YOSHUA 8:20 - Biblía Axweesantá Hhohho' ar Mungú 2004

²⁰ Múk Ai tana alií qaytsiít, quui kana ár i tsa/a/aán gawaá doori. Inooín nay ya'a' tsatitiyé' adór tar /akuuti iri qwát. Asma múk Israeli kudaádá' aa geeraín wa goow ay yaamaá /awaak, gaa harawarqáy.

YOSHUA 8:20 Iomraidhean Croise

IIMU/UUNGW 19:28

Inós iri qaytsiít bihhaá Sodoma nee Gomora, nee yaamu sleémeero awa ayaadá', ga/aaweek, quuír naa yaamuú wa tleer gari ár, adór ira tsa/aán, adór quuír gufteeri.

YOBU 11:20

Ala múk tlákw ilaaín i maa/uutiyá', lohduuín sleémeero awa tar gowi niri qwaariyá', harahhifor'ín ar alhhe'eesaay tari gwa'ara.»

WARA'AMI 76:5

Miguuse ana mura' hayót, inooín nari slar/amiitiyé' gu'uteero adór múk aa qaatl, nari daba' tsatiitiyé'.

ISAYA 34:10

Tlaatla/aangw nee xweeraawo asltí i baloó gwa'aká, quuirós in sihhmaamít ay alhhe'eesay wasle. Yaamu iri xaanxaay tleehhitiyá' qari sleémeero, heé baraá yaamuudár waaraáhh i kaahh kureerisleém.

YOSHUA 8:19

Mukdádá' aa nahhaat Yoshua nguwa ár lawaalarós gaa gáwtí tleés, inooín nina gaanslár ta'aainé' amór gixsár Ai, ngay hayoohiyé', ngiri da/iyé' ar asla.

YOSHUA 8:21

Yoshua nee mukose quui ngina ariyé', ngay tsaahhiyé' adór slaqwaruuseedá' aa nahhat gixsa ngira hayót, ngay da/iyé' ar asla, quui iri tsa/aán gawa. Inooín múk Ai ngway harawarqayé' tsu/utaaro.

Geehhoeemaá 18:9

Nee waawituú baraá yaamu, kudá' aa fuquus nee inós, nee kudá' nee inós diihhooa kaa al/aay, inooín tari tsuunqumiis qoomár quuír asltá inós gaa xaawuur bar kaa ár.

Geehhoeemaá 19:3

Tari malé oó', «Mungú i xirfuuti! Quui i gawaawós wa sihhmaamít ay alhhe'eesay wasle.»

HAR'OHUUSE 20:38

Ala layár taa al'axweés tla/ángw kudá' gigidiimá' nee múk Israeli a tí, bar quuír ur aga aandé' ar adór huunki i gáwtí tsa/aa/aán baraá gixsarihe,

HAR'OHUUSE 20:40

Ala qoomár huunkidár quui iwa gáwtí sihhít baraá gixsaro, múk Benyamini tay alií qaytsiít, naxés gixsa sleémeero quui gaa altinghít, i gáwtí tsa/a/aán ay doori.

HAR'OHUUSE 20:41

Múk Israeli tay warqáy, múk Benyamini tari da'ayuút, kari tsaáhh adór qwanay'ín nira hamaár.