MAHTE 5:3 - Jinghpaw Common Language Bible 2009

³ “Wenyi hta matsan mayan rai nga ai hpe dum chye ai masha ni gaw a lu ma ai, hpa majaw nga yang, sumsing lamu a mungdan gaw shanhte a mungdan rai nga malu ai!

Jinghpaw Hanson Version Bible

³ Wenyi hta matsan mayan rai nga ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga malu ai.

MAHTE 5:3 Iomraidhean Croise

2 HKAWHKAM LABAU 33:12

Shi nni nkri hkrum wu ai majaw shagrit shanem ai myit hte dai Madu shi a Karai Kasang hpang de kayin wa nhtawm hpyi nem wu ai.

2 HKAWHKAM LABAU 33:19

Hkawhkam wa a akyu hpyi ga hte dai hte seng ai Karai Kasang a mahtai, shi myit malai garai n lu yang, n hkru ai amu galaw nna shi shut hpyit kau ai yubak mara ni a lam, tara maigan masha ni nawku ai shara ni, shi tawk galaw ai Ashera karai num a hkrang sumla ni hte shi nawku ai hpara sumla ni yawng a lam hpe Myihtoi ni a Labau Laika hta ka matsing da nga ai.

2 HKAWHKAM LABAU 33:23

Rai ti mung shi a kawa hte n bung ai sha, n shagrit shanem ai hte dai Madu hpang de n kayin wa nga ai. Shi gaw kawa hta pyi grau sawng hkra yubak mara shut hpyit nga ai.

2 HKAWHKAM LABAU 34:27

Yerusalem mare hte dai hta nga ai amyu masha ni hpe ari jaw na matu ngai kaning rai jahkrit shama ai lam hpe nang na ndai shaloi na a hpun palawng ni hpe gang je kau nna hkrap let nye a man e myit malai ai hte nang nan shagrit shanem nga ndai. Na a hpyi nem ai nsen hpe ngai na ni ai majaw,

2 HKAWHKAM LABAU 7:14

shanhte galaw shut kau sai n hkru n shawp ai amu kaw nna myit malai ai hte kayin wa nhtawm ngai kaw akyu hpyi mu ai rai yang, sumsing lamu hta madat mara ya na nngai. Shing rai shanhte a yubak mara ni hpe raw dat kau ya nhtawm shanhte a mungdan hpe bai ngamu ngamai shangun na we ai.

YOBA 42:6

Dai rai nna, ngai tsun kau sai lam yawng mayawng a majaw kaya hkrum nga nngai; shing rai ga nhpu hte wan dap hte bun nna myit malai lu nngai.

SHAKAWN KUNGDAWN 1:1

N hkru ai masha ni a hpaji daw ai lam hpe ningdang ai ni, yubak kap ai ni a kasi hta n hkan nang ai ni, Karai Kasang hpe jahpoi asawng ai ni hte rau n dung lawm ai ni gaw a nga ai.

SHAKAWN KUNGDAWN 112:1

Dai Madu hpe shakawn mu! Dai Madu hpe shagrau sha-a nna shi a hkang da ai ga ni hpe madat mara hkan sa na hta awng sharawng nga ai wa gaw a nga ai.

SHAKAWN KUNGDAWN 128:1

Dai Madu a ga hpe madat nna, shi a hkang da ai mungga hte maren asak hkrung nga ai ni gaw a lu ma ai.

SHAKAWN KUNGDAWN 146:5

Yaku a Karai Kasang karum la ai lam hpe hkam la lu ai ni hte dai Madu shi a Karai Kasang hta shamyet shanat nga ai ni gaw a lu ma ai.

SHAKAWN KUNGDAWN 2:12

hkrit gari ai hte shi hpe dingnyawm nga mu; shing n rai yang, shi a masin kahtet ai gaw alawan su rawt wa ai hte nanhte gaw akajawng sha si mat na marin dai. Makawp maga la na matu, shi kaw du sa ai ni gaw a lu ma ai.

SHAKAWN KUNGDAWN 34:18

Dai Madu gaw myit daw myit hten ai ni hte ani sha nga nga ai; myit mada shara n nga mat sai ni hpe shi hkye hkrang la nga ai.

SHAKAWN KUNGDAWN 41:1

Matsan mayan masha ni a matu, myit ru myit tsang ya nga ai ni gaw a nga ai; shanhte ru tsang hkrum nga ai shaloi, dai Madu gaw shanhte hpe karum la na ra ai.

SHAKAWN KUNGDAWN 51:17

O Karai Kasang e, nye a shagu hkungga gaw shagrit shanem ai myit rai nga li ai; shagrit shanem ai myit hte myit malai ai myit masin hpe nang n ningdang kau na ndai.

