SHINGRAN 11:3 - Jinghpaw Common Language Bible 2009

³ Bai, nye a sakse yan lahkawng hpe ngai shangun dat na mawe ai rai nna, shan gaw lachyit nba bu hpun let nhtoi 1,260 ya tup Karai Kasang a mungga hpe myihtoi ga hku hkaw tsun na mara ai.

Jinghpaw Hanson Version Bible

³ Bai, nye a sakse yan lahkawng hpe ngai ahkang jaw na mawe ai rai nna, shan gaw lachyit nba bu hpun let, nhtoi hkying mi ni tsa e kru shi ya tup, myihtoi htoi na mara ai.”

SHINGRAN 11:3 Iomraidhean Croise

NINGPAWT NINGHPANG 37:34

Yaku gaw yawn hkyen ai hte shi a hpun palawng ni hpe gang je kau nhtawm lachyit nba lawai da wu ai. Shi gaw shing rai hkrum hkra sai kasha a matu nhtoi na na wa sharung shayawt nga wu ai.

2 SAMUELA 3:31

Dawi gaw Yoab hte shi a masha ni hpe shanhte a bu hpun palawng ni gang je kau nhtawm lachyit nba lawai let Abna a matu sharung shayawt na lam hkang dat wu ai. Dai moi mang makoi mayang ai shaloi, Hkawhkam Dawi mung shi hkum nan moi mang shingdu kaw nna hkan sa nang wu ai.

1 HKAWHKAM 21:27

Elia ga tsun ngut jang, Ahab gaw shi a hpun palawng ni hpe gang je kau nhtawm dai ni hpe raw kau nna lachyit sumpan hpun da wu ai. Shat lusha n sha ai sha, lachyit sumpan ntsa e yup taw nga wu ai; myit htum let mung yawn hkawm nga ai.

2 HKAWHKAM 19:1

Hkawhkam Hezekia gaw shanhte tang shawn ai shiga hpe na ai shaloi jang, yawn ai myit hte shi a hpun palawng ni hpe gang je kau nhtawm lachyit nba bu hpun let dai Madu a Nawku Htingnu de sa wa wu ai.

1 HKAWHKAM LABAU 21:16

Dai lamu kasa gaw Yerusalem mare hpe jahten sharun kau na matu shi a lata hta nhtu lang da nhtawm nbung ka-ang e tsap nga ai lamu kasa hpe Dawi mu wu ai. Dawi hte shi a amyu masha ni a ningbaw ni gaw lachyit nba bu hpun let shanhte a myi man ga de du hkra gum dagup nga ma ai.

NEHEMIA 9:1

Dai shata a hkun mali ya shani e, Israela amyu masha ni gaw shanhte galaw shut ai yubak mara ni a majaw yawn hkyen ai hpe madun nna lusha gam na matu hpawng nga ma ai. Dai rai nna shanhte gaw maigan masha ni yawng hte jahka kau ma ai. Shanhte gaw yawn hkyen ai kumla madun na nga, lachyit nba bu hpun nna shanhte a baw ntsa hkan e ga nhpu hte bun ma ai. Dai hpang shanhte hte shanhte a kaji kawa ni shut hpyit kau ai yubak mara ni a matu, shanhte rawt tsap let mara yin la hpang wa ma ai.

YOBA 16:15

Lachyit sumpan hte galaw ai hpun nba ni bu hpun let ngai yawn madai nngai; ndai yang e, sum kadawng ai myi man hte ga nhpu hta dung nga nngai.

SHAKAWN KUNGDAWN 69:11

Sharung shayawt ai hpun palawng ngai bu hpun ti mung, shanhte ngai hpe mani asawng nga ma ai.

ESAIA 22:12

Chyahtum Chyalai N-gun rawng ai Tsaw Htum ai dai Madu gaw nang hpe hkrap ngu hkrap ngoi ai, sharung shayawt ai, na a baw shangun na hte lachyit nba hpun na matu htet da nga ai.

