YEREMIA 32:20 - Biblía Axweesantá Hhohho' ar Mungú 2004

²⁰ Kuúng aange layu nee muruú waa/oo/amo una tléhh baraá yaamaá Misriro, tay laarí tlehhtuuwo a kumít baraá tla/ángw múk Israeliwo, nee baraá múk xoordaá hatlae, adoorí kuúng ugwa iia tleerés.

YEREMIA 32:20 Iomraidhean Croise

2 SAMUELI 7:23

Slám baraá yaamuwo muu a gaalá oo ta slaqasi nee mukók oo Israeli? Kudá' Munguúín aa ba/amisár áy as tawa mukós. Muruú urén oo waa/oo/amo guri tleéhh baraá yaamuuwose dír geeraá mukose, umuuwós iri xu'utiít. Giri ba/amisár áy baraá Misri as inós, xoordu giri geeraaín wa guús nee mungui'ine.

1 QOM'I 17:21

Xoorór adór mukók oo Israeli baraá yaamuwo a gaalá, ar Mungú aa ba/amisár áy as tawa mukós? Kuúng umuuwók una iia tleerés, muruú urén nee oo dae tlaáq kuwa tléhh, qoomár xoordu kiwa geeraá mukók wa tlatlahhás, kudá' taa ba/amís baraá yaamaá Misrír wa ale.

NEHEMIA 9:10

Layu nee muruú waa/oo/amoro ina tlehhít dír Farao nee sagadiyuuseerós nee dír múk yaamuudá' sleémeero, asma kuúng ana xú' adór bariiseerén ngira baramaanuusiyé'. Kuúng umuuwók kuri iia tleerés ay laarí.

NEHEMIA 9:11

Tlawi ana tla/aa qasís dír ilaaín wa aleeró, inooín tay waraáhh ar baraá tla/ángw tlawi ar yaamaá kaahaar. Ala múk Misri kudá' gaa eehar kiri kwáhh adór tlaa/anoó iiloó' i baraá ma'aá yaariir.

WARA'AMI 135:9

Layu gina tlehhiít nee muruú waa/oo/amór koóm baraá tla/ángw yaamaá Misri wa ale, gawaá Farao nee sagadiyuuseerós sleémeero.

TI'INAANGW 10:2

As kahhó' kuungá' na/iihúng kiwa kaangwí beera', nee na/aá nangwhúng, adór aníng múk Misri ngura niqís nee layuudá' naa baraá tla/angw'ín wa tleéhh, as kahhó' kawa xua' adór aníng tar AAKOÓ MUNGÚ.»

TI'INAANGW 3:20

Aníng dakw'eé' un gáwtí tleés, yaamaá Misri ngiri slaáhh ar waa/oo/amor'eé' sleémeero tidá' ni tleéhh tla/angw'ín wa alé, daqaní waawutmo nuri ya/ámár i haniis tawa tleera'.

TI'INAANGW 7:3

Ala aníng muunuú Farao un gawdeés, tam tlehhma'aá waa/oo/amo nee layaá yaariir i tleehha baraá yaamaá Misriro.

TI'INAANGW 9:16

Ala aníng nuna slafíngwí máw as /uuruueé' nguwa laqaam, nee umuueé' kuwa alki/iiti baraá yaamu sleémeerowo.

ISAYA 63:12

Inós handá' ar /uuruuwose tlehhma'aá waa/oo/amo gina tleéhh ar dákw Mose. Kudá' tlawi gaa dír geeraaín wa tla/a tsaat as tiwa umuú alhhe'eesay wásl i slay.

ISAYA 63:14

Adór hikwaá taa huúw baraá qawtantá baraá xatso. An adoodá' qeeruú AAKOÓ MUNGÚ mukós ngura hungu/uús. An adoodá' kuúng mukók kura geerahát nee umuuwók xirif gway sláy.»

YEREMIA 13:11

Adoodá' inqwaarír siinootaay ira naga'át baraá afeetlaá hee, an adór múk Israeli nee oo Yuda ngaa laáq, ina gawaaeé' naga'aás, as inooín tawa muk'eé' tleehhiti, as niwa umuueér xu'utiitiya', nee iwa xirfayeemisiya' nee iwa diidi'iimisiya'. Ala inooín aníng iga iiárií qaasi'iiká.› Anuú AAKOÓ MUNGÚ tí ngina oó'.»

DANIELI 6:28

Naagáy Danieli diihhooa gana sláy de'emaá waawutmo Dariowo nee sleeme de'emaá waawutmo Koreshi, heé Persiawo.

DANIELI 9:15

«Hám daxta, aá Aakoó Munguúrén, kuúngudá' mukók ngwaa dux baraá yaamaá Misrír wa ale, umuuwók kway iia tleerés ay laarí. Hamí an kaahaan atén aga dakusaán, tlakweema iga tleehhaán.

Tlehhema'aá ya/Abuuse 7:36

Kwí an kudá' inooín nga duux, layu gina tlehhiít nee muruú waa/oo/amór koóm baraá yaamaá Misriro, nee baraá tlawtá Shamú wa ale, nee baraá xaanxaay, ar har kureeri mibeeri tsiyáhh.

DABE 11:3

nee layuudá' nee waa/oo/amoodae tidá' aa baraá yaamaá Misrír wa tleéhh dír waawutmo Farao oo Misri nee yaamuuwós sleémeero.

DABE 4:34

Xáy, kuungá' mungú taa axasé' i deéro oo mukós gwaa leehh baraá xoorór hatlá' i ale, adoodá' AAKOÓ MUNGÚ, Munguúhúng aa tleéhh ar loohír iiara'at, nee layu nee slaqsa'aá waa/oo/amo, ar slaqwara, laqaá ar /uuruuwós kudá' úr, muruú yaariír guri tleéhh, kudá' taa aandé' ilahunge baraá yaamaá Misriro.

DABE 6:22

Atén ilaarén awa kilae laydu nee muruú waa/oo/amo nee oo dae tlaáq una araán, qoomár AAKOÓ MUNGÚ nguwa tleéhh dír múk Misri, dír waawutmooín nee geeraharuuseerós.

DABE 7:19

Inslawaak muxtaadá' tlakw ilahunge taa aandé', muruú waa/oo/amo nee layudá' uren, nee /uuruú úr nee aleesleemuú úr kudá' AAKOÓ MUNGÚ, Munguúhúng ira gadiyuús qoomár nuwa baraá yaamaá Misrír wa tuú/. Adoorí an adoodá' i tleehhi dír mukdá' kuungá' ta da'ayumiita'.