YEREMIA 3:17 - Biblía Axweesantá Hhohho' ar Mungú 2004

¹⁷ Nee qoomaadae gixsár Yerusalemu ka bay, ‹Kitángw aleesleemu oo AAKOÓ MUNGÚ.› Nee xoordu sleémeero niri burumburitiyá' dír geeraaeé'. Adoodá' tlaakw muner'ine ta slai ngi eehariaaká.

YEREMIA 3:17 Iomraidhean Croise

IIMU/UUNGW 8:21

AAKOÓ MUNGÚ slaahhareraá tsuuá' giri sláy awa ngwa sla'atisiye'. AAKOÓ MUNGÚ iri baraá muunaáwós i oó', «Yaamu i baloó lu'usaaká alaá adoorihe asma muu, asma inslawoó hee ku tlákw iimír iimu/uungose. Aníng muruú slaáf sleémeero u malé qwaareesaaká baloó alé, ar adoodá' ngira tleéhh.

1 WAAWITÁ 8:41

«Tam hoomo sleeme oo naa xay amór yaamaá saawá' wa alé, oo heé Israeliwooká as umuuwók,

WARA'AMI 102:23

AAKOÓ MUNGÚ /uuruueé' gwa /aareés. Deelór slafingw'eé' gaa hartsaát.

WARA'AMI 78:8

Eeít, matawa adór baabi'ii'ín tleehhiít, qartá sagegawden nee ar aa dee/aanut, qartá baraá muner'ine Mungú gu gaárí xuaaká, ta inkihhimuú konká amór Munguhe.

WARA'AMI 87:3

Kiíng gixsár Mungú, Mungú kiíng i xirfayeemiis.

ISAYA 26:8

Aá AAKOÓ MUNGÚ, baraá lohdaá sakwasleemaroge atén kuúng un daamaán, muneerén gár i ló'wa sla' a inslaslángw umuuwók.

ISAYA 56:6

Nee mukduú dahaaye naa haragwaa' dír AAKOÓ MUNGÚ, nguwa sagadiyuusiya', nee umuú AAKOÓ MUNGÚ nguwa slaiya' kudá' sleémeero deelór Sabaáto ngaa oohiye' nee ngi meetagamisa'aaká, nee alqador'eé' nga oohiye'.

ISAYA 59:19

AAKOÓ MUNGÚ kuri ilaiwawaa/ bihhaá /uwawo, bihhaá da/awe xirfuuwós kuri tsaahh. Asma inós ni hardah adór yaaér hi'iit ar gaanslaay. Yaaér taa dúk nee fur'ár AAKOÓ MUNGÚ.

ISAYA 6:1

Kurkú waawutmo Usia iwa gwaá', aníng Aako una ár aa iwiít gawaá kitángw waawuti'iima, kudá' gáwtí dirií' nee kwaa tleesa hhe'eés, pasleemaá inqwaarirós guruú doó Mungú nguna tuuntukiyé'.

ISAYA 66:1

AAKOÓ MUNGÚ i kaahi, «Doori an kitangw'eé' oo waawuti'iima, nee yaamu an kitángw ya'aaeé' ngi qamiim. Xáy aníng doó kuungá' i tlehha' a doó adoomá? Xáy dír ni hungu/uus a dír adoomá?»

ISAYA 66:18

Asma aníng tlehhmi'ii'ín i xuú' nee inslaway'ine, aníng xoordu sleémeero nee tsifrír dimbadimbé an burumbuúr. Inooín niri hardihiyá' xirfueé' nguri ariyá'.

ISAYA 66:20

Hhaeehúng sleémeero kingay ki/is baraá xoordaá hatlá' wa ale adór ilahhooár anuú AAKOÓ MUNGÚ. Kingin ki/is ar faras, nee ar gaardu, nee ar /aampu, nee ar wayshama' nee ar angamiadu ay baraá gixsár Yerusalemu dír tloomar'eé' tidá' hhoohhoo'. Inooín kingi huuw, adór múk Israeli ilahhooár balaangw kingir haahuwi baraá xooslmoó hhoohhoó ar ale ay dír dooeé' anuú AAKOÓ MUNGÚ.

