Isr. 9:26 - Yus Papí: Shuarja̱i̱ Yus Yamaram Chicham Najanamu

²⁶ Kame wa̱i̱ pujutniuitkiuiṉkia nuṉka yama naṉkammanumia̱ṉ juárkiniaitkiuṉka ataksha awaiṉki̱ ajá puju̱a̱yi. Túrasha yamaikia tunáa amukatniun nuṉka amuumam jákatniunam Krístuka chikichkí surumakuiti.

Isr. 9:26 Iomraidhean Croise

2 Sam. 12:13

Nuna tinia umikmatai Tawit Natanan aya̱k “Uunt Yusruí̱ nekas tunaan túraitjiai.” Takui̱ Natan chicharuk “Uunt Yuska áminkia tsaṉkurtámprayi. Tuma asam ámeka jákashtatme.

2 Sam. 24:10

Tawitcha aentsun nekapmamtikiar umikmatai ni enentái̱sha wáurkamiayi. Túrasha Uunt Yusan chicharuk “Ju̱na túran ti yajauch túrajai. Tuma asamtai waitneasam Uunt Yusá, Ame takartámniu tunaarí̱ tsaṉkurata. Warí nétsea núnisan túrachjak” tímiayi.

Juup 7:21

¿Urukamtai wi tunáa túramu tura yajauchin túraitjiana nusha tsaṉkurtatsum? Yamaikia jakattsan yuṉkunminiam pujajai. Tura ti e̱a̱tkumnisha atsuttajai” Juup tímiayi.

YKan. 103:12

Nantu jiini̱ akaana nuna naṉkaamas jeachat Uunt Yus ii tunaarí̱ya̱ akantámkiniaitji. Tuma asa tuke akantamji.

Isa. 2:2

Kame amúamu tsawantinkia Uunt Yus Shiir Awajtai̱ Je̱a̱ pujana nú naintkia chíkich naint ainia núja̱i̱ṉkia naṉkaamas páantin awajnástatui. Tura nu naint tépepra ainia núna naṉkaka uunt átatui. Túrunamtai ashí nuṉkanmaya̱ aents ti untsurí nin kauniartatui.

Tan. 10:14

Tuma asamtai amukatin tsawantin ame shuarum urukawartata nuna paant nekamtikiattsan wikia tarijme. Warí, ímiaja̱i̱k wainkiamam nuka nu tsawantaiti” turutmiayi.

Tan. 9:24

Áme shuarumka tura Yus akantúkma péprurmesha sataintia tumiṉ iwiarturmaiti. Nuja̱i̱ ashí tunáa tura yajauch túrutai̱sha amukáttawai. Núnisaṉ ashí tunáa túramuja̱i̱ métek akinkiartatui. Túrunamtai aya nekasa nuja̱i̱ métek túratin átatui. Núnisaṉ ímiaja̱i̱k wainkiamusha tura ukunam túrunatin etserkamusha uminkiattawai. Nuya̱ṉka Ti Shiir Tesamusha asuitiji̱a̱i̱ ukatnáktatui.

Mik. 4:1

Nuyá̱ amúamu tsawantinkia Uunt Yusa Je̱e̱ pujana nú naintkia chíkich naint ainia nuja̱i̱ naṉkamantu awajnástatui. Tura untsurí nuṉkanmaya̱ aents nui̱ tseke káunkartatui.

Mat. 13:39

Tura íwianch ii nemasri̱ asa yajauch nupa̱n arakuiti. Tura nuṉka amúamunam Yusa suntari̱ arakan júuktinia áintsaṉ shuaran yaruaktatui.

Mat. 13:40

Yajauch nupa̱ irur jinium áesatniua ánis nuṉka amúamunam túrunattawai.

Mat. 25:34

Túran nekas Úunt Akupin untsuurí̱ni̱ wajainian títiatui ‘Atumniaka winia Apar shiir awajtámsaitrume. Wi akupeajna nui̱ winitiárum. Yus nuṉkan najanamia tímianaik átum nui̱ warastinian tsaṉkatramkamiarme.

