Istr. 1:19 - Yus Papí: Shuarja̱i̱ Yus Yamaram Chicham Najanamu

¹⁹ Tuma asamtai úunt akupniu, ámiji̱a̱i̱ péṉkeraitkiuiṉkia akupkámu umiktin chicham úunt akupniui̱ya̱ jíinkiti. Tura Pírsianmaya̱ núnisaṉ Mítianmaya̱ akupkámu yapajchatai̱ya núnis yapajniáshti tusam yamaikia Pástikia úunt akupin Asueru pujamunam peṉké weantkashti. Antsu chíkich nuwa̱n níji̱a̱i̱ṉkia naṉkaamas péṉkeran akupniu nuwe̱ úunt akupin awajsati.

Istr. 1:19 Iomraidhean Croise

1 Akup. 3:28

Nu túramun ashí Israer shuar nekaawar ashamkar “Úunt akupniun Yus nekatai̱n súsaiti nekas métek sumamtikiatniun” tiármiayi.

Istr. 1:18

Núnisaraṉ Pírsianmaya̱ tura Mítianmaya̱ nuwa̱sha akupniu nuwé̱ chichamen antukaruka chichaman iwiarin unuimiákaru akupin anairamu matsatainiana nuna nisha núnisaraṉ tiártatui. Tuíniakuiṉkia muí̱jnaikiatin tura yajauch chicharnaisatin átatui.

Istr. 1:21

Nuna takui̱ akupniúsha tura chichaman iwiarin unuimiákaru pujuarmia nusha nekas péṉkeraiti tu enentáimsarmiayi. Tura akupin Asueruka Memukan timia núnaka tímiatrusaṉ túramiayi.

Istr. 2:1

Uunt akupin Asueru kajekmári̱n iniaṉkas pujus Pasti túramia nuna núnisaṉ úunt akupniui̱ṉkia atakka peṉké táchati tu chichaman najanawarmia nuna ti enentáimturmiayi.

Istr. 3:9

Tuma asamtai ámiji̱a̱i̱ péṉkeraitkiuiṉkia nu aentska ashí amuukarti tu chicham najanata. Túrawakmin akupniu kuitri̱ ikiutai̱niam ikiusarti tusan tias mir tarentu jeá kuítian, wi kuitia wáinin ainia nuna súsartatjai.”

Istr. 8:5

chicharuk “Úunt akupniuja̱i̱ iisam péṉkeraitkiuiṉkia tura winiasha waitnentrakmeka wi seajmena nusha núnisaṉ tájamna nusha túramniaitkiumka uminkiati. Núnismek winiasha shiir enentáimturkumka Akaak shuar Ametáta uchirí̱ Aman Israer shuarka ashí amuukarti tusa papí najana ashí nuṉka tesarma ainia nui̱ akuprarma nuka uminkiashti tusam yamaram chicham ataksha najanata.

Istr. 8:8

Nui̱ṉkia átum úunt akupniu náari̱ji̱a̱i̱ áakrum Israer shuar amuktai tusar papí najanamu asakártai tusarum átum wakeramuja̱i̱ aartarum. Tura áarum winia aniyurja̱i̱ kuchaat kuchaat apujtuatarum. Warí úunt akupniu náari̱ji̱a̱i̱ núnisaṉ ni aniyuri̱ji̱a̱i̱ kuchaat kuchaat apujturma papikia yapaji̱áchminiaiti.”

Tan. 6:17

Túrawar kayan itiariar wa̱a̱n apujtuawar uranchati tura Taniar chícham najatamusha yapajniáshti tusar úunt akupniusha tura peṉkeri̱sha kaya apujtuamunam ni aniyuri̱ji̱a̱i̱ apujtua asaka iniaisarmiayi.

1 Sam. 15:28

Túram Samuir Sáuran chicharuk “Israernum akupniuitmena nuya̱ṉka Uunt Yus amincha yamái tsurintramkayi. Tura amiya̱nak ámiji̱a̱i̱ṉkia naṉkaamas péṉker asamtai susayi.