Ipi. 2:15 - Yus Papí: Shuarja̱i̱ Yus Yamaram Chicham Najanamu

¹⁵ Nuik aya Israer shuar Muisais akupkámu untsurí armia nuna umirkatin áiniak nuja̱i̱ chíkich aentsja̱i̱ nemasmanainiarmiayi. Tura Kristu jaka nu akupkámun ántar awajás chikichik aents yamaram awajtámsamiaji.

Ipi. 2:15 Iomraidhean Croise

Isa. 9:6

Warí nu Úchikia iin akiintiurmaitji, chikichik Uchin suramsaitji. Nisha ti kakaram akupin átatui. Ni náari̱ṉkia “Aentsja̱i̱ Naṉkaamas Chicharkartin”, “Kakaram Yus”, “Tuke Pujú Apa”, “Aṉkant Pujustinnia Uuntri̱” tu anaikiamu átatui.

2 Kur. 5:17

Tuma asamtai, Krístunu ajasúka yamaram najanamuiti. Yaunchu enentáimtai̱ meṉkakaiti. Antsu núnaka íikias ni enentáimtairi̱ṉkia nekas yamaram ajasuíti yamaikia.

Kar. 3:10

Antsu ashí shuar “akupkámun umirkan uwemprattajai” tuinia nuka yajauchiniam yumiṉkramu áiniawai. Yus Papinium áarchamukait “Ashí shuar Yus akupkámun ashí aarma nuna takamtsuk umirkachka yajauchiniam yumiṉkramu áiniawai.” Muis. 27:26; Jrm. 11:3

Kar. 3:28

Jesukrístuja̱i̱ tsaniṉkiu asarⁱ imiá métek aji. Israer shuar, Israer shuarcha aṉkant ainia nu aṉkantcha ainia nu áishmaṉ, nuwa̱, ashí mash Jesukrístunuitkiuiṉkia yamaikia “niishaaiti” tu enentáimprashtiniaiti. Ni shuari̱ mash chikichik áiniaji.

Kar. 6:15

Krístunu ajasrikia tsupirnaktincha tsupirnakchaitkiursha mái̱ antraiti antsu yamaram akiiniatin nekas péṉkeraiti.

Ipi. 2:10

Yus najanamuitji. Kame Jesukrístuja̱i̱ tsaníakrin yamaram iwiaakman suramas tuke péṉker túratniun najatmamji. Yáunchuk nuna enentáimturmasmiaji.

Ipi. 2:14

Israer shuarja̱i̱ Israer shuarchaja̱i̱ nemasmanaikiar ajapén péeṉkramu ámiaji. Tura Krístuka nuna sa̱a̱ki nawamnaimtikramkamiaji. Tura chikichik shuar najatmamiaji.

Ipi. 2:16

Núnisaṉ ámiayi. Kristu krúsnum jaka nemasja̱i̱ mai̱ apattamak chikichik awajtámas Yúsja̱i̱sha nawamnaimtikramkamiaji.

Ipi. 4:16

Tuma asa ni aya̱shi̱n wainkiui ashí nuna muchitmari̱ péṉker yáiniaikiar ashí ni túratniuri̱n shiir takasartatui. Nuja̱i̱ nu aya̱shnium muchitmari̱ chíkich chíkich péṉker takainiak métekrak shiir tsakartatui. Tura anenainiakui nu aya̱shsha péṉker úuntmartatui.

Kurs. 2:14

Tura ashí ii tumashri̱n sumamtikramatin amia nuna japiruiti. Kristu krúsnum jakamtai ashí akupkámuja̱i̱ sumamtikramamun tsaṉkurtámpramiaji.

Kurs. 2:20

Atumsha Krístuja̱i̱ jaka asarum aya aentsti enentáimtai̱ ikiukniuitrume. Nuikia ¿urukamtai ju̱ nuṉkanmaya̱ ana nu tuke páchiarum? Ni tuinia nu umirkashtiniaiti.

Kurs. 3:10

Túrarum yapajmiámatniua núnisrum yamaram pushí entsaruitrume. Kame yamaram nekatai̱ achikrum iin najatma urukuit nuja̱i̱ métek tí peṉker ajasat tusa túramuitrume.

Kurs. 3:11

Ashí írunna nuja̱i̱ naṉkaamas Kristu ashiyaiti. Níiniun pujurui. Tuma asamtai ashí ni shuari̱ enentái̱n pujá asamtai nusháa enentáimtunairchatniuiti. Kriaku aentssha tura Israer shuarsha, tsupirnakusha tura tsupirnakchasha, apachcha tura yajaya̱ shuarsha, takarin ainia nusha tura aṉkant ainia nusha, Kristu ashí ni enentái̱n pujakui nusháa enentáimtunairchatniuiti.

Kurs. 3:15

Kame chikichik aya̱shtinia áintsarum ajastarum tusa Yus ni shuari̱ ajasat tusa achirmákmarme. Tuma asamtai Yusja̱i̱ aṉkant awajsamu atumí enentái̱n pujurtamsati. Nuja̱i̱ Yus yumiṉsatarum.

Isr. 7:16

Niṉkia Riwí shuar asa Yúsnan pujurin ajaschamiayi antsu jákashtin asa nu kakarmaja̱i̱ Yúsnan pujurin ajasmiayi.

Isr. 8:13

Wats emka chicham yajauch ajakui Yus yamaram chichaman nájaneak pujurui. Tura yajauch ajasua nuka wárik ajapnattawai.

Isr. 9:23

Tuma asamtai Muisais najanamu aya nayaimpiniam írunna nuna nakumenak taṉkú numpe̱ja̱i̱ shiir awajsatin ármiayi. Antsu nekas nayaimpiniam írunna núnaka nuna kakaram numpaja̱i̱ shiir awajsatniuyayi.