SHINGRAN 2:10 - Jinghpaw Common Language Bible 2009

¹⁰ Nang hkrum magang ra ai nni nkri hpe hkum hkrit et; Yu u: Nanhte hpe chyam yu na matu nat gaw, nanhte hta na nkau mi hpe htawng hta sharen da na ra ai rai nna, nanhte a ru yak nni nkri hkrum ai lam nhtoi shi ya tup na na ra ai. Si hkra ngai hta maju jung nga u, shaloi ngai nang hpe asak janmau jaw na de ai: dai gaw na a awng padang lu ai shabrai rai nga ai.

Jinghpaw Hanson Version Bible

¹⁰ Nang hkrum magang ra ai nni nkri hpe hkum hkrit et; yu u, nanhte hpe chyam yu na, Nat gaw nanhte hta na nkau mi hpe htawng hta sharen da nna, nanhte n htoi shi ya tup zingri zingrat ai hkrum na marin dai. Si hkra maju jung nga u, shaloi ngai nang hpe asak janmau jaw na de ai.

SHINGRAN 2:10 Iomraidhean Croise

SHAKAWN KUNGDAWN 31:23

Shi a kangka ai amyu masha ni yawng hte e, dai Madu hpe tsaw ra nga mu. Dai Madu gaw kangka ai ni hpe makawp maga nga ti mung, gumrawng gumtawng ai ni hpe chyawm gaw shanhte hkam la ging ai hte maren ari jaw ya nga ai.

SHARUNG SHAYAWT 3:57

Nang gaw ngai hpe hpa hkrit tsang shara n nga ra ai nga nna htan ni ai hte tsun nit dai.

Daniela 1:12

Shi gaw, “Anhte hpe shi ya tup chyam yu mi, anhte dai laman sha na namlaw namlap hte lu na ntsin sha jaw mi.

Daniela 1:14

Shi mung shanhte hpe nhtoi shi ya tup chyam shangun na myit hkrum ya wu ai.

HABAKU 2:3

Dai hpe ka tawn u, hpa majaw nga yang dai gaw teng teng byin wa na aten garai n du nga ai. Rai ti mung aten gaw alawan du nga sai, ngai nang hpe madun ai lam gaw teng wa na ra ai. Dai du wa na aten gaw lanyan ai zawn rai nga ai, rai ti mung dai hpe la nga u; dai gaw teng teng byin wa na ra ai, dai gaw na taw nga na ra ai n rai.

MAHTE 10:22

Nye a majaw masha shagu gaw nanhte hpe n dawng n wawm na mara ai. Rai ti mung, htum hkra shakut sharang ai wa gaw, hkye hkrang la ai hkrum na ra ai.

MAHTE 10:28

Nanhte a hkum hkrang hpe sha sat kau nna Wenyi hpe n sat kau lu ai ni hpe hkum hkrit mu: Wenyi hte hpawn hkum hkrang hpe ngarai mung hta e jahten kau lu ai wa hpe grau nna hkrit nga mu.

MAHTE 24:13

Rai ti mung jahtum du hkra shakut sharang ai wa gaw hkye hkrang la ai hkrum na ra ai.

MARKU 13:13

Nye a majaw masha shagu nanhte hpe n ju n dawng ai hkrum na marin dai; rai ti mung jahtum du hkra shakut sharang ai wa kadai rai ti mung hkye hkrang la ai hkrum na ra ai.

MARKU 8:35

Hpa majaw nga yang, tinang a asak hpe hkye la mayu ai wa kadai mung asak sum na ra ai; rai ti mung nye a majaw hte dai Kabu Gara Shiga a majaw shi a asak sum ai wa chyawm gaw, dai hpe hkye la lu na wu ai.

LUKA 21:12

Dai lam ni yawng garai n byin yang, masha ni gaw nanhte hpe rim la nna zingri zingrat di nhtawm, tara jawng ni hta jeyang nna htawng bang kau na matu ap kau ai hkrum na myit dai hte nye a mying a majaw hkawhkam ni hte du ni a man de du na marin dai.

YAWHAN 12:25

Tinang a asak hpe tsaw ra nna lahpawt dum ai wa gaw asak sum na ra ai; ndai mungkan ga e, tinang a asak hpe n dawng ai wa chyawm gaw htani htana asak hpe makawp maga kyem da ai wa tai na ra ai.

YAWHAN 13:2

Yesu hte shi a sape ni gaw, shana shat sha nga ma yang, nat gaw Simun a kasha Yuda Iskarut a kraw kata e, Yesu hpe ap kau na hpaji daw bang ya boi nu ai.

YAWHAN 13:27

Yuda gaw dai muk n-gup mi la sha ngut ai shaloi jang, Satan gaw shi hta shang nu ai. Dai re ai majaw, Yesu gaw, “Nang galaw ra ai amu lau lau galaw u!,” ngu nna shi hpe tsun wu ai.

KASA 20:24

Rai ti mung nye a matu masat da ai amu lit hpe mung Madu Yesu ngai e ap ya da ai magam amu hpe mung, tsep kawp ngut kre hkra gun na lam chyu sha ahkyak madung rai nga ai majaw ngai gaw nye a asak hpe pyi lahpawt nngai n rai. Dai Madu ap ya da ai magam amu ngu ai gaw Karai Kasang a chyeju Kabu Gara Shiga hpe hkaw tsun sakse hkam na lam nan rai nga ai.

