NEHEMIA 1:6 - Jinghpaw Common Language Bible 2009

⁶ Madu e, ngai hpe mada yu nna na a shangun ma ni rai nga ai Israela amyu masha ni a matu shani shana ngai hpyi ai nye a akyu hpyi ga hpe na ya e. Anhte Israela amyu masha ni mung nye a kaji kawa ni hte ngai shut kau sai yubak mara ni a matu mung ngai hpyi nem nngai.

Jinghpaw Hanson Version Bible

⁶ na a mayam wa, Israela kashu kasha ni a matu, na a man e shani shana akyu hpyi nga nna, Israela kashu kasha ni rai nga ai anhte gaw, nang hpe shut kau ai yubak mara madun tawngban nga yang, na a mayam wa a ga hpe madat mara na matu, ya na a na hpe hpaw nna, na a myi azi yu mi. Rai sa, ngai mung nye wa nta dap ni mung, yubak galaw saga ai.

NEHEMIA 1:6 Iomraidhean Croise

1 HKAWHKAM 8:30

Nye a akyu hpyi ga ni hpe mung, ndai shara de myi man yawng nna hpyi ai na a amyu masha ni a akyu hpyi ga ni hpe mung na ya e. Sumsing lamu na na a nta hta anhte a akyu hpyi ga hpe madat ya nna anhte hpe mara dat ya mi law.

1 HKAWHKAM 8:47

na a amyu masha ni a akyu hpyi ga ni hpe madat ya u. Shanhte gade wa yubak mara galaw nna n hkru n hkra rai nga ma ti mung, dai mungdan hta shanhte myit malai lu nna nang kaw akyu hpyi let mara hpyi nem mu ai shaloi, O Madu e, shanhte a akyu hpyi ga hpe madat ya u law.

2 HKAWHKAM LABAU 28:10

Ya mung Yuda hte Yerusalem mare na lasha numsha ni hpe mayam shatai na maw nga myit dai. Nanhte mung dai Madu nanhte a Karai Kasang hpe shut kau nga manit dai hpe nanhte n chye nga myit ni?

2 HKAWHKAM LABAU 29:6

Anhte a kaji kawa ni mahtang dai Madu anhte a Karai Kasang hta sadi sahka n dung nga ma ai rai nna shi n ra sharawng ai amu ni hpe galaw nga ma ai. Shanhte gaw shi hpe kau da nna shi shanu nga ai shara kaw nna shanhte kayin mat wa masai.

2 HKAWHKAM LABAU 6:40

“Ya chyawm gaw, O nye a Karai Kasang e, anhte hpe mada yu nhtawm ndai shara e akyu hpyi ap nawng ai ga ni hpe madat ya mi.

EZRA 10:1

Ezra gaw Nawku Htingnu ndaw e gum dagup let myi prwi pru nna dai yubak mara ni hpe yin la nhtawm akyu hpyi nga yang, Israela masha wunawng wuwa kaba rai nga ai numsha lasha ni hte ma kaji ni nye a grup grup hkan e sa hpawng nga let ahkup ahka nga hkra hkrap nga ma ai.

EZRA 10:11

Dai re ai majaw, dai Madu nanhte a kaji kawa ni a Karai Kasang hta nanhte a yubak mara ni hpe yin la nna, shi sharawng awng ai amu hkan galaw nga mu. Anhte a mungdan hta nga nga ai maigan masha ni hte nanhte kaga san san rai nga nna nanhte a maigan madu jan ni hpe yeng seng kau mu,” ngu nna tsun wu ai.

NEHEMIA 1:11

Nye a akyu hpyi ga hte nang hpe shagrau sha-a mayu ai kaga na a shangun ma ni yawng a akyu hpyi ga ni hpe ya jang madat ya mi. Dai ni jang ngai hpe awng dang ai lam jaw ya let hkawseng wa anhte hpe yu matsan dum shangun mi law.” Ngai chyawm gaw dai aten e hkawseng wa a sabyi jau ai wa rai nga nngai.

SHAKAWN KUNGDAWN 102:17

Shi gaw kabai kau da hkrum ai shi a amyu masha ni a nsen ni hpe na wa na ra ai; shanhte a akyu hpyi ga ni hpe madat ya na ra ai.

SHAKAWN KUNGDAWN 106:6

Anhte gaw anhte a kaji kawa ni galaw lai wa sai zawn yubak galaw kau saga ai; shing rai, anhte gaw tara n lang ai ni hte n hkru n shawp ai ni tai mat nga saga ai.

SHAKAWN KUNGDAWN 130:2

Madu e, nye a hpyi jahtau ai nsen hpe na ya e; karum la na matu, nye a hpyi shaga ai nsen hpe madat ya e.

SHAKAWN KUNGDAWN 32:5

Shing rai, ngai gaw nye a yubak ni hpe nang kaw yin la ni ai; nye a shut hpyit ai mara ni hpe mung ngai makoi magap da nngai n rai. Dai lam ni hpe nang kaw mara yin la na ngai daw dan ni ai; nye a yubak yawng hte hpe nang dat kau ya nit dai.

SHAKAWN KUNGDAWN 34:15

Dai Madu gaw ding hpring ai ni hpe mada mara nga nna; shanhte a hpyi jahtau ai nsen ni hpe madat ya nga ai.

