YEREMIA 50:44 - Biblía Axweesantá Hhohho' ar Mungú 2004

⁴⁴ Ga/aaweek, adoodá' diraangw nir baraá darmuú Yordanír wa /akuuti ay baraá tla/ángw daqtá bee/aangw, an adoodá' aníng múk Babuloni ngur guus baraá yaamuuín wa ale. Aníng geeraharusmooeé' oo ni slaa' un tsawaár, nee nguri qaás. Asma heé adór aníng a heemá? Heé aníng i sakwasleemuút a heemá? De'eemusmoó aníng i tlampa'aás a gaalá?

YEREMIA 50:44 Iomraidhean Croise

WARA'AMI 89:6

Xáy, a heemá heé nee AAKOÓ MUNGÚ qoomá' gawaá dooriwo? I kaahh tam oo wák baraá dooriwo oo nee kuúng qoomá'.

WARA'AMI 89:8

AAKOÓ MUNGÚ Aleesleemusámo, a heemá oo /uuruú koóm adór kuúng wa ale? Kuúng a inkihhimuú koón dír umuú gaaro.

TI'INAANGW 15:11

Aá AAKOÓ MUNGÚ, Mungú adór kuúng baraá munguiiwo a gaalá? Baraá hhohhoarto oo xirfuú koóm adór kuúng a gaalá? Kudá' xirfuuwós ta ilaiwawa/i tlehhma'aá waa/oo/amo gi tlehhiít.

ISAYA 40:18

Xáy, Mungú nee heemá ki slaqamisi? Xáy heé kur qoomes a heemá?

ISAYA 40:25

Kudá' Hhoohhoó' i kaahi, Xáy, heé ta aníngár qoomesa' a heemá? Xáy, heé adór aníng i deéro?

ISAYA 41:25

Hee ngwa bihhaá /iikú wa duúk, inós ni hardah, inós ngwaa tsawaár bihhaá da/aáw wa ale, inós umuueé' gu oo', waawitá gun yaamií harakalaa/ adór baa/í adór tleeusmo tleeirós ngir lufu/aa/in.

ISAYA 43:10

AAKOÓ MUNGÚ i kaahi, «Kuungá' a lamabu'uuser'eé', nee sagadiyuuser'eé' ar naa tsawaár, as kahhó' aníng iwa xua' nee iwa haratlintia', nee kawa tsahha' adór aníng tar Mungú. Mungú geeraaeé' gaa haar i kaahh, nee sleeme oo ta aluueé' wa tleehhi i kaahh.

ISAYA 46:11

Aníng deelaqaasi an iimír da/aáwí ateét. Heé sufueé' gu xuú' un amór yaamaá saáwá huúw. Tí aníng aga oó' nee an boo/eés, tidá' naa qoomeés aqo an tleéhh.

ISAYA 46:9

Muruudá' aáng aa tleehharuut inslawaak. Asma aníng a Mungú, Munguú hatlá' i kaahh. Aníng a Mungú, Munguú adór aníng i kaahh.

ISAYA 48:14

Sleémeero dinkwa i burumburitaak iia qaasaak. Heé baraá tla/angwhunge kaangwí gwaa alki/iit a heemá? AAKOÓ MUNGÚ Koreshi gu slaa', inós tidá' Mungú i slai ga boo/ees daanduú Babuloniro, inós múk Kaldayo gu i haratláy.

YEREMIA 12:5

AAKOÓ MUNGÚ i kaahi, «Yeremía, kuúng qwaatlór nee muu ana harslaaqát, adór kuúng nee faras tar qwatla'? Kuúng bar an huuhu'uún dír yaamaá hhoohhooe, adór kuúng qwaatlo kar aleesleer baraá darmuú Yordaniro?

YEREMIA 25:38

AAKOÓ MUNGÚ mukós gwa tawo geexáy, adór diraangw mar'irós ngir tawo gixaaxay. Yaamuuín naa deewaaiyé' asma slaqwarár mukdá' gi baramaanuús, nee as buhhtaá xaraaslá' awa AAKOÓ MUNGÚ.»

YEREMIA 30:21

Geeraharusmooín kun baraá tla/angw'ín wa sláy, waawutmooín ku sláy baraaine, inós aníng u dir'eénií tseeweés, inós niri tseewúy. Asma heé dir'eénií tseewúw ar /uuruuwós tumu wák i kaahh. Anuú AAKOÓ MUNGÚ tí ngina oó'.

YEREMIA 50:15

Tsee'é' bihhe sleémeerowo, daxta Babuloni aa ya/a/aán, maraywós kudá' uren naa huuhu'uné', koo/irós ka fee/. Asma AAKOÓ MUNGÚ li/aay gun buu' daanduú Babuloniro. Gimsé' li/aay buaak. Adoodá' inós aa tlehhaahhít tay tlehhe'.

SEKARIA 11:3

Tsuunqusmoó de'eemuuse iiárií qaasaak, asma xirfuuín kwa hhitín, afór /orootlór diraangw iiárií qaasaak, darmuú yaaér Yordani kwaa hhitín.

FAARO 16:5

Kora nee mukós kudá' gwaa eehari giri báy, «Matlo matlaatle, AAKOÓ MUNGÚ heewós ngu laqán, nee axáy a heemá oo hhoohhoó', nee a heemá oo i pa/aángwí haniisi oo inós gu i tseewúw, kudá' aa tsawaár an kudá' gu i tseewúw.