KASA 21:13

Pawlu chyawm gaw, “Nanhte hpa rai hkrap ngu hkrap ngoi nga nna nye myit hpe gawng run shangun ya nga myit ta? Yerusalem mare e gyit hkang da ai hkrum na sha n ga, Madu Yesu a mying nsang a majaw dai yang sa si hkam na pyi ngai jin jin rai nga nngai,” ngu nna htan shangap mu ai.

1 KORINHTU 9:25

Shingjawng poi shang na matu shaman ai ginsup ninghkrin shagu gaw, ja ai hkan sa tara ni hpe hkan sa shatup ma ai. Dai masha ni shing rai galaw ai gaw hten mat chye ai nampan shanghkawng janmau lu la na matu rai nga ai. Anhte chyawm gaw htani htana n hten n mat chye ai janmau lu la na matu shakut sharang ga ai.

EHPESU 2:2

Dai ten hta nanhte gaw mungkan a n hkru n kaja ai lam hta hkan sa nna lamu ganghkau hpe up ai wenyi numla hte seng ai n- gun atsam a npu e taw nga myit dai. Karai Kasang hpe n madat n mara ai ni gaw, ya ten hta dai wenyi numla a hkang ai kata hta nga nga ma ai.

EHPESU 6:12

Hpa majaw nga yang, anhte shinggyim masha ni hte gasat hkat nga ai n rai; sumsing lamu lahta tang e nga ai n hkru n hkra ai nat luksuk ni hte mung, ndai sin mak ai mungkan hpe up hkang nga ai du ni, ahkang aya lu ai ni hte gasat gala hkat nga ga ai.

YAKU 1:12

Agung alau ai lam ni hkrum yang ngang ngang kang kang sadi dung nga ai wa gaw a lu ai; hpa majaw nga yang dai wa gaw dai zawn re ai chyam dinglik ai lam hpe lai di awng dang kau lu ai shaloi Karai Kasang gaw shi hpe tsaw ra ai ni hpe jaw na nga nna ndat da sai asak hpe shi a shagrau kumhpa hku nna hkam la lu na ru ai.

1 PETRU 5:4

Dai Sagu Rem Agyi Kaba Wa dan pru ai shaloi nanhte gaw htoi kabrim ai nsam galoi mung n mat chye ai arawng sadang hte hpring ai janmau lu la na marin dai.

1 PETRU 5:8

Nanhte htauli htaula rai nga mu! Nanhte a hpyen wa ngu ai Satan gaw, kadai hpe kawa mayu sha kau lu na i? nga nna shabam ai hkanghkyi zawn ningwan hkawm nga ai.

SHINGRAN 13:14

Shi gaw shawng na matse labye a man e madun dan na ahkang lu ai lamik kumla ni hpe madun nna ga ntsa e nga ai masha yawng hpe hkalem kau wu ai. Dai matse labye gaw, nhtu hkang nma hkrum ti mung n si ai sha bai mai mat ai matse labye hpe shagrau sha-a ai hku nna shi a hkrang sumla galaw shachyaw na matu mungkan masha ni hpe shangun da wu ai.

SHINGRAN 13:2

Dai ngai mu ai matse labye gaw rawnggawk hte bung nna, shi a lagaw ni gaw tsap lagaw zawn, shi a n-gup hkanghkyi n-gup zawn rai nga ai. Baren numraw gaw shi a hpung dagu hte mung shi a tingnyang hpe mung, shi a kaba la ai ahkang aya hpe mung, dai matse labye a lata de ap ya wu ai.

SHINGRAN 13:7

Shi gaw Karai Kasang a masha ni hpe gasat nna dang kau na ahkang mung, mungdan shagu hta nga ai ga baw amyu shagu shaga ai masha amyu bawsang yawng hte a ntsa e up na ahkang hpe mung jaw da hkrum ai wa rai nga ai.

SHINGRAN 17:14

Shanhte gaw Sagu Kasha hpe hpyen gasat na mara ai; rai ti mung dai Sagu Kasha gaw, shi shaga la nna lata la hkrum ai, kangka re ai shi a hpang hkan nang ai ni hte rau awng padang lu na ra ai. Hpa majaw nga yang, shi gaw Madu ni a Madu, Hkawhkam ni a Hkawhkam rai nga ai,” nga nna ngai hpe tsun ai.

SHINGRAN 2:13

Nang gara shara e nga nga ndai hpe ngai chye nga nngai. Satan a tingnyang dung nga ai shara e nang nga nga ndai. Ngai hta sadi dung ai hte sakse hkam ai Antipa gaw Satan de nga ai shara ngu ai nanhte a ka-ang e Sat kau hkrum ai aten hta pyi, nang gaw ngai hta sadi dung nga nna, ngai hpe kam sham ai na a makam masham hpe n nyet kau ndai.

SHINGRAN 2:9

Nang hkrum ai zingri zingrat hte matsan mayan hpe ngai chye nga nngai; rai ti mung kaja wa nang sut su nga ndai! Yuda masha rai ga ai nga nhtawm me, Yuda masha n teng ai masha ni nang hpe sari hpoi shangun ai n hkru n kaja ai shatan nhkan ga ni tsun nga ma ai hpe ngai chye nga nngai. Kaja wa nga yang shanhte gaw Satan a hpung masha ni rai nga ma ai.