YOSHUA 24:20 - Biblía Axweesantá Hhohho' ar Mungú 2004

²⁰ Kuungá' barnaxes AAKOÓ MUNGÚ ugwa gunqaaresé', munguaá /eetuuse kiri sagadiyusé', inós aqo nun al warqáy, nuri slahh'eemiis, nuri xooro qwaarees kitangw nuwa hhooeemáy tlehhahhiít.»

YOSHUA 24:20 Iomraidhean Croise

1 QOM'I 28:8

«Gimsé', daxta geeraá boo/oó múk Israeli sleémeero dinku'uumár AAKOÓ MUNGÚ, diirí Munguúrén iwa axamiisi aníng kuungá' nu baw, hara'ayár AAKOÓ MUNGÚ, Munguúhúng, harmagaahhaak nee aldakuutaak, as kahhó' kuungá' yaamuuká' hhoo' kiwa ala', nee kiri na/iihúng i geexeerá' as ngiwa aaliya' aluuhunge ay alhhe'eesay.»

1 QOM'I 28:9

Daudi Solomon guri báy, «Kuúng garmaaeé' Solomon, Munguú baabuúwók xueek, inós sagadiyuuseek ar muunaáwók sleémeero nee ar tsáp. Asma AAKOÓ MUNGÚ inslawoó muu sleémeero gun tsee/aarín, nee umuúqo gár ta qoomeemesi gan tsatsahhán. Barnaxes kuúng inós ugwa leeléhh u sleér, ala bar ugwa sí', inós un geexáy ay alhhe'eesay wasle.

2 QOM'I 15:2

Inós iri tláy waawutmo Asa guri al'áy gway báy, «Aá waawutmo Asa, nee muu sleémeero oo Yuda nee oo Benyaminiwo, aníng iiárií qaasaré', AAKOÓ MUNGÚ a dinkwa nee kuungá', barnaxes kuungá' a dinkwa nee inós. Kuungá' bura leelehhé' u sleerá', ala bura geexeeré', inós sleeme kuungá' nu geexáy.

ESRA 8:22

Asma aníng ana muruút waawutmo nguwa firiim slaqwaruuseero nee kudá' faras ngu i tsa/aamá', as tiwa xuna' dír wakuuseero, asma atén waawutmo una bawaán, «Hhooeemaá Munguúrén i gawaá kudá' ngu leelehhiitá', nee /uuruú xarasleemaawós i gawaá mukdá' sleémeero inós gwa geexay.»

WARA'AMI 89:31

barnaxes kaahir'eé' ngaa waaqaaiyé', nee hara'ayar'eé' ngay eehari'iiká,

ISAYA 1:28

Ala dee/aanuuse, nee tlakuuseero kin dinkwaárí hhaamiis, nee kudá' AAKOÓ MUNGÚ gixaawá' ki qwaarees.

ISAYA 63:10

Ala inooín tana dee/aanuút, qeeruuwós kudá' hhoohhoó' nguna gurhaamír ar ayé'. Gawaá adoorihe inós iri warqáy tari wakusmooín, inósuú kilá' iri amor'ín i muxuút.

YEREMIA 17:13

AAKOÓ MUNGÚ kuúng a harahhifór múk Israeli, kudá' kuúng ugwa si'iye' sleémeero ki mureekees. Kudá' kuúng ugwa geexaye' a adór umér taa gooín baraá hhape. Asma kuúnguú AAKOÓ MUNGÚ una si'iyé', kuduú kutltá ma'aá slafiingw.

ESEKIELI 18:24

«Ala heé ganaá' barnaxes gan'amuuwós gwaa máy, tlehhmi'iidá' aníng i buhhtimiisá', kudá' heé tlaákw i tlehhaahhiti, giri tleéhh, xáy, heewí iqo tsuwa sláfi? Aasla'áy, tlehhmi'iidá' sleémeero awa hho' aa tlehhahhiít geeraawo ki baloó inslayká, inós aqo in gwaa' as dee/anuuwós nee tlakweemaadá' aa tleéhh.

Tlehhema'aá ya/Abuuse 7:42

Mungú iri gurhaamuút, giri geexáy as murslaaqatuuín nguwa xirfayeemisiya', adoodá' kara gooín baraá kitaábuú aaruuseero tawa káh, ‹Kuungá' múk Israeli, hikwaadá' taa tsu/é' nee ilahhooadár muruú ta tsu/i tidá' taa hanmisé' kureeridá' mibeeri tsiyáhh baraá xaanxáy wa ale, ngina aníng i hanmisí'i?

DABE 4:25

«Barnaxes hota iga iimu/uundé' baraá yaamuudae, na/ii kiri laqwalé', nee nángw naangw, tari dimadiindé', tari hhitirumité', slaqsi'i kiri dakutá' as tawa Munguúhúng, muruú tlákw kuri tlehhitá' dír geeraá AAKOÓ MUNGÚ, Munguúhúng, nee kuri buhhtisé',

DABE 4:26

aníng laarí Munguú doori nee yaamu un ateét as tawa lamabu'usmo daanduuhunge, aníng kuungá' nun babaw, kuungá' a hhaandá' wa'aá wák ar ale baraá yaamuudá' ta ala'a amoodár gayuú yaaér Yordani. Kuungá' a tleeresaaká amoodae, aqo tundun ló'wa hhaamiis.

Ebrania 10:38

Ala hee'eé' kudá' gan'amkú koóm, inós gár ir slafi a haratlintaao. Ala barnaxes aa alií kií/, muunaáeé' i qwalaala/iiká as inós.»

YOSHUA 24:21

Ala inooín Yoshua nguri bayé', «Aasla'áy no. Atén aqo AAKOÓ MUNGÚ un sagadiyusaán.»

1 SAMUELI 12:15

Ala barnaxes afór AAKOÓ MUNGÚ aga iiárií qasi'iiká, ala aqo hara'ayár AAKOÓ MUNGÚ ana sié', daqaní dákw AAKOÓ MUNGÚ i gawaahúng, kuungá' nee waawutmohunge.

1 SAMUELI 12:25

Ala bar kumitá' tlehhma'aá tlakwe, a hhaandá' kuungá' nee waawutmoohunge.»