Daniela 7:14 - Jinghpaw Common Language Bible 2009

¹⁴ Shi gaw ahkang aya, shagrau sha-a ai hte hkawhkam a daru magam jaw shagrau hkrum ai wa rai nna, amyu baw ni yawng a masha ni yawng mung, amyu bawsang ni hte ga amyu myu shaga ai ni yawng mung shi hpe daw jau na mara ai. Shi a ahkang aya gaw htani htana agrin nga nna, shi a mungdan htum mat na ra ai n rai.

Jinghpaw Hanson Version Bible

¹⁴ Masha amyu baw shagu hte, ga amyu myu tsun ai ni yawng, shi hpe daw jau na matu, up ai ahkang aya, hpung shingkang hte mungdan, shi hpe ap ya wu ai: shi a up hkang ai gaw n htum n wai, htani htana prat dingsa up hkang ai lam rai nga nna, shi a mungdan gaw hten byak lu ai mungdan n rai.”

Daniela 7:14 Iomraidhean Croise

SHAKAWN KUNGDAWN 103:19

Dai Madu gaw shi a tingnyang hpe sumsing lamu ntsa e, shadun da nna; shi gaw yawng mayawng a ntsa na hkawhkam wa rai nga ai.

SHAKAWN KUNGDAWN 145:13

Na a up hkang lam gaw htani htana agrin nga nna, nang gaw htani htana prat dingsa agrin nga ai hkawhkam wa rai nga ndai; Madu gaw shi a ga sadi ni hta sadi dung nga ai hte magam bungli ni yawng hta tsaw ra matsan dum ai wa rai nga ai.

SHAKAWN KUNGDAWN 146:10

Dai Madu gaw htani htana hkawhkam wa rai nga ai, Ziun e, na a Karai Kasang gaw prat mi hte prat mi up nga na ra ai. Dai Madu hpe shakawn mu!

SHAKAWN KUNGDAWN 45:6

Karai Kasang nang hpe jaw ya nit dai mungdan gaw htani htana prat dingsa agrin nga na ra ai. Nang gaw na a amyu masha ni hpe teng man ai tara hte up hkang na ra ai rai nna,

SHAKAWN KUNGDAWN 72:11

Hkawhkam ni yawng hte gaw shi a man e, dingnyawm wa na mara ai; amyu masha ni yawng hte mung shi hpe daw jau na mara ai.

SHAKAWN KUNGDAWN 72:17

Hkawhkam wa a amying hpe galoi mung n malap kau lu mu ga; shi a mying gumhkawng ai lam, jan zawn agrin nga u ga. Hkawhkam wa hpe Karai Kasang shaman chyeju jaw ya ai zawn, amyu baw ni yawng mung, Karai Kasang shanhte hpe shaman ya na matu hpyi nga mu ga.

SHAKAWN KUNGDAWN 8:6

Nang shi hpe hpan tawn da ai arai yawng mayawng a ntsa e, up hkang ai wa tai lu na, ahkang ap ya nit dai; nang gaw shi hpe hpan da ai arai yawng mayawng a ntsa e san da nna;

ESAIA 16:5

Dai hpang Dawi a matu mara langai gaw hkawhkam tai na ra ai, shi gaw amyu masha ni hpe sadi sahka hte tsaw ra myit hte up hkang na ra ai. Shi gaw ding hpring ai amu galaw na matu lawan na ra ai; teng man rap ra ai amu nga nga ai hpe shi mu na ra ai.)

ESAIA 60:12

Rai ti mung nang hpe n daw jau ai masha amyu Baw ni gaw tsep kawp shamyit kau hkrum na mara ai.

ESAIA 9:6

Anhte a matu kasha langai shangai sai! Anhte hpe shadang sha jaw mi ai! Shi gaw anhte a up hkang du tai na ra ai. Shi gaw, “Mauhpa Wa, Hpaji Daw Ai Wa, Chyahtum Chyalai N-gun Rawng Ai Karai Kasang, Htani Htana Kawa, Ngwi pyaw Sim Sa Ai A Hkawhkam Kasha,” ngu nna shamying hkrum na ra ai.

