1 Bakorinto 4:5 - Indagano Inyaaya mu-Chijita

⁵ Woori, mwasiga okuramura abhaanu omwanya guchaari kukinga, rindirira okukingira orusuku runu Raatabhugenyi Yeesu ariija. Omwene niwe arituura abhweru ebhiinu bhyone bhinu bhibhisirwe mu‑chisuute na okweresya bhinu bhiri mu‑myoyo ja abhaanu. Niwo bhuri muunu aribhona jikuma jinu jimwiyire, okusooka ku‑Nyamuwanga.

INDAGANO INYA:YA

⁵ Mbe mutatemaga eci:na co musango gwone jisiku jicari kwiya, okukinga runu Ratabugenyi ari:ja, unu arimurika binu bibisirwe ebya mu cisu:te, ka aribukisya okurwaja okwa mu mutima. Mbe niwo buri mu:nu aribona okusi:mwa kwae ku Nyamuanga.

1 Bakorinto 4:5 Iomraidhean Croise

Matayo 10:26

“Mbe, musigega okuubhaya abhaanu abho. Okubha echiinu choonechoone chinu chibhisirwe, chiriswerurirwa, ka wone imbisike yooneyoone, irimenyekana.

Matayo 24:30

“Ku‑mwanya ogwo, echibharikisyo cha Omwana wa Omuunu chiribhonekana ku‑rutumba, na abhaanu bha amaanga goone bharyamba okurira kwa okuyaya. Runu niriija, abhaanu bhoone bharindora niri mu‑meere niri na amanaga na rikusyo rikuru.

Matayo 24:46

Rusuku rumwi, omwami waaye arisubha okusooka mu‑rugendo. Ari na ribhando omugaya unu omwami waaye arimusongʼana ˆnaakoraga rwa kutyo ꞉aamuragiriiye.

Matayo 25:21

“Mwami waaye ˆnaamubhwira ati, ‘Ukorere kisi muno. Awe uri mugaya wa ekisi na omwiyikanyibhwa! Wamaabha omwiyikanyibhwa ku‑bhitooto bhinu ꞉naakuyaaye, kurwa ejo enija okukukora okubha omwangarisi wa obhuniibhi bhwafu. Nuuwuuje chikonderwe aamwi.’

Matayo 25:23

“Mwami waaye ˆnaamubhwira ati, ‘Ukorere kisi muno. Awe uri mugaya wa ekisi na omwiyikanyibhwa! Wamaabha omwiyikanyibhwa ku‑bhitooto bhinu ꞉naakuyaaye, kurwa ejo enija okukukora okubha omwangarisi wa obhuniibhi bhwafu. Nuuwuuje chikonderwe aamwi.’

Ruuka 6:37

“Mwasiga okuramura abhandi, korereki emwe wone Nyamuwanga atarija okubharamura. Musige okwendera abhandi indamu, emwe wone mwasiga okwenderwa indamu. Mufwire echigongo abhaanu bhanu bhabhakayiiye, niwo emwe wone omuja okufwirwa echigongo ebhibhiibhi bhyemwe.

Yowana 21:22

Yeesu ˆnaamusubhya ati, “Araabha nikeenda ati arame okukingira omwanya gunu nirisubha, ogwo ogukusaasa ki? Awe nuunduubhe.”

Yowana 21:23

Mbe, emisango ejo nijiswirana mu‑bheejaabho ati, omwiyigisibhwa oyo atakufwa. Nawe Yeesu ꞉ataabhwiriiye Peetero ati omwiyigisibhwa oyo atakufwa, tari ꞉aamubhwiriiye ati, “Araabha nikeenda ati arame okukingira omwanya gunu nirisubha, ogwo ogukusaasa ki?”

Yowana 5:44

Emwe mwendere okukuuyibhwa na abheejaanyu, nawe mutakwikomeesya okuyenja echibharo chinu echisooka ku‑Nyamuwanga omwene. Woori, omutura kutiki okunyikirisya?

Barumi 14:4

Awe utari na obhuturo bhwonebhwone bhwa okuramura omukosi wa omuunu owundi. Omwami waaye niwe kaamenya araabha omukosi waaye akayire amwi atakayire. Mbe omukosi waaye arikora rwa kutyo jeenderwe, kwa okubha Raatabhugenyi Yeesu ari na obhuturo bhwa okumwimereegusyu abhega ˆnaakora kutyo.