SHAKAWN KUNGDAWN 84:12

Chyahtum Chyalai n-gun rawng ai Madu e, nang hpe kam hpa nga ai ni gaw kade wa a lu nga ma hka!

GA SHAGAWP 16:19

Matsan mayan rai nna myit shagrit shanem nga na gaw gumrawng ai masha langai ngai hte lanep garan la lu ai hta grau kaja nga ai.

GA SHAGAWP 29:23

Myit tsaw myit dap ai gaw nang hpe hkrat sum shangun ti mung, nang mahtang shagrit shanem nga ai wa rai yang chyawm gaw hkungga ai hpe nang hkam la lu na ra ai.

GA SHAGAWP 8:32

Ya chyawm gaw, shabrang ni e, nye a ga hpe madat mu; ngai tsun ai ga hte maren, hkan galaw ai rai yang, nanhte a lu na marin dai.

ESAIA 30:18

Ti mung, dai Madu gaw nanhte hpe matsan dum la na matu ala nga ai. Shi gaw teng man ai amu tut nawng galaw ai majaw, nanhte hpe matsan dum la na matu jin jin rai nga ai. Dai Madu hpe kam hpa ai ni gaw a nga ai.

ESAIA 57:15

“Ngai gaw htani htana agrin nga ai matsaw ntsa na chyoi pra ai Karai Kasang rai nga nngai. Ngai gaw tsaw nna chyoi pra ai shara hta nga nngai, rai ti mung ngai gaw shagrit shanem ai hte myit malai lu ai ni hte rau mung nga nngai, shaloi ngai gaw shanhte a kam hpa shara hte myit mada shara hpe bai jaw ya lu nngai.

ESAIA 61:1

Tsaw Htum ai dai Madu gaw ngai hpe shi a Wenyi hte jahpring ya ni ai. Matsan mayan ni hpang de kabu gara shiga gun sa na matu mung, Myit daw mat sai ni hpe shamai shatsai ya na matu mung, Bawng dung ai ni hpe raw dat na matu mung, Htawng hta shareng da hkrum ai ni hpe shalawt dat na matu mung, Shi ngai hpe lata la nna shangun dat nu ai.

ESAIA 66:2

Ngai hkum nan nga yawng danghta n-gawn tawa ting hpe hpan da ni ai! Ngai gaw shagrit shanem ai hte myit malai lu nna ngai hpe hkrit kamyin ai hte nye a ga madat mara ai ni hpe awng sharawng nga nngai.

MIHKA 6:8

N rai law, dai Madu gaw anhte hpe mai kaja ai amu galaw na matu she hkang da sai. Anhte kaw na shi hpyi ai gaw ndai lam rai nga ai: “Teng man ai amu galaw na lam, dinggrin tsaw ra myit madun dan na lam, anhte a Karai Kasang hte kanawn mazum ai hta myit grit myit nem hte asak hkrung hkawm nga na lam ni hpe sha, shi hpyi nga ai.”

MAHTE 11:25

Dai aten hta Yesu gaw, Sumsing Lamu Mungdan hte ginding aga a Madu Wa e, hpaji byeng-ya rawng ai ni hte myit kung hpan ai ni hpe n chye shangun hkra makoi magap da nhtawm, hpaji kata ai ni hpe madun dan ndai majaw, ngai nang hpe shakawn kungdawn nngai.

MAHTE 11:6

Ngai hta myit kataw ai lam n mu ai wa kadai mung, a lu nga ai,” ngu mu ai.

MAHTE 13:16

“Nanhte a myi mu lu nna, nanhte a na na lu nga malit dai majaw a lu myit dai.

MAHTE 19:14

Yesu chyawm gaw, “Ma ni ngai hpang de sa maru ga, shanhte hpe hkum ban shadang myit, hpa majaw nga yang, sumsing lamu a Mungdan gaw dai zawn re ai ma ni a Mungdan rai nga ai,” ngu mu ai.

MAHTE 24:46

Shi a madu bai du wa yu yang, shing rai galaw nga la ai mayam gaw gade wa a lu na a hka!

MAHTE 25:34

Shaloi dai Hkawhkam wa gaw, shi a hkra maga de nga ai ni hpe, ‘Nye a Wa kaw na shaman ya ai lu la ai ni e! Sa marit! Ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu.

MAHTE 3:2

shi gaw, “Sumsing lamu a mungdan du magang ra ai majaw, nanhte a yubak mara ni kaw na myit malai lu mu!” nga nna hkaw tsun hpang wu ai.

MAHTE 8:11

Bai ngai nanhte hpe tsun made ga, sinpraw maga de na hte, sinna maga de na masha ni law law wa du sa wa nna, sumsing lamu a Mungdan hta e, Abraham, Isak, Yaku hte hte rau lusha poi hta dung lu na mara ai.