Juaṉ 1:29

Nuyá̱ kashin Juaṉ Jesusan winian wainiak chichaak “Iistarum. Núiti Yusa Murikrí̱ ashí aentsu yajauchiri̱n asakána nu.

Juaṉ 17:24

Aparu, shuar surusmam nu Wi pujustatjana nui̱ pujusárti tusan seajme. Kame ju̱ nuṉká nájanchamunmaṉ tuke anentin asam ti shiir awajtúsuitme. Tura ti shiir awajtúsmamna nuna íisarti tusan nuna seajme.

1 Kur. 10:11

Yaunchu ii úuntri̱ji̱a̱i̱ túrunamu iin amúamu tsawantnum pujajnia nuna jintintramat tusa áarmaiti.

Kar. 4:1

Kuítrinniu uchirí̱ ashí ni aparí̱ takakna nuna niniu áchattawak ukunam. Tura uchichitkiuṉka ni aparí̱ takarniúri̱ya núkete.

Ipi. 1:10

Ashí jú̱ nuṉkanam írunna nunasha tura nayaimpiniam írunna nunasha Kristu ashí akupin ati tusa Yus tsaṉkatkattawai. Nunasha Yus yaunchu enentáimturu asamtai tsawant jeamtai ashí uminkiattawai.

Ipi. 5:2

Kristu iin anenmajⁱ núnisrum anenaitiarum. Kame ii tunaari̱n akikmaktaj tusa Niṉki Yusan súsatniuncha tura ti shiir nekapújamnia áestamuncha núnis jákatniunam surumakmiayi.

Tit. 2:14

Jesukrístuka iin jarutramkamiaji ii tunaarí̱nia̱ uwemtikrampratajtsa. Tura Winia ajasár tuke enentáiji̱a̱i̱ péṉker túrawarat tusa ii tunaari̱n japirtampramiaji.

Isr. 1:2

Kame amúamu tsawantin pujajnia ju̱i̱ṉkia Ni Uchiri̱i̱ní̱ chichartamkaitji. Tura ashí írunna nunasha Niini̱ najanka asa Ni nérentin ajasti tusa Uchirí̱n ashí súsaiti.

Isr. 10:10

Nuja̱i̱ Jesukrístu Yusan umiruk jákatniun chikichkí surumakmatai Yus iin tunaarincha shiir awajtámsaitji.

Isr. 10:12

Antsu Jesukrístuka jákatniunam chikichkí surumak ashí shuara yajauchiri̱n asakár atakka peṉké jákashtiniaiti. Nuna tura Yusa untsuurí̱ni̱ nekas akupin pujutai̱nium pujusuiti.

Isr. 10:26

Túrasha shuar nekas chichaman nékayat ní wakeramuri̱ji̱a̱i̱ṉ yajauchiniam wekaakka Kristu jakamun nakitia asamtai chíkich taṉkun numpe̱ja̱i̱ ni yajauch túramu asakátratin atsawai.

Isr. 10:4

Warí waakasha tura murik áishmaṉsha maar nuna numpe̱ja̱i̱ ii yajauch túrukarma peṉké asakárchamniaiti.

Isr. 4:3

Antsu iikia Ni chichame̱ enentáimta asar Yusja̱i̱ shiir pujustinnium nekas waya̱ji. Tura chikichan Yus tímiayi “Nu asamtai kajerkan nekas tákun ‘Wi ayampratniun amaajna nuna peṉké pachischartatui’ tímiajai” YKan. 95:11 tímiayi. Kame Yus jú̱ nuṉkan najana umik nuyá̱ shiir pujus ayampramiayi.

