HPILIPI 2:1 - Jinghpaw Common Language Bible 2009

¹ Nanhte gaw Hkristu hte rau asak hkrung ai a marang e n-gun lagaw hpring wa myit dai hte shi a tsaw ra myit gaw nanhte hpe shalan shabran ai lam jaw myit dai. Dai hta n-ga Wenyi a kanawn mazum lu ai lam hte shada da n-gaw nwai matsan dum ai lam hkam la nga myit dai.

Jinghpaw Hanson Version Bible

¹ Dai re ai majaw, Hkristu hta e shadum jahprang na lam, tsawra ai myit hte shangwi shapyaw na lam, wenyi a kanawn mazum ai lam hte, n-gaw nwai nna matsan dum ai lam lama ma nga a yang gaw,

HPILIPI 2:1 Iomraidhean Croise

SHAKAWN KUNGDAWN 133:1

Karai Kasang a amyu masha ni myit hkrum rap ra nna, rau hpawng nga lu ai gaw, kade wa mauhpa rai nga a hka, dai gaw kade wa ngwi pyaw nga a hka!

ESAIA 16:11

Ngai gaw Moba a matu yawn hkyen ai hte madai sharung nngai, Kira Heresha a matu sharung shayawt nngai.

LUKA 2:25

Dai ten hta Simun mying ai masha langai mi Yerusalem mare e nga ai, dai wa gaw ding hpring ai hte Karai Kasang hpe hkrit hkungga nna, Israela hpe hkye hkrang la na lam myit mada ala nga ai wa rai nga ai.

YAWHAN 14:18

Ngai wa mat ai shaloi nanhte hpe jahkrai zawn ngai kau da na n rai; nanhte hpang de ngai bai sa na ring ngai.

YAWHAN 14:27

“Ngwi pyaw sim sa ai gaw ngai nanhte hpe tawn da ya ma sade ai; Nye a ngwi pyaw simsa ai nanhte hpe ngai jaw made ai, mungkan ga na ni jaw ai zawn ngai nanhte hpe jaw made ai n rai. Nanhte myit hkum ru myit, hkrit mung hkum hkrit myit.

YAWHAN 17:13

Ya gaw nang hpang de ngai wa na rai nna, nye a kabu gara ai gaw shanhte a kraw lawang ni hta hpring tup wa malu ga, ngu nna mungkan ga e ndai lam ni ngai tsun da nga nngai.

KASA 2:46

Shani shagu myit langai sha hte Nawku Htingnu hta shanhte htep lahti machyu nga nna tinang a nta ni hta myit nem ai hte kabu gara let rau sha lusha, shahpa sha ma ai.

KASA 4:32

Dai kam sham ai shawa hpawng ting gaw myit mang langai sha rai nga ma ai. Kadai mung tinang lu ai arai hpe nye a n nga ai sha shanhte yawng gaw lu ai arai hpa hpe rai tim shada da jawm garan lang ma ai.

ROMA 5:5

Dai myit mada ai lam chyawm gaw anhte hpe myit daw shangun mi ai n rai; hpa majaw nga yang anhte hpe Karai Kasang jaw da sai kumhpaw kumhpa ngu ai dai Chyoi Pra ai Wenyi e Karai Kasang a tsaw ra ai myit hpe anhte a kraw lawang hta e ru bang ya mani ai.

ROMA 8:26

Dai hte maren dai Wenyi mung anhte a gawng kya ai lam hpe karum ya na matu du sa ai; hpa majaw nga yang anhte gara hku kaning ngu akyu hpyi mai na lam n chye ga ai; dai Wenyi nan anhte a n-gup aga hte n hkawn n tsun lu ai kraw kata e madai nga ai hte anhte a matu hpyi htinglu ya mi ai.

1 KORINHTU 12:13

Dai hte maren anhte yawng gaw, Yuda ni rai ti mung, Yuda amyu masha n re ai ni rai ti mung, mayam ni rai ti mung, mayam n re ai ni rai ti mung, Wenyi langai sha hta hkalup hkam la nna hkum hkrang langai sha tai wa saga ai hte, nlang hte a myit masin hta dai Wenyi langai sha hpe hkam la saga ai.

1 KORINHTU 15:31

Hpu nau ni e ngai gaw shani shagu si hkrung si htan hte hkrum kadup nga nngai! Ngai ndai zawn tsun lu ai gaw dai Madu hta nanhte a jaw e ngai kabu gumrawng nga ai majaw re.

1 KORINHTU 3:16

Nanhte gaw Karai Kasang a nawku htingnu rai nga nna, Karai Kasang a Wenyi gaw nanhte hta e rawng nga ai hpe nanhte kaja wa chye nga myit dai!