YEREMIA 1:10

Baw kau na hte run kau na matu mung, jahten shabyak kau na hte gumlau jahten kau na matu mung, gaw da na hte hkai da na matu mung, masha amyu baw ni hte mungdan ni a ntsa hta e up na ahkaw ahkang, dai ni jang, ngai nang hpe ap nga nngai,” ngu nna tsun wu ai.

SHARUNG SHAYAWT 2:10

Yerusalem na asak kaba sai salang ni gaw ga ntsa e atsin sha dung nga nhtawm, Shanhte a baw ntsa hkan e ga nhpu kap nga nna, shanhte a hkum ni hta lachyit nba ni lawai da nga ma ai. Num mahkawn ma ni mung ga de gum dagup nga ma ai.

EZEKELA 4:6

Nang gaw dai maga mi de hkrawn ai nhtoi ngut jang, na a hkra maga de kayin hkrawn taw nna, nhtoi mali shi ya tup, Yuda amyu a shut hpyit ai amu a matu nni nkri hkam sha na rai ndai, shanhte a ari gun hpai ai aten ladaw gaw lani mi a matu laning mi rai na ra ai.

Daniela 12:7

Dai lamu kasa gaw lamu de lata lahkawng sharawt nhtawm Htani Htana a Karai Kasang a mying ningsang hta dagam shaka let ga sadi tawn da wu ai. Shi gaw, “Dai aten gaw masum ning a chyen mi rai na ra ai. Karai Kasang a amyu masha ni hpe zingri zingrat ai aten htum jang, ndai lam yawng mayawng byin wa na ra ai,” ngu nna tsun ai ga hpe ngai na nngai.

Daniela 7:25

Shi gaw Tsaw Htum ai Karai Kasang hpe tsun ninghkap nna, Karai Kasang a amyu masha ni hpe dip gamyet kau na ra ai. Shi gaw shanhte a makam masham tara ni hte lusha poi ni hpe galai kau mayu na ra ai. Karai Kasang a amyu masha ni mung shi a daru magam n-gun npu hta masum ning jan taw nga na mara ai.

Daniela 8:14

Kaga lamu kasa gaw, “Dai gaw jahpawt shana 2,300 rai nga ai; dai laman jahpawt shana shagu hkungga ni hpe nawng jau lu na n rai; dai hpang mahtang Nawku Htingnu hpe bai gram lajang da na ra ai,” ngu nna htan ai ga hpe ngai na nngai.

YOELA 1:13

Tawn hkungri hta daw jau amu galaw ai hkinjawng ni e, lachyit nba hpun let hkrap nga mu! Nawku Htingnu kata shang nna shana tup sharung shayawt mu! Nanhte a Karai Kasang a matu nawng ya na nsi naisi hte sabyi ntsin n nga sai.

YONA 3:5

Ninewe mare masha ni gaw Karai Kasang a mungga hpe kam ma ai. Dai rai nna shanhte myit malai lu sai hpe madun na matu kaba grau ai kaw nna kaji htum ai wa kaw du hkra, masha shagu lachyit nba hpun let lusha gam na matu daw dan da nga ma ai.

YONA 3:8

Masha hte dusat ni yawng lachyit nba bu hpun lu na rai nga ai. Masha shagu gaw Karai Kasang kaw akroi anoi akyu hpyi lu na rai nga ai, shanhte gaw n hkru ai arawn alai hte n kaja ai amu ni hpe kau da lu na rai ma ai.

BU HKAWM 11:26

Dai ningbaw sanit shi hta na Eldad hte Medad yan mahtang Sum de n pru sa ai sha dap kata e nga nga ma ai. Dai yan hta mung wenyi du nna shan mung dap kata e myihtoi ni zawn marawn jahtau hpang wa ma ai.

