Istr. 7:8 - Yus Papí: Shuarja̱i̱ Yus Yamaram Chicham Najanamu

⁸ Nuya̱ṉka úunt akupin kuku̱j ajanmaya̱ waketki̱ péṉker yurumtainiam nui̱ ataksha támiayi. Tura pujutai̱niam Istir pujamunam Aman iniant awaṉtun tarimiayi. Kame úunt akupin nuna wainiak chicharuk “Winia je̱a̱rui̱ wisha pujai̱ṉkik ¿Istirsha yajauch awajsattam?” úunt akupin nuna takui̱ Amana yapi̱n nukurkarmiayi.

Istr. 7:8 Iomraidhean Croise

Istr. 1:5

Nu naṉkaamasmatai tí peṉker yurumtai̱ namperan akupniu je̱e̱n kuku̱j ajarí̱n úunt akupin siati tsawant najanamiayi. Kame pepru uuntri̱ Súsanam pujuarmia nuka nú aentska naṉkamantu tura péejchach armia nusha ashí ipiaamu ármiayi.

Istr. 1:6

Kame nuiṉkia mármur ukuamunam kuít jiruja̱i̱ tenté najankar nenarmanum kapa̱a̱kuja̱i̱ riniu pachimprar yáraṉ najankamuja̱i̱ jiṉkiar riniu tarach puju tura samek núnisaṉ kiṉkia nenarma armai. Tura nuṉkanka tí shiirmach kaya únise núnisaṉ jasentu ántsaṉ arapástru tura mármur pújuja̱i̱ mukusa piniumár tí peṉker iwiarkar aepramunam tepesá ayamtai̱ kuriji̱a̱i̱ tura kuít jiruja̱i̱ najankamu pujuarmai.

Istr. 6:12

Nu turasu̱a̱ umikiam Martukíuka ataksha úunt akupniu je̱e̱n wáitiri̱n pujuumiayi. Túrasha Amanka tí kuntuts enentáimiar muuke̱n nukuk wárikmas je̱e̱n waketkimiayi.

Istr. 7:10

Martukíu kajemtikra mátniun imia niṉki Aman najanamia nui̱ níniak nenawarmiayi. Túrawarmatai úunt akupin suir kaje̱ntkamun mikirmiayi.

Juup 9:24

Niin enentáimtuiniatsna nuna ju̱ nuṉkan íktusuiti. Tura sumamtikin ainia nuna ji̱ncha ukusturaruiti. Nuiṉkia ¿Níchuitkiuisha yaki aint nusha tui̱ pujá?

Isa. 22:17

Anearta, Uunt Yus achirmak wereṉká ajaprama yarurmaktatui. Maaj kakaram áishmaṉká nekas yapimin nukurmáktatui.

Isa. 49:23

Kame úunt akupniuka ame uchirmin wáinin ártatui tura ni nawantri̱ ainia nusha ame uchirmin tsakatma ártatui. Núnisaṉ tikishmar ámin tsuntsumprútmawar nawemíya̱ nuṉka ju̱yu̱ri̱n nukarartatui. Nuja̱i̱ Wi Úunt Yusaitjiana nu nekaattame. Tura winia nákarainia nuka peṉké natsa̱a̱rchartatui” tawai.

Ams. 3:12

Israer shuar Samarianam peak péṉker iwiarkamunam pujuiniaka murikiu jimiará makuin núja̱i̱nchuka kuishi̱ tsakari̱n úunt ya̱wa̱ apakun murikiu wáinin ata̱i̱nia núnisar pisarartatui” tú tíniuiti Jiuwá.

Mar. 14:65

Chíkich chíkich Jesusan usukiáwarmiayi. Ji̱n epetkar awatiar “¿Ya áitkiarma? etserkata” tiármiayi. Yúsnan pujurniu suntarí̱sha yapiniam awatiármiayi.