YEREMIA 11:8

Tam adoorihe inooín aníng iga iialooeesi'iiká, laqaá iga iiárií qaasi'iiká, ala nina ak buhhiyé' niwa sagagawdúr hootiya'. Gawaá adoorihe aníng inooín in slaáhh ar adór axweesanayduú alqado naa dir'ín i hara'ayiím, kudá' inooín naa si'iyé'.»

YEREMIA 12:15

Alaá ngiwa hingemiís in malé gurtláw, umuú xoorooro an ki/ís dirós nee baraá yaamuuwós.

YEREMIA 12:16

Alaá kaangwí bira waaraáhh, inooín barnaxes alhotaarír muk'eé' kaa intsatsaáhh ar muunuú ló', nee bar lo'o ngaa umuueér /ayiyé' tawa kaahi, ‹Ar adoodá' AAKOÓ MUNGÚ ir hotaatina.› Adoodá' aáng muk'eé' ngura intsaahhatisiyé' lo'o ngiwa /ayiya' ar mungú Ba'ali, daqaní inooín tari hoot baraá tla/ángw muk'eene.

YEREMIA 14:21

Atén miti aahhaar as daanduú kuúng kilók. Kitaangók kuduú xirif mu mureekeesaar, inslaweek alqadoodá' taa qás dirén i aleeró.

YEREMIA 16:12

Kuungá' tlakweema ina tlehhé' ta baabi'ihunge, asma ga/aawaak, umuú heewo dirhunge ku saga gawít, nee ku inslaway tlákw, tam aníng i iiárií qamiinda'aaká.

YEREMIA 16:19

Aá AAKOÓ MUNGÚ, kuúng an /uuruueé', nee koo/ir'eé' ar gawit, kuúng an dír guway'eé' qoomár slahh'amuwo! Xoordaá badu sleémeero awa yaamu nin amoorók i hardihiyá' tawa kaahi, «Baabi'iirén gár taa aál i káhh, aqo har munguaá lama, muruú tawo oo slaasláwár koomaaká.

YEREMIA 17:12

Kitángw xirif iimír iimu/uungo i gáwtí dirii', an dír Doó Mungú i dirii'i.

YEREMIA 18:12

Ala inooín i kaahiya', ‹Tisíng a tawo. Adoorén tidá' ta sla'aan an eeharaán, nee umuú heewo in hoot ar adór aa ár baraá muunaáwós kudá' tlaakwe.› »

YEREMIA 3:19

Aníng ngiwa xuu' geeraawo, kuúng un adór na/ay'eé' tleéhh, yaamaá sla'atimiisá' ngiri kuúngií haniís, aalír ló'wa hhoohhoo' baraá xoorduuwo, ngiwa xuu' geeraawo kuúng in baabuúwógár atét, nee kuúng in baloó meeraaká eeharto.

YEREMIA 31:23

AAKOÓ MUNGÚ Aleesleemusmo, Munguú Israeli i kaahi, «Qoomár múk Yuda bura diihhooárí ki/ís, inooín baraá yaamaá Yudawo nee gixsadaá Yudawo tari malé ooi, ‹AAKOÓ MUNGÚ nu tsuuqi, aá yaamuloouusér hota ganaa', i tsuuqi kiíng tloomár hhoohhoo'.›

YEREMIA 33:9

Gixsarí dir'eene tari gixsár qwal/uú huwahuuw nee ilaiwa/ame nee xirif dír geeraá xoordu sleémeero awa yaamuwo, kudá' kaangwí ngu axaasá' oo hhooeemaadá' naa dír múk Yerusalemúr i haniís. Inooín tari da'ayuut nee tari daaraax as kaangwí.»

YEREMIA 4:2

Barnaxes lo'o aga /ák ar looeema nee ar sakwasleemár ganaa' nee ar hotaá ganaa'á', tari ó', ‹Ar adór AAKOÓ MUNGÚ ir hotaatina,› daqaní xoordu tsuuqa ngiri dir'eé' wa slayá', tari xirfayeemisiyá' as aníng.»