ESAIA 9:7

Shi a hkawseng daru magam n-gun gaw matut nna galu kaba wa na ra ai; shi a mungdan tut nawng ngwi pyaw sim sa na ra ai. Shi gaw Hkawhkam Dawi a hkringhtawng dagraw ai wa zawn up hkang nna, shi a daru magam n-gun gaw ding man ai hte teng man rap ra ai hta rudi nga ai rai nna, ya kaw nna jahtum ai aten du hkra agrin nga na ra ai. Chyahtum Chyalai N-gun rawng ai dai Madu gaw ndai amu yawng galaw na matu daw dan da nga sai.

Daniela 2:35

Hpri, kagam ga, magri mang, gumhpraw hte aja ni agrawp mani mat nna ginhtawng ta, chyarang pa ntsa e taw ai ga nhpu zawn tai mat nga ai. Dai gaw nbung e ahpawt kau ai n rai; ahkang ngam ai n rai. Rai ti mung dai nlung gaw bum tai wa nna lamu ga ting hpe ka-up kau nga ai.

Daniela 2:37

Madu hkawhkam wa e, nang gaw hkawhkam ni yawng hta galu kaba htum ai wa rai nga ndai. Sumsing lamu a Karai Kasang gaw nang hpe hkawseng shatai nna daru magam n-gun, hpung dagu hte arawng sadang jaw nit dai.

Daniela 2:44

Ndai mung du ni up hkang ai aten hta, sumsing lamu a Karai Kasang gaw galoi mung htum ngu n nga ai mungdan langai de da na ra ai. Dai gaw galoi mung ka-up la hkrum na ra ai n rai, rai ti mung dai gaw ndai hkawseng mungdan ni yawng hpe tsep kawp shamyit kau ai hpang e sha htani htana agrin nga na ra ai.

Daniela 3:4

ga htawn ai wa gaw, “Masha amyu baw ni, amyu bawsang ni hte ga amyu myu shaga ai ni e!

Daniela 4:3

“Karai Kasang anhte hpe madun dan ai mauhpa amu ni gaw kade wa galu kaba nga a hka! Shi galaw dan sai mauhpa lamik kumla ni kade sha hpung dagu rawng nga a hka! Karai Kasang gaw htani htana hkawhkam rai nga ai; shi gaw prat mi hte prat mi a up nga na ra ai.

Daniela 6:26

Nye a mungdan ting hta nga nga ai masha shagu hte gaw Daniela a Karai Kasang hpe hkrit kamyin ai hte hkungga lara ang nga ai ngu, ngai hkang da nngai. “Shi gaw ahkrung nga ai Karai Kasang rai nga ai, shi gaw htani htana up hkang na ra ai. Shi a mungdan galoi mung hten run mat na ra ai n rai, shi a daru magam n-gun galoi mung htum mat na ra ai n rai.

Daniela 7:18

Tsaw Htum ai Karai Kasang a amyu masha ni gaw hkawhkam daru magam n-gun hpe hkam la nna dai hpe htani htana madu la na mara ai,” ngu nna tsun wu ai.

Daniela 7:27

Ginding aga ntsa na mungdan ni yawng a daru magam n-gun hte galu kaba ai lam gaw Tsaw Htum ai Karai Kasang a amyu masha ni a lata de ap kau ai hkrum na ra ai. Shanhte a hkawhkam daru magam n-gun gaw galoi mung htum mat na ra ai n rai; Ginding aga ntsa na up hkang du ni yawng mayawng mung shi hpe daw jau ai hte shi a ga madat mara na mara ai.

OBEDIA 1:21

Yerusalem na awng padang lu ai masha ni gaw Edom hpe gasat nhtawm dai mung hpe up hkang na mara ai. Dai Madu shi nan hkawhkam tai na ra ai.”

MIHKA 4:7

Shanhte gaw lagaw hten htu ai hte dum nta hte tsan gang nga ma ai, rai ti mung ngai chyawm gaw naw ngam nga ai ni hte nnan gaw sharawt la nhtawm shanhte gaw amyu kaba tai wa na mara ai. Ngai gaw shanhte hpe Ziun Bum ntsa e dai aten kaw nna htani htana du hkra up nga na nngai,” nga nna tsun ai.

