Isk. 14:1 - Yus Papí: Shuarja̱i̱ Yus Yamaram Chicham Najanamu1-11 Israer shuara uuntri̱ ainia nu Yúsnan etserin pujamunam taar naka pujusármai. Túrunawarmatai Uunt Yusa chichame̱ Yúsnan etserniun tarimiai túram chicharainiak “Ju̱ aentska nakumkar najankamu yusan tikishmátin áiniawai. ¿Túrasha anintrúttsarat tusan iniaisartatjak? Antsu chicharainiakum yaaksha nakumkar najankamu yusan tikishmátin ainia nu Yúsnan etserniui taar Winia chichamprum nekaattsa wakerakka ni yusri̱ nakumkar najankamu írunna nuja̱i̱ métek ai̱kma ártatui. Núnaka Israer shuar Winí̱ waketkiar Winia enentáimtursarat tusan túrattajai. Yaaksha nakumkar najanamu yusri̱n nekas enentáimtayat Winia anintrúttsattsa tákuiṉkia nuja̱i̱ nekaawarat tusan nin kajerkattajai tura Wí shuarai̱ya̱ṉka emeṉkáktatjai. Túramtai Wikia Úunt Yusaitjiana nu nekaattarme. Tura Yúsnan etserin ni chichame̱nak étserkuisha núnisnak túrattajai. Tura chichama étserusha núnisaṉ anintrasha niṉkia sumamawartatui. Núnaka Israer shuar Wini̱ya̱ṉka kanakiára̱i̱ṉ tura ni yajauch túramuri̱ncha mátrara̱i̱ṉ tusan túrattajai. Nuna túramtai niṉkia Wi shuar ártatui tura Wisha ni Yusri̱ átatjai” tawai Uunt Yus Ashí Aentsu Uuntri̱. Faic an caibideil |
Isk. 14:1
13 Iomraidhean Croise
Tura uwí siátitin nantu seṉku tura tsawantka tiástin Israer shuarnumia̱ uunt armia nu Isekiár anintrúsar Uunt Yusa chichame̱n nekaatai tusar tariarmiayi. Túrasha Uunt Yuska anintrúttsara̱i̱ṉ tusa nakitrámiayi tura chicharainiak “Wikia Israer shuaran achikiármajai núnisnak Ejiptunam pujuarma nui̱ nuna nekamtikiawarmajai. Tura Ejiptunmaya̱ṉka ji̱i̱ran tí peṉker nuṉka asa ashí árak tsapáu asamtai muntsu míshkiji̱a̱i̱ entsa núnis akamunmasha atumnia anajmarma ana nui̱ matsastatjarme tiármajai. Núnisnak chicharainiakun ‘Najankamu yus mui̱jmiai̱ ainia tí peṉker enentáimtusrum anearmena nuka utsaṉtarum túrarum Ejiptunmaya̱ ántar yus ainia nuja̱i̱ mui̱jmiai̱ ajasá̱i̱rum’ tiármajai. Túrasha Winia tumá kajertukarmai. Antsu ántar yus najankamu áiniana nunasha tura Ejiptunmaya̱ yusnasha iniaisacharmai. Nuiṉ Ejiptunmaṉ asutiátniuṉka enentáimturarmajai túrasha Wikia Ejiptunam matsatainian ji̱i̱ran yarumainiakun Wi túramun wáinkiarma nu shuar yajauch enentáimturara̱i̱ṉ tusan Wiki enentáimtumasan pachischarmajai” tímiayi.
Yúsnan etserin ímiaja̱i̱k wainkiamia nui̱ṉkia Jerusaréṉnum Yus jukí̱ aents ti yajauchin túriarmia nuna iniaktusmiayi. Tura arakaani̱ péprunam wa̱i̱ti̱a̱i̱ amia nui̱ ántar yus nakumkar najanamun enentáimtuiniak Yusan akajiarmia nu ámiayi. Nuyá̱ Yúsnan etserin Yusa Je̱e̱n init tesamunam wayá̱ íimiaj tukamá náṉkamas yajasma mui̱jmiai̱ áiniana nuna nakumkar najankarma Israer shuara yusri̱ ainia nuna wainkiamiayi. Tura nui̱ naka sataintia uunt Israernumia̱ nu yajasman kuṉkuinian áestuiniak pujuinian wainkiamiayi. Nuya̱ṉka Yusan Uunt Je̱e̱n wa̱i̱ti̱a̱i̱ arakaani̱ ana nui̱ Tamusan, nuwa̱ najanamu yusa nuna e̱a̱iniak pujuinian wáinkiarmiayi. Tura Yusa Uunt Je̱e̱n wá̱i̱ti̱a̱i̱niam waiti tura Yus áestutai̱ pujana nui̱ ajapén paintiséṉku áishmaṉ tikishmarar etsa̱ tatainmaani̱ iimsar etsa̱n tikishmátainian wainkiamiayi. Kame timiá yajauch túruiniamu nuṉkanam piaku asamtai aya yajauch awajnáisatniuk akui Yuska Israer shuarnaka seamsha peṉké anturkachartatui núnisaṉ waitnentancha waitnentrachartatui.
Nui̱ Papru chichaak “Wikia Israer shuaraitjiai. Társunam Sirisia nuṉkanam akiiniaitjiai. Túmaitiatnak ju̱i̱ Jerusaréṉnum tsakaruitjiai. Tura unuikiartin Kamaríran chichame̱n unuimiáruitjiai. Tuma asan ii uuntri̱ akupkarmia nuna ashí umirkaitjiai. Tura átum yamái túrarmena nuna wisha nútiksanak Yusna ana nuna tuke enentáiji̱a̱i̱ wakerukuitjiai.
Sanasan