Bafilipi 2:2 - Indagano Inyaaya mu-Chijita

² mukuumisye rikonderwa ryani kwa okuungwana abheene kwa abheene na okwendana abheene kwa abheene. Ka wone mubhe na obhumwi mu‑myoyo jeemwe na mubhe na obhukarariiye bhumwi.

INDAGANO INYA:YA

² Mbe mukumisye okukonderwa kwani ati, mwiganirisyega gumwi, mubega no kwenda kumwi, no mwoyo gumwi, no kwiganirisya kumwi.

Bafilipi 2:2 Iomraidhean Croise

Yowana 3:29

Omumura unu ari na omwenga niwe omutwasi. Anye niri rwa omusaani wa omutwasi, niimereeguuyu ku‑mbari yaaye, na enikonderwa okuungwa jinu omutwasi kaayika. Chimari musango gunu gwankondisya muno.

Ebikorwa 1:14

Abho bhoone bhaariga nibheekomeesya okwikofyanya aamwi okusabhwa Nyamuwanga. Aamwi na abho, bhaariga bhari‑wo abhagasi abhandi na Maryamu nyiramwene Yeesu na abhamura bhaabho Yeesu.

Ebikorwa 2:1

Orusuku rwa Pendekoosite rwejire rwakinga, abhaanu bhoone bhanu ꞉bheekirisiisye Yeesu bhaariga bheekofyanyiisye mu‑nju imwi.

Ebikorwa 2:46

Bhuri rusuku, bhaabhuganaga aamwi mu‑rubhuga rwa Riyekaru. Nawe ku‑mwanya gwa okubhega omukaate, bhaabhuganaga mu‑nju jeebhwe na okurya aamwi kw‑ikonderwa na omutima mweru,

Ebikorwa 5:12

Jitumwa ja Yeesu bhaariga nibhakora ebhibharikisyo na ebhiruguusyo bhyafu mu‑bhaanu. Abheekirisya bhoone bha Yeesu bhaariga nibheekofyanya aamwi mu‑rubhuga rwa Riyekaru mw‑Igaragariro rya Seremaani.

Barumi 12:16

Mwikare kwa obhwira bhumwi emwe abheene kwa abheene. Kutyo, musigega okwikuuya, tari mwikeeyega, mubhega na obhusangi na abhaanu abha obhukene. Musigega okwirora ati neemwe abha obhwenge era.

1 Bakorinto 1:10

Woori, abhayiri bhaani mu‑riikirisya, enibheerembeeresya kw‑isiina rya Raatabhugenyi weeswe Yeesu Kirisito ati, mwasiga okutaasyanya mu‑nyaayika. Kwasiga okubha‑wo okwawukana agati yeemwe, tari mubhe na obhumwi ku‑jinu omukararira na ku‑jinu omwiganirisya.

2 Bakorinto 13:11

Woori, abhayiri bhaani mu‑riikirisya, enimariisya kwa okubhabhwira ati mukonderwega! Mubhega mukuumiiye mu‑riikirisya, musimbiisyanyega, mubhega na obhumwi, mwikarega kwa omurembe na Nyamuwanga wa eryenda na omurembe, kaja okubha aamwi na emwe.

2 Bakorinto 2:3

Eyo niyo isonga inu ꞉yaakorere nimbakaamira ku‑nyarubha irya ati nitakubhaaja‑ko, naasiga okusurumbasibhwa na emwe, bhanu mwenderwe okunkora nikonderwe. Nimenyere chimari ati, anye nikakonderwa, emwe bhoone wone omukonderwa.

2 Bakorinto 7:7

Jitari ati, ꞉chaafungʼamiibhwe mu‑kuuja kwa Tiito era, tari ꞉chaafungʼamiibhwe noorwo okuruubhana na kutyo ꞉mwamufungʼamiisye. ꞉Aachibhwiriiye kutyo omwigomba okundora, kutyo omusurumbara na okunnyaakirira. Ejo jaankora nikonderwe muno.

Bafilipi 1:4

Ka wone omwanya gwone bhunu enibhasabhirwa, enisabhwaga nikondereywe,

Bafilipi 2:16

Ka wone muraasisye abhaanu omusango gwa Nyamuwanga gunu ogubhayaana obhuwanga bhwa akajaanende. Mukakora kutyo, niribhona echiinu cha okwikuuyisya ku‑rusuku rurya Kirisito arisubha. Okubha emirimu jinu ꞉naayambeene okukora agatigati yeemwe jaariga jitari ja okufwirwa‑mo.

Bafilipi 2:20

Okubha nitari na omuunu owundi anu unu chimari kaabhegana rwa Timoteewo.

Bafilipi 4:2

Eniirembeeresya muno Ewodiya na Sitiike, bhabhe na obhwira bhumwi kwa okubha abheene abharuubha Raatabhugenyi Yeesu.

Bakolosai 2:5

Enaayika ejo noorwo kutyo nitari aamwi na emwe echinyamubhiri, nawe niri aamwi na emwe echinyamwoyo. Enikonderwa, kwa okubha enuungwa inguru ya obhumwi bhwemwe na okurumatana kwa eriikirisya ryemwe ku‑Kirisito.

2 Batesalonika 2:13

Nawe eswe, echikenwa chisiime Nyamuwanga bhuri rusuku ku‑songa yeemwe. Emwe abhayiri, mwenderwe na Raatabhugenyi Yeesu. Echisiima Nyamuwanga, kwa okubha ꞉aabhawuuwe, echiinu choonechoone chichaari okubhumbwa korereki muchungurwe. Muchunguuywe kwa okubha mwesibhwe na Mwoyo Mweru, ka wone mwikirisiisye echimari.

2 Timoteo 1:4

Eniichuka kutyo ꞉waaririre omwanya gunu ꞉chaarageene. Niri na obhwira muno okubhugana na awe rindi. Kurwa ejo, ukaaja okundora nirikonderwa muno.

Filemoni 1:20

Woori, omuyiri waani, nuunkorere omusango ogwo rwa wuti owukorera Raatabhugenyi Yeesu. Kondisya omwoyo gwani rwa kutyo abhayiri mu‑Kirisito abhakora.

2 Yoana 1:4

꞉Naakondeeywe muno nejire naarora abhaana bhaawo abharebhe nibharuubha echimari, rwa kutyo Raata Nyamuwanga ꞉aachiragiriiye.

3 Yoana 1:4

Chitari‑wo echiinu chinu echinkondisya muno, okukira okuungwa ati abhaana bhaani mu‑riikirisya abhagenderera okuruubha echimari.