MAHTE 11:27

Nye Wa gaw arai yawng mayawng ngai hpe ap ya ni ai; Wa hta kaga, dai Kasha hpe kadai mung n chye lu ai: dai Kasha hte, dai Kasha shadan dan mayu ai ni hta kaga kadai n chye lu ai.

MAHTE 28:18

Yesu gaw sape ni hpang de sit sa wa nna, “Sumsing lamu hta e mung, ginding aga hta e mung, up hkang na ahkang nlang hte ngai hpe ap ya ni ai.

LUKA 1:33

Shi gaw Yaku a aru arat ni a ntsa e htani htana a up nga na ra ai; shi a mungdan mung htum ngu ai nga na n rai,” ngu nna shi hpe tsun wu ai.

LUKA 10:22

“Nye Wa gaw arai yawng mayawng ngai hpe ap ya ni ai, Kasha wa kadai rai nga ai hpe Wa hta kaga kadai mung n chye ai, Wa kadai re ai mung, Kasha wa hte dai Kasha e shadan dan na matu lata la ai wa hta kaga kadai mung n chye nga ai.”

YAWHAN 12:34

Shing nga ai majaw shawa masha ni gaw, “Meshia gaw htani htana asak hkrung nga na ra ai, nga nna she anhte a Tara laika hta anhte hpe tsun da mi ai. Dai rai yang, Meshia gaw sharawt da ai hkrum lu na ra ai, ngu nna nang kaning ngu tsun lu n ta? Masha Kasha dai gaw kadai wa mi rai ta?,” ngu nna shi hpe htan mu ai.

YAWHAN 3:35

Kawa gaw Kasha hpe tsaw ra wu ai rai nna ahkang aya yawng mayawng shi a lata hta ap ya nu ai.

HEBRE 12:28

Dai rai nna anhte lu la ai mungdan gaw n shamu n shamawt lu ai rai nna, anhte Karai Kasang hpe chyeju dum nga ga. Anhte gaw chyeju dum let hkrit hkungga ai myit hte Madu sharawng awng na hku Karai Kasang hpe nawku daw jau nga ga.

1 PETRU 3:22

Yesu Hkristu gaw sumsing lamu de lung mat wa nhtawm, Karai Kasang a hkra maga de anga nga ai rai nna lamu kasa ni yawng hte sumsing lamu na ahkang aya lu ai ni hte, hpung dagu rawng ai ni yawng hpe up hkang nga ai.

SHINGRAN 1:6

Shi a Kawa a magam amu hpe gun hpai lu na matu anhte hpe mungdan amyu hte hkinjawng aya jaw ya ai Yesu Hkristu kaw hpung shingkang hte daru magam ahkang aya gaw htani htana e anga nga u ga law! Amen.

SHINGRAN 11:15

Dai hpang sanit ngu na lamu kasa gaw shi a pahtau dum dat wu ai. Shaloi sumsing lamu hta e nsen kaba ngoi pru wa ai gaw, “Mungkan ga na mungdan hpe up na ahkang aya gaw, anhte a Madu Meshia a lata de rai nga sai rai nna, shi gaw htani htana prat dingsa e a up nga na sai law!,” nga nna tsun nga ai.

SHINGRAN 17:14

Shanhte gaw Sagu Kasha hpe hpyen gasat na mara ai; rai ti mung dai Sagu Kasha gaw, shi shaga la nna lata la hkrum ai, kangka re ai shi a hpang hkan nang ai ni hte rau awng padang lu na ra ai. Hpa majaw nga yang, shi gaw Madu ni a Madu, Hkawhkam ni a Hkawhkam rai nga ai,” nga nna ngai hpe tsun ai.

SHINGRAN 3:21

Ngai awng padang lu nna nye Wa a tingnyang makau e shi hte rau dung nga lu ai zawn, awng padang lu ai wa gaw nye a tingnyang makau e ngai hte rau dung nga lu na ahkang ngai jaw na we ai.