MAHTE 11:21

“O, Kurazin e, nang dingnye lu ndai! O, Betsaida e, nang dingnye lu ndai! Hpa majaw nga yang, nan hta dan ai mauhpa magam bungli ni hpe Turu hte Sidon mare yan hta dan yu taw gaw moi moi me lachyit nba hpun, dap hta galwi rai nna myit malai lu boi na masai.

MAHTE 18:16

Na a ga hpe n madat la yang gaw, marai langai lahkawng hpe naw shaga la nna hpa hku hpa lam rai ti mung nang mara madun ai lam teng nga ai lam dai Chyum Laika hta tsun da nga ai hte maren, sakse lahkawng masum a n-gup ga hte daw dan ya mu.

LUKA 10:13

“Kurazin e, na a matu gade hkrithpa kaba rai na rai nga a hka! Betsaida e, na a matu gade hkrithpa kaba rai na rai nga a hka! Nan hta dan ai lamik kumla ni hpe Turu hte Sidon mare hta lama dan yu taw gaw, dai kaw na masha ni gaw, moi moi me lachyit nba hpun ai hte shanhte a ntsa e dap hte bun la rai nna myit malai lu boi na masai.

LUKA 24:48

Nanhte ni gaw ndai lam ni a sakse ni rai nga myit dai.

YAWHAN 15:27

Nanhte mung, shawng nnan kaw nna ngai hte rau nga nga manit dai majaw, nye a lam sakse hkam ya na marin dai, ngu mu ai.

YAWHAN 3:27

Shaloi Yawhan gaw, “Karai Kasang kaw na jaw ai sha n rai yang gaw masha gaw hpa amu lit hpe mung hkam la lu ai n rai.

KASA 1:8

Rai ti mung dai Chyoi Pra ai Wenyi nanhte a ntsa e du jang, nanhte n-gun atsam lu la na marin dai rai nna, nanhte gaw Yerusalem mare hte Yuda mung ting, Samari mung hte lamu ga shingjut shingnaw ni htum hkra nye a sakse ni tai na marin dai,” ngu nna shanhte hpe tsun mu ai.

KASA 13:31

Bai shi gaw Galile mung kaw nna Yerusalem de shi hte rau lung wa ai ni hpe, nhtoi tsawmra wa na hkra shi hkum shadan dan mu ai. Shanhte gaw ya shi a Israela amyu masha ni a man e shi a matu sakse ni tai nga ma ai.

KASA 2:32

Dai Yesu hpe Karai Kasang jahkrung sharawt la wu ai rai nna anhte yawng mung dai lam a sakse ni rai nga ga ai.

KASA 3:15

Nanhte gaw asak jaw ya lu ai wa hpe gaw sat kau myit dai, rai ti mung Karai Kasang gaw shi hpe si ai kaw na sharawt la nu ai rai nna anhte gaw dai lam a sakse ni rai nga ga ai.

1 KORINHTU 12:28

Karai Kasang gaw dai Hpung hta e, langai ngu na shara hta Kasa ni, lahkawng ngu shara hta myihtoi ni, masum ngu na shara hta sara ni, dai hpang e lamik kumla galaw ai ni, dai hpang machyi makaw shamai shatsai na atsam lu ai ni, masha kaga ni hpe karum madi shadaw lam madun chye ai atsam lu la ai ni, lam woi ningshawng ni hte, laklai ai ga amyu myu chye shaga ai ni hpe mung shi shara hte shi san tawn da manu ai.

2 KORINHTU 13:1

Ya ngai gaw nanhte hpang de masum lang ngu na bai du sa wa na nngai. Chyum laika hta mung, “Mara shagun da ai lam langai ngai hpe chye ya ai sakse lahkawng, shing n rai lahkawng hta jan ai sakse ni a ga hte shagrin da lu na rai nga ai,” nga nna tsun da nga ai.

