Isr. 4:11 - Yus Papí: Shuarja̱i̱ Yus Yamaram Chicham Najanamu

¹¹ Nu asamtai iisha Yusja̱i̱ shiir pujustinnium pachinkiacha̱i̱j tusar Yus shiir enentáimtusar kakaram ajastiniaitji. Israer shuar yaunchu Yus táman nakitrarua núnis ajaschatniuitji.

Isr. 4:11 Iomraidhean Croise

Mat. 11:12

Kakaram shuarka imiakratin Juaṉ tamia nú tsawantnumia̱ Yus akupeamunam ti pachinkiatniun wakeruiniak kakarmaja̱i̱ pachinkiatniun enentáimiainiawai.

Mat. 7:13

Waṉkaram jintia awai. Waya̱tniusha yúpichuchiti. Nui̱sha untsurí wáiniawai. Tura nusha meṉkakatniunam jeawai. Túrasha chíkich jintia awai. Nusha tsérerach asa itiurchataiti. Waya̱tniuri̱sha yupipitchiti. Nui̱ ishichik wáiniawai. Tura nusha iwiaaku pujustinnium jeawai. Tuma asamtai tuke iwiaaku pujustaj tákurmeka tsérerach jintianmaani̱ wetarum.

Ruk. 13:24

Tutai Jesus chichaak “Yupikiach wáitiniam waya̱taj tusarum ti wakeritiarum. Kame untsurí waya̱taj tusar wakeriartatui túrasha tujintkiartatui, tájarme.

Ruk. 16:16

Juaṉ étsertsa̱i̱ṉ Muisais aar akupkámia nunasha tura Yúsnan etserin unuiniarmia nunasha antuktin ármiayi. Tura yamaisha tímiania ti shiir chicham awai. Yus akupeana nui̱ urukukit nuka paant etserkamuiti. Tura ashí shuar nui̱ pachinkiataj tusar ni kakarmari̱ji̱a̱i̱ṉ ti takainiawai.

Juaṉ 6:27

Ju̱yá̱ yurumak amuukatin asamtai ti enentáimtuschatnuitrume̱. Antsu amuukashtin yurumak tuke iwiaaku pujustinian amaana nu takarsatniuiti. Nú yurumkanka Wi Aents Ajasu asan susattajrume. Tú tusa Yus Apa nuna túratniun surusuiti” tímiayi.

Tur. 26:19

Tuma asamtai uunt Akripia, Uunt Jesus nayaimpinmaya̱ wantintiurak turutmia nuna umirkataj tusan pujajai.

Ipi. 2:2

Nu tunaanum jú̱ nuṉkanam pujuinia nuja̱i̱ métek tuke wekainiuyarme. Túrarum iwianchi akupniuri̱ wakeramuri̱ umirniuyarme. Iwianchi uuntri̱ Yusan umirainiatsna nuna ashí akaténawai. Kame ju̱ nuṉkanam yajauch wakan ni akupeamuri̱ji̱a̱i̱ wekainia nuja̱i̱ métek atumsha wekainiuyarme.

Ipi. 5:6

Nu túramniaiti tusar ántar chichamja̱i̱ anaṉkramacharti. Warí, nuna túruiniakui Yusan umirainiachun Yus ti asutiáwartatui.

Jir. 2:12

Nu asamtai aneamu yatsuru, wi atumji̱a̱i̱ pujakui umirtukmarmena nuna naṉkaamas yamaikia arant pujakuisha umirtuktarum. Iis, Yus atumí enentái̱n takaak ni shiir wakeramu wakeruktinniasha tura umiktinniasha pujurtamprume. Nu asamtai atumsha kakaram ajastarum Yus tí peṉker awajtámsatniun wakera nu túrunati tusarum. Tura péejchach enentáimprarum awajirminiaitjiai tusarum aneara wekasatarum.

Kurs. 3:6

Shuar Yusan umirtsuk aya nuna túrin ásarmatai Yus nin kajerak ti asutiáttawai.

Tit. 1:16

Tura nisha “Yus shuaraitjiai” tuíniayataṉ Yusan umirtsuk niisháa túruiniawai. Tuma ásar nisha mui̱jmiai̱ áiniawai. Umichu ásar péṉkeran túratniun peṉké tujintiainiawai.

Tit. 3:3

Warí, Yuska umirtsuk iisha núnisrik Yus shuar ajatsuk náṉkamsar wekaimji. Tura íwianch emetamu pempée wekaimji. Tura ii aya̱shi̱ wakeramu tuke túriniuyaji. Tunaasha túriniuyaji. Chíkich atankittsar wakeriniuyaji. Chíkich shuar kajerkar tura nuamtaksha kajernainiuyaji.

Isr. 3:12

Anearta, yatsuru. Yajauch enentáimsarum tuke iwiaaku Yus enentáimtutsuk kanakiirap.

Isr. 3:18

Kame umirkacharunka Yus “Wiji̱a̱i̱ shiir pujustinian peṉké tsaṉkatkachartatjai” tímiayi.

Isr. 4:6

Shuar nui̱ waya̱war ayampratin tuke awai. Tura emka uwempratin Chichaman antukarmia nuka umichu ásar waya̱charmiayi.

Isr. 6:11

Tura nuik túrarmena núnisrumek tuke iniaitsuk kakaram takasrum ashí Yus tsaṉkatramkatta nu wainkiattarme. Núnisaṉ atí tusar wakeraji.

2 Pit. 2:6

Enentáimpratarum. Sutumancha tura Kumurancha nayaimpinmaya̱ jin akuptuk Yus mash amukmiayi. Aya yúṉkunmik awajsámiayi. Ukunam nu túrunamun nekaawar shuar tunáa túratin tsuumainian nekaawarat tusa túramiayi.