SHAKAWN KUNGDAWN 55:17

Jahpawt manap, shani ka-ang hte shana na aten ni hta, nye a hpyi aput ai hte madai ai nsen gaw shi kaw hkrang lung wa ai; shi gaw nye a nsen hpe na ya na ra ai.

SHAKAWN KUNGDAWN 88:1

Ngai hpe hkye hkrang la ai Madu Karai Kasang e shani tup ngai nang hpe hpyi jahtau nna; shana e mung, na a man de du sa nngai.

ESAIA 6:5

Ngai gaw, “Nye a matu myit mada shara n nga sahka! Nye a nten kaw nna pru ai ga hkum shagu gaw yubak ga ni rai nna, ga hkum shagu yubak ga tsun shaga ai amyu masha ni a lapran e ngai nga nga nngai majaw, ngai gaw dingnye hkrum nga nngai. Ti mung, nye myi hte chyaw, Chyahtum Chyalai N-gun rawng ai dai Madu Hkawhkam wa hpe ngai mu se ai.

SHARUNG SHAYAWT 5:7

Anhte a kaji kawa ni yubak galaw masai, rai ti mung ya chyawm gaw shanhte htum mat masai, anhte gaw shanhte a yubak ni a majaw nni nkri hkrum sha nga ga ai.

Daniela 9:15

“O Madu anhte a Karai Kasang e, nang gaw na a daru magam n-gun madun dan let na a amyu masha ni hpe Egutu mung kaw nna woi wa nga ndai majaw na a daru magam n-gun hpe ya du hkra adum nga ai. Anhte gaw yubak galaw kau saga ai; anhte gaw shut hpyit amu galaw kau saga ai.

Daniela 9:20

Ngai gaw akyu matut hpyi nga nngai rai nna, nye a yubak ni hte nye a amyu masha Israela masha ni a yubak ni hpe la let shi a chyoi pra ai Nawku Htingnu bai gram lajang gaw gap na matu dai Madu nye a Karai Kasang hpe hpyi nem nga nngai.

Daniela 9:4

Ngai gaw dai Madu nye a Karai Kasang hpe akyu hpyi let nye a amyu masha ni a yubak mara ni hpe yin la nga nngai. Ngai gaw, “Madu Karai Kasang e, nang gaw galu kaba nga ndai majaw anhte nang hpe shagrau sha-a ga ai. Nang gaw na a ga shaka hta sadi dung nga ndai rai nna nang hpe tsaw ra ai ni hpe dinggrin tsaw ra myit madun dan nna nang hkang da ai hte maren hkan galaw nga ndai.

Daniela 9:5

“Anhte yubak galaw shut kau saga ai; anhte gaw n hkru ai ni she rai mat saga ai, anhte gaw shut hpyit ai amu galaw kau saga ai. Anhte galaw na matu nang hkang da ai ga ni hpe ningdang kau nna nang anhte hpe madun dan nit dai jaw ai lam kaw nna mung yit mat wa saga ai.

Daniela 9:8

Anhte a hkawhkam ni, mung up hkang du ni hte anhte a kaji kawa ni kaya kahpa amu galaw ai hte Madu nang hpe yubak galaw shut kau nga masai.

LUKA 18:7

Karai Kasang gaw, shi hpe shani shana karum la na matu hpyi jahtau nga ai, shi a lata la ai amyu masha ni a maga de, tara n dara ya ai nga na wu ni?

LUKA 2:37

Dai num gaw Nawku Htingnu kaw na n pru ai sha, lusha gam nna akyu hpyi ai hte Karai Kasang hpe nawku daw jau let anga nga ai.

EHPESU 2:3

Kaja wa anhte yawng mung shawng de kalang mi shanhte zawn rai nna anhte a hkum shan a marin marit ai lam ni hta hkan sa let hkum shan a ra ai lam ni hte myit masin a ra ai lam shagu hpe hkan sa galaw nga ga ai. Anhte mung hkum shan lam hku nna kaga masha ni hte maren Karai Kasang a pawt sindawng ai hpe hkrum ging ai ni rai nga ga ai.

1 TIMOHTI 5:5

Masha shingtai rai nna shi hpe yu lanu lahku na kadai n nga ai gaida jan langai mi gaw, Karai Kasang hta myit mada kam hpa let shani shana akyu hpyi ai hte Karai Kasang kaw na karum ai lam hpyi lajin nga ai.

2 TIMOHTI 1:3

Nye a ji wa ni galaw ai zawn, san seng ai myit hte ngai daw jau nga ai Karai Kasang hpe ngai shakawn nngai. Ngai gaw shani shana akyu hpyi ai hta nang hpe galoi mung adum nga let Karai Kasang hpe chyeju shakawn nga nngai.

1 YAWHAN 1:9

Rai ti mung anhte a yubak mara ni hpe Karai Kasang kaw madun yin la nna hpyi nem ga yang gaw, shi gaw shi a ga sadi hta grin nga nna dai teng man ai amu galaw ai wa rai nga ai majaw, anhte a yubak mara hpe raw dat kau ya na hte, shut hpyit tawt lai ai lam yawng mayawng hta na jasan jaseng la na mi ai.

1 SAMUELA 15:11

“Shawlu hpe hkawhkam shatai kau ni ai majaw ngai yawn la nngai; shi gaw ngai kaw na kayin mat wa ai hte nye a hkang da ai ga ni hpe mung n madat mat nu ai,” ngu nna tsun wu ai. Dai majaw, Samuela masin pawt nga ai; dai Madu hpe mung shana tup hpyi nem nga wu ai.