SHINGRAN 21:3 - Jinghpaw Common Language Bible 2009

³ Bai ngai gaw, dai tingnyang kaw na shaga pru ai nsen kaba langai mi na nngai. Dai nsen gaw, “Ya Karai Kasang a sum nta gaw shinggyim masha ni hte rau rai nga ai. Shi shanhte hte rau hpawng de nga na rai nna, shanhte gaw shi a amyu masha ni tai na mara ai. Karai Kasang gaw, shi hkum nan shanhte hte rau nga nga na ra ai rai nna, shi gaw shanhte a Karai Kasang tai na ra ai.

Jinghpaw Hanson Version Bible

³ Bai, dai tingnyang kata na nsen kaba gaw, “Yu mu, Karai Kasang a sum gaw shinggyim masha ni hte rau rai nga ai rai nna, shi shanhte hte rau hpawng de nga na hte, shanhte gaw shi a amyu ni tai na mara ai: Karai Kasang gaw shi hkum nan shanhte hte rau nga nga nna, shanhte a Karai Kasang tai na ra ai:

SHINGRAN 21:3 Iomraidhean Croise

1 HKAWHKAM 8:27

“Rai ti mung, O Karai Kasang e, nang gaw ginding aga ntsa e teng teng shanu nga lu na kun? Sumsing lamu yawng pyi nang hpe sharawng da lu na daram kaba nga ai n rai; dai rai yang, ngai gap da ai ndai Nawku Htingnu gaw kaning rai kaba ram lu na rai nga a ta?

2 HKAWHKAM LABAU 6:18

“Rai ti mung, O Karai Kasang e, nang gaw shinggyim lasha, numsha ni hte rau ga ntsa e teng teng shanu nga lu na ndai kun? Sumsing lamu yawng pyi nang hpe rawng da lu na daram kaba nga ai n rai; dai rai yang, ngai gap da ai ndai Nawku Htingnu gaw kaning rai kaba ram lu na rai nga a ta?

PRU MAT 25:8

Amyu masha ni mung nye a matu chyoi pra ai Sum langai galaw lu na rai ma ai, shaloi ngai shanhte hta shanu nga lu na nngai.

PRU MAT 29:45

Ngai gaw Israela amyu masha ni hta shanu nga nhtawm shanhte a Karai Kasang tai nga na nngai.

ESAIA 12:6

Ziun e nga ai masha shagu hte gaw marawn jahtau ai hte mahkawn mangoi nga mu ga! Israela a chyoi pra ai Karai Kasang gaw galu kaba nga ai, shi gaw shi a amyu masha ni a lapran e nga nga ai,” ngu nna mahkawn mangoi ai nhtoi du wa nga sai.

YEREMIA 31:33

Israela amyu masha ni hte tawn da na ga shaka ningnan gaw ndai rai nga ai: Ngai gaw shanhte kata hta nan nye a tara hpe tawn da ai hte dai hpe shanhte a kraw lawang ni hta e ka da na nngai. Ngai gaw shanhte a Karai Kasang tai nna shanhte gaw nye a amyu masha ni tai na mara ai.

YEREMIA 32:38

Shing rai, shanhte gaw nye a amyu tai nna, ngai gaw shanhte a Karai Kasang tai nga na nngai.

EZEKELA 37:27

Ngai gaw dai yang e, shanhte hte rau anga nga nna, ngai gaw shanhte a Karai Kasang, shanhte gaw nye a amyu masha ni tai na mara ai.

EZEKELA 43:7

“Si chye ai masha wa e, ndai gaw nye a tingnyang rai li ai. Ndai yang e, Israela amyu masha ni hte rau ngai shanu nga nna shanhte hpe htani htana up hkang nga na nngai. Israela amyu masha ni hte shanhte a hkawhkam ni gaw karai shaje ni hpe nawku ai hku nna mung, shanhte a hkawhkam ni a si mang ni a makau hkan e mung, nye a chyoi pra ai mying ningsang hpe awu asin bai di lu na mara ai n rai.

EZEKELA 48:35

Man maga mali grup ngu na mare bunghku hpe shadawn yang, yawng hkra pe 30,240 rai nga ai. Dai shani kaw nna dai mare a mying hpe, “Dai Madu Gaw Ndai Shara E Anga Nga Ai,” ngu nna shamying na mara ai.

ZEHKARIA 13:9

Ngai gaw dai naw hkrung nga ai htam mi hpe wan hte jasan jaseng la ai gumhpraw zawn shanhte hpe jasan jaseng nna chyam yu na nngai; ngai gaw aja hpe chyam yu ai zawn shanhte hpe chyam yu na nngai. Dai shaloi shanhte ngai kaw hpyi wa nna, ngai mung shanhte hpe htan ya na nngai. Shanhte gaw nye a amyu masha ni rai nga ma ai lam ngai shanhte hpe tsun dan na nngai, ngai gaw shanhte a Karai Kasang rai nga nngai hpe shanhte yin la na mara ai,” ngu nna tsun ai.

ZEHKARIA 8:8

shanhte hpe Yerusalem hta nga shangun na matu, sinpraw sinna maga hkan nga nga ai shanhte hpe bai woi la na nngai. Shanhte gaw nye a amyu masha ni tai nna, ngai gaw shanhte a Karai Kasang tai nga let shanhte hpe sadi sahka hte teng man ai hku up hkang nga na nngai.