2 KORINHTU 2:14

Rai ti mung Karai Kasang a chyeju grai kaba la nga ai; hpa majaw nga yang, shi gaw anhte hpe Hkristu hte langai sha shatai nna Hkristu a awng padang lu ai poi hta ninglaw yan hkawm ai bawng masha ni hpe zawn Karai Kasang gaw anhte hpe woi awn da mi ai. Hkristu hpe chye chyang ai machye machyang hpe manam pyaw ai bat zawn shara shagu hkan e shabra dat na matu Karai Kasang gaw anhte hpe jai lang nga mi ai.

GALATI 4:6

Ya nanhte gaw Karai Kasang a kasha ni rai nga ai hpe sakse madun na matu “Wa e, nye Wa e,” nga nna shaga chye ai shi a kasha a Wenyi hpe anhte a kraw lawang kata de shangun dat nu ai.

GALATI 5:22

Rai ti mung dai Wenyi a asi chyawm gaw, tsaw ra ai, kabu gara ai, ngwi pyaw ai, myit galu kaba ai, matsan dum ai, mai kaja ai,

EHPESU 4:4

Nanhte hpe Karai Kasang shaga la ai lam hta myit mada shara langai sha de, shaga la manit dai hte maren, hkum hkrang langai sha hte Wenyi langai sha rai nga ai.

HPILIPI 1:8

Ngai gaw Hkristu Yesu shi nan a myit masin hta rawng ai n-gaw nwai ai myit hte nanhte hpe myit dum marit nga nngai, ngu nna ngai tsun ai ga teng nga ai gaw Karai Kasang nye a sakse rai nga li ai.

HPILIPI 3:3

Matu gadoi hkam ai lam majing hpe hkam la ai ni gaw shanhte n rai, anhte she rai nga ga ai. Hpa majaw nga yang, anhte gaw Karai Kasang hpe shi a Wenyi hte nawku daw jau nna Hkristu Yesu hta langai sha tai lu ai asak hkrung lam hta kabu gumrawng ai ni rai ga ai. Anhte gaw shinggan maka kumla shadik poi ni hta n kam hpa ga ai.

KOLOSE 2:2

Shing rai ngai gun hpai shakut ai lam gaw, shanhte yawng hta nden ja ai myit hte hpring tsup nna langai hte langai a tsaw ra myit hta makyit mahkai wa ai hte shanhte gaw dai teng man ai lam hpe chye nna myit kam da lu sai ngu ai sutgan hpe hpring hpring tsup tsup hkam la lu na mara ai. Ndai lam hku nna Karai Kasang a makoi magap da ai sung htum ai lam ngu ai Hkristu hpe chye chyang wa na mara ai.

KOLOSE 3:12

Nanhte gaw Karai Kasang a masha ni rai nga myit dai rai nna, shi gaw nanhte hpe tsaw ra nna shi a matu mara lata la hkrum ai ni rai nga myit dai. Dai re ai majaw nanhte gaw n ja n hpra ai, matsan dum lama ai, myit nem ai, sumnung shingdi ai myit galu kaba ai hpe bu hpun dagraw nga mu.

HEBRE 6:18

Shing rai dai ga sadi hte dagam ai ga myu lahkawng yan gaw n mai galai mat ai baw re ai majaw Karai Kasang gaw masu ga tsun ai n rai. Dai re ai majaw shi hta shingbyi nna shim ai lam lu la ai ni ngu ai anhte gaw anhte hpe jaw ya ai myit mada shara hta ngang ngang kang kang magra noi nga na matu n-gun jaw ai lam grai wa lu la saga ai.

1 PETRU 1:2

Shi a Wenyi hta chyoi pra ai amyu masha shatai la nna, Yesu Hkristu a ga madat mara na hte shi a sai hte shachyoi shapra la na matu Kawa Karai Kasang a moi kaw nna shatawng shada da sai hte maren nanhte hpe lata la manit dai. Chyeju hte ngwi pyaw ai gaw nanhte hta hpring tsup nga malit ga law.

1 YAWHAN 3:24

Karai Kasang a hkang da ai ga hpe hkan shatup ai wa kadai rai ti mung, Karai Kasang hte langai sha rai nga ai rai nna, Karai Kasang mung dai wa hte langai sha rai nna nga nga ai. Shing rai byin ai lam hpe Karai Kasang jaw ya ai dai Wenyi a jaw e anhte chye nga ga ai.

1 YAWHAN 4:12

Karai Kasang hpe kadai mung galoi mung n mu yu ai rai ti mung anhte shada da tsaw ra nga ga yang gaw, Karai Kasang gaw anhte hte langai sha tai nna nga nga ai rai nna, shi a tsaw ra ai myit gaw anhte hta kup tsup wa lu na ra ai.

1 YAWHAN 4:16

Dai rai nna, anhte a ntsa e Karai Kasang a tsaw ra myit tawn da nga ai lam hpe anhte nan chye ga ai hte kam sham ga ai. Karai Kasang gaw tsaw ra ai myit rai nga ai; dai rai nna tsaw ra ai myit hta asak hkrung ai wa kadai rai ti mung, Karai Kasang hte langai sha tai nna nga nga ai, Karai Kasang mung shi hte langai sha tai nna nga nga ai.