Isr. 7:27

Nisha yaunchu Yúsnan pujurniu uuntri̱ armia núninchaiti. Yaunchua nuka murikiun máwar ashí tsawant Yusan suu ármiayi. Nuja̱i̱ emka ni yajauchiri̱n nuyá̱ ashí shuara tunaari̱ncha asakátin ármiayi. Tura Jesuska jákatniunam chikichkí surumak ashí shuara yajauchiri̱n asakátramiayi.

Isr. 9:12

Tura Kristu Imiá Shiir Tesamunam chipiu áishmaṉ tura waaka yamatskama numpe̱ja̱i̱sha waya̱chuiti antsu ímia ni numpe̱ja̱i̱ṉᵏⁱ waya̱iti. Tura aya chikichkí wayá̱ ii yajauch túrutairi̱n asaktúrmar iniaṉnatsuk uwemtikrampramiaji.

Isr. 9:14

Antsu Kristu peṉké tunaarinchaitiat tuke jáchatai Wakaní̱ kakarmari̱ji̱a̱i̱ jákatniunam Yusai̱ surumakmiayi. Tuma asamtai Kristu numpé̱ ii yajauchiri̱n peṉké asakáru asamtai yamaikia ii tunaarí̱ jákatniunam júana nuja̱i̱ itit enentáimtumatsuk nekas iwiaaku Yus ¿shiir umirkachminkiaitiajⁱ?

1 Pit. 1:20

Nuṉkan nájantsuk aentsun jaruktinian Krístun anaikiamiayi Yus. Tura wárik akupkachmiayi. Antsu yamái tsawantin átum pujarmin péṉker pujusúk tusa wakerak atumín jarutramkat tusa Krístun akupkámiayi.

1 Pit. 2:24

Kristu imia Niṉki ni aya̱shí̱i̱n ii tunaari̱n entsakí̱ krúsnum jarutramkamiaji. Kame iikia yajauch túrutainmaṉka jákaitji. Túmaitiatar naka péṉkera nuja̱i̱ métek túratniunam iwiaakji. Ántsarik Ni asutniámuja̱i̱ iikia tsuámaruitji.

1 Pit. 3:18

Kristu ii tunaari̱n asakártaj tusa jarutramkamiaji. Ashí asakárma asamtai atak tunaan jarukchatniuiti. Nisha tunaan peṉké túrichuitiat ii tunáa asakrin Yusai̱ ejetamtai tusa wáitrutmasmiaji. Aya̱shi̱i̱nkia jakayat ni wakaní̱ji̱a̱i̱ ni aya̱shi̱ ataksha iwiaaku ajasmiayi.

1 Pit. 4:7

Ashí amuukatin jeatémayi. Tuma asamtai péṉker enentáimsatarum. Túrarum anearum Yus auju pujutarum.

1 Jṉ. 3:5

Jesukrístu ii tunaarí̱ asakártaj tusa ju̱ nuṉkanam tamia nu nékarme. Tura Niṉkia yajauchin túrichuyayi.

1 Jṉ. 3:8

Antsu shuar yajauchiniam wekaana nu iwianchnaiti íwianch tuke yajauchin túrin asamtai. Yusa Uchirí̱ ju̱ nuṉkanam táwiti ashí íwianch túramun emesrataj tusa.

Apu. 13:8

Túramtai ashí aents tuke iwiaaku átinia nu papinium ni naari̱ yámankamtaikniumia̱ anujkamu atsúarma nuka nu Yajasman tikishmátrarmai. Nu papincha Murik jaka nantakmia nu takakui.

Apu. 17:8

Nu yajasma wainkiam nuka yaunchu pujuwiti tura yamaikia ju̱i̱ pujachiat amúamunam tuke játsuk náṉkatkachu wá̱a̱nmaya̱ jiinkittiawai. Shuar nuna wáinkiar ni naari̱ tuke iwiaaku pujutai̱ papinium yámankamtaikniumia̱ anujtúkchamua nuka nu yajasman ashamkartatui. Nu yajasma yaunchu pujú yamaikia atsayat atak wantinkiattawai turutmiai.