YAWHAN 1:14

Mungga gaw shinggyim hkum hkrang dagraw la nna, chyeju hte teng man ai hpring let anhte hta nga nga yu sai. Anhte gaw shi a hpung shingkang hpe mu lu sagaw ai. Dai hpung shingkang gaw Kawa Karai Kasang a Kasha shingtai ngu ai hpe shi hkam la lu ai lam rai nga ai.

YAWHAN 14:23

Yesu gaw, “Ngai e tsaw ra ai wa rai yang gaw, nye a sharin shaga ai ga hpe madat mara hkan sa shatup na ra ai. Nye Wa mung dai wa hpe tsaw ra na wu ai rai nna an lahkawng gaw dai wa kaw sa nna, shi hte rau shanu nga na ga ai.

2 KORINHTU 6:16

Karai Kasang a nawku htingnu gaw gawng-ngu sumla ni hte kaning di nna myit hkrum lu na rai ta? Hpa majaw nga yang, anhte gaw ahkrung nga ai Karai Kasang a nawku htingnu ni rai nga ga ai! Karai Kasang shi nan, “Ngai gaw nye a amyu masha ni hta nye a nta shatai nna, shanhte hta shanu nga na nngai; Ngai shanhte a Karai Kasang tai nga na nngai rai nna, shanhte gaw nye a amyu masha ni tai na mara ai,” nga nna tsun ai.

2 KORINHTU 6:18

Nanhte a Kawa ngai tai na nngai, rai nna nanhte gaw nye a shadang sha ni hte shayi sha ni tai na marin dai, nga nna chyahtum chyalai n-gun atsam rawng ai Madu gaw atsun nga ai.”

1 HTESALONI 3:11

Anhte a Wa Karai Kasang shi nan hte Madu Yesu Hkristu gaw anhte a matu nanhte hpang de sa wa na lam lajang ya u ga.

HEBRE 11:16

Ya chyawm gaw, dai hta grau ai sumsing lamu na buga mungdan hpe marit nga ma ai. Dai re ai majaw, Karai Kasang gaw shanhte a Karai Kasang re ai ngu na hpe kaya ma ai n rai, hpa majaw nga yang, Karai Kasang gaw shanhte a matu nga na shara langai mi lajang da ya manu ai.

HEBRE 8:10

Ya ndai ga shaka gaw du na ra ai nhtoi ni a hpang e Israela amyu masha ni hte ngai tawn da na ga shaka rai nga ai. Shanhte a myit masin kata hta nye a tara hpe ngai bang da ya na mawe ai, shanhte a kraw lawang hta ka da na we ai: Shanhte a Karai Kasang ngai tai na nngai rai nna, shanhte gaw nye a amyu masha ni tai na mara ai.

HEBRE 8:2

Shi gaw sumsing lamu na chyoi pra dik ai shara hta Hkinjawng Agyi Kaba amu gun hpai nga ai, dai shara gaw sumsing lamu ngu ai masha lata hte n galaw da ai, Karai Kasang e galaw da ai sum majing rai nga ai.

SHINGRAN 10:4

Dai mu ngoi ai mahku a nsen shaga shapraw dat ai shaloi jang, ngai ka da na maw nngai. Rai ti mung sumsing lamu de nna, “Ndai mu ngoi ai nsen sanit tsun dan sai hpe makoi magap da u, hkum ka da et!,” nga nna tsun pru ai nsen ngai na nngai.

SHINGRAN 10:8

Dai hpang, lamu de na ngai na yu ai nsen ngai hpe bai tsun ai gaw, “Panglai hte hkarang ntsa e tsap nga ai lamu kasa a hpaw nga ai laika hpe sa la su,” nga ai.

SHINGRAN 12:10

Dai hpang sumsing lamu kata na nsen kaba gaw, “Ya anhte a Karai Kasang a hkye hkrang la ai lam du ra ai! Ya Karai Kasang gaw hkawhkam rai nga ai lam shi a atsam madun dan nu ai! Ya shi a Meshia gaw shi a daru magam ahkang aya hpe madun dan nu ai! Hpa majaw nga yang, anhte a hpu nau ni hpe, shani shana anhte a Karai Kasang a man e mara shagun, jahte tam ai wa hpe sumsing lamu kata kaw nna jahkrat kau ai hkrum nu ai.

SHINGRAN 21:7

Awng padang lu ai wa gaw, ndai ga sadi hte maren hkam la lu na ra ai rai nna, ngai gaw shi a Karai Kasang tai na hte, shi gaw nye a kasha tai na ra ai.

SHINGRAN 22:3

Karai Kasang a dagam dala hkrum ai ngu ai hpa mung htawm hpang de dai mare hta nga sana n rai. Karai Kasang hte Sagu Kasha a tingnyang gaw, dai mare kata hta nga nga na ra ai rai nna, shi a shangun ma ni shi hpe nawku daw jau na mara ai.

SHINGRAN 7:15

Dai re ai majaw, shanhte gaw Karai Kasang a tingnyang man e ningngai nga lu na ma ai hte, shi a nawku htingnu hta shani shana shi hpe nawku daw jau nga ma ai. Tingnyang hta dung nga ai wa mung, shanhte hte rau nga nga nna shanhte hpe makawp maga na ra ai.