Bafilipi 3:2 - Indagano Inyaaya mu-Chijita

² Mwikenge abheeyigisya bhanu abhengisya ebhiraagiro bhya Echiyawudi mw‑ikanisa. Abhaanu abho bhari rwa jimbwa, ni abhakosi bha ebhibhiibhi, abhakomeeresya okutenda.

INDAGANO INYA:YA

² Mwikenge jimbwa. Mwikenge abakosi bo bubi:bi. Mwikenge banu abe:tema.

Bafilipi 3:2 Iomraidhean Croise

Matayo 24:10

Niwo abhaanu bhaafu bharisiga okunduubha. Bhariromerana iniku na okusokana abheene kwa abheene.

Matayo 7:15

“Mwikengega abharagi abhabheeyi. Omwanya gunu abhabhaaja‑ko, abheekora okubha abhoorooro rwa jinaama, nawe echimari ni bharuru rwa emisege.

Matayo 7:6

“Mwasiga okuyaana jimbwa ebhiinu bhinu bhiri bhya Nyamuwanga, kwa okubha ejija okuyinduka na okubhakaabhura. Ka wone, mwasiga okwesera jimbiiji ebhiinu bhya obhugusi obhurambu, kwa okubha ejija okubhitajiirira.

Barumi 2:28

Mbe, mumenye ati, jitari ati bhuri muunu unu kaabhonekana ati ni Muyawudi, aribha Muyawudi wa echimari. Omuunu atakutura okubha Omuyawudi wa echimari kwa okubha ati omubhiri gwaye gutenderwe era.

2 Bakorinto 11:13

Enaayika kutyo, kwa okubha abhaanu rwa abho, nibho jitumwa ja orubheeyi, abhakora emirimu mu‑bhurigerige, abheekora wuti, nibho jitumwa ja Kirisito.

Bagalatia 5:13

Abhayiri bhaani, Nyamuwanga abhabhirikiiye, korereki mubhe abhaanu bhanu muri na obhwitaage. Nawe mwasiga okukorera obhwitaage bhwemwe wuti omwanya gwa okuruubha okurigira kwa omubhiri, tari musakirane mu‑ryenda.

Bagalatia 5:15

Nawe mukarumana na okuwutaasyanya rwa jityanyi ja ibhara, mwiyangarire korereki mwasiga okusingaarisyanya.

Bagalatia 5:6

Mbe araabha chiri na obhumwi na Kirisito Yeesu, okutendwa amwi okurema okutendwa kutari na obhugajuro bhwonebhwone. Echiinu cha bhusibhusi ni riikirisya ryeswe rinu erikora emirimu mu‑ryenda.

Bafilipi 3:19

Abhaanu abho bharisingaarisibhwa ku‑bhuteero, kwa okubha inda niryo risambwa ryebhwe. Abheene abheekuuyisya ebhikorwa bhya jiswaro bhinu abhakora. Ka wone abheeganirisya era emisango ja ku‑chaaro.

Bafilipi 3:3

Eswe neeswe chitenderwe echinyamwoyo kwa okubha Mwoyo wa Nyamuwanga kaachisakira kutyo jiiyire chiramye Nyamuwanga. Eswe echikuuyisya Kirisito Yeesu na okumwiyikanya. Ka wone chitakwiyikanya ebhikorwa bhyeswe bhya echinyamubhiri korereki chibhone obhuchungusi,

1 Timoteo 1:19

Ugwatirire eriikirisya na okubha na omutima gwa ekisi. Abhaanu abhandi abhagaya okukora emisango jinu abhamenya ati ni chimari, eryo rikorere nibhasiga okwikirisya Nyamuwanga.

Tiito 1:16

Abheene abhaayika ati bhamenyere Nyamuwanga, nawe ebhikorwa bhyebhwe ebhyeresya ati abhamwigaana. Abho ni bhaanu bhanu abhafuruurusya muno, ni bhanyatagayuka, bhateeyire ku‑bhikorwa bhyonebhyone bhya ekisi.

2 Petero 2:22

Iri‑wo inyaayika ya echimari inu eyayika ati, “Imbwa eyirya amatanake gaayo,” wone iri‑wo eyindi inu eyayika ati, “Imbiiji inu yosiibhwe eyigaragasya rindi mu‑matoto!” Nikwo kutyo abheene wone ꞉bhaakorere.

Yuuda 1:4

Enibhakaamira inyarubha inu, kwa okubha bhari‑wo abheeyigisya abharebhe bha orubheeyi bhanu bheeyingisiisye mw‑imwe bhumbise. Abhaanu abho, bhatakugayuka Nyamuwanga. Mu‑meeyigisyo gwebhwe, abhayindura obhwitiriranya bhwa Nyamuwanga weeswe, abhakora bhubhe rwa isonga ya okukora emisango ja orukubho. Ka wone, abheegaana Raatabhugenyi weeswe Yeesu Kirisito, omutangasya weeswe omukuru. Nawe okwambira kara jikaamirwe mu‑Bhikaame Ebhyeru ati, abhaanu abho, bhariramurwa rwa kutyo abhandi ꞉bhaaramuuywe.

Obhusweruro 2:9

Enimenya ebhinyaasyo bhyemwe na obhutaka bhwemwe. Nawe chimari emwe muri bhaniibhi! Ka wone, enimenya amafumo ganu omufumwa. Amafumo ago agasoosibhwa na bhanu abheetoga ati, ni bhaana bha Nyamuwanga, nawe bhatari abhaana bha Nyamuwanga, abheene ni bharuubhirisya bha Syetaani.

Obhusweruro 21:8

Nawe abhoobha, abhaanu bhanu bhatakwikirisya Nyamuwanga, bhanu abhamufuruurusya, abheeti, abharomesi, abharosi na bhanu abharamya amasusano, aamwi na abhabheeyi, bhoone abho orubhaara rwebhwe ni mu‑nyanja ya omuriro omururu gwa emisimu ja echibhiriiti. Okwo nikwo okufwa kwa kabhiri.”

Obhusweruro 22:15

Nawe, abharosi bhoone, abharomesi, abheeti, abhaanu bhanu abharamya amasusano na abhaanu bhoone bhanu abheenda okwayika orubheeyi, bharibha anja ya omusi ogwo rwa jimbwa.

Obhusweruro 3:9

Mutegeresye! Niribhareeta abharuubhirisya bha Syetaani. Abheene abheetoga ati ni bhaana bha Nyamuwanga keenu bhatari nibho, tari ni abhabheeyi. Mbe abho, niribhakora bhaaje bhabharamye. Niwo abho bhoone bharimenya ati nibheendere emwe.