Barumi 2:1

Mbe, awe Omuyawudi weejaasu, chimari owuramura abhaanu abhandi bhanu abhakora emisango ejo. Nawe noorwo awe utakutura okwibhagira imbere ya Nyamuwanga! Ringira, omwanya gunu owuramura abhandi, niwo awe wone umenye ati owiramura omwene, kwa okubha emisango emijabhi jinu abhakora nijo awe omwene owukora.

Barumi 2:16

Nikwo kutyo jiribha ku‑rusuku rwa indamu. Nyamuwanga ariramura abhaanu okutura ku‑Kirisito Yeesu, noorwo emisango jeebhwe ja imbisike, rwa kutyo ejaayika Emisango ja Ekisi jinu eniraasya.

Barumi 2:29

Wuri! Omuyawudi wa echimari ni unu kaagayuka Nyamuwanga kwa omwoyo gwaye gwone. Okutendwa kwa echimari okukorwa mu‑mwoyo na Mwoyo Mweru, kutari kwa okuruubha ebhiraagiro bhya Muusa. Omuunu rwa oyo, atakuramira jikuma okusooka ku‑bhaanu, tari arikuuywa na Nyamuwanga omwene.

Barumi 2:7

Nyamuwanga ariyaana obhuwanga bhwa akajaanende koone abhaanu bhanu abheegumiirisya mu‑kukora ja ekisi okuyigwa wuri, inguru ya okuyenja rikusyo na echibharo na obhuwanga bhunu bhutakunyamuka okusooka ku‑mwene.

1 Bakorinto 1:7

Woori mutagerukiiywe noorwo echiyaanwa choonechoone cha Mwoyo Mweru, mukabha nimurindiriraga kwa obhwiro bhwafu okusubha kwa Raatabhugenyi weeswe Yeesu Kirisito.

1 Bakorinto 11:16

Nawe araabha omuunu keenda okubhambaara inguru ya emisango ejo, amenye ati eswe chitari na akatungiiywe akandi okukira ako, noorwo mu‑makanisa ga Nyamuwanga katari‑mo akatungiiywe akandi.

1 Bakorinto 11:26

Kutyo, omwanya gunu omurya omukaate ogwo na okunywera omutawo ogwo, omubha nimuraasya okufwa kwa Raatabhugenyi okukingira omwanya gunu ariija.

1 Bakorinto 15:23

Nawe bhuri muunu arisuururwa ku‑mwanya gwaye, Kirisito aariga ari wa okwamba okusuururwa, omwanya gunu omwene ariija, niwo abhaanu bhaaye bharisuururwa.

1 Bakorinto 3:13

na obhwa ekisi bhwa emirimu ja bhuri muunu bhuribhonekana abhwerubhweru. Orusuku rurya rwa indamu emirimu joone jiribha abhweru, kwa okubha emirimu ja bhuri muunu, jiriregeejwa kwa omuriro.

1 Bakorinto 3:14

Araabha omurimu gwa omuunu gukawona, omuunu oyo ariramira echiyaanwa.

1 Bakorinto 3:8

Unu kaayamba na unu keetirira amanji bhoone bheengeene, Nyamuwanga ariyaana bhuri umwi weebhwe omuyeero gwaye, okuruubhana na kutyo ꞉aakorere emirimu jaaye.

2 Bakorinto 10:18

Obhugajuro bhwagwo ni ati, omuunu woonewoone unu keekondya omwene atakwikirisibhwa, tari unu Raatabhugenyi kaamukuuya, niwe keekirisibhwa.

2 Bakorinto 10:9

Nitakwenda nibhonekane kw‑imwe ati, eneenda okubhakanganya ku‑nyarubha jinu enibhakaamira.

2 Bakorinto 4:2

Chiremere kata okukora emisango ja imbisike na eja jiswaro. Chitakujiga abhaanu, noorwo chitakusaasya omusango gwa Nyamuwanga na orubheeyi. Tari, echiimenyegesya mu‑kwayika echimari abhwerubhweru, korereki abhaanu bhoone bhamenye mu‑mitima jeebhwe ati, eswe chiri bhaanu bha echimari imbere ya Nyamuwanga.

2 Bakorinto 5:10

Nikwo kutyo, kwa okubha eswe bhoone chiriimereeguru imbere ya echitebhe cha indamu cha Kirisito, korereki bhuri umwi, ayaanwe omuyeero okuruubhana na kutyo ꞉aakorere ku‑chaaro kunu, jibhe ja kisi amwi mibhiibhi.