MARKU 10:14

Yesu dai hpe mu yang, myit yu pawt nga ai rai nna, “Ma ni hpe ngai hpang de sa shangun maru, shanhte hpe hkum jahkring shingdang da myit, hpa majaw nga yang, Karai Kasang a mungdan gaw, dai zawn re ai ni a mungdan rai nga ai.

LUKA 11:28

Rai ti mung, Yesu gaw, “Karai Kasang a mungga madat la nna, hkan nang ai ni mahtang gade wa a lu nga ma hka!,” ngu nna htan wu ai.

LUKA 18:14

Ngai nanhte hpe tsun made ga, Hparishe n re ai sha kang hta ai wa gaw Karai Kasang a man e, jaw ai hku galaw nna nta de wa lu nu ai. Hpa majaw nga yang, tinang hkum hpe shagrau ai wa kadai mung shagrit kau ai hkrum nna, tinang hkum hpe shagrit ai chyawm gaw shagrau ai hkrum na ra ai,” ngu mu ai.

LUKA 22:29

Dai re ai majaw, nye Wa gaw ngai hpe up hkang na ahkang aya jaw ai zawn, ngai mung nanhte hpe, up hkang na ahkang jaw made ai.

LUKA 22:30

Nye a mungdan hta, nye a sha ku e nanhte ngai hte rau lusha lu na marin dai hte tingnyang ni hta dung nna Israela amyu shi lahkawng hte hpe up nga lu na marin dai.

LUKA 4:18

“Madu a Wenyi nye a ntsa e nga nga ai: matsan mayan ni hpe Kabu Gara Shiga hkaw tsun dan na matu, Shi ngai hpe namman jaw ya ni ai. bawng dung ai ni hpe shalawt lu na lam, myi kyaw ai ni hpe myi bai mu na lam, hkaw tsun na matu mung, zingri zingrat hkrum ai ni hpe dat dat shangun na hte,

YAWHAN 20:29

Yesu gaw, “Nang gaw ngai e mu lu ai majaw sha kam n ni? Ngai hpe n mu lu ai sha kam sham ai ni gaw a lu ma ai!,” ngu nna Htawma hpe tsun wu ai.

TARA JAHPRANG 8:2

Nanhte hpe chyam yu na nga, yak hkak jam jau lam ni hpe dat dat nna shi a hkang da ai ga ni hpe hkan sa madat mara let hkan galaw mayu ai myit rawng n rawng chye lu hkra nga, lai mat wa sai mali shi ning tup dai Madu nanhte a Karai Kasang kaning rai woi hkawm ai nam mali lam galu hpe myit dum nga mu.

YAKU 1:10

Lu su ai Hkristan hpu nau wa gaw, Karai Kasang e shi hpe shagrit kau hkrum ai shaloi mung kabu gara nga ra ai. Hpa majaw nga yang lu su ai ni gaw nam na nampu nampan zawn wai mat na mara ai.

YAKU 1:12

Agung alau ai lam ni hkrum yang ngang ngang kang kang sadi dung nga ai wa gaw a lu ai; hpa majaw nga yang dai wa gaw dai zawn re ai chyam dinglik ai lam hpe lai di awng dang kau lu ai shaloi Karai Kasang gaw shi hpe tsaw ra ai ni hpe jaw na nga nna ndat da sai asak hpe shi a shagrau kumhpa hku nna hkam la lu na ru ai.

YAKU 2:5

Nye a tsaw ra ai hpu nau ni e, madat mu! makam masham hta lu su ai ni tai lu na hte shi hpe tsaw ra ai ni hpe jaw na nga nna ndat da sai sumsing lamu a sali wunli hkam la na matu Madu gaw ndai mungkan hta matsan mayan re ai ni hpe lata la mu ai.

SHINGRAN 19:9

Dai hpang lamu kasa gaw, “Dai Sagu Kasha a hkungran poi de shaga da hkrum ai ni gaw a lu ma ai, ngu nna ka da u,” nga nna mung, “Ndai ga gaw Karai Kasang a teng man ai mungga ni rai nga ai,” nga nna mung ngai hpe tsun ai.

SHINGRAN 22:14

Asak jahkrung ai hpun a asi sha lu na hte, mare chyinghka hku shang lu na ahkang lu la na matu, tinang a hpun palawng hkrut jasan kau ai ni gaw a lu ma ai.

SHINGRAN 3:17

Nang gaw, ‘Ngai sut su nga nngai, ngai hta sut ring gan chying sali ai; ngai hta ra ai lam yawng ngai lu se ai,’ nga nna tsun nga ndai. Rai ti mung nang gaw, gade wa tsin-yam tsindam hte chyaren karen ai wa, matsan mayan myi kyaw ai hte singgu krin re ai wa nang rai nga ndai hpe nang n chye nga n hka!