Ists. 3:8 - Yus Papí: Shuarja̱i̱ Yus Yamaram Chicham Najanamu

⁸ Kame Saratiára uchirí̱ Surupapír nuyá̱ Jusatáka uchirí̱ Jesúa ni yachi̱sha núnisaṉ ashí Yúsnan pujurin ántsaṉ Riwí shuar tura ashí achirar yajá yaruakma Jerusaréṉnum waketrar káunkarmia nuyá̱ chikichik uwí amukar chíkich uwí naṉkama jimiará nantu jeamunam Uunt Yusa je̱e̱n je̱a̱mtan naṉkamawarmiayi. Tura Riwí shuarsha painti uwí íniaṉkasaṉ takaku armia nu Uunt Yusa Je̱e̱n je̱a̱mtan juárkiarmiayi.

Ists. 3:8 Iomraidhean Croise

Ists. 10:18

Chíkich nuṉkanmaya̱ nuwa̱n nuatraruka Yúsnan pujurniu uchirí̱ṉkia tiasisiáti ármiayi. Nuyá̱ Riwí shuarka sais ármiayi núnisaṉ kantamin armia nuya̱ṉka chikichik ámiayi tura waiti wáinniuka menaint ármiayi. Núnisaṉ Israer shuar náṉkamas armia nuka uchaintia ármiayi. Kame ashí ju̱ aentska chíkich nuṉkanmaya̱ nuwa̱n nuatkaru ásar chíkichkia uchincha yajutmaku ármiayi.

Ists. 2:2

Kame ni uuntri̱ Surupapír tura Jesúa, Neemías, Serayás, Reerayás, Martukíu, Wírsan, Míspar, Wikwai, Reum nuyá̱ Páanaja̱i̱ iruntrar waketkiarmiayi.

Ists. 3:2

Nuya̱ṉka Jusatáka uchirí̱ Jesúa ni yachi̱ Yúsnan pujurin armia nu, núnisaṉ Saratiára uchirí̱ Surupapír yachi̱miak yaunchu Muisais Yusa takarniúri̱ papinium aarmia nuna uminiak Israer shuar murik maar Yus áestutai̱n najanawarmiayi.

Ists. 4:24

Nuya̱ṉka Yusa Je̱e̱ je̱a̱mtinian Jerusaréṉnum naṉkamawarmia núnaka iniaisarmiayi. Tura núnasha Taríu Pirsia nuṉkanam úunt akupin ajasma jimiará uwí pujumia ímianai iniaisarmiayi.

Ists. 4:3

Túrasha Surupapír, Jesúa, núnisaṉ Israer shuara uuntri̱ armia nu chichainiak “Ii Yusri̱ Je̱e̱ṉka atumji̱a̱i̱ iruntrarkia je̱a̱rchatniuitji. Antsu Pírsianmaya̱ úunt akupin Siru akupkámuja̱i̱ métek Uunt Yus Israer shuara Yusri̱ Je̱e̱ṉka iik je̱a̱rtiniaitji” tiármiayi.

Ists. 5:16

Nuya̱ṉka nu Sespasár taa Yusa Je̱e̱ Jerusaréṉnum ana nuna tépakmari̱n aeprurmiayi. Nuyá̱ juárkimiuk yamaiya̱ ju̱i̱sha tuke takainiawai túrasha tuke amuiniatsui.’

Ists. 5:2

Nuya̱ṉka Saratiára uchirí̱ Surupapír tura Jusatáka uchirí̱ Jesúaja̱i̱ ataksha chichamprukar Uunt Yusa Je̱e̱ Jerusaréṉnum je̱a̱mainiayat iniaisámun ataksha naṉkamawarmiayi. Tura Yúsnan etserin armia nusha niji̱a̱i̱ métek pujuiniak ikiakáiniarmiayi.

Aji. 1:1

Uunt akupin Taríu akupin ajas jimiará uwí wéamunam nantu sáistin nantu juarma tsawantin Yúsnan etserin Ajíui̱ní̱ Jutanmaya̱ shuara uuntri̱ Saratiára uchirí̱ Surupapíran núnisaṉ Yúsnan takarniu uuntri̱ Jusatáka uchirí̱ Jusuin Uunt Yusa chichame̱n akuptúkmiayi. Tura Ajíu chicharainiak

Sak. 4:9

“Yusa Uunt Je̱e̱ tépakmari̱nkia Surupapír ní uweje̱ja̱i̱ṉ aeprukmai. Tuma asa amúaksha ní uweje̱ja̱i̱ṉ amuktatui. Tura nu túrunamtai antsu nui̱ṉkia Wíniaka Uunt Yus atumíin akuptúkua nu nekarattarme.

Sak. 6:12

Tura Ashí Akupin Uunt Yusri̱ chichartamuk ‘Ju̱ áishmaṉka náari̱ṉkia Kanawe asa numia áintsaṉ jé̱e̱rtatui. Tura ni kaṉkapé̱ya̱ je̱e̱r Yusa Uunt Je̱e̱n je̱a̱mtiatui túramui’ titiá.