YEREMIA 7:24

Ala inooín aníng iga ilaiwa/i'iiká laqaá axweesante'eé' nga iiárií qaasi'iiká. Inooín nina hootiyé' ar adoodá' sager'ine i slaiya', nee muner'ín tidá' gawden ngina eehariyé', inooín nina alií ki/iyé' kitángw tawa geerií kumiiti hhooeema tlehhtuwo.

YEREMIA 9:14

Ala inooín muner'ín ngina gawdeesiyé' nee Ba'ali nguri eehariyé' adoodá' kira intsaahhatís nee baabi'ii'ín.› »

ESEKIELI 1:26

Gawaá daanduú gaarihe gár adór slaqsoó kitángw waawuti'iima ana ár, kalaywós a adór kuduú yakútír sirboo/, slaqsoó adór hee aa gawaadá' i iwiít.

ESEKIELI 43:7

Inós iri báy, «Heewí, diirí an didár kitangw'eé' oo waawuti'iima, an dír tsa/aá ya'aaeé' ngay qamaamiim. An hoót baraá tla/ángw múk Israeli wa ale ay alhhe'eesay wasle. Nee múk Israeli aníng i meetagaasiaaká, inooín awa kilá', laqaá waawitaáín, as slaqsi'iidaá munguaá hatlá' ngiwa haratlintatii'iya', laqaá waawitaáín kudaá qaatl kuwa inslaslay.

ESEKIELI 48:35

Tlenángw koo/irí sleémeero bihhe tsiyahhaawo a miíta kume gweleél. Umuú gixsa iimír hamí ku báy, ‹AAKOÓ MUNGÚ i diirí dirii'.› »

SEKARIA 2:11

«Nee de'emadae xoordaá yaariir i haragwaaiyá' dír anuú AAKOÓ MUNGÚ, inooín tari muk'eé, aníng nee inooín tari alhootaán.» Kuungá' kay tsahhá' adór aníng tira ya/aáw amorhúng nee AAKOÓ MUNGÚ Aleesleemusmo.

SEKARIA 8:8

Aníng inooín ngiri huúw, tawa hotaá ay tla/ángw Yerusalemu, inooín tari muk'eé', aníng tari Munguúín, ngiri geerahaár ar inkihhimu nee hotaá ganaa'á'.»

FAARO 15:39

Afuuntluraywí qoomár bura aandé', kuungá' nu inslawtamisi, hara'ayár AAKOÓ MUNGÚ sleémeero, nee nee adoodá' i kat ka tlehhá' as kuungá' ilaatleerír munerhúng ma eeharaharaara', nee muruú ilaahunge ta ara'aandá'.

Rumi 1:21

Inooín tam Mungú ngwa tsaahhi'i, ala inooín ngwa xirfayeesi'iiká tawa Mungú, nee slám ngwa sluufmiisi'iiká. Ala inslaway'ín iri daktu'uút, nee muner'ín tidá' sagalooár koomaaká iri ak gíp.

Rumi 6:14

Asma kuungá' tlakweema nu aleeslay'aaká nuwa sa waawuti'ina'. Asma kuungá' dír tay dir'a' a baraá waawuti'iimár hara'ayarooká, ala kuungá' a baraá waawuti'iimár gurtleemu.

Galatia 4:26

Ala /ameenidár hatlá' an adór gixsár Yerusalemu tidár gawaá doorí dirii'. Inós an lawaalo'oorooká, nee an aayoorén.

DABE 29:29

«Muruú naaqo oo AAKOÓ MUNGÚ, Munguúrén, ala muruudá' taa geehhooatís a koorén nee na/iirén ay alhhe'eesay wasle, as axweesanoó dabeerí kuwa harmagahhaan.»

HAR'OHUUSE 2:19

Ala qoomár har'ohusmoodá' bira gwaá', inooín nin alií ki/iyá', tlakweema ngin male tleehhiyá', baabi'ii'ín ba/a, munguaá hatlá' ngin eehariyé' nee ngin sagadiyuusiyá', nee ngin i tumbarara'amiitiyá'. Tlehhmi'ii'ín kudá' tlakw nga mayi'iiká, laqaá tam saga gawdeemaaín nga mayi'iiká sleeme.