín tuke enentáimpratarum tusan jintintratniuitjiarme, tu enentáimsajai.

1 Jṉ. 2:3

Yus tana nu umirkurkia nuikia Yus nekas nékaitji.

1 Jṉ. 2:5

Antsu shuar Yus tana nuna umireakka Yusan ti shiir aneawai. Túrakur Niji̱a̱i̱ tsaniṉkiar pujamu nékaji.

Apu. 1:18

Wikia tuke iwiaakuitjiai. Jakamiajai tura nantakin jákashtinian tuke iwiaaku pujajai. Jákatniuncha tura jaka pujuinia nuna yawiri̱n takakun nérenniuitjiai.