1 Batesalonika 5:2

Okubha emwe abheene, omumenya kisi ati, orusuku rwa okusubha Raatabhugenyi Yeesu, ruribha rwa okutakya era rwa kutyo omwifi kaaja mu‑ngeta.

Baeburania 4:13

Chitari‑wo echibhumbwa choonechoone chinu chiiyibhisire imbere ya Nyamuwanga. Ebhiinu bhyone bhiri abhweru imbere yaaye, na ku‑mwene chiryendwa okweresya ebhikorwa bhyeswe bhyone.

Yakobo 4:11

Bhayiri bhaani, musigega okuromana, kwa okubha unu kaaroma oweejaabho, amwi okuramura oweejaabho, oyo niwe kaabha agayire ebhiraagiro bhya Nyamuwanga. Omwanya gunu owikora okubha omuramusi wa ebhiraagiro keenu awe utari omuramusi waabhyo, niwo owubha utakubhigayuka, waabha omuramusi wa okuramura ebhiraagiro.

Yakobo 5:7

Kurwa ejo, abhayiri bhaani mu‑riikirisya, mwigumiirisyega okukingira anu Raatabhugenyi Yeesu arisubha. Murore kutyo omurimi kaarindirira amatwasyo ga omuriiro omunene, keegumiirisya na okurindirira okukingira anu agabhonera jingʼubha ja okwamba na ja obhuteero.

Yakobo 5:9

Abhayiri bhaani mu‑riikirisya, musige okujujuumirana abheene kwa abheene korereki mutariramurwa. Mwangarire! Omuramusi wa ebhiraagiro ari yeeyi okusubha.

1 Petero 1:7

Amaregeejo ago, agaregeeja eriikirisya ryemwe, korereki ribhonekane ati ni rya echimari. Noorwo inaaryo, inu eyitura okusingaarika, eyochiibhwa mu‑muriro korereki wone iregeejibhwe. Nyabhuriko, eriikirisya ryemwe rinu riri na obhurambu obhunene okukira inaaryo, ni bhusibhusi wone riregeejibhwe, ribhonekane ati ni rya echimari. Awo niwo, Yeesu Kirisito aribhakuuya, aribhayaana rikusyo na echibharo, orusuku runu ariswerurwa.

1 Petero 5:4

Mbe, Omureefi Omukuru wa rikanisa aribha aswerurwa, muriyaanwa orutengya rwa rikusyo runu rutakunyamuka.

2 Petero 3:12

nimurindiriraga orusuku rurya rwa Nyamuwanga na okuyenja ati ruuje bhwangu. Ku‑songa ya orusuku orwo, orutumba ruryochibhwa kwa omuriro na okusingaarika na ebhiinu bhinu bhiri‑mo bhirigera kwa ribhirabhira riruru muno.

2 Petero 3:4

nibhaayikaga ati, “Kirisito ꞉aaragire ati, arisubha! Woori ari aaki? Okusookerera bhasaaja weeswe bhafwe, emisango joone jiri kutyokutyo rwa kutyo jaariga jiri ku‑bhwambiro bhwa echaaro!”

Yuuda 1:14

Enooke, omuunu wa riyimbo rya kataanu na kabhiri okusookerera ku‑Adaamu, ꞉aasoosiisye obhuragi inguru ya abhaanu abho ati, “Ringira, Raatabhugenyi kaaja ari na bhamaraayika bhaaye abheeru ebhiwumbi na ebhiwumbi.

Obhusweruro 1:7

Muringire! Ariija ari ku‑meere! Abhaanu bhoone bharimurora, noorwo bhanu ꞉bhaamusomere, wone bharimurora. Jingʼanda joone mu‑chaaro jiririra inguru yaaye. Chimari nikwo kutyo jiribha. Jibhe kutyo.

Obhusweruro 20:12

Nindora abhafuuwe bhoone, abharera na abhakuru, bheemereeguuyu imbere ya echitebhe cha ingʼoma. Niwo ebhitabho bhinu bhyariga bhikaamirwe‑mo ebhikorwa bhya abhaanu bhoone nibhifumburwa. Echitabho echindi nichifumburwa, echo nicho echitabho cha obhuwanga. Abhafuuwe abho nibharamurwa okuruubhana na ebhikorwa bhyebhwe bhinu bhyariga bhikaamirwe mu‑bhitabho omwo.