YEREMIA 23:22 - Biblía Axweesantá Hhohho' ar Mungú 2004

²² Inooín geeraawo bar kwasleemar'eé' ngaa aye', inooín geeraawo axweesante'eé' ngaa dahareemisiyé' dír muk'eé'. Geeraawo muk'eé' kunga ki/ís baraá loohidá' tlaakwe, nee geeraawo kunga duúx baraá tlehhmi'iidá' tlakwe.»

YEREMIA 23:22 Iomraidhean Croise

YEREMIA 23:14

Ala baraá aaruusér Yerusalemuro xisluú dae tlaáq ugwa ár. Inooín in fuquusiyá' nee i /aysenaá tlaaqiyá', mukdaádá' tlakweemaá tlehhiít ngun muunií qaminá', as adoorí heé tlakweemaá mamáw i kaahh. Inooín sleémeero dir'eene an adór múk Sodoma, yaamuloouuser'ín a múk tlákw adór múk Gomora.»

YEREMIA 23:18

Dír aaruuseerihe aarusmoó aa daqay dír kwasleemár Mungú gaálaay? Oo axweesantós gaa axaas nee gari tsaáhh? Laqaá oo axweesantós gaa iiárií qaas?

YEREMIA 25:5

Tunduna babáy, ‹Umuú heewo tlehhimi'iiwós kudá' slasla/aren nee kudá' tlakw ngi may, as daqaní kuungá' tawa hota' baraá yaamuudá' AAKOÓ MUNGÚ naa kuungií haniís, nee baabi'iihúng, iimír aáng wa alé, as kiwa ala' kureerisleém.

YEREMIA 35:15

Umuú daqto nuna sagadiyuuser'eé' ya/abiít ar aaruuse, umuú daqto ngina ya/abiít, niwa káh, ‹Umuú heewo tlehhmi'iiwós kudá' tlakw ngi may, tlehhmi'iiwós ngi qwatsi, nee slaqsa'aá hatlá' munguaá eeharto nee sluufmisuuwo ngi may. Adoorí bara tlehhé', a hotá' baraá yaamuudá' naa baabi'iihúng i haniís.› Kár ala kuungá' iia aga qasi'iiká, laqaá tidá' naa káh aga iialooeesi'iiká.

YEREMIA 36:3

Doóqa múk Yuda amotlakweedá' ni dir'ín i tleehhár wa slaa' ka axaas, as umuú heewo tlakweemaawós ngiwa may as kahhó' án dakuúsar'ín nee tlakweemaine ngiwa gurtlaw.»

YEREMIA 9:12

Heé sagaloó' i deéro oo muruuwí tsaahharo gu aleesláw? Heé AAKOÓ MUNGÚ aa i axweés a heemá as kaangwí nguwa alki/iiti dír múk hatlá'? Ahaá waáy, gár yaamu nisa adoorír gwaaiyé', niri deewaiyé' tam gár baraadár waraahh iri káhh?

ESEKIELI 13:22

«Kuungá' múk hota ganaá' ugwa daba' tlaqé' ar lameemoohúng, oo aníng naa diqiya' tsatiiká, nee múk tlákw kuri /uurií hanisé', tlakweema tlehhtuuwo tari kumiít, nee slafingw'ín kuri ba/amisiiká.

ESEKIELI 13:5

Inooín wa/aameedá' aa fee/it baraá koo/iro nga xun'iiká, laqaá koo/ír /aben ngi tlehhitiaaká as múk Israeli nguwa /is qoomár slaqwaraaro, baalaadá' anuú AAKOÓ MUNGÚ naa qoomeesi.

ESEKIELI 18:30

«Gawaá adoorihe, anuú Aakoó MUNGÚ kuungaá múk Israeli, nun sakwasleemuút. Umuú heewo un sakwasleemuút ar harqoomoó tlehhmi'iiwós. Hhu'uu'umé' nee tlakweema tlehhtuuwo mawaak, tlakweemaahúng munduwa hhaamiisiyé'.

ESEKIELI 2:7

Kuúng ki axweesante'eé' beér, tam ka axaás, laqaá tam ka axasiiká, asma inooín a múk aa dee/anuut.

ESEKIELI 3:17

«Heewí, aníng kuúng ugwa xuumusmoó múk Israelír wa qaás. Aníng gaa birnga oó' dirók, kuúng mukwí ku naanáq kitangw'eé' wa aleeró.

AMOS 3:7

Ar tsuuwa ló', Aakoó MUNGÚ gaa ga tawo tleehhiiká, bar naaqoorós ngaa geehhooeesiiká dír sagadiyuuseerós tidár aaruuse.

SEKARIA 1:4

Kuungá' ma adór baabi'iihúng tleehhitaara', kudá' aaruuseedár aáng aa beér, lohduuhúng kudá' tlakw mawaak nee tlehhmi'iihúng kudá' tlakwe.› Ala naa axasi'iiká, tam anuú AAKOÓ MUNGÚ iga ilaiwa/i'iiká.

MALAKI 2:6

Hara'ayár ló' i baraá afkós, tam al/ayma i káhh baraá afkose. Ina hi'iimiít dinkwa nee aníng ar wayda nee gan'amu, nee awa yaariir nay warqayé', tlakweema ngay mayé'.

Tlehhema'aá ya/Abuuse 20:27

Asma aníng adoodá' sleémeero Mungú i slai dirhúngí alki/iituuwo ngaa mawiiká.

1 Tesalonike 5:6

Gawaá adoorihe atén gár tiwa hariím masók an guanaaká adoodár múk hatlá' sleémeero wa ale, ala masók an dalaa'aán nee múk qoomoó koóm.