EHPESU 4:11

Shinggyim masha ni hpe chyeju kumhpa ni hpe jaw ya ai Madu mung shi nan rai nga ai. Shi gaw nkau mi hpe kasa, nkau mi hpe myihtoi, nkau mi hpe Kabu Gara Shiga hkaw hkawm ai ni, nkau mi hpe hpung up ni hte sara ni di nna san da shajang mu ai.

TARA JAHPRANG 17:6

Rai ti mung marai lahkawng masum shi a lam sakse hkam ai rai yang chyu sha sat kau ai hkrum mai nga ai. Sakse langai sha rai yang chyawm gaw si ai hkrum lu na wu ai n rai.

TARA JAHPRANG 19:15

“Ru hka amu galaw shut ai mara gawn lu na matu sakse langai sha hte n law nga ai; dai masha wa mara lu nga ai hpe shagrin na matu yawm dik sakse lahkawng ra nga ai.

SHINGRAN 1:5

Kangka re ai sakse wa, si mat ai ni hta na shawng numshawn hkrung rawt wa ai wa, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta anga nga malit ga law. Anhte hpe tsaw ra nna, shi hkum nan hpe hkungga nawng si hkam ai hte anhte a yubak kaw na raw dat mi ai hte,

SHINGRAN 11:2

Rai ti mung, dai htingnu a shinggan wang hpe gaw hkum shadawn et, hpa majaw nga yang, dai gaw maigan masha ni hpe ap ya kau ngut sai rai nna, shanhte gaw dai Chyoi Pra Ai Mare hpe shata mali shi lahkawng tup kabye dip da na mara ai.

SHINGRAN 11:6

Shan gaw dai Karai Kasang a mungga htawn tsun myihtoi htoi ai nhtoi hte hta, marang n htu lu u ga, lamu hpe pat kau na ahkang lu ma ai; hka hpe sai shatai kau na ahkang mung, shan gaw tinang ra ai ten shagu hta mungkan ga hpe ana zinli amyu shagu hte tsin-yam dat na ahkang mung lu ma ai.

SHINGRAN 12:6

Dai numsha gaw, shi a matu Karai Kasang lajang da ya ai nam mali de hprawng mat wa ai. Dai shara hta nhtoi 1,260 ya du hkra shi hpe bau maka na maru ai.

SHINGRAN 13:5

Dai matse labye gaw, shakawng gumrawng ai hte Karai Kasang hpe shatan nhkan ga tsun na mung, shata mali shi lahkawng tup up hkang na ahkang mung lu tawn da wu ai.

SHINGRAN 19:10

Shaloi, ngai gaw shi hpe nawku na ngu, shi a lagaw nhpang e dingnyawm dagup dat nngai. Rai ti mung, dai lamu kasa gaw, “Shing hkum rai et! Ngai gaw nang hte na nhpu nnau ni hte hpawn, Madu Yesu shadan dan ai dai teng man ai mungga hta jung noi nga ai ni a shingdep shingtau shangun ma manang she rai nngai. Karai Kasang hpe nawku u!” Hpa majaw nga yang, Madu Yesu sakse hkam shadan shaleng dan ai dai teng man ai mungga nan myihtoi ni hpe shung ya nga ai.

SHINGRAN 20:4

Dai hpang, tingnyang ni hpe ngai mu nngai; dai tingnyang ni hta dung nga ai ni gaw, tara dara na ahkang aya ap ya da hkrum ai ni rai nga ma ai. Dai hta kaga, Madu Yesu shadan dan ai teng man ai lam hpe mung, Karai Kasang a mungga hpe mung hkaw tsun sakse hkam ai majaw, sat kau hkrum ai ni hte, dai matse labye hpe mung, shi a hkrang sumla hpe mung, n naw n ku ai hte, tinang a lahtan hte lata ni hta dai matse labye a masat dingsat ni hpe n hkam la ai ni a tsu ni hpe mung, ngai mu nngai. Shanhte gaw asak bai hkrung wa nna, hkawhkam ni zawn Madu Yesu hte rau shaning hkying mi tup up nga na mara ai.