1 Juan 2:14 - Jakalteko

¹⁴ Walex acꞌto hex yin̈ Istzotiꞌ Comam Dios, caw chintzꞌibn̈etojan huneꞌ tiꞌ teyet, yuto heyohtaxa Comam ay bey yul satcan̈. Hex mame miꞌe, chintzꞌibn̈epaxtojan huneꞌ tiꞌ teyet, yuto caw heyohtaxaticꞌa Comam ayxaticꞌa yet yalan̈to maẍto chiwatxꞌi yul sat yiban̈kꞌinal tiꞌ. Hex tzehtaj, caw chintzꞌibn̈epaxtojan huneꞌ tiꞌ teyet yuto caw ay heyip heyanico Istzotiꞌ Comam Dios yin̈ heyanma. Yu huneꞌ tuꞌ xin, quexkꞌoji yin̈ naj matzwalil.

1 Juan 2:14 Iomraidhean Croise

San Juan 15:7

Tato hacn̈eticꞌa tuꞌ heyehico win̈an, machi xin checꞌayto heyijen cuybanile chiwalcanotiꞌan, kꞌanwe tzet choche hecꞌul chiakꞌlaxo teyet.

San Juan 5:38

Caw maẍto Istzotiꞌ Inmamtuꞌan yul heyanma, yuto mach cheyayto yul heyanma win̈an, wal xin haꞌ Comam Dios an̈eintijan.

San Juan 8:31

Yalni Comam Jesús tet anma Israel chahni Comam yul yanma: —Tato caw huneln̈e cheyayto yul heyanma yin̈ tzet chiwalan, yin̈ caw yeli incuywoman heyehi.

San Juan 8:37

Caw wohtajan tato heyichmam icham Abraham, yaj caw cheyoche quinhepotxꞌoꞌan, yuto mach cheyoche heyabeꞌ cuybanile chiwakꞌtiꞌan.

Efesios 6:10

Wal tinan̈ hex wuẍtaj, hex wanab, yikꞌab yip heyanma yin̈ Comam Jesucristo yuto caw aycano ishelanil yip Comam.

Filipenses 4:13

Sunil chisje wuhan, yuto haꞌ Comam Jesucristo chicolwa win̈an.

Colosenses 1:11

Caw chon̈txahlihan̈ teyin̈, haxinwal haꞌ Comam chakꞌni heyip helin̈ban heba yu huneꞌ yip Comam caw aycano yelapnoj, hac tuꞌ xin caw chexkꞌoji istecha sunil heyu, yeb caw ay henimancꞌulal.

Colosenses 3:16

Caw chiwochehan tato caw huneln̈e chucanico Istzotiꞌ Comam Jesucristo yul heyanma. Yin̈ojab caw helanil checuylecanto heba, cat hecachni heba. Bitn̈ewe isbi Comam Dios yu Salmos, himnos yeb bit chipitzcꞌati yul heyanma.

2 Timoteo 2:1

Hach caw incꞌaholtiꞌan, caw akꞌ hawip hawatxꞌenico haba yin̈ iscꞌulal iscꞌul Comam Dios chiyakꞌ jet, yuto caw hunxa je yeb Comam Jesucristo.

Hebreos 8:10

Haꞌ xin huneꞌ trato chiwakꞌan tet anma Israel yin̈ tzujanilxa tuꞌ, haꞌ ton huneꞌ tiꞌ: Chiwacojan inchejbanilan yin̈ isnabal ebnaj cat intzꞌibn̈enicojan yin̈ yanma ebnaj. Haninan xin chinocan isDiosalo ebnaj cat yoc ebnaj incon̈obojan.

1 Juan 1:1

Chintzꞌibn̈etojan huneꞌ carta tiꞌ teyet yun̈e heyohtan̈en tzet caw yelapno ye Comam Tzotiꞌ chiakꞌni cokꞌinal. Comam ayxaticꞌa yet maẍto hunu tzet ye tuꞌ chiwatxꞌi yul sat yiban̈kꞌinal tiꞌ. Wal xin han̈-caw-on̈an̈ jabehan̈ tzet caw yal Comam tuꞌ, jilnipaxicojan̈ yin̈ Comam. Nahatil jil cobahan̈ yeb Comam, cotzabnipaxojan̈ Comam. Comam chiakꞌni kꞌinale tiꞌ isye isba jetan̈, yuxin chijaco cobahan̈ jalnilojan̈. Tinan̈ xin chijalan̈ teyet ta haꞌ Comam chiakꞌni cokꞌinal mach istan̈bal. Iscꞌatan̈ Comam Dios ay Comam, yaj xin hulicꞌo yul sat yiban̈kꞌinal tiꞌ isyeni isba jet.

1 Juan 1:10

Tato chijala ta machi comul chijacoj, lan̈an jalni ta lekꞌtiꞌ Comam Dios, caw machi Istzotiꞌ Comam yin̈ janma hacaꞌ tuꞌ.

1 Juan 2:13

Hex mame miꞌe, caw chintzꞌibn̈etojan huneꞌ tiꞌ teyet, yuto caw heyohtaxa huneꞌ Comam ayxaticꞌa yet yalan̈tocano maẍto chiwatxꞌi yul sat yiban̈kꞌinal tiꞌ. Hac pax tuꞌ xin hex tzehtaj, caw chintzꞌibn̈epaxtojan huneꞌ tiꞌ teyet, yuto caw xaquexkꞌoji yin̈ naj matzwalil.

2 Juan 1:2

Caw xahan ayex wuhan, yu huneꞌ caw isyelal ayco yin̈ janma. Aycꞌo cocꞌatan̈ huneꞌ isyelal tiꞌ sunilbal tiempo.

3 Juan 1:3

Caw quintzalahan yet wabenan yalni huntekꞌan ebnaj juẍta hulicꞌoj tato caw yijem ach yin̈ iscꞌulal Comam, yebpaxo xin tzujan ach yin̈ isyelal.

Apocalipsis 2:3

Wohtajan ta caw chexecꞌyaꞌ yu ayexico yul inkꞌaban, yaj xin caw ay henimancꞌulal, mach chitibayo heyu.

Apocalipsis 2:7

Maquex cheyabe huneꞌ tiꞌ, caw akꞌwe heyanma hetxumnilo tzet chal Comam Espíritu tet ej macta ayxaco yul iskꞌab Comam Dios. Haꞌ mac chikꞌoji, chiwakꞌan sat teꞌ lobehal chiakꞌni kꞌinale islob, teꞌ ay yul yictabal isparaíso Comam Dios,” ẍi Comam.